¹ Questa lescha ha l'intent da cumbatter cunter l'utilisaziun abusiva d'armas, da parts d'armas, d'accessoris d'armas e d'elements da muniziun.

² Ella regla l'acquist, l'apport en il territori svizzer, l'export, la conservaziun, il possess, il purtar, il transport, l'intermediaziun, la producziun da ed il commerzi cun:

a.

armas, parts essenzialas d'armas u parts d'armas construidas spezialmain ed accessoris d'armas;

b.

muniziun ed elements da muniziun.

³ Plinavant ha ella l'intent d'impedir ch'i vegnian purtads abusivamain objects privlus.

¹ Questa lescha na vala betg per l'armada, per il Servetsch d'infurmaziun da la Confederaziun e per las autoritads da duana e da polizia. Cun excepziun dals artitgels 32a^bis, 32c e 32j na vala ella er betg per las administraziuns militaras.⁶

² Per armas anticas valan mo ils artitgels 27 e 28 sco er las disposiziuns penalas correspundentas da questa lescha. Sco armas anticas valan armas da fieu producidas avant l'onn 1870 sco er armas da culpir, armas da piz ed autras armas producidas avant l'onn 1900.

³ Las disposiziuns da la legislaziun federala da chatscha e da militar restan resalvadas.

Il dretg d'acquistar, da posseder e da purtar armas è garantì en il rom da questa lescha.

¹ Sco armas valan:

a.

utensils, cun ils quals ins po sajettar projectils cun agid da chargias propulsivas ed ils quals ina suletta persuna po purtar e manipular, u objects che pon vegnir transfurmads en tals utensils (armas da fieu);

b.

utensils ch'èn concepids per donnegiar duraivlamain la sanadad d'umans, tras quai ch'i vegnan squittadas u vapurisadas substanzas;

c.

cuntels, dals quals la loma po vegnir liberada mo cun in maun tras in mecanissem d'avertura automatic, cuntels-tgiralla, cuntels da trair e stilets cun loma simmetrica;

d.

utensils ch'èn concepids per blessar umans, en spezial rintgs da pugnada americans, pertgas e bastuns da culpir, stailas da trair e fundas;

e.

apparats d'electroschoc che pon diminuir la forza da resistenza d'umans u donnegiar duraivlamain la sanadad;

f.

armas ad aria cumprimida ed armas da CO₂ che sviluppan in'energia da sbuccada d'almain 7,5 joules u che pon vegnir confundidas cun vairas armas da fieu pervia da lur cumparsa;

g.

armas d'imitaziun, armas d'alarm ed armas da soft air che pon vegnir confundidas cun vairas armas da fieu pervia da lur cumparsa.

² Sco accessoris d'armas valan:

a.

surdinas e lur parts construidas spezialmain;

b.

apparats da mira da laser e da notg sco er lur parts construidas spezialmain;

c.

bittagranatas ch'èn vegnids construids sco parts supplementaras d'ina arma da fieu.

^2bis Sco indrizs per chargiar da gronda capacitad valan indrizs per chargiar armas da fieu mez automaticas a percussiun centrala che han ina capacitad:

a.

en cas d'armas da fieu curtas: da passa 20 patronas;

b.

en cas d'armas da fieu da maun: da passa 10 patronas.⁸

^2ter Sco stadi da Schengen vala in stadi ch'è lià cun ina da las cunvegnas d'associaziun a la reglamentaziun da Schengen. Las cunvegnas d'associaziun a la reglamentaziun da Schengen èn inditgadas en l'agiunta.⁹

³ Il Cussegl federal fixescha ils objects che vegnan considerads da questa lescha sco parts essenzialas d'armas, sco parts d'armas construidas spezialmain u sco accessoris d'armas.

⁴ El circumscriva las armas ad aria cumprimida, las armas da CO₂, las armas d'imitaziun, las armas d'alarm e las armas da soft air, ils cuntels, ils stilets, ils apparats d'electroschoc, ils apparats tenor l'alinea 1 litera b e las fundas che valan sco armas.

⁵ Sco muniziun vala material da tir cun ina chargia propulsiva, da la quala l'energia vegn transmessa sin in projectil cun envidar in'arma da fieu.

⁶ Sco objects privlus valan objects sco utensils, apparats dal tegnairchasa e da sport che pon vegnir duvrads per smanatschar u per blessar umans. Cuntels da satg, sco per exempel il cuntè da satg da l'armada svizra e products sumegliants, na valan betg sco objects privlus.

¹ Igl è scumandà da transferir, d'acquistar, d'intermediar a retschaviders en Svizra, d'apportar en il territori svizzer sco er da posseder:

a.

armas da fieu a seria ed apparats militars per sajettar muniziun, projectils u missils cun effect explosiv sco er lur parts essenzialas e lur parts construidas spezialmain;

b.

armas da fieu a seria ch'èn vegnidas transfurmadas en armas da fieu mez automaticas e lur parts essenzialas, cun excepziun d'armas da fieu d'ordonanza ch'il possessur ha prendì en proprietad directamain dals inventaris da l'administraziun militara, sco er da parts essenzialas per mantegnair la funcziun da questas armas;

c.

las suandantas armas da fieu mez automaticas a percussiun centrala:

1.

armas da fieu curtas ch'èn equipadas cun in indriz per chargiar da gronda capacitad,

2.

armas da fieu da maun ch'èn equipadas cun in indriz per chargiar da gronda capacitad;

d.

armas da fieu da maun mez automaticas che pon vegnir scursanidas cun agid d'in moni plegabel u telescopic u senza agid ad ina lunghezza da main che 60 cm, senza ch'ellas perdian lur funcziunalitad;

e.

armas da fieu ch'èn l'imitaziun d'in object da diever sco er lur parts essenzialas;

f.

bittagranatas tenor l'artitgel 4 alinea 2 litera c.

² Igl è scumandà da transferir, d'acquistar, d'intermediar a retschaviders en Svizra sco er d'apportar en il territori svizzer:

a.

cuntels e stilets tenor l'artitgel 4 alinea 1 litera c;

b.

utensils da culpir e da trair tenor l'artitgel 4 alinea 1 litera d, cun excepziun dals bastuns da culpir;

c.

apparats d'electroschoc tenor l'artitgel 4 alinea 1 litera e;

d.

accessoris d'armas.

³ Igl è scumandà da sajettar cun:

a.

armas da fieu a seria;

b.

apparats militars per sajettar muniziun, projectils u missils cun effect explosiv.

⁴ Igl è scumandà da sajettar cun armas da fieu en lieus accessibels a la publicitad ordaifer las occurrenzas da tir permessas uffizialmain u ordaifer las plazzas da tir.

⁵ Igl è permess da sajettar cun armas da fieu en lieus betg accessibels a la publicitad ed en lieus segirads correspundentamain e da sajettar cun armas da fieu durant la chatscha.

⁶ Ils chantuns pon permetter excepziuns dals scumonds tenor ils alineas 1-4.

⁷ Il post central (art. 31c) po permetter excepziuns dal scumond d'apport en il territori svizzer.

¹ Il Cussegl federal po scumandar u prescriver cundiziuns spezialas per l'acquist, per il possess, per la producziun e per l'apport en il territori svizzer da muniziun e d'elements da muniziun che han cumprovadamain in grond potenzial da chaschunar blessuras.

² Exceptads èn muniziun ed elements da muniziun che vegnan duvrads a chaschun d'occurrenzas da tir u per la chatscha.

¹ Persunas ch'acquistan tras successiun d'ierta armas, parts essenzialas d'armas e parts d'armas construidas spezialmain u accessoris d'armas ch'èn suttamess ad in scumond tenor l'artitgel 5 alinea 1, ston dumandar ina permissiun excepziunala entaifer 6 mais.

² A burgais esters che n'han nagina permissiun da domicil, ma che abitan en Svizra dastga vegnir concedida la permissiun excepziunala per acquistar in'arma, ina part essenziala d'ina arma u ina part d'ina arma construida spezialmain u in accessori d'ina arma tenor l'artitgel 5 alinea 1 mo, sch'els preschentan ina conferma uffiziala dal stadi d'origin, tenor la quala els han il dretg d'acquistar l'object correspundent.

¹ A persunas che abitan a l'exteriur dastga vegnir concedida la permissiun excepziunala per acquistar in'arma, ina part essenziala d'ina arma u ina part d'ina arma construida spezialmain u in accessori d'ina arma tenor l'artitgel 5 alinea 1 mo, sch'ellas preschentan ina conferma uffiziala dal stadi da domicil, tenor la quala ellas han il dretg d'acquistar l'object correspundent.¹⁴

² Sch'i dat dubis areguard l'autenticitad da la conferma u sch'ina tala na po betg vegnir preschentada, trametta il chantun vinavant ils documents al post central. Quel examinescha la conferma u po eventualmain conceder ina tala.

¹ Il Cussegl federal po scumandar a burgais da tscherts stadis d'acquistar, da posseder, d'offrir, d'intermediar e da transferir armas, parts essenzialas d'armas u parts d'armas construidas spezialmain, accessoris d'armas, muniziun ed elements da muniziun sco er da purtar e da sajettar cun armas:

a.

sch'igl exista in privel considerabel per in'utilisaziun abusiva;

b.

per tegnair quint da conclus da la cuminanza internaziunala u dals princips da la politica exteriura da la Svizra.

² A persunas tenor l'alinea 1, che sa participeschan ad occurrenzas da chatscha u da sport u che adempleschan incumbensas da protecziun da persunas e d'objects, pon ils chantuns permetter excepziunalmain d'acquistar, da posseder u da purtar armas u da sajettar.

¹ Persunas pertutgadas d'in scumond tenor l'artitgel 7 alinea 1 ston annunziar armas, parts essenzialas d'armas u parts d'armas construidas spezialmain, accessoris d'armas, muniziun u elements da muniziun a l'autoritad cumpetenta da lur chantun da domicil entaifer 2 mais suenter l'entrada en vigur dal scumond.

² Entaifer 6 mais suenter l'entrada en vigur dal scumond pon ellas inoltrar ina dumonda per ina permissiun excepziunala. Cas cuntrari ston ils objects vegnir transferids entaifer quest termin ad ina persuna autorisada.

³ Sche la dumonda vegn refusada, ston ils objects vegnir transferids entaifer 4 mais suenter la refusa ad ina persuna autorisada; cas cuntrari vegnan els sequestrads.

¹ Armas, parts essenzialas d'armas u parts d'armas construidas spezialmain, accessoris d'armas, muniziun u elements da muniziun na dastgan betg vegnir offrids, sch'i n'è betg pussaivel per las autoritads cumpetentas d'identifitgar l'offerent.

² Igl è scumandà d'offrir armas, parts essenzialas d'armas u parts d'armas construidas spezialmain, accessoris d'armas, muniziun u elements da muniziun a chaschun d'exposiziuns e da martgads accessibels a la publicitad. Exceptadas èn persunas annunziadas che offreschan objects a chaschun da bursas d'armas publicas ch'èn vegnidas permessas da las autoritads cumpetentas.

¹ Tgi che vul acquistar in'arma u ina part essenziala d'ina arma, dovra ina permissiun d'acquistar armas.²¹

^1bis Tgi che dumonda ina permissiun d'acquistar in'arma da fieu per auters intents ch'il sport, la chatscha u la collecziun, sto inditgar il motiv da l'acquist.²²

² Nagina permissiun d'acquistar armas na survegnan persunas che:

a.

n'han betg anc cumplenì 18 onns;

b.²³

stattan sut curatella cumplessiva u vegnan represchentadas d'ina persuna incumbensada da prevenziun;

c.

dattan l'occasiun da supponer ch'ellas pericliteschian sasezzas u terzas persunas cun l'arma;

d.²⁴

cumparan en l'extract privat tenor l'artitgel 41 da la Lescha federala dals 17 da zercladur 2016²⁵ davart il register penal pervia d'in act che demussa in caracter violent u privlus u pervia da crims u delicts commess repetidamain.

^2bis Persunas ch'acquistan armas da fieu u parts essenzialas d'armas tras successiun d'ierta ston dumandar entaifer 6 mais ina permissiun d'acquistar armas, nun ch'ils objects vegnian transferids entaifer quest termin ad ina persuna autorisada.²⁶

^3-5 ...²⁷

¹ La permissiun d'acquistar armas vegn concedida da l'autoritad cumpetenta dal chantun da domicil u, per persunas cun domicil a l'exteriur, da l'autoritad cumpetenta dal chantun, en il qual l'arma vegn acquistada.

² L'autoritad dumonda ordavant ina posiziun da l'autoritad chantunala tenor l'artitgel 6 da la Lescha federala dals 21 da mars 1997²⁹ davart mesiras per mantegnair la segirezza interna.

¹ Persunas cun domicil a l'exteriur ston preschentar a l'autoritad chantunala cumpetenta ina conferma uffiziala da lur stadi da domicil, tenor la quala ellas han il dretg d'acquistar l'arma u la part essenziala d'ina arma.

^1bis Burgais esters che n'han nagina permissiun da domicil, ma che abitan en Svizra ston preschentar a l'autoritad chantunala cumpetenta ina conferma uffiziala da lur stadi d'origin, tenor la quala els han il dretg d'acquistar l'arma da fieu u la part essenziala d'ina arma.³¹

² Sch'i dat dubis areguard l'autenticitad da la conferma u sch'ina tala na po betg vegnir preschentada, trametta il chantun vinavant ils documents al post central. Quel examinescha la conferma u po eventualmain conceder ina tala.

¹ La permissiun d'acquistar armas vala per tut la Svizra ed autorisescha d'acquistar ina suletta arma u ina suletta part essenziala d'ina arma.

² Il Cussegl federal prevesa excepziuns per il remplazzament da parts essenzialas d'ina arma permessa legalmain sco er per l'acquist da pliras armas u parts essenzialas d'armas tar la medema persuna u per l'acquist tras successiun d'ierta.

³ La permissiun d'acquistar armas vala 6 mais. L'autoritad cumpetenta po prolungar la valaivladad per maximalmain 3 mais.

Tgi che transferescha in'arma u ina part essenziala d'ina arma, sto trametter - entaifer 30 dis suenter la conclusiun dal contract - ina copia da la permissiun d'acquistar armas da l'acquistader a l'autoritad ch'è cumpetenta per conceder ina permissiun d'acquistar armas tenor l'artitgel 9.

¹ Las suandantas armas sco er lur parts essenzialas dastgan vegnir acquistadas senza permissiun d'acquistar armas:

a.

schluppets da chatscha a culp singul ed a pliras chonnas sco er reproducziuns da schluppets a culp singul per chargiar davant en;

b.

schluppets a repetiziun manuala, designads dal Cussegl federal, che vegnan duvrads normalmain per il tir ordaifer il servetsch e per il tir da sport organisads da las societads da tir renconuschidas tenor la Lescha militara dals 3 da favrer 1995³⁵ sco er per la chatscha en Svizra;

c.

floberts a culp singul;

d.

armas ad aria cumprimida ed armas da CO₂ che sviluppan in'energia da sbuccada d'almain 7,5 joules u che pon vegnir confundidas cun vairas armas da fieu pervia da lur cumparsa;

e.

armas d'imitaziun, armas d'alarm ed armas da soft air che pon vegnir confundidas cun vairas armas da fieu pervia da lur cumparsa.³⁶

² Il Cussegl federal po fixar ulteriuras excepziuns u limitar il champ d'applicaziun da l'alinea 1 per burgais esters senza permissiun da domicil en Svizra.

¹ La persuna che transferescha in'arma u ina part essenziala d'ina arma senza permissiun d'acquistar armas (art. 10) sto examinar l'identitad e la vegliadetgna da l'acquistader a maun d'in document d'identitad uffizial.

² L'arma u la part essenziala d'ina arma dastga mo vegnir transferida, sche la persuna transferenta dastga supponer tenor las circumstanzas che nagins motivs d'impediment tenor l'artitgel 8 alinea 2 na s'opponian a l'acquist.

³ L'artitgel 9a vala tenor il senn.

⁴ La persuna transferenta po s'infurmar tar l'autoritad cumpetenta dal chantun da domicil da l'acquistader, sch'in motiv d'impediment s'oppona a l'acquist. Per far quai dovra ella il consentiment en scrit da l'acquistader.³⁸

¹ Per mintga transferiment d'ina arma u d'ina part essenziala d'ina arma senza permissiun d'acquistar armas (art. 10) sto vegnir concludì in contract en scrit. Mintga part contractanta sto tegnair en salv il contract almain 10 onns.

² Il contract sto cuntegnair las suandantas indicaziuns:

a.

il num, il prenum, la data da naschientscha, l'adressa da domicil e la suttascripziun da la persuna che transferescha l'arma u la part essenziala d'ina arma;

b.

il num, il prenum, la data da naschientscha, l'adressa da domicil e la suttascripziun da la persuna ch'acquista l'arma u la part essenziala d'ina arma;

c.⁴⁰

il gener d'arma, il producent, la designaziun, il caliber, il numer da l'arma sco er la data ed il lieu dal transferiment;

d.⁴¹

il gener ed il numer dal document d'identitad uffizial da la persuna ch'acquista l'arma u la part essenziala d'ina arma u - en cas d'in transferiment d'ina arma da fieu - ina copia dal document d'identitad;

e.⁴²

ina infurmaziun davart l'elavuraziun da datas persunalas en connex cun il contract tenor las disposiziuns davart la protecziun da datas da la Confederaziun e dals chantuns, sch'i vegnan transferidas armas da fieu.

³ Tgi che transferescha in'arma da fieu tenor l'artitgel 10 alineas 1 e 3⁴³, sto trametter ina copia dal contract al post d'annunzia (art. 31a) entaifer 30 dis suenter la conclusiun dal contract. Ils chantuns pon prevair ulteriuras furmas d'annunzia adattadas.⁴⁴

⁴ Tgi ch'acquista in'arma da fieu u ina part essenziala d'ina arma tenor l'artitgel 10 tras successiun d'ierta, sto transmetter las indicaziuns tenor l'alinea 2 literas a-d al post d'annunzia entaifer 6 mais, sch'el na transferescha betg l'object entaifer quest termin ad ina persuna autorisada.⁴⁵

⁵ Cumpetent è il post d'annunzia dal chantun da domicil da l'acquistader u, per persunas cun domicil a l'exteriur, il post d'annunzia dal chantun, en il qual l'arma da fieu è vegnida acquistada.

¹ Ina persuna minorenna dastga emprestar in'arma da sport tar sia societad da tir u tar sia represchentanza legala, sch'ella po cumprovar ch'ella fa regularmain sport da tir cun questa arma e ch'i n'èn avant maun nagins motivs d'impediment tenor l'artitgel 8 alinea 2 litera b u c.

² La represchentanza legala sto annunziar l'emprest d'ina arma da sport entaifer 30 dis al post d'annunzia dal chantun da domicil da la persuna minorenna. Sche la represchentanza legala è infurmada, po l'emprest vegnir annunzià er tras la societad che metta a disposiziun l'arma.

³ Il Cussegl federal regla ils detagls.

Il dretg da posseder in'arma, ina part essenziala d'ina arma u ina part d'ina arma construida spezialmain u in accessori d'ina arma ha quella persuna che ha acquistà legalmain l'object.

¹ Tgi che acquista, offrescha, dat vinavant u intermediescha a titel professiunal armas, parts essenzialas d'armas u parts d'armas construidas spezialmain, accessoris d'armas, muniziun u elements da muniziun, dovra ina permissiun per il commerzi cun armas.

² Ina permissiun per il commerzi cun armas survegn ina persuna:

a.

a la quala na s'opponan nagins motivs d'impediment tenor l'artitgel 8 alinea 2;

b.

ch'è inscritta en il register da commerzi;

c.

che ha fatg in examen che cumprova ch'ella haja enconuschientschas suffizientas dals tips d'armas e da muniziun sco er da las disposiziuns legalas;

d.

che dispona da localitads da fatschenta spezialas, en las qualas armas, parts essenzialas d'armas e parts d'armas construidas spezialmain, accessoris d'armas, muniziun ed elements da muniziun pon vegnir mess en salv en moda segira;

e.

che garantescha che las fatschentas vegnian fatgas confurm a l'urden.

³ Las persunas giuridicas ston designar in commember da la direcziun ch'è responsabel entaifer l'interpresa per tut las dumondas tenor questa lescha.

⁴ Il Departament federal da giustia e polizia decretescha il reglament d'examen e fixescha las pretensiuns minimalas envers las localitads da fatschenta.

⁵ La permissiun per il commerzi cun armas vegn concedida da l'autoritad cumpetenta da quel chantun, en il qual il petent ha il domicil da sia interpresa. Filialas extrachantunalas dovran in'atgna permissiun per il commerzi cun armas.

⁶ Il Cussegl federal regla sut tge premissas che titulars da permissiuns estras per il commerzi cun armas pon sa participar a bursas d'armas publicas.

⁷ Sch'in transferiment ha lieu tranter persunas che han ina permissiun per il commerzi cun armas, sto la persuna transferenta annunziar a l'autoritad cumpetenta da ses chantun da domicil entaifer 30 dis suenter la conclusiun dal contract il transferiment, cunzunt il tip ed il dumber d'objects transferids.

Ina permissiun per il commerzi cun armas dovra, tgi ch'exequescha ina da las suandantas activitads a titel professiunal:

a.

producescha armas, parts essenzialas d'armas u parts d'armas construidas spezialmain, accessoris d'armas, muniziun u elements da muniziun;

b.

modifitgescha parts d'armas ch'èn essenzialas per la funcziun u per l'effect da l'arma; u

c.

reparescha u modifitgescha armas da fieu, lur parts essenzialas u lur parts construidas spezialmain, accessoris d'armas, muniziun u elements da muniziun.

¹ Ils producents d'armas da fieu sco er da lur parts essenzialas u da lur accessoris ston marcar differentamain mintgin da quests objects, per ch'els possian vegnir identifitgads e repersequitads. ... .^{59 60}

² Mintga arma da fieu sco er mintgina da lur parts essenzialas e mintgin da lur accessoris che vegnan apportads en il territori svizzer ston esser marcads differentamain.

³ La marcaziun sto vegnir fatga uschia, ch'ella na po vegnir ni allontanada ni modifitgada senza meds mecanics.

⁴ Il Cussegl federal po fixar che armas da fieu betg marcadas dastgian vegnir apportadas per maximalmain 1 onn en il territori svizzer.

¹ Ils producents da muniziun ston marcar mintgina da las pli pitschnas unitads d'emballadi da muniziun, per che quellas possian vegnir identifitgadas e repersequitadas.

² Mintgina da las pli pitschnas unitads d'emballadi da muniziun apportada en il territori svizzer sto esser marcada.

¹ Igl è scumandà da producir armas, parts essenzialas d'armas u parts d'armas construidas spezialmain, accessoris d'armas, muniziun ed elements da muniziun a titel betg professiunal sco er da transfurmar a titel betg professiunal objects en armas tenor l'artitgel 5 alineas 1 e 2.

² Per transfurmar a titel betg professiunal objects en autras armas da fieu che las armas u las parts essenzialas d'armas tenor l'artitgel 5 alinea 1 dovri ina permissiun. Ils artitgels 8, 9, 9b alinea 3, 9c, 10, 11 alineas 3 e 5 sco er 12 valan tenor il senn.

³ Ils chantuns pon permetter excepziuns dals scumonds tenor l'alinea 1. Il Cussegl federal precisescha las premissas.

⁴ Igl è permess da rechargiar muniziun per il diever persunal.

¹ Igl è scumandà da transfurmar armas da fieu mez automaticas en armas da fieu a seria, da modifitgar u d'allontanar ils numers da las armas sco er da scursanir armas da fieu da maun.

² Ils chantuns pon permetter excepziuns. Il Cussegl federal precisescha las premissas.

¹ Ils titulars da permissiuns per il commerzi cun armas èn obligads da manar cudesch davart la producziun, davart la transfurmaziun, davart l'acquisiziun, davart la vendita e davart mintga auter commerzi cun armas, cun parts essenzialas d'armas u cun parts d'armas construidas spezialmain, cun accessoris d'armas, cun muniziun e cun pulvra da sajettar sco er davart reparaturas fatgas per restabilir il funcziunament d'armas da fieu.

^1bis Els èn obligads d'annunziar a l'autoritad chantunala cumpetenta per la gestiun dal sistem d'infurmaziun (art. 32a al. 2) entaifer 20 dis sin via electronica l'acquisiziun, la vendita u mintga auter commerzi cun in acquistader en Svizra.⁶⁶

^1ter Ils chantuns designeschan in'autoritad che retschaiva las annunzias da transacziuns suspectusas da muniziun u d'elements da muniziun, che vegnan inoltradas da titulars da permissiuns per il commerzi cun armas.⁶⁷

² Ils cudeschs sco er las copias da las permissiuns d'acquistar armas e da las permissiuns excepziunalas (documents) ston vegnir mess en salv durant 10 onns.

³ Ils documents ston vegnir surdads a l'autoritad chantunala cumpetenta per la gestiun dal sistem d'infurmaziun (art. 32a al. 2):

a.

suenter la scadenza dal termin da conservaziun;

b.

suenter la liquidaziun dal manaschi; u

c.

suenter la revocaziun u la privaziun da la permissiun per il commerzi cun armas.

⁴ L'autoritad cumpetenta metta en salv ils documents durant 20 onns e permetta - sin dumonda - a las autoritads da persecuziun penala ed a las autoritads giudizialas dals chantuns e da la Confederaziun da prender invista da tals per ademplir lur incumbensas legalas.

Ils titulars da permissiuns per il commerzi cun armas e lur persunal èn obligads da dar a las autoritads da controlla tut las infurmaziuns ch'èn necessarias per ina controlla adequata.

¹ Permissiuns excepziunalas per transferir, per acquistar, per intermediar a retschaviders en Svizra e per apportar en il territori svizzer objects tenor l'artitgel 5 alinea 2 pon vegnir concedidas mo, sche:

a.

motivs respectabels èn avant maun;

b.

nagins motivs d'impediment tenor l'artitgel 8 alinea 2 n'èn avant maun; e

c.

las premissas particularas previsas da questa lescha èn ademplidas.

² Sco motivs respectabels valan en spezial:

a.

necessitads professiunalas;

b.

l'utilisaziun per intents industrials;

c.

la cumpensaziun d'impediments corporals;

d.

in'activitad da collecziun.

¹ Permissiuns excepziunalas per transferir, per acquistar, per intermediar a retschaviders en Svizra, per apportar en il territori svizzer e per posseder objects tenor l'artitgel 5 alinea 1 pon vegnir concedidas mo, sche:

a.

motivs respectabels èn avant maun;

b.

nagins motivs d'impediment tenor l'artitgel 8 alinea 2 n'èn avant maun; e

c.

las premissas particularas previsas da questa lescha èn ademplidas.

² Sco motivs respectabels valan:

a.

necessitads professiunalas, en spezial concernent l'adempliment d'incumbensas da protecziun sco la protecziun da persunas, d'infrastructuras criticas u da transports da valurs;

b.

il tir da sport;

c.

in'activitad da collecziun;

d.

necessitads da la defensiun naziunala;

e.

intents da furmaziun, da cultura, da perscrutaziun ed intents istorics.

³ Permissiuns excepziunalas per sajettar tenor l'artitgel 5 alineas 3 e 4 pon vegnir concedidas, sch'i n'èn avant maun nagins motivs d'impediment tenor l'artitgel 8 alinea 2 e sche la segirezza è garantida tras mesiras adattadas.

¹ La concessiun da permissiuns excepziunalas concernent il tir da sport è limitada ad armas da fieu ed a parts essenzialas d'armas tenor l'artitgel 5 alinea 1 literas b e c sco er a parts d'armas construidas spezialmain ed ad accessoris d'armas che vegnan effectivamain duvrads per quest intent.

² Permissiuns excepziunalas vegnan concedidas mo a persunas che cumprovan a l'autoritad chantunala cumpetenta ch'ellas:

a.

èn commembras d'ina societad da tir; u

b.

dovran regularmain lur arma da fieu per il tir da sport, er sch'ellas n'èn betg commembras d'ina societad da tir.

³ La cumprova tenor l'alinea 2 sto vegnir furnida suenter 5 e suenter 10 onns.

¹ Permissiuns excepziunalas per motivs da collecziun pon vegnir concedidas mo, sche las persunas u las instituziuns pertutgadas cumprovan ch'ellas hajan prendì mesiras adequatas en il senn da l'artitgel 26 per tegnair en salv la collecziun en moda segira.

² Ils collecziunaders ed ils museums ston:

a.

manar ina glista da tut las armas da fieu tenor l'artitgel 5 alinea 1 ch'èn en lur possess; questa glista sto vegnir actualisada cuntinuadamain;

b.

pudair preschentar a las autoritads, sin dumonda, da tut temp la glista sco er las permissiuns excepziunalas appartegnentas.

¹ En preschientscha da la persuna che posseda ina permissiun tenor questa lescha u da sia represchentanza han ils organs executivs chantunals il dretg:

a.

da controllar, sche las cundiziuns e las pretensiuns, ch'èn colliadas cun la permissiun, vegnan observadas;

b.

d'examinar - senza preannunzia e durant il temp da lavur usità - las localitads da fatschenta dal titular d'ina permissiun per il commerzi cun armas e da prender invista da las actas respectivas.

² Els mettan en segirezza material engrevgiant.

³ La controlla e l'examinaziun tenor l'alinea 1 ston vegnir repetidas regularmain en cas da titulars d'ina permissiun per il commerzi cun armas.

¹ L'autoritad cumpetenta revochescha ina permissiun, sche:

a.

las premissas per sia concessiun n'èn betg pli ademplidas;

b.

las cundiziuns ch'èn colliadas cun la permissiun na vegnan betg pli ademplidas.

² ...¹⁰⁷

¹ L'autoritad che refusa ina permissiun, communitgescha la refusa al post central inditgond ils motivs.

² L'autoritad che revochescha ina permissiun, communitgescha la revocaziun a l'autoritad che ha concedì la permissiun ed al post central.

Las persunas ch'èn obligadas d'observar il secret d'uffizi ed il secret da professiun èn autorisadas d'annunziar a las autoritads chantunalas e federalas da polizia e da giustia las persunas che:

a.

pericliteschan sasezzas u terzas persunas tras il diever d'armas;

b.

smanatschan da duvrar armas cunter sasezzas u cunter terzas persunas.

¹ L'autoritad cumpetenta sequestrescha:

a.

armas che vegnan purtadas da persunas che n'han betg il dretg da purtar talas;

b.

armas, parts essenzialas d'armas e parts d'armas construidas spezialmain, accessoris d'armas, muniziun ed elements da muniziun dal possess da persunas, per las qualas exista in motiv d'impediment tenor l'artitgel 8 alinea 2 u las qualas n'han betg il dretg da cumprar u da posseder quests objects;

c.

objects privlus, che vegnan purtads en moda abusiva;

d.¹¹¹

armas da fieu, lur parts essenzialas u lur parts accessoricas ch'èn marcadas tenor l'artitgel 18a;

e.¹¹²

las pli pitschnas unitads d'emballadi da muniziun che n'èn betg marcadas tenor l'artitgel 18b;

f.¹¹³

indrizs da chargiar da gronda capacitad e l'arma da fieu appartegnenta dal possess da persunas che n'han betg il dretg da cumprar u da posseder quests objects.

² Sch'ella sequestrescha armas, parts essenzialas d'armas u parts d'armas construidas spezialmain, accessoris d'armas, indrizs da chargiar da gronda capacitad e l'arma da fieu appartegnenta, muniziun u elements da muniziun u objects privlus dal possess d'ina persuna, che n'ha betg il dretg da posseder quests objects, restituescha ella quests objects a la persuna che ha il dretg d'als posseder, sch'i n'exista nagin motiv d'impediment tenor l'artitgel 8 alinea 2.¹¹⁴

^2bis Sch'ella sequestrescha armas da fieu tenor l'artitgel 5 alinea 1 literas b-d, las qualas n'èn betg registradas en il sistem d'infurmaziun chantunal davart l'acquist d'armas da fieu tenor l'artitgel 32a alinea 2, per las qualas il possess legitim tenor l'artitgel 42b n'è betg vegnì annunzià u per las qualas la cumprova tenor l'artitgel 28d alinea 3 n'è betg vegnida furnida, sto il possessur inoltrar entaifer 3 mais ina dumonda per ina permissiun excepziunala tenor ils artitgels 28c-28e u transferir las armas da fieu ad ina persuna autorisada.¹¹⁵

^2ter Sch'ella sequestrescha indrizs da chargiar da gronda capacitad e l'arma da fieu appartegnenta, sto il possessur inoltrar entaifer 3 mais ina dumonda per ina permissiun excepziunala tenor ils artitgels 28c-28e per l'arma da fieu u transferir ils objects ad ina persuna autorisada.¹¹⁶

³ Ella confiscescha definitivamain ils objects sequestrads:

a.

sch'igl exista il privel ch'els vegnian duvrads en moda abusiva, particularmain, perquai che persunas èn vegnidas smanatschadas u blessadas cun tals objects;

b.

sch'i sa tracta d'objects tenor l'alinea 1 litera d u e ch'èn vegnids producids u apportads en il territori svizzer suenter ils 28 da fanadur 2010; u¹¹⁷

c.¹¹⁸

sch'ils objects n'èn betg vegnids transferids ad ina persuna autorisada e sche la dumonda tenor l'alinea 2^bis u 2^ter n'è betg vegnida inoltrada u è vegnida refusada.¹¹⁹

⁴ Ella communitgescha al post central la confiscaziun definitiva d'armas designond precisamain l'arma.

⁵ Il Cussegl federal regla la procedura per il cas che la restituziun n'è betg pussaivla.

Ils chantuns èn obligads da prender encunter gratuitamain armas, parts essenzialas d'armas e parts d'armas construidas spezialmain, accessoris d'armas, muniziun ed elements da muniziun. Els dastgan adossar als titulars d'ina permissiun per il commerzi cun armas ina taxa per prender encunter quests objects.

¹ Ils chantuns designeschan in post d'annunzia. Sias incumbensas pon els surdar ad organisaziuns d'impurtanza naziunala ch'èn activas en il sectur d'armas.

² Il post d'annunzia ademplescha las incumbensas che al èn vegnidas surdadas tenor ils artitgels 11 alineas 3 e 4, 32k e 42a. Sin dumonda dat el las infurmaziuns necessarias a las autoritads da persecuziun penala dals chantuns e da la Confederaziun.

¹ Il Cussegl federal designescha in post central che sustegna las autoritads executivas.

² Ultra da sia incarica tenor ils artitgels 9a alinea 2, 22b, 24 alineas 3 e 4, 25 alineas 3 e 5, 31d, 32a, 32c e 32j alinea 1 ademplescha il post central en spezial las suandantas incumbensas:

a.

el cusseglia las autoritads executivas;

b.

el coordinescha lur activitads;

b^bis.¹²³

el elavura dumondas d'autoritads svizras u d'autoritads estras da repersequitar armas da fieu, lur parts essenzialas u lur parts accessoricas sco er muniziun ed elements da muniziun e transferescha ad autoritads estras las dumondas correspundentas d'autoritads svizras; el è il post da contact per dumondas tecnicas ed operativas en il sectur da la repersequitabladad;

c.

el funghescha sco post da retschavida e d'annunzia central per il barat d'infurmaziuns cun ils ulteriurs stadis da Schengen;

d.

el transferescha als chantuns da domicil las communicaziuns sur da persunas che abitan en Svizra e che han acquistà in'arma da fieu en in stadi da Schengen;

e.

el elavura las recumandaziuns concernent in'applicaziun unitara da la legislaziun davart las armas e concernent la concessiun da permissiuns excepziunalas;

f.

el po conceder a societads aviaticas estras ina permissiun generala per exequir funcziuns da segirezza tenor l'artitgel 27a.

³ Il Cussegl federal regla ils detagls da l'activitad dal post central.

¹ La Confederaziun ed ils chantuns pon manar in servetsch naziunal da coordinaziun per l'evaluaziun centrala da fastizs d'armas da fieu tenor l'artitgel 4 alinea 1 literas a ed f.

² El stat sut la direcziun dal post central.

Il Cussegl federal fixescha las taxa per:

a.

elavurar permissiuns, examinaziuns e confermas tenor questa lescha;

b.¹²⁶

metter en salv las armas ch'èn vegnidas sequestradas ed ils objects privlus purtads en moda abusiva ch'èn vegnids sequestrads;

c.¹²⁷

prender mesiras en connex cun la sequestraziun, cun la confiscaziun definitiva e cun l'utilisaziun d'objects tenor l'artitgel 4.

¹ Il post spezialisà maina las suandantas bancas da datas:

a.

banca da datas davart l'acquist d'armas tras burgais esters senza permissiun da domicil (DEWA);

b.

banca da datas davart l'acquist d'armas tras persunas cun domicil en in auter stadi da Schengen (DEWS);

c.

banca da datas davart la revocaziun e davart la refusa da permissiuns e davart la sequestraziun d'armas (DEBBWA);

d.

banca da datas davart la surlaschada d'armas da l'armada sco proprietad e davart persunas obligadas da far la mustra e davart appartegnents da l'armada, per ils quals exista tenor l'artitgel 113 da la Lescha militara dals 3 da favrer 1995¹³¹ in motiv d'impediment per posseder in'arma persunala (DAWA);

e.

banca da datas davart las marcaziuns per repersequitar armas da fieu e lur muniziun (DARUE).

² Mintga chantun maina in sistem d'infurmaziun electronic davart l'acquist e davart il possess d'armas da fieu.

³ Supplementarmain al sistem d'infurmaziun tenor l'alinea 2 pon els manar in sistem d'infurmaziun cuminaivel armonisà davart l'acquist e davart il possess d'armas da fieu. Els designeschan in organ ch'è responsabel per centralisar e per administrar las datas.

⁴ Ils sistems d'infurmaziun tenor ils alineas 1 e 3 pon vegnir consultads dals utilisaders cun in'unica retschertga en il rom da lur dretgs d'access.

⁵ La Confederaziun po sustegnair mesiras per armonisar ils sistems d'infurmaziun tenor ils alineas 1-3.

⁶ Il Cussegl federal determinescha las premissas che ston esser ademplidas per che la Confederaziun concedia agids finanzials tenor l'alinea 5.

Las autoritads ch'elavuran online datas en ils sistems d'infurmaziun tenor l'artitgel 32a alineas 2 e 3 annunzian al post central ils numers da la AVS tenor l'artitgel 50c da la Lescha federala dals 20 da december 1946¹³³ davart l'assicuranza per vegls e survivents per duvrar tals en la DEBBWA ed en la DAWA.

¹ La DEWA e la DEWS cuntegnan las suandantas datas:

a.

persunalias e numer da register da l'acquistader;

b.

gener d'arma, producent, designaziun, caliber, numer da l'arma sco er data dal transferiment;

c.

data da la registraziun en la banca da datas.

² La DEBBWA cuntegna las suandantas datas:

a.

persunalias e numer da la AVS¹³⁵ da persunas, da las qualas èn vegnidas revocadas u a las qualas èn vegnidas refusadas permissiuns u da las qualas èn vegnidas sequestradas armas;

b.¹³⁶

circumstanzas che han chaschunà la revocaziun u la refusa da la permissiun;

c.

gener, tip e numer da l'arma sco er data dal transferiment;

d.

circumstanzas che han chaschunà la sequestraziun;

e.

disposiziuns per las armas sequestradas;

f.

data da la registraziun en la banca da datas.

³ La DAWA cuntegna las suandantas datas:

a.

persunalias e numer da la AVS da las persunas, a las qualas è vegnida surlaschada in'arma sco proprietad, cur ch'ellas èn sortidas da l'armada;

b.

persunalias e numer da la AVS da las persunas, da las qualas è vegnida prendida davent u revocada - sin basa da la legislaziun militara - l'arma persunala u l'arma ad emprest;

c.

persunalias e numer da la AVS da las persunas, a las qualas n'è vegnida consegnada nagina arma pervia da motivs d'impediment concernent la consegna da l'arma persunala tenor l'artitgel 113 da la Lescha militara dals 3 da favrer 1995¹³⁷;

d.

gener, tip e numer da l'arma sco er data dal transferiment u da la privaziun;

e.

circumstanzas che han chaschunà che l'arma n'è betg vegnida consegnada, che l'arma è vegnida prendida davent u revocada da questas persunas;

f.

disposiziun per las armas sequestradas;

g.

data da la registraziun en la banca da datas.

⁴ La DARUE cuntegna las suandantas datas:

a.

las indicaziuns da marcaziun tenor ils artitgels 18a e 18b;

b.

ulteriurs segns caracteristics e referenzas dal producent sco er da l'importader;

c.

datas da contact dal producent, dal furnitur sco er da l'importader;

d.

las indicaziuns da la permissiun d'apportar armas en il territori svizzer.

⁵ Il sistem d'infurmaziun tenor l'artitgel 32a alinea 2 cuntegna las suandantas datas:

a.

persunalias e numer da register da l'acquistader e da la persuna che transferescha l'arma;

b.¹³⁸

gener da l'arma u da la part essenziala da l'arma, producent, designaziun, caliber, numer da l'arma, data dal transferiment e data da la destrucziun;

c.

persunalias dal titular d'ina carta europeica d'armas da fieu tenor l'artitgel 25b ed indicaziuns che figureschan en quella;

d.

persunalias dal titular d'ina permissiun per purtar in'arma tenor l'artitgel 27 ed indicaziuns che figureschan en quella.

⁶ Il sistem d'infurmaziun cuminaivel armonisà tenor l'artitgel 32a alinea 3 cuntegna las suandantas datas:

a.

persunalias da l'acquistader;

b.

gener d'arma, producent, designaziun, caliber, numer da l'arma e data dal transferiment;

c.

persunalias dal titular d'ina carta europeica d'armas da fieu tenor l'artitgel 25b ed indicaziuns che figureschan en quella;

d.

persunalias dal titular d'ina permissiun per purtar in'arma tenor l'artitgel 27 ed indicaziuns che figureschan en quella.

⁷ Ils sistems d'infurmaziun tenor l'artitgel 32a alineas 2 e 3 dastgan er cuntegnair il numer da la AVS.

¹ Tut las datas da la DEWA, da la DEBBWA e da la DARUE pon vegnir communitgadas a las suandantas autoritads per ademplir lur incumbensas legalas:

a.

a las autoritads cumpetentas dal stadi da domicil u d'origin;

b.

ad ulteriuras autoritads da giustia e da polizia da la Confederaziun e dals chantuns sco er a las autoritads ch'èn cumpetentas per exequir questa lescha;

c.

a las autoritads estras da polizia, da persecuziun penala e da segirezza sco er als posts dad EUROPOL e dad INTERPOL.

² Tut las datas da la DEWA, da la DEBBWA, da la DAWA e da la DARUE pon vegnir rendidas accessiblas a las autoritads da persecuziun penala da la Confederaziun e dals chantuns, a las autoritads da polizia dals chantuns sco er a las autoritads da duana cun agid d'ina procedura d'invista.

³ Tut las datas da la DEBBWA e da la DAWA pon vegnir rendidas accessiblas cun agid d'ina procedura d'invista als posts cumpetents da l'administraziun militara ed als posts cumpetents per l'execuziun da la Lescha federala dals 25 da settember 2020¹⁴⁰ davart ils precursurs da substanzas explosivas.¹⁴¹

⁴ Il post central communitgescha immediatamain als posts cumpetents da l'administraziun militara ils appartegnents da l'armada e las persunas obligadas da far la mustra ch'èn vegnids inscrits da nov en la DEBBWA, sch'ina permissiun è vegnida revocada u refusada u sch'ina arma è vegnida sequestrada dad els. La communicaziun al Sistem d'infurmaziun per la gestiun integrada da las resursas (PSN) vegn fatga en ina procedura automatisada.

⁵ Il post central communitgescha immediatamain a l'autoritad cumpetenta dal chantun da domicil ils appartegnents da l'armada u las persunas obligadas da far la mustra ch'èn vegnids inscrits da nov en la DAWA, sche l'arma persunala u l'arma ad emprest è vegnida prendida davent u revocada dad els ubain sche l'arma persunala u l'arma ad emprest n'è betg vegnida consegnada ad els. La communicaziun al sistem d'infurmaziun dal chantun da domicil cumpetent tenor l'artitgel 32a alineas 2 e 3 vegn fatga en ina procedura automatisada.

⁶ Las datas da la DEWS ston vegnir dadas vinavant a las autoritads cumpetentas dal stadi da domicil da la persuna respectiva.

⁷ Las datas dal sistem d'infurmaziun tenor l'artitgel 32a alinea 3 pon vegnir rendidas accessiblas - cun agid d'ina procedura d'invista - a las autoritads da persecuziun penala ed a las autoritads giudizialas da la Confederaziun e dals chantuns, a las autoritads da polizia dals chantuns, a l'Uffizi federal da polizia (fedpol) sco er a las autoritads da duana ed als posts cumpetents da l'administraziun militara per ademplir lur incumbensas legalas.

⁸ Il Cussegl federal regla en tge dimensiun che las datas duain vegnir communitgadas a las autoritads da la Confederaziun e dals chantuns sco er lur controlla, lur conservaziun, lur rectificaziun e lur stizzada.

La communicaziun da datas persunalas a las autoritads cumpetentas da stadis da Schengen ha il medem status giuridic sco la communicaziun da datas persunalas tranter organs federals.

¹ Datas persunalas dastgan mo vegnir communitgadas a terzs stadis, sch'els garanteschan in nivel da protecziun da datas adequat tenor l'artitgel 16 alinea 1 da la Lescha federala dals 25 da settember 2020¹⁴⁴ davart la protecziun da datas (LPD).¹⁴⁵

² Sch'in terz stadi na garantescha betg in nivel da protecziun da datas adequat, al pon vegnir communitgadas datas persunalas en ils suandants cas:

a.

la persuna pertutgada ha dà ses consentiment tenor l'artitgel 6 alinea 6 ed eventualmain alinea 7 LPD;

b.

la communicaziun è necessaria per proteger la vita u l'integritad corporala da la persuna pertutgada ed i n'è betg pussaivel da survegnir ses consentiment entaifer in termin adequat;

c.

la communicaziun è necessaria per proteger interess publics predominants u per constatar, exequir u far valair dretgs davant dretgira u davant in'autra autoritad estra cumpetenta.¹⁴⁶

³ Ultra dals cas numnads en l'alinea 2 pon datas persunalas er vegnir communitgadas, sche garanzias suffizientas permettan en il cas singul che la persuna pertutgada saja protegida adequatamain.

⁴ Il Cussegl federal fixescha la dimensiun da las garanzias che ston vegnir furnidas e las modalitads per furnir questas garanzias.

Il dretg da dar infurmaziuns sa drizza tenor las disposiziuns davart la protecziun da datas da la Confederaziun u dals chantuns.¹⁴⁸ …¹⁴⁹

¹ ...¹⁵²

² Ils posts cumpetents da l'administraziun militara communitgeschan al post central:

a.

l'identitad ed il numer da la AVS da persunas, a las qualas è vegnida surlaschada in'arma sco possess, cur ch'ellas en sortidas da l'armada, sco er il gener ed il numer da l'arma;

b.

l'identitad ed il numer da la AVS da persunas, da las qualas è vegnida prendida davent u revocada - sin basa da la legislaziun militara - l'arma persunala u l'arma ad emprest u a las qualas n'è betg vegnida consegnada l'arma persunala u l'arma ad emprest.¹⁵³

Las autoritads chantunalas cumpetentas sco er ils posts d'annunzia transmettan al post central las infurmaziuns, da las qualas els disponan, davart:

a.

l'identitad da persunas senza permissiun da domicil en Svizra che han acquistà en Svizra in'arma u ina part essenziala d'ina arma u ina part d'ina arma construida spezialmain;

b.

l'identitad da persunas cun domicil en in auter stadi da Schengen, che han acquistà en Svizra in'arma da fieu u ina part essenziala d'ina arma u ina part d'ina arma construida spezialmain;

c.

las armas acquistadas u parts essenzialas d'ina arma u parts d'ina arma construidas spezialmain.