¹ Ovras èn, independentamain da lur valur u da lur intent, creaziuns spiertalas litteraras ed artisticas, che han in caracter individual.

² Latiers tutgan en spezial:

a.

ovras linguisticas litteraras, scientificas ed autras;

b.

ovras musicalas ed autras ovras acusticas;

c.

ovras da l'art figurativ, particularmain maletgs, sculpturas ed ovras graficas;

d.

ovras cun in cuntegn scientific u tecnic sco dissegns, plans, chartas u ovras modelladas;

e.

ovras d'architectura;

f.

ovras da l'art applitgà;

g.

ovras fotograficas, cinematograficas ed autras ovras visualas u audiovisualas;

h.

ovras coreograficas e pantomimas.

³ Sco ovras valan er programs da computer.

^3bis Reproducziuns fotograficas e reproducziuns d'objects traidimensiunals producidas cun ina procedura sumeglianta a la fotografia valan sco ovras, er sch'ellas n'han betg in caracter individual.⁴

⁴ Medemamain protegids èn sbozs e projects, titels e parts d'ovras, sch'els èn creaziuns spiertalas che han in caracter individual.

¹ Ovras spiertalas che han in caracter individual, las qualas vegnan creadas - utilisond ovras existentas - uschia, che las ovras utilisadas restan visiblas en lur caracter individual, èn ovras da segund maun.

² Talas ovras èn cunzunt translaziuns sco er adattaziuns audiovisualas ed autras.

³ Ovras da segund maun èn protegidas autonomamain.

⁴ La protecziun da las ovras utilisadas resta resalvada.

¹ Collecziuns èn protegidas autonomamain, sch'ellas èn - areguard la schelta u areguard la disposiziun - creaziuns spiertalas che han in caracter individual.

² La protecziun da las ovras reunidas en la collecziun resta resalvada.

¹ Betg protegids tras il dretg d'autur èn:

a.

leschas, ordinaziuns, contracts internaziunals ed auters decrets uffizials;

b.

meds da pajament;

c.

decisiuns, protocols e rapports d'autoritads e d'administraziuns publicas;

d.

scrits d'invenziun e dumondas da patenta publitgadas.

² Medemamain betg protegidas èn collecziuns e translaziuns uffizialas u pretendidas tras lescha da las ovras tenor l'alinea 1.

Autur è la persuna natirala che ha creà l'ovra.

¹ Sche pliras persunas han cooperà - sco autur - a la creaziun d'ina ovra, han ellas cuminaivlamain il dretg d'autur.

² Sch'ellas n'han betg fixà insatge auter, pon ellas utilisar l'ovra mo cun il consentiment da tuts; il consentiment na dastga betg vegnir refusà cunter la buna fai.

³ Mintga coautur po persequitar autonomamain violaziuns dal dretg d'autur, però pretender mo ina prestaziun a tuts.

⁴ Sche las singulas contribuziuns sa laschan separar e sch'i n'è betg fixà insatge auter, dastga mintga coautur utilisar autonomamain l'atgna contribuziun, nun che quai pregiuditgeschia la gestiun da l'ovra cuminaivla.

¹ Uschè ditg ch'i n'è betg cumprovà insatge auter, vala sco autur, tgi che vegn numnà cun l'agen num, cun in pseudonim u cun in segn caracteristic sin ils exemplars da las ovras u a chaschun da la publicaziun da l'ovra.

² Uschè ditg che l'autur na vegn betg numnà u resta nunenconuschent en cas d'in pseudonim u d'in segn caracteristic, po pratitgar il dretg d'autur quella persuna che ha edì l'ovra. Sch'er quella persuna na vegn betg numnada, po pratitgar il dretg d'autur quella persuna che ha publitgà l'ovra.

¹ Il dretg d'autur è transferibel ed ertaivel.

² Il transferiment d'in dretg cuntegnì en il dretg d'autur cumpiglia il transferiment d'auters dretgs parzials mo, sche quai è fixà.

³ Il transferiment da la proprietad d'in exemplar da l'ovra na cumpiglia er betg la cumpetenza d'utilisaziun cun tut ils dretgs d'autur, sch'i sa tracta da l'ovra originala.

Il patrun ha sulet il dretg d'exequir las cumpetenzas exclusivas d'utilisaziun d'in program da computer, sche quel vegn creà d'in lavurant cun exequir activitads da servetsch sco er cun ademplir obligaziuns contractualas.

A l'execuziun sfurzada èn suttamess ils dretgs numnads en l'artitgel 10 alineas 2 e 3 sco er en l'artitgel 11, sche l'autur als ha gia exequids e sche l'ovra è gia vegnida publitgada cun il consentiment da l'autur.

¹ Ovras publitgadas dastgan vegnir utilisadas per l'agen diever. Sco agen diever vala:

a.

mintga utilisaziun da l'ovra en il sectur persunal ed en in circul da persunas ch'èn colliadas stretgamain ina cun l'autra, sco parents u amis;

b.

mintga utilisaziun d'ovras tras la persuna d'instrucziun per l'instrucziun en classa;

c.

la reproducziun d'exemplars d'ovras en manaschis, en administraziuns publicas, en instituts, en cumissiuns ed en organisaziuns sumegliantas per l'infurmaziun interna u per la documentaziun.

² Tgi che ha il dretg d'utilisar l'ovra per l'agen diever dastga - cun resalva da l'alinea 3 - laschar producir l'ovra er da terzs; sco terzs en il senn da quest alinea valan er bibliotecas, autras instituziuns publicas e manaschis che mettan a disposiziun apparats da copiar a lur utilisaders.⁹

³ Ordaifer il circul privat tenor l'alinea 1 litera a n'èn betg admessas:¹⁰

a.

la reproducziun cumpletta u per gronda part cumpletta d'exemplars d'ovras che vegnan vendidas sin il martgà;

b.

la reproducziun d'ovras da l'art figurativ;

c.

la reproducziun da registraziuns graficas d'ovras musicalas;

d.

la registraziun da referats, da represchentaziuns u da preschentaziuns d'ina ovra sin portatuns, sin videos u sin purtaders da datas.

^3bis Reproducziuns che vegnan producidas cun consultar ovras rendidas accessiblas legalmain, èn exceptadas da las restricziuns per l'agen diever ch'èn cuntegnidas en quest artitgel sco er dals dretgs da bunificaziun tenor l'artitgel 20.¹¹

⁴ Quest artitgel na vegn betg applitgà per programs da computer.

¹ L'utilisaziun da l'ovra en in circul privat tenor l'artitgel 19 alinea 1 litera a na sto betg vegnir bunifitgada cun resalva da l'alinea 3.

² Tgi che reproducescha ovras en ina moda u l'autra per l'agen diever tenor l'artitgel 19 alinea 1 litera b u litera c u sco terz tenor l'artitgel 19 alinea 2, debitescha a l'autur ina bunificaziun per quai.

³ Tgi che producescha u importa cassettas vidas ed auters portatuns u videos adattads per registrar ovras, debitescha a l'autur ina bunificaziun per l'utilisaziun da l'ovra tenor l'artitgel 19.

⁴ Ils dretgs da bunificaziun pon vegnir fatgs valair mo da societads da gestiun admessas.

¹ Tgi che ha il dretg da duvrar in program da computer, po sa procurar u sa laschar procurar da terzas persunas - cun decifrar il code dal program - las infurmaziuns necessarias via interfatschas cun programs sviluppads independentamain.

² Las infurmaziuns sin las interfatschas, ch'èn vegnidas obtegnidas cun decifrar il code dal program, dastgan mo vegnir utilisadas per sviluppar, per mantegnair sco er per duvrar programs da computer interoperabels, uschenavant che ni l'evaluaziun normala dal program ni ils interess legals dals titulars dal dretg vegnan pregiuditgads en moda insupportabla.

¹ Ils dretgs da laschar percepir a medem temp e senza modificaziuns ovras emessas u da las retransmetter en il rom d'in transferiment, pon vegnir fatgs valair mo da societads da gestiun admessas.

² Permess èsi da retransmetter ovras via installaziuns tecnicas ch'èn destinadas ad in pitschen dumber da retschaviders, sco installaziuns d'ina chasa da pliras famiglias u d'ina surbajegiada serrada.

³ Quest artitgel na po betg vegnir applitgà per il transferiment da programs da televisiun ad abunament e da programs che na pon vegnir retschavids nagliur en Svizra.

¹ Ils suandants dretgs da las ovras d'archiv d'interpresas d'emissiun tenor la Lescha federala dals 24 da mars 2006¹³ davart radio e televisiun pon - cun resalva da l'alinea 3 - vegnir fatgs valair mo sur societads da gestiun admessas:

a.

il dretg d'emetter l'ovra d'archiv senza modificaziuns, cumpletta u en furma d'in extract;

b.

il dretg da render accessibla l'ovra d'archiv senza modificaziuns, cumpletta u en furma d'in extract uschia, che persunas han access ad ella en lieus ed ad uras da lur tscherna;

c.

ils dretgs da reproducziun ch'èn necessaris per l'utilisaziun tenor las literas a e b.

² Sco ovra d'archiv d'ina interpresa d'emissiun vala in'ovra fixada sin in portatun u sin in video, ch'è vegnida producida da l'interpresa d'emissiun sezza, sut la responsabladad redacziunala da l'interpresa d'emissiun e cun agens meds finanzials dad ella u alura da terzs per incumbensa da l'interpresa d'emissiun ed a ses custs, e da la quala l'emprima emissiun datescha almain dapi 10 onns. Sch'i èn integradas en l'ovra d'archiv autras ovras u parts d'ovras, vala l'alinea 1 er per far valair ils dretgs da questas ovras u da questas parts d'ovras, nun ch'ellas determineschian considerablamain la particularitad da l'ovra d'archiv.

³ Sch'igl è vegnida fatga ina cunvegna contractuala avant l'emprima emissiun u entaifer 10 onns suenter quella davart ils dretgs tenor l'alinea 1 e davart lur bunificaziun, valan exclusivamain las disposiziuns da la cunvegna contractuala. Per ils dretgs da las interpresas d'emissiun tenor l'artitgel 37 na vegn l'alinea 1 betg applitgà. Las interpresas d'emissiun ed ils terzs cun dretg èn - sin dumonda - obligads d'infurmar las societads da gestiun davart las cunvegnas contractualas.

¹ In'ovra vala sco orfna, sch'ils titulars dals dretgs da l'ovra èn nunenconuschents u nunchattabels, suenter ch'els èn vegnids retschertgads cun lavur e custs raschunaivels.

² Ils dretgs tenor l'artitgel 10 sin l'ovra orfna pon vegnir fatgs valair mo sur societads da gestiun admessas, sche l'ovra vegn utilisada sin basa d'in exemplar che:

a.

sa chatta en inventaris da bibliotecas, d'instituziuns da furmaziun, da museums, da collecziuns e d'archivs publics u accessibels a la publicitad ubain en inventaris d'archivs d'interpresas d'emissiun; e

b.

è vegnì producì, reproducì u rendì accessibel en Svizra ubain surdà ad ina instituziun en il senn da la litera a.

³ Ovras orfnas valan sco publitgadas. Sch'i èn integradas en in'ovra orfna autras ovras u parts d'ovras, vala l'alinea 2 er per far valair ils dretgs da questas ovras u da questas parts d'ovras, nun ch'ellas determineschian considerablamain la particularitad da l'exemplar.

⁴ Per utilisar l'ovra pon ils titulars dal dretg pretender ina bunificaziun. Quella na dastga betg surpassar la bunificaziun previsa en il reglament da repartiziun da la societad da gestiun correspundenta per l'utilisaziun da l'ovra.

⁵ Per utilisar in dumber pli grond d'ovras sin basa d'exemplars or d'inventaris tenor l'alinea 2 litera a vegn applitgà l'artitgel 43a.

⁶ Sche nagins titulars da dretgs na s'annunzian entaifer 10 onns, vegn l'entir retgav da la gestiun duvrà - en divergenza da l'artitgel 48 alinea 2 - per il provediment social e per la promoziun adequata da la cultura.

¹ Il dretg da render accessiblas en emissiuns da radio e da televisiun ovras musicalas betg teatralas ch'èn cuntegnidas en l'emissiun, po vegnir fatg valair mo da societads da gestiun admessas, sche:

a.

l'emissiun è vegnida producida principalmain da l'interpresa d'emissiun sezza u sin sia incumbensa;

b.

l'emissiun era deditgada ad in tema betg musical che predominava la musica e ch'era vegnì annunzià avant l'emissiun en moda usitada; e

c.

cun render accessibla la musica u cun purschidas online da terzs na vegn betg pregiuditgada la vendita da musica sin portatuns.

² Mo societads da gestiun admessas pon far valair - sut las premissas tenor l'alinea 1 - il dretg da reproducziun cun l'intent da render accessibla la musica.

¹ Sch'ina ovra musicala cun u senza text è vegnida registrada en Svizra u a l'exteriur sin portatuns e sch'ella è vegnida offrida, vendida u derasada autramain en questa furma cun il consentiment da l'autur, pon tut ils producents da portatuns, che han in domicil manaschial en Svizra, dumandar dal titular d'in dretg d'autur - cunter indemnisaziun - la medema permissiun per la Svizra.

² Il Cussegl federal po metter ord vigur la cundiziun d'avair in domicil manaschial en Svizra per ils appartegnents da pajais che concedan dretg reciproc.

¹ Per garantir ch'ina ovra vegnia mantegnida, dastga vegnir fatga ina copia da quella. In exemplar da l'ovra sto vegnir tegnì en salv en in archiv che n'è betg accessibel a la publicitad e sto vegnir designà sco exemplar d'archiv.

^1bis Bibliotecas, instituziuns da furmaziun, museums, collecziuns ed archivs publics u accessibels a la publicitad dastgan producir ils exemplars da l'ovra ch'èn necessaris per garantir e per mantegnair lur inventaris, nun che questas reproducziuns hajan in intent economic u commerzial.¹⁶

² Tgi che ha il dretg da duvrar in program da computer, dastga far ina copia da segirezza da quel; quest dretg na po betg vegnir excludì tras contract.

La reproducziun ad interim d'ina ovra è admissibla, sch'ella:

a.

è mumentana u accumpagnanta;

b.

represchenta ina part integrala ed essenziala d'in process tecnic;

c.

serva exclusivamain a la transmissiun en ina rait tranter terzs tras in intermediatur u tras in'utilisaziun legala da l'ovra; e

d.

n'ha nagina impurtanza economica autonoma.

¹ Sche portatuns e videos ch'èn d'obtegnair commerzialmain, vegnan utilisads per l'emissiun tras interpresas d'emissiun ch'èn suttamessas a la Lescha federala dals 24 da mars 2006¹⁹ davart radio e televisiun, po vegnir fatg valair il dretg da reproducziun d'ovras musicalas betg teatralas mo d'ina societad da gestiun admessa.

² Reproducziuns producidas tenor l'alinea 1 na dastgan ni vegnir vendidas ni vegnir derasadas autramain; ellas ston vegnir producidas da l'interpresa d'emissiun cun agens meds finanzials. Ellas ston puspè vegnir stizzadas, cur ch'ellas han ademplì lur intent. L'artitgel 11 resta resalvà.

¹ In'ovra dastga vegnir reproducida, derasada e rendida accessibla en ina furma accessibla per persunas cun impediments, sche quellas na pon betg percepir l'ovra en sia furma gia publitgada u la pon percepir mo sut cundiziuns engrevgiantas.

² Reproducziuns tenor l'alinea 1 dastgan vegnir producidas, derasadas e rendidas accessiblas mo per il diever tras persunas cun impediments e senza intent da rendita.

³ Reproducziuns tenor l'alinea 1 e reproducziuns ch'èn vegnidas producidas tenor ina restricziun legala correspundenta d'in auter pajais dastgan vegnir importadas ed exportadas, sch'ellas:

a.

vegnan utilisadas unicamain da persunas cun impediments; e

b.

èn vegnidas acquistadas d'ina organisaziun senza finamira da rendita che metta a disposiziun a persunas cun impediments - sco ina da sias activitads principalas - servetschs en ils secturs da la furmaziun, da la scolaziun pedagogica, da la lectura adattada u da l'access ad infurmaziuns.

⁴ L'autur ha il dretg d'ina bunificaziun per reproducir, per derasar e per render accessibla in'ovra en ina furma accessibla per persunas cun impediments, nun ch'i sa tractia mo da la producziun da singuls exemplars da l'ovra.

⁵ Il dretg da bunificaziun po vegnir fatg valair mo d'ina societad da gestiun admessa.

¹ Per intents da la perscrutaziun scientifica èsi admissibel da reproducir in'ovra, sche la reproducziun è necessaria per applitgar ina procedura tecnica e sch'igl exista in access giuridicamain admissibel a las ovras ch'èn da reproducir.

² Cur che la perscrutaziun scientifica è finida, dastgan las reproducziuns producidas en il rom da quest artitgel vegnir conservadas per motivs d'archivaziun e da segirada.

³ Quest artitgel na vala betg per la reproducziun da programs da computer.

¹ Sin las glistas che servan a cataloghisar ed ad intermediar lur inventaris dastgan bibliotecas, instituziuns da furmaziun, museums, collecziuns ed archivs publics u accessibels a la publicitad reproducir curts extracts da las ovras u dals exemplars da l'ovra che sa chattan en lur inventaris, uschenavant che quai na pregiuditgescha betg la gestiun normala da l'ovra.

² Sco curts extracts valan en spezial las suandantas parts d'ovras:

a.

per ovras linguisticas litteraras, scientificas ed autras:

1.

la cuverta sco maletg da pitschen format cun pitschna dissoluziun,

2.

il titel,

3.

il frontispizi,

4.

il cuntegn e la bibliografia,

5.

las paginas da la cuverta,

6.

resumaziuns d'ovras scientificas;

b.

per ovras musicalas ed autras ovras acusticas sco er per ovras cinematograficas ed autras ovras audiovisualas:

1.

la cuverta sco maletg da pitschen format cun pitschna dissoluziun,

2.

in extract ch'ils titulars dal dretg han rendì accessibel a la publicitad,

3.

in curt extract cun dissoluziun reducida u cun format reducì;

c.

per ovras da l'art figurativ, particularmain da la pictura, da la sculptura e da la grafica, sco er per ovras fotograficas ed autras ovras visualas: la vista totala da las ovras sco maletg da pitschen format cun pitschna dissoluziun.

¹ Ovras publitgadas dastgan vegnir citadas, sch'il citat serva sco explicaziun, sco infurmaziun u sco illustraziun e sche quest intent giustifitgescha la dimensiun dal citat.

² Il citat sco tal e la funtauna ston vegnir inditgads. Sch'i vegn renvià a l'autur en la funtauna, sto quel medemamain vegnir inditgà.

In'ovra che sa chatta en ina collecziun accessibla a la publicitad, dastga vegnir reproducida en in catalog edì da l'administraziun da la collecziun; la medema regulaziun vala per l'ediziun da catalogs da fieras e d'aucziuns.

¹ In'ovra che sa chatta per adina sin vias e sin plazzas ch'èn accessiblas a la publicitad, dastga vegnir reproducida; la reproducziun dastga vegnir offrida, vendida, emessa u derasada autramain.

² La reproducziun na dastga betg esser traidimensiunala e na dastga er betg vegnir utilisada per il medem intent sco l'original.

¹ Sch'igl è necessari per rapportar davart eveniments actuals, dastgan vegnir registradas, reproducidas, preschentadas, emessas, derasadas u laschadas percepir autramain las ovras percepidas en quest connex.

² Cun l'intent d'infurmar davart dumondas actualas dastgan vegnir reproducids, derasads ed emess u retransmess curts extracts d'artitgels da pressa sco er da rapports da radio e da televisiun; l'extract e la funtauna ston vegnir inditgads. Sch'i vegn renvià a l'autur en la funtauna, sto quel medemamain vegnir inditgà.

¹ In'ovra è protegida tenor il dretg d'autur, uschespert ch'ella è creada, e quai independentamain dal fatg, sch'ella è fixada sin in purtader u betg.

² La protecziun s'extingua:

a.

per programs da computer, 50 onns suenter la mort da l'autur;

a^bis.²³

per reproducziuns fotograficas e per reproducziuns d'objects traidimensiunals producidas cun ina procedura sumeglianta a la fotografia, sche las reproducziuns n'han betg in caracter individual, 50 onns suenter la producziun;

b.

per tut las autras ovras, 70 onns suenter la mort da l'autur.

³ Sch'ins sto supponer che l'autur saja mort dapi passa 50 respectivamain 70 onns²⁴, n'exista nagina protecziun pli.

⁴ Per reproducziuns fotograficas e per reproducziuns d'objects traidimensiunals producidas cun ina procedura sumeglianta a la fotografia n'èn ils artitgels 30 e 31 betg applitgabels, sche las reproducziuns n'han betg in caracter individual.²⁵

¹ Sche pliras persunas han contribuì a la creaziun d'ina ovra (art. 7), s'extingua la protecziun:

a.

per programs da computer, 50 onns suenter la mort da la persuna defuncta sco ultima²⁶;

b.

per tut las autras ovras, 70 onns suenter la mort da la persuna defuncta sco ultima²⁷.

² Sche las singulas contribuziuns sa laschan separar, s'extingua la protecziun da las contribuziuns utilisablas independentamain 50 respectivamain 70 onns²⁸ suenter la mort da l'autur respectiv.

³ En cas da films e d'autras ovras audiovisualas vegn prendì en consideraziun mo il reschissur per calcular la durada da la protecziun.

¹ Sche l'autur d'ina ovra è nunenconuschent, s'extingua sia protecziun 70 onns suenter la publicaziun u, sche l'ovra è vegnida publitgada en furniziuns, 70 onns suenter l'ultima furniziun.

² Sch'i vegn generalmain enconuschent avant la scadenza da quest termin da protecziun, tge persuna²⁹ che ha creà l'ovra, s'extingua la protecziun:

a.

per programs da computer 50 onns suenter sia mort³⁰;

b.

per tut las autras ovras 70 onns suenter sia mort³¹.

La durada da la protecziun vegn calculada a partir dals 31 da december da quel onn, en il qual è capità l'eveniment decisiv per la calculaziun.

¹ A la surveglianza da la Confederaziun èn suttamess:

a.

la gestiun dals dretgs exclusivs per l'inscenaziun e per l'emissiun d'ovras da musica betg teatralas e per la producziun da portatuns u da videos da talas ovras;

a^bis.⁴⁶

il far valair dretgs exclusivs tenor ils artitgels 22, 22a-22c e 24b;

b.⁴⁷

il far valair ils dretgs da bunificaziun tenor ils artitgels 13, 13a, 20, 24c, 35 e 35a.

² Il Cussegl federal po suttametter ulteriurs secturs da gestiun a la surveglianza da la Confederaziun, sche l'interess public pretenda quai.

³ La gestiun persunala dals dretgs exclusivs tenor l'alinea 1 litera a tras l'autur u tras ses ertavels n'è betg suttamessa a la surveglianza da la Confederaziun.

Tgi che gestiunescha dretgs ch'èn suttamess a la surveglianza da la Confederaziun dovra ina permissiun da l'Institut da proprietad intellectuala (IPI)⁴⁸.

¹ Permissiuns survegnan mo societads da gestiun:

a.

ch'èn vegnids fundadas tenor dretg svizzer, che han lur sedia en Svizra e che mainan lur fatschentas da la Svizra anora;

b.

che han sco intent principal la gestiun da dretgs d'autur u d'auters dretgs da protecziun parents;

c.

ch'èn avertas per tut ils titulars da dretgs;

d.

che concedan als auturs ed als artists interpretants in dretg da cundecisiun adequat;

e.

che garanteschan l'observaziun da las prescripziuns legalas, particularmain sin fundament da lur statuts;

f.

che laschan spetgar ina gestiun efficazia ed economica.

² Per regla vegn concedida ina permissiun mintgamai mo ad ina societad per categoria d'ovras e per ils dretgs da protecziun parents.

¹ La permissiun vegn concedida per 5 onns; ella po mintgamai vegnir prolungada per 5 ulteriurs onns.

² La concessiun, la prolungaziun, la midada, la privaziun e la nunprolungaziun da la permissiun vegnan publitgadas.

¹ Per utilisar in dumber pli grond d'ovras publitgadas e da prestaziuns protegidas po ina societad da gestiun exercitar ils dretgs exclusivs er per titulars da dretgs ch'ella na represchenta betg, en cas ch'ella n'è betg suttamessa a l'obligaziun da permissiun tenor l'artitgel 41 per gestiunar quests dretgs, uschenavant che las suandantas premissas èn ademplidas:

a.

l'utilisaziun licenziada na pregiuditgescha betg la gestiun normala d'ovras e da prestaziuns protegidas;

b.

en il champ d'applicaziun da la licenza represchenta la societad da gestiun in dumber relevant da titulars da dretgs.

² Ovras che sa chattan en inventaris da bibliotecas, d'archivs u d'autras instituziuns da memoria publicas u accessiblas a la publicitad valan sco publitgadas en il senn da l'alinea 1.

³ Las societads da gestiun rendan enconuschent en moda adequata las licenzas collectivas extendidas avant lur entrada en vigur, en spezial cun publitgar quellas en in lieu facilmain accessibel e chattabel.

⁴ Ils titulars da dretgs ed ils titulars d'ina licenza exclusiva pon pretender che la societad da gestiun, che conceda ina licenza collectiva extendida, excludia lur dretgs d'ina tscherta licenza collectiva; l'applitgabladad da questa licenza collectiva sin las ovras u sin las prestaziuns protegidas respectivas finescha cun l'entrada da la decleraziun d'exclusiun.

⁵ Per las licenzas collectivas extendidas n'èn applitgablas ni las prescripziuns davart las tariffas (art. 46 e 47) ni las prescripziuns davart la surveglianza da las tariffas (art. 55-60); percunter ston retgavs da questas gestiuns vegnir repartids tenor ils princips da l'artitgel 49. La gestiun sin basa da quest artitgel è suttamessa a l'obligaziun da dar infurmaziuns e da render quint (art. 50) ed a la surveglianza da la gestiun (art. 52-54).

Las societads da gestiun èn obligadas envers ils titulars dals dretgs da far valair ils dretgs che tutgan a lur champ d'activitad.

¹ Las societads da gestiun ston manar lur fatschentas tenor ils princips d'ina administraziun ordinada ed economica.

² Ellas ston procurar che la gestiun haja lieu tenor reglas fixas e tenor il princip dal tractament egual.

³ Ellas na dastgan betg prender en mira in agen gudogn.

⁴ Sche pussaivel fan ellas contracts da reciprocadad cun societads da gestiun da l'exteriur.

¹ Las societads da gestiun fixeschan tariffas per cuvrir las bunificaziuns ch'ellas pretendan.

² Ellas contracteschan davart la concepziun da las singulas tariffas cun las associaziuns che represchentan ils utilisaders.

³ Ellas suttamettan las tariffas a la Cumissiun arbitradra (art. 55) per l'approvaziun e publitgeschan las tariffas approvadas.

¹ Sche pliras societads da gestiun èn activas en il medem sectur d'utilisaziun, fixeschan ellas ina tariffa cuminaivla tenor princips unitars per mintga utilisaziun d'ovras u da preschentaziuns e designeschan ina dad ellas sco post d'incassament cuminaivel.

² Il Cussegl federal po decretar ulteriuras prescripziuns concernent lur collavuraziun.

¹ Las societads da gestiun èn obligadas da fixar in reglament da repartiziun e da suttametter quel al IPI per l'approvaziun.⁵⁰

² Cun il consentiment da l'organ suprem da la societad pon parts dal retgav da gestiun vegnir duvradas per il provediment social e per ina promoziun adequata da la cultura.

¹ Las societads da gestiun ston reparter il retgav da gestiun a norma dal retgav da las singulas ovras e preschentaziuns. Ellas ston far tut ils sforzs pretendibels per eruir las persunas autorisadas.

² Sche questa repartiziun è colliada cun custs insupportabels, dastgan las societads da gestiun stimar la dimensiun dal retgav; las stimaziuns ston sa basar sin aspects controllabels ed adequats.

³ Il retgav sto vegnir repartì tranter ils titulars oriunds dal dretg ed autras persunas autorisadas uschia, ch'i resta per regla ina part adequata als auturs ed als artists interpretants. In'autra repartiziun è admessa, sch'ils custs fissan insupportabels.

⁴ Il reglament da repartiziun n'annullescha betg cunvegnas contractualas dals titulars oriunds dal dretg cun terzs.

Las societads da gestiun ston dar al IPI⁵¹ tut las infurmaziuns e metter a disposiziun tut ils documents ch'èn necessaris per exequir la surveglianza sco er preschentar mintga onn in rapport da gestiun davart lur activitads.

¹ Sch'igl è pretendibel, ston ils utilisaders d'ovras dar a las societads da gestiun - en ina furma che correspunda al stadi da la tecnica e che permetta d'elavurar automaticamain las datas - tut las infurmaziuns che quellas dovran per concepir e per applitgar las tariffas sco er per reparter il retgav.⁵²

^1bis Las societads da gestiun èn autorisadas da barattar ina cun l'autra las infurmaziuns ch'ellas han survegnì tenor quest artitgel, uschenavant che quai è necessari per exequir lur activitad.⁵³

² Las societads da gestiun èn obligadas da mantegnair secrets da fatschenta.

Tgi che cumprova in interess legitim, po purtar plant per laschar constatar, sch'in dretg u ina relaziun giuridica tenor questa lescha è avant maun u betg.

¹ Tgi che vegn violà u periclità en ses dretg d'autur u en ses dretg da protecziun parents, po pretender da la dretgira:

a.

da scumandar ina violaziun smanatschanta;

b.

d'eliminar ina violaziun existenta;

c.⁵⁷

d'obligar la partida accusada d'inditgar la derivanza e la quantitad dals objects ch'èn vegnids producids u mess en circulaziun en moda illegala e che sa chattan en ses possess sco er da numnar ils adressats e la dimensiun d'ina surdada a cumpraders commerzials.

^1bis Ina periclitaziun da dretgs d'autur u da dretgs da protecziun parents è avant maun en spezial en cas d'acziuns tenor ils artitgels 39a alineas 1 e 3, 39c alineas 1 e 3 sco er en cas da violaziun da las obligaziuns tenor l'artitgel 39d.⁵⁸

² Resalvads restan ils plants a norma dal Dretg d'obligaziuns⁵⁹ sin indemnisaziun dal donn, sin satisfacziun sco er sin consegna d'in gudogn tenor las disposiziuns davart la gestiun senza mandat.

³ Tgi che dispona d'ina licenza exclusiva, po sez purtar plant, nun che quai saja vegnì exclus explicitamain en il contract da licenza. Tut ils titulars da licenzas pon sa participar ad in plant da violaziun per far valair lur agen donn.⁶⁰

¹ La dretgira po ordinar la confiscaziun e la gestiun u la destrucziun dals objects producids en moda illegala ubain dals indrizs, apparats ed ulteriurs meds che servan principalmain a lur producziun.⁶¹

² Exceptadas èn ovras architectonicas gia realisadas.

Tgi che dumonda l'ordinaziun da mesiras preventivas po pretender en spezial che la dretgira ordineschia mesiras:

a.

per segirar las cumprovas;

b.

per eruir la derivanza d'objects producids u mess en circulaziun en moda illegala;

c.

per mantegnair il stadi existent; u

d.

per exequir da maniera provisorica pretensiuns d'omissiun e d'eliminaziun.

Sin dumonda da la partida che ha gudagnà po la dretgira ordinar che la sentenzia vegnia publitgada sin donn e cust da l'autra partida. La dretgira fixescha la moda e la dimensiun da la publicaziun.

Las dretgiras tramettan gratuitamain al IPI ina copia cumpletta da sentenzias cun vigur legala.

¹ Sin dumonda da la persuna ch'è vegnida violada en ses dretgs vegn chastià cun in chasti da detenziun da fin 1 onn u cun in chasti pecuniar, tgi che fa intenziunadamain e senza dretg il suandant:⁶⁵

a.

utilisescha in'ovra sut ina faussa designaziun u sut ina designaziun differenta da quella che l'autur ha fixà;

b.

publitgescha in'ovra;

c.

mida in'ovra;

d.

utilisescha in'ovra per crear in'ovra da segund maun;

e.

producescha en ina moda u l'autra exemplars d'ina ovra;

f.

offra, venda u derasa autramain exemplars d'ina ovra;

g.

recitescha, inscenescha u preschenta directamain u cun meds d'ina moda u l'autra in'ovra u lascha percepir in'ovra en in auter lieu;

g^bis.⁶⁶

renda accessibla in'ovra cun meds d'ina moda u l'autra uschia, che persunas han access a quella en lieus ed ad uras da lur tscherna;

h.

emetta in'ovra via radio, via televisiun u via meds sumegliants, er via conducts, u retransmetta in'ovra gia emessa cun agid d'indrizs tecnics, dals quals il purtader n'è betg l'interpresa d'emissiun oriunda;

i.⁶⁷

lascha percepir in'ovra ch'è vegnida rendida accessibla, emessa u retransmessa;

k.⁶⁸

refusa d'inditgar a l'autoritad cumpetenta la derivanza e la quantitad dals objects ch'èn vegnids producids u mess en circulaziun en moda illegala e che sa chattan en ses possess sco er da numnar ils adressats e la dimensiun d'ina surdada a cumpraders commerzials;

l.

affitta in program da computer.

² Tgi che ha commess a titel professiunal in fatg tenor l'alinea 1, vegn persequità d'uffizi. Il chastì è in chasti da detenziun da fin 5 onns u in chasti pecuniar. …^{69 70}

Tgi che tralascha intenziunadamain d'inditgar la funtauna utilisada e - sche quel vegn numnà en la funtauna - l'autur en ils cas previs da la lescha (art. 25 e 28), vegn chastià cun ina multa sin dumonda da la persuna ch'è vegnida violada en ses dretgs.

¹ Sin dumonda da la persuna ch'è vegnida violada en ses dretgs vegn chastià cun in chasti da detenziun da fin 1 onn u cun in chasti pecuniar, tgi che fa intenziunadamain e senza dretg il suandant:⁷¹

a.

emetta ina preschentaziun d'ina ovra via radio, via televisiun u via proceduras sumegliantas, er via conducts;

b.

registrescha ina preschentaziun d'ina ovra sin portatuns, sin videos u sin purtaders da datas;

c.

offra, venda u derasa autramain copias d'ina preschentaziun d'ina ovra;

d.

retransmetta ina preschentaziun d'ina ovra gia emessa cun agid d'indrizs tecnics, dals quals il purtader n'è betg l'interpresa d'emissiun oriunda;

e.⁷²

lascha percepir ina preschentaziun d'ina ovra ch'è vegnida rendida accessibla, emessa u retransmessa;

e^bis.⁷³

utilisescha ina preschentaziun d'ina ovra sut in fauss num d'artist u sut in num d'artist different da quel che l'artist interpretant ha fixà;

e^ter.⁷⁴

renda accessibel ina preschentaziun d'ina ovra, in portatun, in video u in'emissiun cun meds d'ina moda u l'autra uschia, che persunas han access a quella u a quel en lieus ed ad uras da lur tscherna;

f.

reproducescha in portatun u in video, offra, venda u derasa autramain ils exemplars reproducids;

g.

retransmetta in'emissiun;

h.

registrescha in'emissiun sin portatuns, sin videos u sin purtaders da datas;

i.

reproducescha in'emissiun registrada sin portatuns, sin videos u sin purtaders da datas u derasa tals exemplars reproducids;

k.⁷⁵

refusa d'inditgar a l'autoritad cumpetenta la derivanza e la quantitad dals purtaders d'ina prestaziun protegida tenor ils artitgels 33, 36 u 37 ch'èn vegnids producids u mess en circulaziun en moda illegala e che sa chattan en ses possess sco er da numnar ils adressats e la dimensiun d'ina surdada a cumpraders commerzials.

² Tgi che ha commess a titel professiunal in fatg tenor l'alinea 1, vegn persequità d'uffizi. Il chastì è in chasti da detenziun da fin 5 onns u in chasti pecuniar. …^{76 77}

¹ Sin dumonda da la persuna ch'è vegnida violada en sia protecziun vegn chastià cun ina multa, tgi che fa intenziunadamain e senza dretg il suandant:

a.

guntgescha mesiras tecnicas efficazias tenor l'artitgel 39a alinea 2 cun l'intenziun d'utilisar ovras u auters objects protegids en moda legalmain scumandada;

b.

fabritgescha, importa, offra, venda u derasa autramain, affitta, surlascha per il diever, fa reclama u posseda per intents da gudogn indrizs, products u parts integralas ubain furnescha servetschs che:

1.

èn l'object d'ina promoziun da vendita, d'ina reclama u d'ina commerzialisaziun cun l'intent da guntgir mesiras tecnicas efficazias,

2.

han - abstrahà da guntgir mesiras tecnicas efficazias - mo in intent u in niz economic limità, u

3.

vegnan sviluppads, fabritgads, adattads u furnids principalmain per pussibilitar u per facilitar da guntgir mesiras tecnicas efficazias;

c.

allontanescha u mida infurmaziuns electronicas per far valair dretgs d'autur u dretgs da protecziun parents tenor l'artitgel 39c alinea 2;

d.

reproducescha, importa, offra, venda u derasa autramain, emetta, lascha percepir u renda accessibels ovras u auters objects protegids, dals quals èn vegnidas allontanadas u midadas infurmaziuns per far valair dretgs tenor l'artitgel 39c alinea 2.

² Tgi che ha commess a titel professiunal in fatg tenor l'alinea 1, vegn persequità d'uffizi. Il chastì è in chasti da detenziun da fin 1 onn u in chasti pecuniar.

³ Acziuns tenor l'alinea 1 literas c e d èn mo chastiablas, sch'ellas vegnan commessas d'ina persuna che sa u sto savair tenor las circumstanzas ch'ella incitescha, pussibilitescha, facilitescha u dissimulescha qua tras la violaziun d'in dretg d'autur u d'in dretg da protecziun parent.

Tgi che fa valair senza la permissiun necessaria (art. 41) dretgs d'autur u dretgs da protecziun parents, dals quals la gestiun è suttamessa a la surveglianza da la Confederaziun (art. 40), vegn chastià cun multa.

Per cuntravenziuns commessas en interpresas, tras incumbensads e tras sumegliants èn applitgabels ils artitgels 6 e 7 da la Lescha federala dals 22 da mars 1974⁸⁰ davart il dretg penal administrativ.

Ovras architectonicas gia realisadas na pon betg vegnir confiscadas tenor l'artitgel 69 dal Cudesch penal svizzer⁸².

¹ La persecuziun penala è chaussa dals chantuns.

² Cuntravenziuns tenor l'artitgel 70 vegnan persequitadas e giuditgadas dal IPI tenor la Lescha federala dals 22 da mars 1974⁸³ davart il dretg penal administrativ.

¹ Cunter las disposiziuns dal IPI e da la Cumissiun arbitradra poi vegnir fatg recurs tar il Tribunal administrativ federal.

² La procedura da recurs davant il Tribunal administrativ federal sa drizza tenor la Lescha federala dals 17 da zercladur 2005⁸⁵ davart il Tribunal administrativ federal e tenor la Lescha federala dals 20 da december 1968⁸⁶ davart la procedura administrativa (LFPA). Resalvadas restan las suandantas excepziuns:

a.

recurs cunter disposiziuns da la Cumissiun arbitradra n'han nagin effect suspensiv; ina concessiun da l'effect suspensiv en il cas singul è exclusa;

b.

l'artitgel 53 LFPA n'è betg applitgabel;

c.

per inoltrar ina consultaziun fixescha il Tribunal administrativ federal in termin da maximalmain 30 dis; quest termin na po betg vegnir prolungà;

d.

in'ulteriura correspundenza tenor l'artitgel 57 alinea 2 LFPA n'ha per regla betg lieu.⁸⁷

¹ L'Uffizi federal da la duana e da la segirezza dals cunfins (UDSC) è autorisà d'infurmar ils titulars dals dretgs d'autur u dals dretgs da protecziun parents sco er las societads da gestiun admessas, sch'i vegn suspectà ch'i dettia proximamain in apport d'ina rauba en il territori da duana u or dal territori da duana e sche la derasaziun da questa rauba cuntrafa a la legislaziun ch'è en vigur en Svizra davart il dretg d'autur u davart ils dretgs da protecziun parents.

² En quest cas è el autorisà da retegnair la rauba durant 3 dis da lavur, per che las persunas autorisadas possian far ina dumonda tenor l'artitgel 76.

¹ Sche titulars da dretgs d'autur u da dretgs da protecziun parents respectivamain titulars da licenzas cun dretg da purtar plant u ina societad da gestiun admessa han indizis concrets, ch'i dettia proximamain in apport d'ina rauba en il territori da duana u or dal territori da duana e sche la derasaziun da questa rauba cuntrafa a la legislaziun ch'è en vigur en Svizra davart il dretg d'autur u davart ils dretgs da protecziun parents, pon els pretender en scrit dal UDSC ch'el refusia da dar liber la rauba.

² A medem temp pon ils petents pretender en scrit, che la rauba vegnia destruida:

a.

en la procedura ordinaria (art. 77c-77h); u

b.

en la procedura simplifitgada (art. 77h^bis), sch'i sa tracta d'ina spediziun pitschna.

³ En la dumonda tenor l'alinea 2 pon els pretender che la rauba vegnia surdada ad els, per ch'els possian destruir sezs la rauba.

⁴ La dumonda tenor l'alinea 2 litera a na chaschuna betg ina prolungaziun dals termins tenor l'artitgel 77 alineas 3 e 4 per effectuar mesiras preventivas.

⁵ Il Cussegl federal fixescha, tge che vala sco spediziun pitschna; en quest connex resguarda el en spezial il dumber d'unitads ch'èn cuntegnidas en ina spediziun.

⁶ Ils petents ston furnir tut las indicaziuns ch'els han a disposiziun e ch'il UDSC dovra per pudair decider davart la dumonda, particularmain ina descripziun exacta da la rauba.

⁷ Il UDSC decida definitivamain davart la dumonda. El po incassar ina taxa per cuvrir ils custs administrativs.

¹ Sch'il UDSC suspecta - sin basa d'ina dumonda d'agid tenor l'artitgel 76 alinea 1 - che l'apport da la rauba en il territori da duana u or dal territori da duana cuntrafetschia a la legislaziun ch'è en vigur en Svizra davart il dretg d'autur u davart ils dretgs da protecziun parents, lura:

a.

retegna el la rauba; e

b.

communitgescha quai d'ina vart al petent e da l'autra vart al declerant, al possessur u al proprietari da la rauba.

² Sch'ina dumonda da destruir spediziuns pitschnas (art. 76 al. 2 lit. b) è vegnida inoltrada ensemen cun la dumonda d'agid tenor l'artitgel 76 alinea 1, sa drizza la procedura unicamain tenor l'artitgel 77h^bis.

³ Il UDSC retegna la rauba durant maximalmain 10 dis da lavur suenter ch'il petent ha survegnì la communicaziun tenor l'alinea 1 litera b, per che quel possia effectuar mesiras preventivas.

⁴ En cas motivads po el retegnair la rauba durant maximalmain 10 ulteriurs dis da lavur.

⁵ En cas d'ina spediziun pitschna po el surdar al IPI la cumpetenza per la communicaziun tenor l'alinea 1 litera b e per ils ulteriurs pass da la procedura.

¹ Durant che la rauba vegn retegnida, è il UDSC⁹³ autorisà da surdar u da trametter al petent sin dumonda emprovas u musters per l'examinaziun u d'al permetter d'inspectar la rauba retegnida.

² Las emprovas u ils musters vegnan prelevads e tramess sin donn e cust dal petent.

³ Suenter che l'examinaziun è fatga, ston las emprovas u ils musters vegnir restituids, sche quai è raschunaivel. Sche las emprovas u ils musters restan tar il petent, èn els suttamess a las disposiziuns da la legislaziun da duana.

¹ Ensemen cun la communicaziun tenor l'artitgel 77 alinea 1 infurmescha il UDSC il declerant, il possessur u il proprietari da la rauba davart in'eventuala surdada d'emprovas u da musters respectivamain davart la pussaivladad d'ina inspecziun tenor l'artitgel 77a alinea 1.

² Per proteger ses secrets da fabricaziun u da fatschenta po il declerant, il possessur u il proprietari pretender dad esser preschent a chaschun da l'inspecziun.

³ Sin dumonda motivada dal declerant, dal possessur u dal proprietari po il UDSC refusar la surdada d'emprovas u da musters.

¹ …⁹⁷

² Sch'i vegn fatga ina dumonda da destruir la rauba, communitgescha il UDSC quai al declerant, al possessur u al proprietari da la rauba en il rom da la communicaziun tenor l'artitgel 77 alinea 1.

³ ...⁹⁸

¹ Per destruir la rauba dovri il consentiment dal declerant, dal possessur u dal proprietari.

² Il consentiment vala sco concedì, sch'il declerant, il possessur u il proprietari na refusa betg la destrucziun entaifer ils termins da l'artitgel 77 alineas 2 e 3.

Avant che destruir la rauba preleva il UDSC emprovas u musters e tegna en salv quels sco meds da cumprova en vista ad eventuals plants sin indemnisaziun dal donn.

¹ Sche la destrucziun da la rauba sa mussa sco nunmotivada, stat unicamain il petent bun per il donn resultà.

² Sch'il declerant, il possessur u il proprietari ha dà ses consentiment en scrit a la destrucziun, na resultan nagins dretgs d'indemnisaziun dal donn envers il petent, er betg sche la destrucziun sa mussa pli tard sco nunmotivada.

¹ La rauba vegn destruida sin donn e cust dal petent.

² Davart ils custs per prelevar e per tegnair en salv emprovas u musters tenor l'artitgel 77e decida la dretgira en connex cun il giudicament dals dretgs d'indemnisaziun dal donn tenor l'artitgel 77f alinea 1.

¹ Sch'igl è da temair che la retenziun da la rauba chaschunia in donn, po il UDSC suttametter la retenziun a la cundiziun ch'il petent al dettia ina decleraziun da responsabladad. Empè da questa decleraziun po il UDSC pretender dal petent - en cas motivads - ina garanzia adequata.

² Il petent sto remplazzar il donn ch'è resultà cun retegnair la rauba e cun prelevar emprovas u musters, sche mesiras preventivas na vegnan betg ordinadas u sa mussan sco nunmotivadas.

¹ Il UDSC retegna ina rauba, sch'i sa tracta d'ina spediziun pitschna e:

a.

sch'el suspecta - sin basa d'ina dumonda d'agid tenor l'artitgel 76 alinea 1 - che l'apport da la rauba en il territori da duana u or dal territori da duana cuntrafetschia a la legislaziun ch'è en vigur en Svizra davart il dretg d'autur u davart ils dretgs da protecziun parents; e

b.

sch'igl è vegnida inoltrada ina dumonda da destruir spediziuns pitschnas (art. 76 al. 2 lit. b).

² El po surdar al IPI la cumpetenza per realisar ils ulteriurs pass da la procedura.

³ L'autoritad cumpetenta infurmescha il declerant, il possessur u il proprietari da la rauba davart il suspect e davart la rauba retegnida ed al renda attent, che la rauba vegnia destruida, sch'el na refusia betg explicitamain la destrucziun entaifer 10 dis da lavur suenter ch'el ha survegnì questa infurmaziun.

⁴ Sch'il declerant, il possessur u il proprietari refusa explicitamain la destrucziun entaifer il termin tenor l'alinea 3, communitgescha l'autoritad cumpetenta quai al petent. L'ulteriura procedura sa drizza analogamain tenor ils artitgels 77 alineas 3 e 4, 77a, 77b e 77h.

⁵ Sch'il declerant, il possessur u il proprietari accepta la destrucziun u sch'el na prenda betg posiziun entaifer il termin tenor l'alinea 3, destruescha l'autoritad cumpetenta la rauba sin donn e cust dal petent il pli baud 3 mais suenter l'infurmaziun tenor l'alinea 3, u surdat la rauba al petent per la destrucziun, sch'el ha pretendì quai tenor l'artitgel 76 alinea 3. Pretensiuns d'indemnisaziun dal petent envers il declerant, il possessur u il proprietari èn exclusas.

⁶ L'autoritad cumpetenta infurmescha il petent davart la quantitad e davart il gener da las raubas destruidas tenor l'alinea 5, sco er davart ils spediturs da questas raubas en Svizra u a l'exteriur.

Il Cussegl federal decretescha las disposiziuns executivas.

Abolidas vegnan:

a.

la Lescha federala dals 7 da december 1922¹⁰⁶ davart il dretg d'autur sin ovras litteraras ed artisticas;

b.

la Lescha federala dals 25 da settember 1940¹⁰⁷ davart la gestiun da dretgs d'autur.

¹ Questa lescha vala er per ovras, per preschentaziuns, per portatuns, per videos u per emissiuns ch'èn vegnids creads avant sia entrada en vigur.

² Sche l'utilisaziun d'ina ovra, d'ina preschentaziun, d'in portatun, d'in video u d'ina emissiun, che fiss illegala tenor questa lescha, era permessa fin ussa, dastga questa utilisaziun vegnir terminada, sch'ella era vegnida cumenzada avant l'entrada en vigur da questa lescha.

¹ Contracts davart dretgs d'autur u dretgs da protecziun parents, concludids avant l'entrada en vigur da questa lescha, sco er disposiziuns prendidas sin basa da talas contracts mantegnan lur effect tenor il dretg vertent.

² Sch'i n'è fixà nagut auter, n'èn quests contracts betg applitgabels per dretgs che vegnan stgaffids pir tras questa lescha.

³ Ils artitgels 13a e 35a n'èn betg applitgabels per contracts ch'èn vegnids concludids avant l'entrada en vigur da la midada dals 27 da settember 2019.¹⁰⁸

Ils artitgels 62 alinea 3 e 65 alinea 5 èn applitgabels mo per contracts da licenza ch'èn vegnids concludids u confermads suenter l'entrada en vigur da la midada dals 22 da zercladur 2007 da questa lescha.

Las societads da gestiun admessas tenor la Lescha federala dals 25 da settember 1940¹¹⁰ davart la gestiun da dretgs d'autur ston dumandar ina nova permissiun (art. 41) entaifer 6 mais suenter l'entrada en vigur da questa lescha.

¹ Tariffas da las societads da gestiun concessiunadas ch'eran vegnidas approvadas tenor il dretg vegl, restan en vigur fin a la scadenza da lur durada da valaivladad.

² Bunificaziuns tenor ils artitgels 13, 20 e 35 vegnan debitadas a partir da l'entrada en vigur da questa lescha; ellas pon vegnir fatgas valair a partir da l'approvaziun da la tariffa correspundenta.

¹ Questa lescha è suttamessa al referendum facultativ.

² Il Cussegl federal fixescha l'entrada en vigur.

Data da l'entrada en vigur:¹¹¹ 1. da fanadur 1993
Art. 74 al. 1: 1. da schaner 1994.