Tgi che vul emetter in program svizzer, sto:

a.

annunziar quai ordavant a l'Uffizi federal da communicaziun (UFCOM); u

b.

avair ina concessiun tenor questa lescha.

Il radio e la televisiun èn independents dal stadi.

¹ Tut las emissiuns d'in program da radio u televisiun ston observar ils dretgs fundamentals. Las emissiuns ston respectar en spezial la dignitad umana, na dastgan ni esser discriminantas, ni contribuir a rassissem, ni periclitar la morala publica, ni glorifitgar u minimalisar violenza.

² Emissiuns redacziunalas cun in cuntegn infurmativ ston mussar ils fatgs ed ils eveniments en moda objectiva, uschia ch'il public po sa furmar in'atgna opiniun. Vistas persunalas e commentaris ston esser renconuschibels sco tals.

³ Las emissiuns na dastgan betg periclitar la segirezza interna ed externa da la Confederaziun u dals chantuns, lur urden constituziunal u l'adempliment d'obligaziuns da la Svizra che resultan dal dretg internaziunal.

⁴ En la totalitad da lur emissiuns redacziunalas ston ils programs concessiunads reflectar en moda adequata la multifariadad dals eveniments e da las opiniuns. Sch'ina zona da provediment vegn provedida cun in dumber suffizient da programs, po l'autoritad da concessiun deliberar en la concessiun in u plirs emetturs da l'obligaziun da diversitad.

Emetturs da programs ston procurar cun la tscherna dal temp d'emissiun u cun autras mesiras che persunas minorennas na vegnian betg confruntadas cun emissiuns che pericliteschan lur svilup corporal, spiertal-psichic, moral u social.

Las contribuziuns concepidas da la redacziun en l'ulteriura purschida publicistica da la SSR ston satisfar als princips da program tenor ils artitgels 4 e 5. L'obligaziun da diversitad (art. 4 al. 4) vala mo per dossiers d'elecziuns e da votaziuns.

¹ Uschenavant ch'il dretg federal na dispona betg autramain, n'èn ils emetturs da programs betg suttamess a las directivas d'autoritads federalas, chantunalas u communalas.

² Tar la concepziun, en spezial tar la tscherna dals temas, tar l'elavuraziun dal cuntegn sco er tar la preschentaziun da lur publicaziuns redacziunalas e da la reclama èn ils emetturs libers e surpiglian la responsabladad en chaussa.¹²

³ Nagin na po pretender d'in emettur da programs da derasar tschertas represchentaziuns ed infurmaziuns.

¹ Il Cussegl federal po obligar emetturs da televisiun - en il rom da la realisabladad pratica e cun meds finanzials adequats:

a.

da reservar ina part essenziala dal temp d'emissiun decisiv per ovras svizras e per autras ovras europeicas;

b.

da reservar en lur programs da televisiun ina part adequata dal temp d'emissiun u dals custs da program per emetter ovras svizras ed autras ovras europeicas da producents independents.

² L'obligaziun dals emetturs da televisiun, che mussan films en lur program, d'impunder ina part da lur entradas per la cinematografia svizra independenta, sa drizza tenor la Lescha da films dals 14 da december 2001¹⁴.¹⁵

³ Emetturs da televisiun che porschan programs naziunals u programs destinads a las regiuns linguisticas ston metter a disposiziun ina part adequata da las emissiuns en ina moda ch'è adattada per persunas cun impediments da l'udida e da la vesida.

⁴ Ils emetturs da televisiun regiunals che han ina concessiun suttituleschan las emissiuns d'infurmaziun principalas. Il Cussegl federal fixescha la dimensiun da questa obligaziun. Ils custs che resultan per preparar las emissiuns per persunas cun impediments d'udida vegnan finanziads cumplainamain tras la taxa da radio e televisiun (art. 68a).¹⁶

¹ La SSR sco er ils emetturs che han ina concessiun sa basond sin l'artitgel 38 alinea 1 litera a u sin l'artitgel 43 alinea 1 litera a ston:¹⁷

a.

integrar immediatamain en lur program communicaziuns urgentas da la polizia ch'èn indispensablas per mantegnair l'urden public e la segirezza publica ubain per garantir la segirezza da persunas sco er annunzias d'alarm ed instrucziuns da cumportament da las autoritads;

b.¹⁸

infurmar la publicitad davart decrets da la Confederaziun che vegnan publitgads urgentamain tenor l'artitgel 7 alinea 3 da la Lescha dals 18 da zercladur 2004¹⁹ davart las publicaziuns uffizialas (LPubl) u extraordinariamain tenor l'artitgel 7 alinea 4 LPubl.

² Per emissiuns tenor l'alinea 1 è responsabla l'autoritad che las ha ordinà.

³ Il Cussegl federal extenda las obligaziuns tenor l'alinea 1 litera a sche necessari sin purschiders da servetschs da telecommunicaziun che derasan programs.

⁴ El procura che l'infurmaziun da la populaziun tras il radio saja garantida en situaziuns da crisa. Las autoritads da concessiun reglan ils detagls en las concessiuns da la SSR e dals emetturs da radio tenor ils artitgels 38-43.

¹ La reclama sto esser separada nettamain da la part redacziunala dal program e sto esser reconuschibla cleramain sco tala. Il Cussegl federal po scumandar u suttametter a disposiziuns spezialas quellas furmas da reclama che pericliteschan la separaziun u la reconuschibilitad.

² Collavuraturs permanents dal program da l'emettur na dastgan betg cooperar en las emissiuns da reclama. Ils emetturs locals e regiunals che han meds finanzials limitads èn exceptads da questa restricziun.

¹ Betg admessa n'è reclama per:

a.²⁰

products da tubac e cigarettas electronicas tenor l'artitgel 3 literas a ed f da la Lescha dal 1. d'october 2021²¹ davart ils products da tubac sco er objects che furman in'unitad funcziunala cun in product da tubac;

b.²²

bavrondas alcoholicas che suttastattan a la Lescha d'alcohol dals 21 da zercladur 1932²³; per proteger la sanadad e la giuventetgna decretescha il Cussegl federal ulteriuras restricziuns;

c.²⁴

...

d.

partidas politicas, persunas che occupan uffizis politics u che candideschan per tals sco er temas ch'èn l'object da votaziuns dal pievel;

e.

confessiuns religiusas e las instituziuns e persunas che las represchentan.

² Betg admessas n'èn:

a.

reclama per medicaments a norma da la Lescha dals 15 da december 2000²⁵ davart ils products terapeutics;

b.

offertas da vendita per tut ils medicaments e per tut ils tractaments medicinals.

³ Betg admessas n'èn reclama clandestina e reclama subliminala.

⁴ Betg admessa n'è reclama che:

a.

offenda persvasiuns religiusas u politicas;

b.

maina en errur u è illoiala;

c.

encurascha ad in cumportament che periclitescha la sanadad, l'ambient u la segirezza persunala.

⁵ Per proteger la sanadad e la giuventetgna po il Cussegl federal declerar sco betg admessas ulteriuras emissiuns da reclama.

¹ La reclama sto da princip vegnir inserida tranter las singulas emissiuns ed emessa en blocs. Il Cussegl federal decida cura ch'i po vegnir devià da quest princip. Las deviaziuns na dastgan betg pregiuditgar il connex total e la valur da l'emissiun pertutgada.

² La reclama na dastga da princip betg surpassar 20 pertschient dal temp d'emissiun dad 1 ura. Il Cussegl federal regla las excepziuns.²⁶

³ Cun reglar las deviaziuns dals princips tenor ils alineas 1 e 2 resguarda il Cussegl federal numnadamain ils suandants criteris:

a.

las incaricas da prestaziun dals emetturs;

b.

la situaziun economica dal radio e da la televisiun;

c.

la concurrenza transcunfinala;

d.

las regulaziuns da reclama internaziunalas;

e.

ils giavischs dal public.

¹ Per il cuntegn e per il temp d'emissiun d'emissiuns sponsuradas è l'emettur da programs sulettamain responsabel. El procura ch'il sponsur n'influenzeschia betg l'emissiun en ina moda che pregiuditgescha l'independenza redacziunala.

² Sche emissiuns u serias d'emissiuns èn sponsuradas per part u dal tuttafatg, ston ils sponsurs vegnir numnads al cumenzament u a la fin da mintga emissiun.

³ Emissiuns sponsuradas na dastgan ni animar a concluder acts giuridics pertutgant rauba u prestaziuns dals sponsurs u da terzas persunas ni cuntegnair deposiziuns cun caracter da reclama per rauba e prestaziuns.

⁴ Emissiuns na dastgan betg vegnir finanziadas da sponsurs che produceschan u vendan en emprima lingia products u porschan prestaziuns, per las qualas igl è scumandà da far reclama tenor l'artitgel 10. Interpresas ch'èn activas en il sectur da medicaments dastgan sponsurar emissiuns, sch'i na vegnan betg numnads u mussads en quest connex products ch'èn suttamess ad in scumond da reclama e sch'i na vegn betg creà en autra moda in effect da reclama per quests products.

⁵ Emissiuns d'infurmaziun ed emissiuns davart eveniments politics actuals sco er emissiuns e serias d'emissiuns che han in connex cun l'exercitar ils dretgs politics en la Confederaziun, en ils chantuns ed en las vischnancas na dastgan betg vegnir sponsuradas.

¹ Reclama che sa drizza a persunas minorennas u en la quala vegnan avant persunas minorennas, na dastga ni profitar da lur mancanza d'experientscha da vita ni las pregiuditgar en lur svilup corporal e psichic. Il Cussegl federal decretescha las prescripziuns correspundentas per concepir la reclama.

² Emissiuns per uffants na dastgan betg vegnir interruttas da reclama.

³ Offertas da vendita na dastgan betg sa drizzar a persunas minorennas.

⁴ Per proteger ils giavischs menziunads en l'alinea 1 excluda il Cussegl federal tschertas furmas dal sponsuradi d'emissiuns per uffants.

¹ Igl è scumandà da far reclama en ils programs da radio da la SSR. Il Cussegl federal po prevair excepziuns per l'autoreclama.

² ...²⁷

³ Il Cussegl federal po restrenscher dal tuttafatg u per part la reclama ed il sponsuradi en ils programs da radio e televisiun da la SSR ed en l'ulteriura purschida publicistica ch'è necessaria per ademplir sia incumbensa da program e che vegn finanziada cun las taxas da radio e televisiun²⁸ (art. 25 al. 3 lit. b).

Ils emetturs concessiunads da programs svizzers ston annunziar al UFCOM²⁹ las entradas bruttas da reclama e da sponsuradi.

Ils emetturs da programs svizzers ston annunziar al UFCOM midadas dal chapital e da las repartiziuns dal dretg da votar sco er participaziuns relevantas vi d'autras interpresas.

¹ Ils emetturs da programs èn obligads da dar a l'autoritad da concessiun e da surveglianza gratuitamain las infurmaziuns e las actas che quellas dovran en il rom da lur activitad da surveglianza sco er per examinar ina periclitaziun da la diversitad da las opiniuns e da las purschidas (art. 74 e 75).³⁰

² A l'obligaziun da dar infurmaziuns èn suttamessas er persunas giuridicas e natiralas:

a.

vi da las qualas l'emettur da programs è participà en moda relevanta u ch'èn participadas vi da l'emettur da programs en moda relevanta e ch'èn activas sin il martgà da radio e televisiun u sin martgads parentads;

b.

che acquireschan reclama u sponsuradi per l'emettur da programs;

c.

che produceschan la gronda part dal program respectiv da l'emettur;

d.

che organiseschan in eveniment public tenor l'artitgel 72;

e.

ch'èn activas sin il martgà da radio e televisiun e che han ina posiziun dominanta en in u en plirs martgads ch'èn relevants per las medias;

f.³¹

ch'èn activas sin in u plirs martgads relevants per las medias en il senn da l'artitgel 74, nua ch'i vegn examinada ina periclitaziun da la diversitad da las opiniuns e da las purschidas, uschenavant che las infurmaziuns èn necessarias per sclerir ina posiziun dominanta sin il martgà.

³ Il dretg da refusar l'infurmaziun u l'extradiziun da las actas sa drizza tenor l'artitgel 16 da la Lescha federala dals 20 da december 1968³² davart la procedura administrativa (LFPA).

¹ Ils emetturs da programs svizzers ston inoltrar al UFCOM il rapport annual sco er il quint annual. Il Cussegl federal deliberescha tschertas categorias d'emetturs da programs da questas obligaziuns.

² Il UFCOM po publitgar indicaziuns dals rapports annuals dals emetturs da programs.

³ Il Cussegl federal fixescha tge ch'il rapport annual ed il quint annual ston cuntegnair e tge indicaziuns che il UFCOM dastga publitgar.

¹ Il UFCOM fa ina statistica en collavuraziun cun l'Uffizi federal da statistica. Quella cuntegna las indicaziuns che las autoritads cumpetentas dovran:

a.

per la legislaziun e per l'applicaziun dal dretg;

b.

per survegnir ina survista dal martgà.

² Ils emetturs da programs svizzers ston inoltrar regularmain al UFCOM las indicaziuns necessarias.

³ Il UFCOM po metter a disposiziun resultats statistics a la publicitad.

⁴ Il Cussegl federal regla ils detagls; en spezial fixescha el ils princips davart la retschertga da datas, davart retschertgas singulas, davart l'utilisaziun da las datas retschertgadas e davart la publicaziun da resultats statistics.

¹ Ils emetturs da programs svizzers ston registrar tut las emissiuns e conservar las registraziuns sco er il material ed ils documents respectivs durant almain 4 mais. Il Cussegl federal po dispensar tschertas categorias d'emetturs da questa obligaziun.

² Las contribuziuns en l'ulteriura purschida publicistica da la SSR ston medemamain vegnir registradas, ed ellas ston vegnir conservadas ensemen cun il material ed ils documents respectivs. Il Cussegl federal regla la durada e la dimensiun da l'obligaziun da registraziun e da conservaziun resguardond las pussaivladads tecnicas e la raschunaivladad per la SSR.

³ Sch'i vegn inoltrà entaifer il termin da conservaziun ina reclamaziun tar il post da mediaziun u fatg recurs tar l'Autoritad independenta da recurs davart radio e televisiun u avert d'uffizi ina procedura da surveglianza, ston las registraziuns, il material ed ils documents respectivs vegnir conservads fin a la fin da la procedura.

¹ Il Cussegl federal po obligar emetturs da programs svizzers da tegnair a disposiziun registraziuns da lur programs, per che quels restian mantegnids permanentamain a la populaziun. Ils emetturs da programs pon vegnir indemnisads finanzialmain per ils custs che als resultan da quai.

² Il Cussegl federal fixescha, tge programs che ston vegnir mantegnids, e regla l'indemnisaziun dals emetturs da programs sco er la consegna, l'archivaziun e la disponibladad da las registraziuns. En spezial po el far prescripziuns tecnicas davart il gener e davart la furma dals purtaders da datas e designar organs che coordineschan las lavurs necessarias e che fan la selecziun dals programs che ston vegnir mantegnids.

³ Ils custs dals organs tenor l'alinea 2 sco er l'indemnisaziun dals emetturs da programs tenor l'alinea 1 vegnan finanziads tras la taxa da radio e televisiun, uschenavant ch'il retgav da l'indemnisaziun per prender invista dals programs registrads e per reutilisar quels na basta betg.³⁴

⁴ Per garantir l'utilisaziun a lunga vista dals archivs po il Cussegl federal prender mesiras da sustegn per mantegnair ils apparats da reproducziun correspundents.

¹ Ils emetturs da programs svizzers che han ina concessiun pajan mintga onn ina taxa da concessiun. Il retgav da la taxa da concessiun vegn duvrà en emprima lingia per promover projects da perscrutaziun en il sectur da radio e televisiun (art. 77) ed en segunda lingia per novas tecnologias da diffusiun (art. 58).³⁵

² La taxa importa maximalmain 1 pertschient da las entradas bruttas da reclama e da sponsuradi. Il Cussegl federal fixescha l'autezza da la taxa ed in import liber.

La SSR ademplescha in servetsch per la generalitad. Ella n'ha betg la finamira da far in gudogn.

¹ La SSR ademplescha l'incumbensa constituziunala en il sectur dal radio e da la televisiun (incumbensa da program). En spezial:

a.

furnescha ella programs da radio e televisiun cumplets e da la medema valur a tut la populaziun en las trais linguas uffizialas;

b.

promova ella la chapientscha, la coesiun ed il barat tranter las regiuns da la Svizra, tranter las cuminanzas linguisticas, tranter las culturas e tranter las gruppaziuns socialas e resguarda ella las atgnadads dal pajais ed ils basegns dals chantuns;

c.

promova ella la stretga colliaziun tranter las Svizras ed ils Svizzers a l'exteriur e la patria sco er la preschientscha da la Svizzer e la chapientscha per ses giavischs a l'exteriur.

² Per la Svizra rumantscha emetta la SSR almain in program da radio. Dal rest fixescha il Cussegl federal ils princips, tenor ils quals ils basegns da radio e televisiun da quest territori linguistic ston vegnir resguardads supplementarmain.

³ Il Cussegl federal fixescha ils princips, tenor ils quals ils basegns dals umans cun impediments dals senns ston vegnir resguardads. El determinescha en spezial, en tge dimensiun ch'i ston vegnir purschidas emissiuns spezialas en la lingua da segns per persunas surdas.

⁴ La SSR contribuescha:

a.

a la furmaziun libra da l'opiniun dal public tras ina infurmaziun cumpletta, multifara ed objectiva en spezial davart connexs politics, economics e socials;

b.

al svilup cultural ed al rinforzament da las valurs culturalas dal pajais sco er a la promoziun da la cultura svizra resguardond spezialmain la producziun d'ovras litteraras, musicalas e cinematograficas svizras, cunzunt cun emetter producziuns svizras ed emissiuns producidas sezzas;

c.

a la furmaziun dal public, cunzunt grazia a la diffusiun regulara d'emissiuns educativas;

d.

al divertiment.

⁵ En emissiuns d'infurmaziun impurtantas che interesseschan sur ils cunfins linguistics e territorials da la Svizra ora sto per regla vegnir duvrada la lingua da standard.

¹ Il Cussegl federal dat a la SSR ina concessiun.

² Avant che dar la concessiun u avant che far midadas da la concessiun ch'èn impurtantas per la politica da medias vegn fatga in'audiziun.

³ La concessiun fixescha en spezial:

a.

il dumber ed il gener dals programs da radio e televisiun;

b.

la dimensiun da l'ulteriura purschida publicistica ch'è necessaria per ademplir l'incumbensa da program sin plaun da las regiuns linguisticas, sin plaun naziunal e sin plaun internaziunal e che vegn finanziada tras las taxas da radio e televisiun;

c.

ils detagls per resguardar la producziun d'ovras litteraras, musicalas e cinematograficas svizras tenor l'artitgel 24 alinea 4 litera b; ella po prescriver quotas minimalas correspundentas.

⁴ La SSR po porscher singuls programs en collavuraziun cun auters emetturs. La collavuraziun vegn reglada en contracts che ston vegnir approvads dal Departament federal per ambient, traffic, energia e communicaziun (DATEC).³⁶

⁵ Il DATEC³⁷ po midar singulas disposiziuns da la concessiun avant ch'ellas scadan, sche las relaziuns effectivas u giuridicas èn sa midadas e sche la midada è necessaria per mantegnair interess impurtants. A la SSR vegn pajada ina indemnisaziun commensurada.

⁶ Il DATEC po restrenscher u suspender per part la concessiun da la SSR, sche:

a.

l'autoritad da surveglianza tenor l'artitgel 89 ha fatg ina dumonda respectiva;

b.

la SSR ha violà repetidamain u grevamain sias obligaziuns concernent las finanzas e concernent il rendaquint (art. 35 e 36).

¹ Igl è scumandà a la SSR d'emetter programs regiunals.

² Cun il consentiment dal DATEC po la SSR integrar fanestras regiunalas da durada limitada en ses programs da radio. En talas fanestras è scumandà il sponsuradi. La durada da questas fanestras regiunalas na dastga betg surpassar 1 ura per di.³⁸

Ils programs da la SSR ston vegnir producids per gronda part en las regiuns linguisticas, a las qualas els èn destinads.

¹ Il Cussegl federal fixescha cun la SSR periodicamain la dimensiun da la purschida publicistica per l'exteriur tenor l'artitgel 24 alinea 1 litera c ed ils custs correspundents.

² En situaziuns da crisa po el concluder cun la SSR incaricas da prestaziun spezialas a curta vista per contribuir a la chapientscha vicendaivla dals pievels.

³ La Confederaziun indemnisescha a la SSR almain per la mesadad ils custs per prestaziuns tenor l'alinea 1 e cumplainamain ils custs per prestaziuns tenor l'alinea 2.

¹ La SSR e las interpresas controlladas d'ella ston annunziar ordavant al UFCOM activitads betg fixadas en la concessiun che pudessan pregiuditgar la posiziun e l'incumbensa d'autras interpresas da medias svizras.

² Sch'ina tala activitad pregiuditgescha l'adempliment da l'incumbensa da program u restrenscha considerablamain la libertad d'autras interpresas da medias da sa sviluppar, po il DATEC decretar cundiziuns davart l'activitad commerziala, davart la finanziaziun, davart la separaziun da la contabilitad e davart la separaziun da las structuras organisatoricas u scumandar l'activitad.

¹ Ils programs da radio e televisiun da la SSR vegnan derasads almain en tut la regiun linguistica pertutgada. Almain in program da radio ed in program da televisiun da la SSR vegnan derasads en l'entira Svizra en tudestg, en franzos ed en talian. Il Cussegl federal po prevair excepziuns. Ultra da quai resguarda el ils basegns dals Rumantschs tenor l'artitgel 24 alinea 2. En quest connex garantescha el che frequenzas e chanals stattan a disposiziun als auters emetturs da programs per mintga gener da diffusiun.

² Il Cussegl federal fixescha per mintga program la zona da provediment ed il gener da diffusiun.

¹ La SSR s'organisescha uschia che:

a.

sia autonomia e sia independenza dal stadi e da singulas gruppaziuns socialas, economicas e politicas èn garantidas;

b.

ella vegna manada en moda economica e las taxas da radio e televisiun vegnan duvradas confurm a lur intent;

c.

ils giavischs da las regiuns linguisticas vegnan resguardads ed ina direcziun e coordinaziun naziunala è garantida;

d.

il public è represchentà en l'organisaziun;

e.

la lavur redacziunala è separada da las activitads economicas;

f.

ella po vegnir manada, survegliada e controllada tenor ils princips dal dretg d'aczias.

² Ses statuts ston vegnir approvads dal DATEC.

¹ Ils organs necessaris èn la radunanza generala, il cussegl d'administraziun, il post da revisiun e la direcziun.

² Sche questa lescha na dispona betg autramain, valan las disposiziuns dal dretg d'aczias tenor il senn per la regulaziun statutara dals dretgs, da las obligaziuns e da las responsabladads dals organs da la SSR.

¹ Il Cussegl federal po designar fin ad in quart dals commembers dal cussegl d'administraziun.

² Il cussegl d'administraziun na dat naginas instrucziuns particularas pertutgant chaussas currentas che concernan ils programs.

³ Ils commembers na dastgan betg esser - sper lur activitad sco cussegl d'administraziun - en ina relaziun d'emploià cun la SSR u cun las interpresas controlladas d'ella. Els n'èn betg obligads d'observar instrucziuns.

La SSR sa finanziescha en emprima lingia tras las taxas da radio e televisiun. Ella po profitar d'ulteriuras funtaunas da finanziaziun, uschenavant che quellas na vegnan betg limitadas da questa lescha, da l'ordinaziun, da la concessiun u dal dretg internaziunal respectiv.

¹ La SSR e las interpresas controlladas d'ella mainan lur finanzas tenor ils princips renconuschids da la meglra pratica. Ellas lavuran tenor aspects economics, utiliseschan lur meds finanzials confurm a l'intent e procuran che la substanza da l'interpresa vegnia mantegnida a lunga vista cun reguard a l'adempliment da lur incumbensa.

² La SSR utilisescha la part da la taxa³⁹ attribuida ad ella exclusivamain per cuvrir ils custs che resultan da l'emissiun dals programs da radio e televisiun e da l'ulteriura purschida publicistica (art. 25 al. 3 lit. b).

³ Sche la SSR desista d'ina activitad ch'è stada d'ina gronda impurtanza tar la fixaziun da l'autezza da la taxa, po il DATEC obligar la SSR da furmar reservas che ston vegnir resguardadas tar la proxima adattaziun da la taxa.⁴⁰

⁴ Il Cussegl federal procura che las disposiziuns da l'artitgel 6a alineas 1-5 da la Lescha dals 24 da mars 2000⁴¹ davart il persunal da la Confederaziun vegnian applitgadas tenor il senn en la SSR ed en las interpresas controlladas d'ella per ils commembers dals organs directivs, per ils appartegnents dal cader directiv sco er per l'ulteriur persunal che vegn salarisà en ina moda sumeglianta.

¹ La SSR e las interpresas controlladas d'ella mainan lur cudeschs tenor las prescripziuns che valan per societads anonimas e tenor ils standards da rendaquint reconuschids da las bursas svizras.

² Ellas mainan quints separads per quellas activitads, che servan ad ademplir l'incarica da prestaziun dal dretg da concessiun, e per lur ulteriuras activitads.

³ Il cussegl d'administraziun da la SSR preschenta mintga onn al DATEC:

a.

il quint dal concern;

b.

il quint annual, il preventiv, la planisaziun da las finanzas ed il rapport annual da la SSR e da las interpresas controlladas d'ella.

⁴ Sin basa dal rapport da gestiun dal cussegl d'administraziun examinescha il DATEC las finanzas da la SSR. El po dumandar infurmaziuns supplementaras. Dal cussegl d'administraziun da la SSR u dals organs incumbensads cun la direcziun suprema da las interpresas controlladas da la SSR po il DATEC pretender en spezial indicaziuns davart la moda e maniera, co ch'els han ademplì lur responsabladad.

⁵ Il DATEC po far verificaziuns al lieu tar la SSR e tar las interpresas controlladas d'ella, sche:

a.

il rapport è insuffizient e la SSR na furnescha betg indicaziuns suffizientas malgrà ch'ella è vegnida intimada dal DATEC da far quai entaifer il termin concedì; u

b.

igl exista in suspect motivà che la SSR u ina interpresa controllada d'ella n'ha betg ademplì las obligaziuns tenor l'artitgel 35 alinea 1.

⁶ Sut las premissas da l'alinea 5 po il DATEC incumbensar la Controlla federala da finanzas u auters experts da far la controlla da las finanzas. La Lescha dals 28 da zercladur 1967⁴² davart la Controlla da finanzas n'è betg applitgabla.

⁷ Puras controllas da l'opportunitad n'èn betg admessas.

Participaziuns da la SSR ad auters emetturs da programs ston vegnir approvadas dal DATEC.

¹ Concessiuns cun ina incarica da prestaziun e cun dretg d'ina part da la taxa (concessiuns cun dretg d'ina part da la taxa) pon vegnir dadas ad emetturs da programs locals e regiunals, che:

a.

provedan ina zona, che n'ha betg pussaivladads da finanziaziun suffizientas, cun programs da radio e televisiun che tegnan quint da las particularitads localas u regiunalas cun infurmar en moda cumplessiva en spezial davart connexs politics, economics e socials e contribueschan al svilup da la vita culturala en la zona da provediment;

b.

contribueschan en las aglomeraziuns - grazia a programs da radio cumplementars senza finamira da rendita - ad ademplir l'incarica da prestaziun constituziunala.

² Concessiuns cun dretg d'ina part da la taxa constitueschan il dretg da derasar il program en ina tscherta zona da provediment (dretg d'access) sco er da survegnir ina part dal retgav da las taxas da radio e televisiun.

³ Per mintga zona da provediment vegn dada ina concessiun cun dretg d'ina part da la taxa.

⁴ La concessiun fixescha almain:

a.

la zona da provediment sco er il gener da la diffusiun;

b.

las prestaziuns pretendidas pertutgant il program e las pretensiuns manaschialas ed organisatoricas ch'èn necessarias per quai;

c.

ulteriuras exigenzas e cundiziuns ch'il concessiunari sto ademplir.

⁵ ...⁴³

¹ Suenter avair consultà la Cumissiun federala da communicaziun fixescha il Cussegl federal il dumber e l'extensiun da las zonas da provediment, per las qualas vegnan dadas concessiuns cun dretg d'ina part da la taxa, sco er il gener da diffusiun en la zona da provediment respectiva. En quest connex fa el la differenza tranter las zonas da provediment per radio e las zonas da provediment per televisiun.

² Las zonas da provediment tenor l'artitgel 38 alinea 1 litera a ston vegnir fixadas uschia:

a.

ch'ellas furman in'unitad politica e geografica ubain ch'ils contacts culturals u economics èn spezialmain stretgs en ellas; e

b.

che lur pussaivladads da finanziaziun ch'èn avant maun permettan a l'emettur - cun agid d'ina part commensurada dal retgav da las taxas da radio e televisiun - d'ademplir sia incarica da prestaziun.

³ Excepziuns pon vegnir previsas per programs regiunals che vegnan emess en in territori al cunfin linguistic en almain duas linguas naziunalas.

⁴ Il dumber e l'extensiun da las zonas da provediment vegnan controllads periodicamain dal Cussegl federal, il pli tard però suenter 10 onns. Adattaziuns minimalas da l'extensiun po far il DATEC.

⁵ Avant che determinar las zonas da provediment ed avant che far midadas essenzialas vegnan tadlads cunzunt ils chantuns ed ils emetturs concessiunads ch'èn pertutgads directamain.

¹ Las parts da la taxa per emetturs cun dretg d'ina part da la taxa tenor l'artitgel 68a alinea 1 litera b importan 4 fin 6 pertschient dal retgav da la taxa da radio e televisiun. Il Cussegl federal determinescha:

a.

cur ch'el fixescha l'autezza da la taxa, las parts che stattan a disposiziun al radio respectivamain a la televisiun, resguardond il basegn per ademplir las incaricas da prestaziun tenor l'artitgel 38 alinea 1;

b.

la part procentuala maximala che la part da la taxa dastga importar cumpareglià cun ils custs da manaschi dal singul emettur.⁴⁴

² Il DATEC fixescha per ina tscherta perioda la part da mintga concessiunari vi dal retgav da las taxas da radio e televisiun. El resguarda la grondezza ed il potenzial economic da la zona da provediment sco er la lavur ch'il concessiunari sto impunder per ademplir l'incarica da prestaziun inclusiv ils custs da diffusiun.

³ Applitgablas èn las disposiziuns da la Lescha da subvenziuns dals 5 d'october 1990⁴⁵.

¹ Ils emetturs da programs che disponan d'ina concessiun cun dretg d'ina part da la taxa ston ademplir l'incarica da prestaziun fixada en la concessiun. Per garantir l'adempliment da l'incarica da prestaziun e l'autonomia en la concepziun dals programs po il Cussegl federal fixar ulteriuras obligaziuns. En spezial po el obligar l'emettur da far in model directiv ed in statut da redacziun.

² Emetturs da programs cun ina concessiun cun dretg d'ina part da la taxa ston duvrar ils meds finanzials en moda economica e confurm a las prescripziuns. Distribuziuns dal gudogn n'èn betg admissiblas. La diffusiun dal program che vegn finanzià tras la taxa sto vegnir separada en la contabilitad d'eventualas autras activitads economicas dal concessiunari. Sch'ina interpresa, che vegn controllada economicamain dal concessiunari, furnescha prestaziuns en connex cun il program, procura il concessiunari che questas prestaziuns vegnian separadas en la contabilitad da las autras activitads.⁴⁶

³ La collavuraziun cun auters emetturs na dastga betg periclitar l'adempliment da l'incarica da prestaziun u l'autonomia en la concepziun dals programs.

¹ Il concessiunari preschenta al UFCOM mintga onn il quint. Quel examinescha, sch'ils meds finanzials èn vegnids utilisads en moda economica e confurm a l'intent. Cas cuntrari po el reducir u pretender enavos las parts da la taxa d'in concessiunari.

² Il UFCOM po er pretender infurmaziuns dal concessiunari e da las persunas ch'èn obligadas da dar infurmaziuns tenor l'artitgel 17 alinea 2 literas a-c e controllar las finanzas tar il concessiunari.

³ Puras controllas da l'opportunitad n'èn betg admessas.

¹ Il DATEC po dar ad auters emetturs da programs ina concessiun per derasar in program sin via terrestra e senza fil, sche quest program:

a.

tegna quint en ina zona da las particularitads localas u regiunalas cun infurmar en moda cumpletta en spezial davart connexs politics, economics e socials e contribuescha al svilup da la vita culturala en la zona da provediment;

b.

gida spezialmain ad ademplir l'incarica da prestaziun constituziunala en ina regiun linguistica.

² La concessiun definescha la dimensiun da l'access a la diffusiun e l'incarica da prestaziun concernent il program. Il DATEC po fixar ulteriuras obligaziuns per garantir l'adempliment da l'incarica da prestaziun e l'autonomia en la concepziun dals programs.

¹ Ina concessiun po vegnir dada, sch'il petent:

a.

è en cas d'ademplir l'incarica da prestaziun;

b.

cumprova vardaivlamain ch'el possia finanziar las investiziuns necessarias e la gestiun;

c.

cumprova a l'autoritad da concessiun, tgi che dispona da las parts essenzialas da ses chapital e tgi che al metta a disposiziun meds finanzials impurtants;

d.

garantescha ch'el observa las prescripziuns dal dretg da lavur e las cundiziuns da lavur da la branscha, il dretg applitgabel ed en spezial las obligaziuns e las cundiziuns ch'èn colliadas cun la concessiun;

e.

separa la lavur redacziunala da las activitads economicas;

f.

è ina persuna natirala cun domicil en Svizra u ina persuna giuridica cun sedia en Svizra;

g.⁴⁷

...

² Uschenavant ch'i na s'opponan naginas obligaziuns internaziunalas, po la concessiun vegnir refusada ad ina persuna giuridica che vegn controllada da l'exteriur, ad ina persuna giuridica svizra cun participaziun da l'exteriur u ad ina persuna natirala senza dretg da burgais svizzer, sch'il stadi ester correspundent na conceda betg la reciprocitad en ina dimensiun sumeglianta.

³ In emettur respectivamain l'interpresa, a la quala l'emettur appartegna, po survegnir maximalmain duas concessiuns da televisiun e duas concessiuns da radio. Il Cussegl federal po prevair excepziuns per l'introducziun da novas tecnologias da diffusiun.⁴⁸

¹ Las concessiuns vegnan dadas dal DATEC. Il UFCOM publitgescha las concessiuns per regla; el po tadlar ils circuls interessads.

^1bis Las concessiuns pon vegnir prolungadas senza publicaziun uffiziala, en spezial sche la situaziun en las zonas da provediment u midadas tecnologicas signifitgan sfidas particularas per ils emetturs da programs. En quest connex vegn resguardà l'adempliment da l'incarica da prestaziun fin ussa.⁴⁹

² Per dar concessiuns da curta durada po il Cussegl federal prevair ina procedura speziala.

³ Sch'i vegnan inoltradas pliras annunzias per ina concessiun publitgada, vegn favurisà quel petent ch'è il meglier en cas d'ademplir l'incarica da prestaziun. Sche pliras annunzias èn per gronda part equivalentas sut quest aspect, vegn favurisà quel petent che enritgescha il pli fitg la diversitad da las opiniuns e da las purschidas.

⁴ Concessiuns per programs che vegnan derasads sin via terrestra e senza fil vegnan per regla dadas avant la publicaziun uffiziala da las concessiuns correspundentas da radiocommunicaziun tenor l'artitgel 22a LTC⁵⁰.⁵¹

¹ Mintga concessiun vegn dada per in tschert temp. Concessiuns cumparegliablas han per regla il medem termin da scadenza.

² Ina concessiun extingua en cas d'ina renunzia da vart da l'emettur da programs, en cas d'ina privaziun e sche sia durada è scadida.

¹ Il UFCOM examinescha, sch'il program concessiunà ademplescha l'incarica da prestaziun. Per sclerir quai po el engaschar posts spezialisads externs u experts.

² Sch'el constatescha mancanzas considerablas, prenda el mesiras. El po scursanir en spezial il dretg da parts da la taxa per maximalmain la mesadad, fin che las mancanzas èn eliminadas.

¹ Il transferiment da la concessiun sto vegnir annunzià al DATEC avant ch'el saja vegnì fatg e sto vegnir approvà da tal.

² Il DATEC examinescha, sche las premissas da la concessiun èn ademplidas er suenter il transferiment. El po refusar l'approvaziun entaifer 3 mais a partir da l'entrada da l'annunzia; en cas spezials po quest termin vegnir prolungà.

³ Sco transferiment vala er la surdada economica da la concessiun. Ina tala è avant maun, sche dapli che 20 pertschient dal chapital d'aczias, dal chapital da basa u dal chapital da la societad cooperativa ubain eventualmain dal chapital da certificats da participaziun u dals dretgs da votar.

¹ Il DATEC po midar singulas disposiziuns da la concessiun avant lur scadenza, sche las relaziuns effectivas u giuridicas èn sa midadas e sche la midada è necessaria per mantegnair interess publics impurtants.

² Il concessiunari vegn indemnisà commensuradamain, sche la midada restrenscha essenzialmain ils dretgs fixads en la concessiun. El na survegn nagina indemnisaziun, sche l'adattaziun sa basa sin interess impurtants da la Svizra u sin ina midada d'obligaziuns internaziunalas.

³ Sin dumonda da l'emettur da programs po il DATEC midar singulas disposiziuns, sche la midada proponida correspunda a las premissas per dar la concessiun.

¹ Il DATEC po restrenscher, suspender u retrair per part la concessiun, sche:

a.

il concessiunari l'ha obtegnida faschond indicaziuns incumplettas u faussas;

b.

il concessiunari ha cuntrafatg en moda gravanta cunter questa lescha e cunter las disposiziuns executivas;

c.

il concessiunari cuntrafa permanentamain - malgrà las mesiras tenor l'artitgel 47 alinea 2 - cunter sias obligaziuns fixadas en la concessiun;

d.

il concessiunari utilisescha la concessiun en moda gravanta per intents illegals;

e.

interess impurtants da la Svizra pretendan quai.

² Il DATEC retira la concessiun, sche premissas essenzialas per la dar èn scadidas.

³ Il concessiunari ha il dretg d'ina indemnisaziun, sch'il DATEC:

a.

retira la concessiun, perquai che premissas essenzialas per la dar èn scadidas per motivs, per ils quals la Confederaziun sto star bun;

b.

suspenda u retira la concessiun, perquai che interess impurtants da la Svizra pretendan quai.

¹ La Confederaziun incassescha ina taxa per finanziar l'adempliment da l'incarica da prestaziun constituziunala da radio e televisiun (art. 93 al. 2 Cst.).

² La taxa vegn incassada per chasada e per interpresa.

³ Il retgav e l'utilisaziun da la taxa na figureschan betg en il quint da la Confederaziun, cun excepziun da las indemnisaziuns ch'èn da pajar a la Confederaziun.

¹ Il Cussegl federal fixescha l'autezza da la taxa da chasadas e da la taxa d'interpresas. Decisiv è il basegn per:

a.

finanziar ils programs da la SSR e l'ulteriura purschida publicistica da la SSR ch'è necessaria per ademplir l'incumbensa da program (art. 25 al. 3 lit. b);

b.

sustegnair programs da concessiunaris cun dretg d'ina part da la taxa (art. 38-42);

c.

sustegnair la Fundaziun per la retschertga davart l'utilisaziun da radio e televisiun (art. 81);

d.

promover l'installaziun da raits d'emetturs en il rom da l'introducziun da novas tecnologias da diffusiun (art. 58);

e.

finanziar la preparaziun d'emissiuns da programs da televisiun regiunals concessiunads per persunas cun impediments d'udida (art. 7 al. 4);

f.

las incumbensas da l'organ d'incassament, da l'Administraziun federala da taglia (AFT), dal UFCOM sco er dals chantuns e da las vischnancas en connex cun incassar la taxa e cun far valair l'obligaziun da pajar la taxa (art. 69d-69g e 70-70d);

g.

finanziar il mantegniment da programs (art. 21).

² Il Cussegl federal fixescha, co ch'il retgav da la taxa vegn repartì sin ils intents d'utilisaziun tenor l'alinea 1. El po determinar separadamain las parts per ils programs da radio, per ils programs da televisiun e per l'ulteriura purschida publicistica da la SSR.

³ En sia decisiun davart l'autezza da la taxa resguarda il Cussegl federal la recumandaziun dal survegliader dals pretschs. Divergenzas da las recumandaziuns ston vegnir motivadas publicamain.

¹ L'obligaziun dals commembers d'ina chasada da pajar la taxa cumenza l'emprim di dal mais che suonda la fundaziun da la chasada e finescha l'ultim di dal mais che la chasada vegn schliada.

² Decisiva per incassar la taxa è la fundaziun da la chasada, sco quai ch'ella è inscritta en il register chantunal u communal d'abitants.

³ Il Cussegl federal regla la periodicitad da la taxa, il mument che la taxa sto vegnir pajada sco er sia surannaziun.

¹ Per mintga chasada privata sto vegnir pajada ina taxa da la medema autezza.

² La definiziun da la chasada privata sa drizza tenor la legislaziun davart l'armonisaziun dals registers.

³ Per la taxa d'ina chasada stattan bunas solidaricamain quellas persunas maiorennas che adempleschan in dals suandants criteris:

a.

la chasada è lur domicil principal, analogamain a la definiziun da la vischnanca da domicil tenor l'artitgel 3 litera b da la Lescha dals 23 da zercladur 2006⁶² davart l'armonisaziun dals registers (LAR); u

b.

ellas n'han nagin domicil principal en Svizra e la chasada è lur domicil secundar, analogamain a la definiziun da la vischnanca da dimora tenor l'artitgel 3 litera c LAR.

⁴ La responsabladad d'ina persuna s'extenda sin las pretensiuns da las periodas da taxaziun, al cumenzament da las qualas questa persuna appartegna a la chasada correspundenta.

⁵ Sche tut las persunas maiorennas bandunan entaifer in mais la chasada, a la quala ellas appartegnevan il cumenzament dal mais, vala la chasada sco schliada l'ultim di da quest mais.

¹ Da l'obligaziun da pajar la taxa vegnan dispensadas:

a.

sin lur dumonda persunas che survegnan prestaziuns annualas tenor l'artitgel 3 alinea 1 litera a da la Lescha federala dals 6 d'october 2006⁶³ davart las prestaziuns supplementaras tar l'assicuranza per vegls, survivents ed invaliditad; la dispensaziun vala retroactivamain a partir dal cumenzament da la retratga da questas prestaziuns supplementaras, maximalmain dentant 5 onns avant che la dumonda è entrada tar l'organ d'incassament;

b.

persunas che giaudan privilegis, immunitads e facilitaziuns tenor l'artitgel 2 alinea 2 da la Lescha dals 22 da zercladur 2007⁶⁴ davart il stadi ospitant (LSO) e che han il status da diplomat, premess ch'ellas na sajan betg burgaisas svizras; il Cussegl federal regla la dispensaziun d'ulteriuras persunas che giaudan privilegis, immunitads e facilitaziuns e che appartegnan al persunal dals benefiziaris instituziunals tenor l'artitgel 2 alinea 1 literas d, e ed f LSO, premess ch'ellas na sajan betg burgaisas svizras.

² Sch'in commember d'ina chasada privata ademplescha las premissas da dispensaziun tenor l'alinea 1, scroda l'obligaziun da pajar la taxa per tut ils commembers da la chasada respectiva.

¹ Per mintga chasada collectiva sto vegnir pajada ina taxa da la medema autezza.

² La definiziun da la chasada collectiva sa drizza tenor la legislaziun davart l'armonisaziun dals registers.

³ La taxa sto vegnir pajada da l'instituziun da dretg privat u public ch'è responsabla per la chasada collectiva.

¹ Il Cussegl federal po delegar l'incassament da la taxa da chasadas e las incumbensas che resultan en quest connex ad in organ d'incassament ordaifer l'administraziun federala. La legislaziun davart las acquisiziuns publicas è applitgabla.

² Il UFCOM surveglia l'organ d'incassament.

¹ L'organ d'incassament po decretar disposiziuns:

a.

envers ils debiturs da la taxa: davart l'obligaziun da pajar la taxa;

b.

envers ils chantuns e las vischnancas: davart lur indemnisaziun tenor l'artitgel 69g alinea 4.

² En quest connex daventa l'organ d'incassament activ sco autoritad en il senn da l'artitgel 1 alinea 2 litera e LFPA⁶⁵. El po eliminar l'opposiziun en proceduras da scussiun tenor l'artitgel 79 da la Lescha federala dals 11 d'avrigl 1889⁶⁶ davart la scussiun ed il concurs (LSC), ed el vala sco autoritad administrativa en il senn da l'artitgel 80 alinea 2 cifra 2 LSC.

³ El na dastga pratitgar naginas autras activitads economicas che quellas ch'èn vegnidas delegadas tenor questa lescha.

⁴ El publitgescha mintga onn in rapport davart sia activitad sco er ses quint annual.

¹ Per sclerir la dispensaziun da l'obligaziun da pajar la taxa tenor l'artitgel 69b alinea 1 litera a po l'organ d'incassament elavurar datas che permettan da trair conclusiuns davart la sanadad d'ina persuna sco er davart mesiras da l'agid social che concernan questa persuna. L'elavuraziun da datas sa drizza tenor las disposiziuns da la Lescha federala dals 25 da settember 2020⁶⁷ davart la protecziun da datas (LPD) che valan per ils organs federals.⁶⁸

² L'organ d'incassament prenda las mesiras organisatoricas e tecnicas, per che las datas sajan segiradas cunter elavuraziuns nunautorisadas. Las datas ch'el obtegna en connex cun sia activitad tenor questa lescha dastga el elavurar mo per incassar la taxa, ed el dastga surdar questas datas a terzas persunas mo per quests intents.

³ Datas che permettan da trair conclusiuns davart la sanadad d'ina persuna sco er davart mesiras da l'agid social che concernan questa persuna, na dastgan betg vegnir communitgadas a terzas persunas. Questas datas dastgan vegnir arcunadas tar terzas persunas en furma codada (codaziun dal cuntegn). Las datas dastgan vegnir decodadas mo tras l'organ d'incassament. Las persunas ch'èn incaricadas cun lavurs da tgira, da mantegniment u da programmaziun dastgan elavurar talas datas en ils sistems d'infurmaziun, sche quai è necessari per ademplir lur incumbensas e sche la segirezza da las datas è garantida. Il cuntegn da las datas na dastga betg vegnir midà qua tras.

⁴ L'organ d'incassament sto surdar ad in eventual successur a temp, gratuitamain ed en furma electronica las datas ch'èn necessarias per incassar la taxa. Suenter la surdada sto el destruir las datas che na vegnan betg pli duvradas.

¹ Las datas davart las chasadas e davart las persunas appartegnentas ch'èn necessarias per incassar la taxa retira l'organ d'incassament dals suandants registers:

a.

dals registers d'abitants (art. 2 al. 2 lit. a LAR⁶⁹);

b.

dal sistem d'infurmaziun Ordipro dal Departament federal d'affars exteriurs (art. 2 al. 1 lit. c LAR).

² El retira las datas da la plattafurma d'informatica e da communicaziun da la Confederaziun tenor l'artitgel 10 alinea 3 LAR.

³ Ils chantuns e las vischnancas mettan a disposiziun a l'organ d'incassament en furma codada las datas da lur registers d'abitants, e quai tenor las cundiziuns ed en la periodicitad che vala per la furniziun a la plattafurma d'informatica e da communicaziun da la Confederaziun.

⁴ L'organ d'incassament paja a las vischnancas ed als chantuns contribuziuns che derivan dal retgav da la taxa per lur investiziuns specificas ch'èn necessarias per pudair transmetter las datas a quest organ.

⁵ L'organ d'incassament po duvrar sistematicamain il numer da la AVS⁷⁰ tenor l'artitgel 50c da la Lescha federala dals 20 da december 1946⁷¹ davart l'assicuranza per vegls e survivents (LAVS):

a.

per ademplir sias incumbensas en connex cun l'incassament da la taxa;

b.

per survegnir da las vischnancas e dals chantuns indicaziuns pli precisas davart las datas furnidas.

⁶ Il Cussegl federal determinescha, tge datas che l'organ d'incassament po retrair tenor l'alinea 1. El regla ils detagls davart la dimensiun e l'elavuraziun da las datas, davart la periodicitad da las furniziuns da datas sco er davart las contribuziuns als chantuns ed a las vischnancas tenor l'alinea 4.

¹ Ina interpresa è obligada da pajar la taxa, sch'ella ha cuntanschì, durant la perioda fiscala terminada l'onn chalendar precedent tenor l'artitgel 34 da la Lescha federala dals 12 da zercladur 2009⁷² davart la taglia sin la plivalur (LTPV), la svieuta minimala fixada dal Cussegl federal.

² Sco interpresa vala, tgi ch'è inscrit tar la AFT en il register da las persunas obligadas da pajar la taglia sin la plivalur ed ha sia sedia, ses domicil u ses stabiliment en Svizra. Betg sco interpresa na vala ina societad simpla tenor l'artitgel 530 dal Dretg d'obligaziuns⁷³.⁷⁴

³ Sco svieuta en il senn da l'alinea 1 vala la svieuta totala ch'ina interpresa ha cuntanschì e ch'è da declerar tenor la LTPV, senza la taglia sin la plivalur, independentamain da sia qualificaziun sut l'aspect da la taglia sin la plivalur. Nua ch'i vegn applitgada la taxaziun da gruppa, è decisiva la svieuta totala da la gruppa da la taglia sin la plivalur.

⁴ Il Cussegl federal fixescha la svieuta minimala uschia, che interpresas pitschnas èn dispensadas da la taxa.

⁵ L'autezza da la taxa sa drizza tenor la svieuta. Il Cussegl federal fixescha plirs stgalims da svieuta cun mintgamai ina tariffa per stgalim (categorias tariffaras).

¹ La AFT incassescha la taxa.

² Per mintga interpresa ch'è obligada da pajar la taxa determinescha la AFT mintga onn, en il rom da l'incassament da la taglia sin la plivalur, sia classificaziun en ina categoria tariffara e metta a quint questa taxa.

³ Sch'ina interpresa na dispona betg d'in rendaquint u sche quel è evidentamain insuffizient, attribuescha la AFT l'interpresa ad ina categoria tariffara tenor appreziar.

⁴ Sch'i n'è per il mument betg pussaivel d'attribuir l'interpresa ad ina categoria tariffara per la perioda fiscala terminada l'onn chalendar precedent, metta la AFT a quint la taxa pir, cur che la categoria tariffara è determinada.

¹ La taxa sto mintgamai vegnir pajada entaifer 60 dis suenter ch'ella è vegnida messa a quint, ed ella surannescha 5 onns suenter ch'ella avess stuì vegnir pajada. Per pajaments retardads vegn debità senza admoniziun in tschains da retard da 5 pertschient per onn.

² Sche la persuna ch'è obligada da pajar la taxa fa opposiziun, decretescha la AFT ina disposiziun davart l'autezza da la taxa debitada ed eliminescha a medem temp l'opposiziun tenor l'artitgel 79 LSC⁷⁵.

³ En cas da contestaziun ha la collocaziun definitiva lieu pir, cur ch'ina disposiziun ha survegnì forza legala.

⁴ La taxa debitada e messa a quint po vegnir scuntrada cun indemnisaziuns da la taglia sin la plivalur.

⁵ Per garantir la taxa valan ils artitgels 93-95 LTPV⁷⁶. Per la cunresponsabladad e per la successiun valan ils artitgels 15 e 16 LTPV.

⁶ La procedura sa drizza tenor la LFPA⁷⁷.

¹ En sia contabilitad sto la AFT separar l'activitad per incassar la taxa da las ulteriuras activitads.

² Ella publitgescha mintga onn il quint annual ed in rapport davart sia activitad en connex cun l'incassament da la taxa.

¹ La AFT elavura mo las datas ch'ella dovra per ademplir las incumbensas tenor questa lescha. Valair valan las disposiziuns da la LTPV⁷⁸ davart l'elavuraziun da datas.

² L'obligaziun da secretezza e sias excepziuns tenor l'artitgel 74 LTPV valan er en il rom da l'incassament da la taxa.

Il Cussegl federal regla las premissas ed ils criteris da calculaziun ch'èn applitgabels per ils projects da perscrutaziun en il sectur da radio e televisiun cun agid da las taxas da concessiun (art. 22).

¹ La Fundaziun per la retschertga davart l'utilisaziun da radio e televisiun procura per la retschertga da datas scientificas davart l'utilisaziun da radio e televisiun en Svizra. Ella exequescha sia activitad en moda scientifica ed independentamain da la SSR, d'auters emetturs e da la reclama. Ella po surdar dal tuttafatg u per part sia activitad a sias filialas e per registrar las datas po ella consultar experts independents. La fundaziun è suttamessa a la surveglianza dal DATEC.

² La fundaziun procura ch'ils emetturs da programs svizzers ed ils perscrutaders scientifics disponian d'in dumber suffizient da datas davart l'utilisaziun da radio e televisiun. Ad emetturs concessiunads en las regiuns muntagnardas e perifericas ston las datas star a disposiziun en ina qualitad cumparegliabla sco als ulteriurs emetturs.

¹ La fundaziun publitgescha almain ina giada per onn ils resultats ils pli impurtants da sias retschertgas.

² Ella metta a disposiziun las datas fundamentalas d'utilisaziun a terzas persunas per pretschs che cuvran ils custs. Ella furnescha gratuitamain las datas a la perscrutaziun universitara ed al UFCOM.

¹ La fundaziun regla sia organisaziun e sias activitads en in reglament che sto vegnir approvà dal DATEC.

² Il cussegl da fundaziun ha tuttina blers represchentants da la SSR sco represchentants dals ulteriurs emetturs svizzers. Ultra da quai vegnan elegidas autras persunas en il cussegl da fundaziun. I vegn guardà che las regiuns linguisticas e las schlattainas sajan represchentadas adequatamain en il cussegl da fundaziun.⁸⁶

³ Il DATEC elegia il cussegl da fundaziun. El resguarda las propostas da las instanzas pertutgadas.

¹ La fundaziun survegn mintga onn ina contribuziun or dal retgav da las taxas da radio e televisiun per sviluppar e per sa procurar metodas e sistems da retschertga.

² Il Cussegl federal fixescha l'import il mument ch'el determinescha l'autezza da las taxas da radio e televisiun.

³ La Lescha da subvenziuns dals 5 d'october 1990⁸⁷ è applitgabla. Las activitads tenor ils artitgels 78 e 79 ston vegnir separadas d'eventualas autras activitads en la contabilitad da la fundaziun e d'eventualas filialas.

¹ Il UFCOM guarda che questa lescha e las disposiziuns executivas, la concessiun sco er las convenziuns internaziunalas respectivas vegnian observadas. Per tractar recurs concernent il cuntegn da publicaziuns redacziunalas sco er concernent la refusa da l'access al program u a l'ulteriura purschida publicistica da la SSR (art. 83 al. 1 lit. a ed art. 94-98) è cumpetenta l'autoritad da recurs.⁹⁰

² Mesiras da surveglianza che sa refereschan a la producziun ed a la preparaziun dals programs e da l'ulteriura purschida publicistica da la SSR sco er puras controllas da l'opportunitad n'èn betg admessas.⁹¹

³ Las disposiziuns da la LFPA⁹² vegnan applitgadas per la procedura da surveglianza, sche la lescha qua avant maun na divergescha betg da quai.

⁴ En la procedura da surveglianza da l'autoritad da recurs (art. 91-98) n'èn admessas naginas mesiras preventivas.⁹³

⁵ L'autoritad da recurs giuditgescha mo recurs concernent publicaziuns redacziunalas cumparidas e concernent la refusa da l'access al program u a l'ulteriura purschida publicistica da la SSR. Ella n'intervegn betg d'uffizi.⁹⁴

¹ Las autoritads da surveglianza orienteschan la publicitad davart lur activitad. Ellas pon publitgar en spezial las decisiuns administrativas e penalas e las render accessiblas en la procedura d'invista.

² Ellas na dastgan betg tradir secrets da fatschenta.

¹ Las autoritads da surveglianza pon elavurar datas ch'èn spezialmain degnas da vegnir protegidas, sche quai è necessari per ademplir las incumbensas surdadas da questa lescha.

² L'elavuraziun da datas sa drizza tenor las disposiziuns da la LPD⁹⁵ che valan per ils organs federals.⁹⁶

¹ Sche l'autoritad da surveglianza constatescha ina violaziun dal dretg, po ella:

a.

pretender da la persuna natirala u giuridica ch'è responsabla per la violaziun:

1.

ch'ella elimineschia la mancanza e prendia mesiras per che la violaziun na sa repetia betg,

2.

ch'ella l'infurmeschia davart las mesiras prendidas,

3.

ch'ella consegnia a la Confederaziun las entradas finanzialas ch'ella ha obtegnì tras la violaziun;

b.

proponer al DATEC da cumplettar la concessiun cun cundiziuns, da la restrenscher, da la suspender u da la retrair.

² Sin dumonda da l'autoritad da recurs (art. 97 al. 4) po il DATEC scumandar il program u decretar cundiziuns per l'activitad da diffusiun.⁹⁷

¹ L'autoritad da surveglianza po engrevgiar cun in import da fin 10 pertschient da la svieuta annuala cuntanschida en media durant ils ultims 3 onns da gestiun en Svizra, tgi che:

a.

cuntrafa ad ina disposiziun en vigur da l'autoritad da surveglianza u ad ina decisiun en vigur da l'autoritad da meds legals;

b.

cuntrafa en greva moda a las disposiziuns da la concessiun;

c.

violescha prescripziuns davart la reclama ed il sponsuradi ch'èn cuntegnidas en questa lescha (art. 4, 5 e 9-14), en las disposiziuns executivas, en la concessiun sco er en las Convenziuns internaziunalas respectivas;

d.

violescha las prescripziuns davart l'obligaziun da diffusiun (art. 55);

e.

n'observa betg l'obligaziun da conceder il dretg da rapportar en cas d'eveniments publics (art. 72);

f.

na conceda betg il liber access ad eveniments d'ina impurtanza considerabla per la societad (art. 73);

g.

cuntrafa a mesiras en il senn da l'artitgel 75 (concentraziun da las medias);

h.⁹⁸

...

² Cun in import fin 10 000 francs po vegnir engrevgià, tgi che n'ademplescha betg, tgi che ademplescha cun retard u en moda incumpletta ina da las suandantas obligaziuns u fa faussas indicaziuns:

a.

obligaziun d'annunzia (art. 3);

b.

obligaziuns da diffusiun (art. 8);

c.

obligaziun d'annunziar las entradas da reclama e da sponsuradi (art. 15);

d.

obligaziun d'annunziar participaziuns (art. 16);

e.

obligaziun d'infurmar (art. 17);

f.

obligaziun da far in rapport (art. 18);

g.

obligaziun d'inoltrar indicaziuns statisticas (art. 19);

h.

obligaziun da registrar e da conservar programs (art. 20) u da mantegnair programs (art. 21);

i.

obligaziuns da la SSR (art. 29);

j.

obligaziuns per ils emetturs cun ina concessiun cun dretg d'ina part da la taxa (art. 41);

k.

obligaziun da communitgar il transferiment da la concessiun (art. 48);

l.

obligaziun da respectar il territori da concessiun fixada dal Cussegl federal per derasar u per laschar derasar programs (art. 52 al. 3);

m.

obligaziun da derasar programs prescrits sin chanals preferids (art. 62);

n.

obligaziun da dar e da preschentar infurmaziuns (art. 63 al. 3).

³ L'autoritad da surveglianza resguarda en spezial la grevezza da la cuntravenziun sco er las relaziuns finanzialas da la persuna giuridica u natirala sancziunada per fixar l'import da la sancziun.

¹ L'autoritad da recurs fixescha per las regiuns da las trais linguas uffizialas mintgamai in post da mediaziun independent ch'è attribuì administrativamain ad ella.

² La SSR prevesa agens posts da mediaziun independents.

³ Ils posts da mediaziun tractan reclamaziuns cunter:

a.

emissiuns redacziunalas emessas pervia da violaziun dals artitgels 4 e 5 da questa lescha u dal dretg internaziunal ch'è impegnativ per ils emetturs da programs svizzers;

a^bis.¹⁰⁰

contribuziuns concepidas da la redacziun e cumparidas en l'ulteriura purschida publicistica da la SSR pervia da violaziun da l'artitgel 5a;

b.¹⁰¹

la refusa da l'access al program d'emetturs svizzers u a la part da l'ulteriura purschida publicistica da la SSR concepida da la redacziun.

⁴ Ils posts da mediaziun da las regiuns linguisticas èn suttamess a la surveglianza da l'autoritad da recurs.

¹ Mintga persuna po inoltrar ina reclamaziun tar il post da mediaziun:

a.

cunter publicaziuns redacziunalas pervia da violaziun dals artitgels 4, 5 e 5a da questa lescha;

b.

cunter la refusa da l'access (art. 91 al. 3 lit. b).

² Las reclamaziuns ston vegnir inoltradas entaifer 20 dis suenter la cumpariziun da la publicaziun contestada u suenter la refusa da la dumonda d'access en il senn da l'artitgel 91 alinea 3 litera b.

³ Sche la reclamaziun sa referescha a pliras emissiuns u contribuziuns, cumenza il termin cun la diffusiun respectivamain cun la cumpariziun da l'ultima publicaziun contestada. L'emprima publicaziun contestada na dastga dentant betg esser cumparida dapli che 3 mais avant l'ultima publicaziun contestada.

⁴ Ina reclamaziun po mo sa drizzar cunter pliras contribuziuns concepidas da la redacziun en l'ulteriura purschida publicistica da la SSR, sche questas contribuziuns èn cumparidas en il medem dossier d'elecziuns u da votaziuns.

⁵ La reclamaziun sto vegnir inoltrada en scrit, ed ella sto vegnir documentada, sch'ella pertutga l'ulteriura purschida publicistica da la SSR. En ina curta motivaziun stoi vegnir inditgà, en tge reguard ch'il cuntegn da la publicaziun redacziunala contestada duai esser manglus u che la refusa da l'access al program respectivamain a la part da l'ulteriura purschida publicistica da la SSR concepida da la redacziun duai cuntrafar al dretg.

¹ Il post da mediaziun examinescha la fatschenta ed intermediescha tranter las parts participadas. El po en spezial:

a.

discutar la fatschenta cun l'emettur da programs u al transferir cas levs per als liquidar directamain;

b.

procurar per ina scuntrada directa tranter las parts participadas;

c.

far recumandaziuns a l'emettur da programs;

d.

orientar las parts participadas davart las cumpetenzas, davart il dretg decisiv e davart la via giudiziala.

² El n'ha betg la cumpetenza da prender decisiuns u da dar directivas.

³ Il post da mediaziun infurmescha en scrit las parts participadas davart ils resultats da ses scleriments e davart il gener da la liquidaziun da la reclamaziun il pli tard 40 dis suenter l'inoltraziun da la reclamaziun.

⁴ En enclegientscha vicendaivla da las parts participadas po avair lieu ina liquidaziun a bucca.

⁵ Il post da mediaziun metta a quint ils custs che derivan da la liquidaziun a l'emettur da programs suenter avair tractà la reclamaziun. Sin dumonda dal post da mediaziun u da l'emettur po l'autoritad da recurs - en il cas d'ina reclamaziun da levsenn - adossar ils custs da procedura a quella persuna che ha inoltrà la reclamaziun.

¹ Recurs cunter ina publicaziun redacziunala cumparida u cunter ina refusa da l'access pon vegnir inoltrads:¹⁰⁴

a.

è stà participà a la procedura da reclamaziun davant il post da mediaziun; e

b.¹⁰⁵

da persunas che cumprovan ina stretga relaziun tar l'object da las publicaziuns redacziunalas contestadas u da persunas, da las qualas la dumonda d'access (art. 91 al. 3 lit. b) è vegnida refusada.

² Er persunas natiralas che na cumprovan betg ina stretga relaziun tar l'object da las publicaziuns redacziunalas contestadas pon far recurs, sch'ellas preschentan almain 20 suttascripziuns.¹⁰⁶

³ Persunas natiralas che fan in recurs tenor l'alinea 2, ston avair almain 18 onns ed avair il dretg da burgais svizzer ubain ina permissiun da domicil u da dimora.¹⁰⁷

⁴ Recurs po far er il DATEC; en quest cas na valan betg las premissas tenor l'alinea 1.

¹ I po vegnir fatg in recurs en scrit tar l'autoritad da recurs entaifer 30 dis dapi l'entrada dal rapport tenor l'artitgel 93 alinea 3. Il rapport dal post da mediaziun sto vegnir agiuntà al recurs.

² Il DATEC inoltrescha ses recurs directamain a l'autoritad da recurs entaifer 30 dis suenter la diffusiun da l'emissiun respectiva.

³ Il recurs sto inditgar curtamain:

a.

en tge reguard che la publicaziun redacziunala contestada ha violà las disposiziuns davart il cuntegn tenor ils artitgels 4, 5 e 5a u il dretg internaziunal liant per ils emetturs da programs svizzers; u

b.

quant enavant che la refusa da l'access (art. 91 al. 3 lit. b) cuntrafa al dretg.¹⁰⁸

¹ Sch'igl exista in interess public d'ina decisiun, entra l'autoritad da recurs er en recurs fatgs sin il termin, che n'adempleschan betg tut las premissas formalas. En quest cas n'han ils recurrents nagins dretgs da partida.

² Sch'il recurs n'è betg evidentamain inadmissibel u nunmotivà, envida l'autoritad da recurs l'emettur da programs a prender posiziun.

³ L'autoritad da recurs po refusar u sistir da tractar in recurs, sche meds giuridics da dretg civil u da dretg penal n'èn betg vegnids duvrads u sch'i vegn fatga ina procedura administrativa en la medema fatschenta.

¹ Las tractativas da l'autoritad da recurs èn publicas, nun ch'i cuntrafetschian ad interess privats degns da vegnir protegids.

² L'autoritad da recurs constatescha, sche:

a.

las publicaziuns redacziunalas contestadas han violà disposiziuns davart il cuntegn tenor ils artitgels 4, 5 e 5a u tenor il dretg internaziunal respectiv; u

b.

la refusa da l'access (art. 91 al. 3 lit. b) cuntrafa al dretg.¹⁰⁹

³ Sche l'autoritad da recurs constatescha ina violaziun, po ella prender u proponer las mesiras previsas en l'artitgel 89.

⁴ En cas da grevas cuntravenziuns repetidas cunter las obligaziuns tenor l'artitgel 4 alineas 1 e 3 sco er tenor l'artitgel 5 concernent il program u cunter las obligaziuns correspundentas concernent l'ulteriura purschida publicistica da la SSR (art. 5a) po l'autoritad da recurs inoltrar al DATEC ina dumonda per in scumond d'emissiun (art. 89 al. 2).¹¹⁰

¹ La procedura da recurs davant l'autoritad da recurs è gratuita.

² Per recurs da levsenn pon vegnir adossads ils custs da procedura a la persuna recurrenta. La LFPA¹¹¹ è applitgabla.