Conclus federal
davart l'approvaziun e la realisaziun da las cunvegnas bilateralas tranter la Svizra e la UE per l'associaziun a la reglamentaziun da Schengen e da Dublin

¹ Approvadas vegnan:

a.

la Cunvegna dals 26 d'october 2004³ tranter la Confederaziun svizra, l'Uniun europeica e la Communitad europeica davart l'associaziun da quest stadi tar la realisaziun, l'applicaziun ed il svilup da l'acquist da Schengen;

b.

la Cunvegna dals 26 d'october 2004⁴ tranter la Confederaziun svizra e la Communitad europeica davart ils criteris e las proceduras per determinar il stadi cumpetent per examinar ina dumonda d'asil inoltrada en in stadi commember u en Svizra;

c.

la Convenziun dals 17 da december 2004⁵ tranter la Confederaziun svizra, la Republica da l'Islanda ed il Reginavel da la Norvegia davart la realisaziun, l'applicaziun ed il svilup da l'acquist da Schengen e davart ils criteris e las proceduras per determinar il stadi cumpetent per examinar ina dumonda d'asil inoltrada en Islanda, en Norvegia u en Svizra;

d.

la Cunvegna dals 26 d'october 2004⁶ en furma d'ina correspundenza tranter il Cussegl da l'Uniun europeica e la Confederaziun svizra davart ils comités che sustegnan la Cumissiun europeica tar l'execuziun da sias cumpetenzas da realisaziun.

² En il rom da la Constituziun federala e da la Lescha federala dals 22 da december 1999⁷ davart la participaziun dals chantuns a la politica exteriura da la Confederaziun reglan la Confederaziun ed ils chantuns en ina cunvegnientscha la participaziun dals chantuns tar la realisaziun e tar l'ulteriur svilup da l'acquist da Schengen e da Dublin avant l'entrada en vigur da questas cunvegnas.

³ Il Corp da guardias da cunfin ademplescha incumbensas da segirezza en collavuraziun cun la polizia dals chantuns e da la Confederaziun. La suveranitad chantunala da polizia resta garantida en quest connex. Il Corp da guardias da cunfin mantegna almain l'effectiv dals 31 da december 2003.

^3bis Las resursas persunalas che la Svizra metta a disposiziun a l'Agentura europeica da guardia da cunfin e da costa na dastgan betg ir a donn e cust da la protecziun naziunala dals cunfins.⁸

⁴ Il Cussegl federal vegn autorisà da ratifitgar las cunvegnas menziunadas en l'alinea 1.

Il Cussegl federal vegn autorisà da far - en cumplettaziun da las cunvegnas menziunadas en l'artitgel 1 alinea 1 - las suandantas cunvegnas:

a.

la Cunvegna tranter la Confederaziun svizra ed il Reginavel dal Danemarc davart la constituziun da dretgs e d'obligaziuns tranter quests dus stadis areguard la collavuraziun tenor Schengen;

b.

il protocol tar la Cunvegna per l'associaziun a la reglamentaziun da Dublin davart la participaziun dal Reginavel dal Danemarc a questa cunvegna.

Las leschas federalas qua sutvart vegnan midadas sco suonda:

...⁹

¹ Quest conclus è suttamess - tenor ils artitgels 141 alinea 1 litera d cifra 3 e 141a alinea 2 da la Constituziun federala - al referendum facultativ cunter contracts internaziunals che cuntegnan disposiziuns legislativas impurtantas u che pretendan il decret da leschas federalas per pudair vegnir realisads.

² Il Cussegl federal fixescha la data da l'entrada en vigur da las leschas federalas numnadas en l'artitgel 3.

Data da l'entrada en vigur:
Art. 3 cifras 7 ed 8: 1. da mars 2008¹⁰
Art. 3 cifra 4 (art. 355c-355e): 1. da zercladur 2008¹¹
Las ulteriuras disposiziuns: 12 da december 2008¹²