Autoritads da persecuziun penala èn:

a.

la polizia;

b.

la procura publica;

c.

las autoritads penalas per surpassaments.

Cumpetenzas giudizialas en la procedura penala han:

a.

la dretgira da mesiras repressivas;

b.

la dretgira d'emprima instanza;

c.

l'instanza da recurs;

d.

la dretgira d'appellaziun.

¹ La Confederaziun ed ils chantuns fixeschan lur autoritads penalas e las designaziuns respectivas.

² Els reglan l'elecziun, la cumposiziun, l'organisaziun e las cumpetenzas da las autoritads penalas, nun che questa lescha u autras leschas federalas reglian definitivamain quests puncts.

³ Els pon prevair procuras publicas superiuras u generalas.

⁴ Cun excepziun da l'instanza da recurs e da la dretgira d'appellaziun pon els nominar pliras autoritads penalas dal medem tip; en quest cas fixeschan els la cumpetenza locala e materiala respectiva.

⁵ Els reglan la surveglianza da lur autoritads penalas.

¹ L'activitad da la polizia da la Confederaziun, dals chantuns e da las vischnancas en il rom da la persecuziun penala sa drizza tenor questa lescha.

² La polizia investighescha malfatgs sin atgna iniziativa, sin denunzia da persunas privatas e d'autoritads sco er per incumbensa da la procura publica; en quest connex è ella suttamessa a la surveglianza ed a las instrucziuns da la procura publica.

³ Sch'in cas penal è pendent davant ina dretgira, po questa dretgira dar instrucziuns ed incumbensas a la polizia.

¹ La procura publica è responsabla ch'il dretg statal da chastiar vegnia exequì en moda unitara.

² Ella maina la procedura preliminara, persequitescha malfatgs en il rom da l'inquisiziun, fa eventualmain l'accusaziun e represchenta l'accusaziun.

¹ La Confederaziun ed ils chantuns pon incumbensar autoritads administrativas da persequitar e da giuditgar surpassaments.

² Surpassaments ch'èn vegnids commess en connex cun in crim u cun in delict vegnan persequitads e giuditgads da la procura publica e da las dretgiras ensemen cun quest crim u cun quest delict.

¹ La dretgira da mesiras repressivas è cumpetenta per ordinar l'arrest d'inquisiziun e l'arrest da segirezza e - sche questa lescha prevesa quai - per ordinar u per approvar ulteriuras mesiras repressivas.

² Ils commembers da la dretgira da mesiras repressivas na pon betg esser derschaders specifics per il medem cas.

¹ La dretgira d'emprima instanza giuditgescha en emprima instanza tut ils malfatgs che na tutgan betg a la cumpetenza d'autras autoritads.

² Sco dretgira d'emprima instanza pon la Confederaziun ed ils chantuns prevair in derschader singul per laschar giuditgar:

a.

surpassaments;

b.⁴

crims e delicts, cun excepziun da quels, per ils quals la procura publica pretenda in chasti da detenziun da passa 2 onns, in internament tenor l'artitgel 64 CP⁵, in tractament tenor l'artitgel 59 CP u - en cas che sancziuns cundiziunadas ston vegnir revocadas a medem temp - ina privaziun da la libertad da passa 2 onns.

¹ L'instanza da recurs giuditgescha recurs cunter acts processuals sco er cunter decisiuns che n'èn betg suttamessas a l'appellaziun e ch'èn vegnidas prendidas:

a.

da las dretgiras d'emprima instanza;

b.

da la polizia, da la procura publica e da las autoritads penalas per surpassaments;

c.

da la dretgira da mesiras repressivas en ils cas ch'èn previs en questa lescha.

² La Confederaziun ed ils chantuns pon surdar las cumpetenzas da l'instanza da recurs a la dretgira d'appellaziun.

¹ La dretgira d'appellaziun decida davart:

a.

appellaziuns cunter sentenzias da las dretgiras d'emprima instanza;

b.

dumondas da revisiun.

² Tgi ch'è stà commember da l'instanza da recurs, na po betg esser commember da la dretgira d'appellaziun per il medem cas.

³ Ils commembers da la dretgira d'appellaziun na pon betg esser derschaders da revisiun per il medem cas.

Las autoritads penalas chantunalas persequiteschan e giuditgeschan ils malfatgs previs dal dretg federal; resalvadas restan las excepziuns legalas.

¹ A la giurisdicziun federala èn suttamess ils suandants malfatgs dal CP⁶:

a.⁷

ils malfatgs da l'emprim e dal quart titel sco er dals artitgels 140, 156, 189 e 190, uschenavant ch'els èn drizzads cunter persunas protegidas dal dretg internaziunal, cunter magistrats da la Confederaziun, cunter commembers da l'Assamblea federala, cunter il procuratur public federal u cunter ils suppleants dal procuratur public federal;

b.

ils malfatgs dals artitgels 137-141, 144, 160 e 172^ter, uschenavant ch'els pertutgan localitads, archivs u documents da missiuns diplomaticas e da posts consulars;

c.

il rapiment d'ostagis tenor l'artitgel 185 per constrenscher autoritads da la Confederaziun u da l'exteriur;

d.

ils crims ed ils delicts dals artitgels 224-226^ter;

e.⁸

ils crims ed ils delicts dal dieschavel titel concernent la munaida, ils daners da palpiri e las bancnotas, las marcas da valur uffizialas ed autras marcas da la Confederaziun, las mesiras ed ils pais; exceptadas èn las vignettas per l'utilisaziun da las vias naziunalas d'emprima e da segunda classa;

f.

ils crims ed ils delicts da l'indeschavel titel, uschenavant ch'i sa tracta da documents da la Confederaziun, cun excepziun dals permiss da manischar e dals mussaments dal traffic da pajaments postals;

g.⁹

ils malfatgs dal dudeschavel titel^bis e dal dudeschavel titel^ter sco er da l'artitgel 264k;

h.

ils malfatgs da l'artitgel 260^bis sco er dal tredeschavel fin al quindeschavel e dal deschsettavel titel, uschenavant ch'els èn drizzads cunter la Confederaziun, cunter las autoritads federalas, cunter la voluntad dal pievel en cas d'elecziuns, da votaziuns, da dumondas da referendum u d'iniziativa federalas, cunter la pussanza federala u cunter la giurisdicziun federala;

i.

ils crims ed ils delicts dal sedeschavel titel;

j.

ils malfatgs dal deschdotgavel e dal deschnovavel titel, uschenavant ch'els èn vegnids commess d'in commember d'ina autoritad u d'in emploià da la Confederaziun ubain cunter la Confederaziun;

k.¹⁰

ils surpassaments dals artitgels 329 e 331;

l.

ils crims ed ils delicts politics, ch'èn il motiv u la consequenza da tumults che chaschunan ina intervenziun federala cun armas.

² Las prescripziuns davart la cumpetenza dal Tribunal penal federal ch'èn cuntegnidas en leschas federalas spezialas restan resalvadas.

¹ A la giurisdicziun federala suttastattan ultra da quai ils malfatgs tenor ils artitgels 260^ter, 260^quinquies, 260^sexies, 305^bis, 305^ter e 322^ter-322^septies CP¹² sco er ils crims che vegnan commess d'ina organisaziun criminala u terroristica en il senn da l'artitgel 260^ter CP, sch'ils malfatgs:¹³

a.

èn vegnids commess per gronda part a l'exteriur;

b.

èn vegnids commess en plirs chantuns, senza ch'i saja avant maun ina clera predominanza en in dals chantuns pertutgads.

² En cas da crims dal segund e da l'indeschavel titel dal CP po la Procura publica da la Confederaziun avrir ina inquisiziun, sche:

a.

las premissas da l'alinea 1 èn ademplidas; e

b.

nagina autoritad da persecuziun penala s'occupa da la chaussa u l'autoritad chantunala da persecuziun penala cumpetenta dumonda la Procura publica da la Confederaziun da surpigliar la procedura.

³ L'avertura d'ina inquisiziun tenor l'alinea 2 stabilescha la giurisdicziun federala.

¹ La Procura publica da la Confederaziun po incumbensar las autoritads chantunalas da retschertgar e da giuditgar, excepziunalmain mo da giuditgar, ina chaussa penala che suttastat a la giurisdicziun federala tenor l'artitgel 23. Exceptadas èn chaussas penalas tenor ils artitgels 23 alinea 1 litera g.

² En cas simpels po ella er incumbensar las autoritads chantunalas da retschertgar e da giuditgar ina chaussa penala che suttastat a la giurisdicziun federala tenor l'artitgel 24.

¹ Sch'il malfatg è vegnì commess en plirs chantuns u a l'exteriur u sch'ils delinquents, ils cumplizis u ils participants han lur domicil u lur lieu da dimora usità en differents chantuns, decida la Procura publica da la Confederaziun, tge chantun che retschertga e giuditgescha la chaussa penala.

² Sch'ina chaussa penala suttastat tant a la giurisdicziun federala sco er a la giurisdicziun chantunala, po la Procura publica da la Confederaziun ordinar che las proceduras vegnian unidas e surdadas a las autoritads federalas u a las autoritads chantunalas.

³ Ina cumpetenza ch'è vegnida stabilida tenor l'alinea 2 vala vinavant, er sche quella part da la procedura che ha stabilì la cumpetenza vegn messa ad acta.

⁴ Sch'i vegn en dumonda ina delegaziun en il senn da quest chapitel, tramettan las procuras publicas da la Confederaziun e dals chantuns ina a l'autra las actas per prender invista da quellas. Suenter la decisiun van las actas a quella autoritad che ha da retschertgar e da giuditgar la chaussa.

¹ Sch'in cas suttastat a la giurisdicziun federala, sche la chaussa è urgenta e sche las autoritads penalas da la Confederaziun n'èn betg anc vegnidas activas, pon las investigaziuns polizialas vegnir exequidas er da las autoritads chantunalas che fissan cumpetentas tenor las reglas da la dretgira cumpetenta. La Procura publica da la Confederaziun sto vegnir orientada immediatamain; il cas sto vegnir surdà ad ella respectivamain vegnir suttamess a sia decisiun tenor ils artitgels 25 u 26 uschè prest sco pussaivel.

² En cas da malfatgs ch'èn vegnids commess dal tuttafatg u per part en plirs chantuns u a l'exteriur e per ils quals la cumpetenza da la Confederaziun u d'in chantun n'è betg anc clera, pon las autoritads penalas da la Confederaziun far emprimas investigaziuns.

Conflicts tranter la Procura publica da la Confederaziun e las autoritads penalas chantunalas vegnan decidids dal Tribunal penal federal.

¹ Malfatgs vegnan persequitads e giuditgads cuminaivlamain:

a.

sch'ina persuna inculpada ha commess plirs malfatgs; u

b.

en cas da cumplicitad u da participaziun.

² Sch'i sa tracta da malfatgs che tutgan per part a la cumpetenza da la Confederaziun u ch'èn vegnids commess en differents chantuns e da pliras persunas, han ils artitgels 25 e 33-38 la precedenza.

Per motivs materials pon la procura publica e las dretgiras separar u unir proceduras penalas.

¹ Cumpetentas per persequitar e per giuditgar in malfatg èn las autoritads dal lieu, nua ch'il malfatg è vegnì commess. Sche mo il lieu, nua che l'effect dal malfatg è vegnì cuntanschì, sa chatta en Svizra, èn cumpetentas las autoritads da quest lieu.

² Sch'il malfatg è vegnì commess en plirs lieus u sche ses effect è vegnì cuntanschì en plirs lieus, èn cumpetentas las autoritads dal lieu, nua ch'ils emprims acts da persecuziun èn vegnids prendids per mauns.

³ Sch'ina persuna inculpada ha commess plirs crims, delicts u surpassaments en il medem lieu, vegnan unidas las proceduras.

¹ Sch'in malfatg è vegnì commess a l'exteriur u sch'il lieu dal malfatg na po betg vegnir eruì, èn las autoritads dal lieu, nua che la persuna inculpada ha ses domicil u sia dimora usitada, cumpetentas per la persecuziun e per il giudicament.

² Sche la persuna inculpada n'ha ni in domicil ni ina dimora usitada en Svizra, èn cumpetentas las autoritads dal lieu d'origin; sch'i manca er in lieu d'origin, èn cumpetentas las autoritads dal lieu, nua che la persuna inculpada è vegnida inscuntrada.

³ Sch'i manca ina dretgira cumpetenta tenor ils alineas 1 e 2, èn cumpetentas las autoritads dal chantun che ha pretendì l'extradiziun.

¹ Ils participants d'in malfatg vegnan persequitads e giuditgads da las medemas autoritads sco il delinquent.

² Sch'in malfatg è vegnì commess da plirs cumplizis, èn cumpetentas las autoritads dal lieu, nua ch'ils emprims acts da persecuziun èn vegnids prendids per mauns.

¹ Sch'ina persuna inculpada ha commess plirs malfatgs en differents lieus, èn las autoritads dal lieu, nua ch'il malfatg smanatschà cun il chasti il pli grev è vegnì commess, cumpetentas per persequitar e per giuditgar tut ils malfatgs. Sche plirs malfatgs èn smanatschads cun il medem chasti, èn cumpetentas las autoritads dal lieu, nua ch'ils emprims acts da persecuziun èn vegnids prendids per mauns.

² Sch'ina accusaziun pervia d'in dals malfatgs è gia vegnida fatga en in chantun pertutgà il mument che la procedura per fixar la dretgira cumpetenta tenor ils artitgels 39-42 vegn exequida, vegnan las proceduras manadas separadamain.

³ Sch'ina persuna è vegnida sentenziada da differentas dretgiras a plirs chastis da medem gener, fixescha la dretgira che ha pronunzià il chasti il pli grev in chasti total sin dumonda da la persuna sentenziada.

¹ En cas d'in malfatg ch'è vegnì commess en Svizra tenor l'artitgel 28 CP¹⁴ èn cumpetentas las autoritads dal lieu, nua che l'interpresa da medias ha sia sedia.

² Sche l'autur è enconuschent e sch'el ha il domicil u la dimora usitada en Svizra, èn er cumpetentas las autoritads dal domicil u dal lieu da dimora usità. En quest cas vegn la procedura realisada là, nua ch'ils emprims acts da persecuziun èn vegnids prendids per mauns. En cas da delicts che vegnan persequitads sin plant po la persuna petenta tscherner tranter las duas dretgiras cumpetentas.

³ Sch'i manca ina dretgira cumpetenta tenor ils alineas 1 e 2, èn cumpetentas las autoritads dal lieu, nua ch'il product da medias è vegnì derasà. Sch'il product da medias è vegnì derasà en plirs lieus, èn cumpetentas las autoritads dal lieu, nua ch'ils emprims acts da persecuziun èn vegnids prendids per mauns.

¹ En cas da malfatgs tenor ils artitgels 163-171 CP¹⁵ èn cumpetentas las autoritads al domicil, al lieu da dimora usità u a la sedia dal debitur.¹⁶

² Per proceduras penalas cunter l'interpresa tenor l'artitgel 102 CP èn cumpetentas las autoritads a la sedia da l'interpresa. Il medem vala, sche la procedura sa drizza - pervia dals medems fatgs - er cunter ina persuna che agescha per l'interpresa.

³ Sch'i manca ina dretgira cumpetenta tenor ils alineas 1 e 2, vegn ella determinada tenor ils artitgels 31-35.

¹ Confiscaziuns independentas (art. 376-378) ston vegnir fatgas al lieu, nua ch'i sa chattan ils objects u las valurs da facultad che duain vegnir confiscads.

² Sch'ils objects u las valurs da facultad che duain vegnir confiscads sa chattan en plirs chantuns e sch'i stattan en connex in cun l'auter pervia dal medem malfatg u pervia dals medems delinquents, èn cumpetentas las autoritads dal lieu, nua che la procedura da confiscaziun è vegnida iniziada l'emprim.

¹ Las procuras publicas pon fixar tranter ellas in'autra dretgira cumpetenta che quella ch'è previsa en ils artitgels 31-37, sche la part predominanta da l'activitad delictuala u las relaziuns persunalas da la persuna inculpada pretendan quai u sch'i èn avant maun auters motivs plausibels.

² Per mantegnair ils dretgs processuals d'ina partida po l'instanza da recurs dal chantun - sin dumonda da questa partida u d'uffizi e suenter avair fatg l'accusaziun - surdar il giudicament ad in'autra dretgira chantunala d'emprima instanza ch'è cumpetenta en chaussa, e quai en divergenza da las prescripziuns da quest chapitel davart la dretgira cumpetenta.

¹ Las autoritads penalas examineschan d'uffizi lur cumpetenza e tramettan sche necessari in cas al post cumpetent.

² Sche pliras autoritads penalas paran dad esser localmain cumpetentas, s'infurmeschan las procuras publicas pertutgadas immediatamain davart ils elements essenzials dal cas e sa stentan da sa cunvegnir uschè svelt sco pussaivel.

¹ Sch'i dat conflicts tranter las autoritads penalas dal medem chantun pervia da la dretgira cumpetenta, vegnan quels decidids da la procura publica superiura u generala u, sch'ina tala n'è betg previsa, da l'instanza da recurs da quest chantun.¹⁷

² Sche las autoritads da persecuziun penala da differents chantuns n'arrivan betg da sa cunvegnir davart la dretgira cumpetenta, suttametta la procura publica dal chantun ch'è stà fatschentà l'emprim cun la chaussa la dumonda immediatamain, en mintga cas avant che far l'accusaziun, al Tribunal penal federal per laschar decider en chaussa.

³ L'autoritad ch'è responsabla per decider davart la dretgira cumpetenta po fixar in'autra dretgira cumpetenta che quella ch'è previsa en ils artitgels 31-37, sche la part predominanta da l'activitad delictuala u las relaziuns persunalas da la persuna inculpada pretendan quai u sch'i èn avant maun auters motivs plausibels.

¹ Sch'ina partida vul contestar la cumpetenza da l'autoritad che sa fatschenta cun la procedura penala, sto ella pretender immediatamain che quella surdettia il cas a l'autoritad penala cumpetenta.

² Cunter la decisiun che las procuras publicas pertutgadas han prendì areguard la dretgira cumpetenta (art. 39 al. 2) pon las partidas far recurs entaifer 10 dis tar l'autoritad ch'è responsabla tenor l'artitgel 40 per decider davart la dretgira cumpetenta. Sche las procuras publicas han fixà in'autra dretgira cumpetenta (art. 38 al. 1), po mo la partida, da la quala la pretensiun tenor l'alinea 1 è vegnida refusada, far recurs cunter questa decisiun.

¹ Fin che la dretgira cumpetenta n'è betg vegnida fixada definitivamain, vegnan las mesiras urgentas prendidas da l'autoritad ch'è sa fatschentada l'emprim cun la chaussa. L'autoritad ch'è responsabla per decider davart la dretgira cumpetenta desi-gnescha sche necessari quella autoritad che sto sa fatschentar ad interim cun la chaussa.

² Persunas arrestadas vegnan pir manadas davant las autoritads d'auters chantuns, cur che la cumpetenza è vegnida fixada definitivamain.

³ Ina dretgira cumpetenta ch'è vegnida fixada tenor ils artitgels 38-41 po vegnir midada mo per novs motivs impurtants e mo avant che far l'accusaziun.

¹ Las disposiziuns da quest chapitel reglan l'assistenza giudiziala en chaussas penalas da vart da las autoritads da la Confederaziun e dals chantuns a favur da las procuras publicas, da las autoritads penalas per surpassaments e da las dretgiras da la Confederaziun e dals chantuns.

² Per la polizia valan questas disposiziuns, uschenavant ch'ella è activa tenor las instrucziuns da las procuras publicas, da las autoritads penalas per surpassaments e da las dretgiras.

³ L'assistenza giudiziala directa tranter las autoritads da polizia da la Confederaziun e dals chantuns sco er dals chantuns tranter els è admessa, sch'ella na concerna betg mesiras repressivas che dastgan vegnir pronunziadas mo da la procura publica u da la dretgira.

⁴ Sco assistenza giudiziala vala mintga mesira che vegn dumandada d'ina autoritad en il rom da sia cumpetenza en ina procedura penala pendenta.

Las autoritads da la Confederaziun e dals chantuns èn obligadas da prestar assistenza giudiziala, sche malfatgs tenor il dretg federal vegnan persequitads e giuditgads en applicaziun da questa lescha.

¹ A las autoritads penalas da la Confederaziun e dals auters chantuns mettan ils chantuns - sche necessari e pussaivel - a disposiziun localitads per lur activitad uffiziala sco er per la collocaziun da praschuniers d'inquisiziun.

² Sin dumonda da las autoritads penalas da la Confederaziun prendan ils chantuns las mesiras necessarias per garantir la segirezza da l'activitad uffiziala da questas autoritads.

¹ Las autoritads han contact direct ina cun l'autra¹⁹.

² Las dumondas d'assistenza giudiziala pon vegnir fatgas en la lingua da l'autoritad petenta u dumandada.

³ En cas d'intschertezza davart l'autoritad cumpetenta drizza l'autoritad petenta la dumonda d'assistenza giudiziala a la procura publica suprema dal chantun dumandà u da la Confederaziun. Quella la trametta al post cumpetent.

¹ L'assistenza giudiziala vegn prestada gratuitamain.

² La Confederaziun paja als chantuns ils custs ch'ella ha chaschunà per il sustegn en il senn da l'artitgel 45.

³ Ils custs chaschunads vegnan annunziads al chantun petent respectivamain a la Confederaziun, per ch'els possian vegnir adossads a las partidas ch'èn sentenziadas da pajar ils custs.

⁴ Las obligaziuns d'indemnisaziun che resultan tras mesiras d'assistenza giudiziala vegnan surpigliadas dal chantun petent u da la Confederaziun.

¹ Ils conflicts davart l'assistenza giudiziala tranter las autoritads dal medem chantun vegnan decidids definitivamain da l'instanza da recurs da quest chantun.

² Ils conflicts tranter las autoritads da la Confederaziun e dals chantuns sco er tranter las autoritads da differents chantuns vegnan decidids dal Tribunal penal federal.

¹ Las procuras publicas e las dretgiras da la Confederaziun e dals chantuns pon pretender da las autoritads penalas d'auters chantuns u da la Confederaziun ch'ellas exequeschian acts processuals. L'autoritad dumandada n'examinescha betg l'admissibladad e l'adequatezza dals acts processuals pretendids.

² Per tractar recurs cunter mesiras d'assistenza giudiziala èn cumpetentas las autoritads dal chantun petent u da la Confederaziun. Tar las autoritads dal chantun dumandà u da la Confederaziun po vegnir contestada mo l'execuziun da la mesira d'assistenza giudiziala.

¹ Cun agid d'in cumond en scrit da manar ina persuna davant ella dumonda l'autoritad petenta da prender en fermanza ina persuna (art. 208).

² L'autoritad dumandada maina sche pussaivel las persunas prendidas en fermanza entaifer 24 uras davant l'autoritad petenta.

³ Las dumondas d'autras mesiras repressivas vegnan motivadas curtamain. En cas urgents po la motivaziun vegnir furnida pli tard.

¹ Las partidas, lur assistents giuridics e l'autoritad petenta pon sa participar als acts processuals pretendids, sche questa lescha prevesa quai.

² Sch'ina participaziun è pussaivla, communitgescha l'autoritad dumandada il lieu e las uras da l'act processual a l'autoritad petenta, a las partidas ed a lur assistents giuridics.

¹ Las procuras publicas, las autoritads penalas per surpassaments e las dretgiras dals chantuns e da la Confederaziun han il dretg d'ordinar e d'exequir directamain en in auter chantun tut ils acts processuals en il senn da questa lescha.

² La procura publica dal chantun, nua che l'act processual duai vegnir exequì, vegn infurmada ordavant. En cas urgents po ella vegnir infurmada posteriuramain. Per dumandar infurmaziuns e per far consegnar actas na dovri nagina infurmaziun.

³ Ils custs dals acts processuals e las obligaziuns d'indemnisaziun che resultan tras quai vegnan surpigliads da la Confederaziun u dal chantun che exequescha quests acts; la Confederaziun u il chantun po adossar quests custs a las partidas a norma dals artitgels 426 e 427.

Sche l'autoritad petenta dovra il sustegn da la polizia per exequir in act processual, drizza ella ina dumonda correspundenta a la procura publica dal chantun dumandà; quella dat las incumbensas necessarias a la polizia locala.

Las proceduras davant las autoritads penalas vegnan manadas a bucca, nun che questa lescha prevesia da las manar en scrit.

¹ La Confederaziun ed ils chantuns fixeschan las linguas da procedura da lur autoritads penalas.

² Las autoritads penalas dals chantuns mainan tut ils acts processuals en lur linguas da procedura; la direcziun da la procedura po permetter excepziuns.

¹ Sch'ina persuna ch'è participada a la procedura na chapescha betg la lingua da procedura u n'è betg en cas da s'exprimer bain avunda en questa lingua, engascha la direcziun da la procedura in translatur. En cas simpels u urgents e cun il consentiment da la persuna pertutgada po ella desister d'in translatur, sch'ella ed il protocollist san bain avunda la lingua estra.

² Er sche la persuna inculpada vegn assistida d'in defensur, la vegn almain il cuntegn essenzial dals acts processuals ils pli impurtants communitgà a bucca u en scrit en ina lingua ch'ella chapescha. In dretg sin la translaziun cumpletta da tut ils acts processuals sco er da las actas n'exista betg.

³ Las actas che na fan betg part da las inoltraziuns da las partidas vegnan sche necessari translatadas en scrit u - per mauns dal protocol - a bucca.

⁴ Per translatar l'interrogaziun da la victima d'in malfatg cunter l'integritad sexuala sto vegnir engaschada ina persuna da la medema schlattaina, sche la victima pretenda quai e sche quai è pussaivel senza retardar nuncunvegnentamain la procedura.

⁵ Per ils translaturs valan las disposiziuns davart ils experts (art. 73, 105, 182-191) confurm al senn.

¹ Las tractativas davant la dretgira d'emprima instanza e davant la dretgira d'appellaziun sco er la communicaziun a bucca da sentenzias e da conclus da questas dretgiras èn publicas, cun excepziun da las deliberaziuns.

² Sche las partidas han renunzià en quests cas da laschar communitgar publicamain la sentenzia u sch'igl è vegnì pronunzià in mandat penal, pon las persunas interessadas prender invista da las sentenzias e dals mandats penals.

³ Betg publicas n'èn:

a.

la procedura preliminara; resalvadas restan communicaziuns da las autoritads penalas a la publicitad;

b.

la procedura da la dretgira da mesiras repressivas;

c.

la procedura da l'instanza da recurs e - sch'ella vegn manada en scrit - la procedura da la dretgira d'appellaziun;

d.

la procedura da mandat penal.

⁴ Las tractativas publicas èn accessiblas a tuts, a persunas sut 16 onns dentant mo cun la permissiun da la direcziun da la procedura.

¹ La dretgira po excluder dal tuttafatg u per part la publicitad da tractativas giudizialas:

a.

sche la segirezza publica u l'urden public u interess degns da vegnir protegids d'ina persuna participada, en spezial da la victima, pretendan quai;

b.

en cas da grondas fullas.

² Sche la publicitad è exclusa, pon la persuna inculpada, la victima e l'accusader privat sa laschar accumpagnar da maximalmain trais persunas da confidenza.

³ Sut tschertas cundiziuns po la dretgira permetter a rapportaders da dretgira ed ad ulteriuras persunas che han in interess giustifitgà d'assister a las tractativas betg publicas tenor l'alinea 1.

⁴ Sche la publicitad è vegnida exclusa, communitgescha la dretgira la sentenzia en ina tractativa publica u orientescha la publicitad sche necessari en in'autra moda adequata davart il resultat da la procedura.

¹ Registraziuns visualas e sonoras entaifer l'edifizi da dretgira sco er registraziuns d'acts processuals ordaifer l'edifizi da dretgira èn scumandadas.

² Cuntravenziuns pon vegnir chastiadas cun ina multa disciplinara tenor l'artitgel 64 alinea 1. Registraziuns nunautorisadas pon vegnir sequestradas.

La Confederaziun ed ils chantuns pon reglar l'admissiun sco er ils dretgs e las obligaziuns dals rapportaders da dretgira.

¹ Ils commembers da las autoritads penalas, lur collavuraturs sco er ils experts nominads da las autoritads penalas tegnan secret ils fatgs ch'els èn vegnids a savair durant lur activitad uffiziala.

² Renviond a l'artitgel 292 CP²⁵ po la direcziun da la procedura obligar l'accusader privat, autras persunas participadas a la procedura e lur assistents giuridics da tegnair secret ils fatgs davart la procedura e davart las persunas pertutgadas, sche l'intent da la procedura u in interess privat pretenda quai. Questa obligaziun sto vegnir limitada areguard il temp.

¹ La procura publica, las dretgiras e - cun lur consentiment - la polizia pon orientar la publicitad davart proceduras pendentas, sche quai è necessari:

a.

per che la populaziun coopereschia al scleriment da malfatgs u a la tschertga da persunas suspectadas;

b.

per admonir u per quietar la populaziun;

c.

per rectifitgar annunzias faussas u famas;

d.

pervia da l'impurtanza speziala d'in cas penal.

² Ultra da quai po la polizia infurmar da sai anora la publicitad davart accidents e davart malfatgs senza numnar nums.

³ Orientond la publicitad ston vegnir resguardads il princip da la presumziun d'innocenza ed ils dretgs persunals da las persunas pertutgadas.

⁴ En cas, nua ch'ina victima è involvida, dastgan las autoritads e las persunas privatas mo publitgar - ordaifer ina procedura giudiziala publica - sia identitad ed infurmaziuns che permettan da l'identifitgar, sche:

a.

igl è necessari che la populaziun coopereschia al scleriment da crims u a la tschertga da persunas suspectadas;

b.

la victima respectivamain ses confamigliars survivents dattan il consentiment a la publicaziun.

¹ Sch'ina persuna inculpada sa chatta en l'execuziun da chastis u da mesiras, infurmeschan las autoritads penalas las autoritads executivas cumpetentas davart novas proceduras penalas e davart las decisiuns decretadas.

² Las autoritads penalas infurmeschan las autoritads socialas sco er las autoritads per la protecziun d'uffants e da creschids davart proceduras penalas iniziadas sco er davart decisiuns penalas, sche quai è necessari per proteger ina persuna inculpada u donnegiada ubain ses confamigliars.²⁶

³ Sch'ellas persequiteschan malfatgs, als quals persunas minorennas èn involvidas, e constateschan che ulteriuras mesiras èn necessarias, infurmeschan ellas immediatmain las autoritads per la protecziun d'uffants.²⁷

^3bis La direcziun da la procedura infurmescha la Gruppa da defensiun davart proceduras penalas pendentas cunter militars u cunter persunas obligadas da far la mustra, sch'i existan infurmaziuns u indizis serius che questas persunas pudessan periclitar sasezzas u terzas persunas cun in'arma da fieu.²⁸

⁴ La Confederaziun ed ils chantuns pon obligar u autorisar las autoritads penalas da far ulteriuras communicaziuns a las autoritads.

¹ Las deposiziuns da las partidas, las decisiuns a bucca da las autoritads sco er tut ils auters acts processuals che na vegnan betg exequids en scrit, vegnan protocollads.

² Il protocollist, la direcziun da la procedura ed in eventual translatur conferman ch'il protocol saja correct.

³ La direcziun da la procedura è responsabla ch'ils acts processuals vegnian protocollads en moda cumpletta e correcta.

⁴ Ella po ordinar che tscherts acts processuals na vegnian betg mo protocollads en scrit, mabain er ch'i vegnian fatgas dal tuttafatg u per part registraziuns visualas u sonoras. Ella infurmescha ordavant las persunas preschentas.

Ils protocols da proceduras cuntegnan tut ils acts processuals essenzials ed infurmeschan en spezial davart:

a.

il gener, il lieu, la data e las uras dals acts processuals;

b.

ils nums dals commembers da las autoritads che han cooperà als acts processuals, da las partidas, da lur assistents giuridics sco er da las ulteriuras persunas preschentas;

c.

las pretensiuns da las partidas;

d.

il fatg che las persunas interrogadas sajan vegnids infurmadas davart lur dretgs e davart lur obligaziuns;

e.

las deposiziuns da las persunas interrogadas;

f.

l'andament da la procedura, las ordinaziuns da l'autoritad penala sco er l'observaziun da las prescripziuns formalas ch'èn previsas per ils singuls acts processuals;

g.

las actas ed auters mussaments ch'èn vegnids inoltrads da las persunas participadas a la procedura u ch'èn vegnids procurads en autra moda en la procedura penala;

h.

las decisiuns e lur motivaziun, nun ch'in exemplar separà da talas vegnia agiuntà a las actas.

¹ Las deposiziuns da las partidas, da las perditgas, dals infurmaturs e dals experts vegnan protocolladas cuntinuadamain.

² Ils protocols vegnan redigids en la lingua da procedura; las deposiziuns essenzialas ston dentant vegnir protocolladas uschenavant sco pussaivel en la lingua che la persuna interrogada ha discurrì.

³ Dumondas e respostas decisivas vegnan protocolladas pled per pled.

⁴ La direcziun da la procedura po permetter a la persuna interrogada da dictar sezza sia deposiziun.

⁵ Suenter la terminaziun da l'interrogaziun vegn il protocol prelegì u dà da leger a la persuna interrogada. Suenter avair prendì enconuschientscha dal protocol sto ella suttascriver quel e visar quel sin mintga pagina. Sch'ella refusescha da leger tras u da suttascriver il protocol, vegnan la refusaziun ed ils motivs ch'ella inditgescha remartgads en il protocol.

^5bis …³⁰

⁶ En cas d'interrogaziuns sur videoconferenza vegnan la suttascripziun e la visada remplazzadas tras la decleranza a bucca da la persuna interrogada ch'ella haja prendì enconuschientscha dal protocol. La decleranza vegn remartgada en il protocol.

⁷ Sche protocols scrits a maun n'èn betg bain legibels u sche las deposiziuns èn vegnidas registradas stenograficamain, vegnan els immediatamain scrits giu da net. Las notizias vegnan conservadas fin a la terminaziun da la procedura.³¹

Sche l'interrogaziun vegn registrada cun agid da meds tecnics, valan las suandantas divergenzas da las reglas generalas (art. 78):

a.

empè d'ina protocollaziun currenta durant l'interrogaziun po il protocol vegnir scrit er pir pli tard sin basa da la registraziun, da princip dentant entaifer 7 dis suenter l'interrogaziun;

b.

l'autoritad interroganta po desister da preleger il protocol a la persuna interrogada u da laschar leger, suttascriver e visar il protocol da la persuna interrogada;

c.

la registraziun da l'interrogaziun vegn agiuntada immediatamain a las actas.

¹ Sbagls evidents vegnan rectifitgads da la direcziun da la procedura ensemen cun il protocollist; suenter infurmescha ella las partidas en chaussa.

² Davart las dumondas da rectifitgar il protocol decida la direcziun da la procedura.

³ Las rectificaziuns, las midadas, las stritgadas e las integraziuns vegnan autentifitgadas dal protocollist e da la direcziun da la procedura. Las midadas dal cuntegn vegnan fatgas uschia che la protocollaziun oriunda resta visibla.

¹ Las decisiuns davart dumondas penalas e civilas specificas sco er las decisiuns posteriuras independentas e las decisiuns da confiscaziun independentas vegnan decretadas en furma d'ina sentenzia. Las autras decisiuns vegnan decretadas en furma d'in conclus, sch'ellas vegnan prendidas d'ina autoritad colleghiala, ed en furma d'ina disposiziun, sch'ellas vegnan prendidas d'ina persuna singula.³³ Las disposiziuns da la procedura da mandat penal restan resalvadas.

² Las decisiuns vegnan decretadas en scrit e vegnan motivadas. Ellas vegnan suttascrittas da la direcziun da la procedura sco er dal protocollist e tramessas a las partidas.

³ Disposiziuns e conclus procedurals simpels na ston ni vegnir redigids en ina furma speziala ni vegnir motivads; i vegnan remartgads en il protocol e communitgads en moda adequata a las partidas.

¹ Las sentenzias ed autras decisiuns che mainan a fin la procedura cuntegnan:

a.

ina introducziun;

b.

ina motivaziun;

c.

in dispositiv;

d.

sch'ellas èn contestablas: l'indicaziun dals meds legals.

² L'introducziun cuntegna:

a.

la designaziun da l'autoritad penala e da ses commembers che han cooperà a la decisiun;

b.

la data da la decisiun;

c.

ina designaziun suffizienta da las partidas e da lur assistents giuridics;

d.

en cas da sentenzias: las pretensiuns finalas da las partidas.

³ La motivaziun cuntegna:

a.

en cas da sentenzias: l'appreziaziun effectiva e giuridica dal cumportament che vegn renfatschà a la persuna inculpada, la motivaziun da las sancziuns, da las consequenzas accessoricas sco er da las obligaziuns da surpigliar ils custs e las indemnisaziuns;

b.

en cas d'autras decisiuns che mainan a fin la procedura: ils motivs per manar a fin la procedura sco previs.

⁴ Il dispositiv cuntegna:

a.

la designaziun da las disposiziuns legalas applitgadas;

b.

en cas da sentenzias: la decisiun davart la culpa e davart la sancziun, davart las obligaziuns da surpigliar ils custs e las indemnisaziuns sco er davart eventuals plants civils;

c.

en cas d'autras decisiuns che mainan a fin la procedura: l'ordinaziun da liquidar la procedura;

d.

las decisiuns giudizialas posteriuras;

e.

la decisiun davart las consequenzas accessoricas;

f.

la designaziun da las persunas e da las autoritads che survegnan ina copia da la decisiun u dal dispositiv.

¹ La dretgira d'emprima instanza renunzia ad ina motivaziun en scrit, sch'ella:

a.

motivescha a bucca la sentenzia; e

b.³⁴

na pronunzia betg in chasti da detenziun da passa 2 onns, in internament tenor l'artitgel 64 CP³⁵, in tractament tenor l'artitgel 59 CP u - en cas che sancziuns cundiziunadas ston vegnir revocadas a medem temp - ina privaziun da la libertad da passa 2 onns.

² La dretgira trametta posteriuramain ina sentenzia motivada a las partidas, sche:

a.

ina partida pretenda quai entaifer 10 dis suenter la consegna dal dispositiv;

b.

ina partida fa recurs.

³ Sche mo l'accusader privat pretenda ina sentenzia motivada u sche mo el fa recurs, motivescha la dretgira la sentenzia mo uschenavant che quella sa referescha al cumportament chastiabel a disfavur da l'accusader privat ed a sias pretensiuns civilas.

⁴ En la procedura da recurs po la dretgira renviar a la motivaziun da l'instanza precedenta per l'appreziaziun effectiva e giuridica dals fatgs accusads.

¹ Sch'il dispositiv d'ina decisiun n'è betg cler, sch'el è cuntradictoric u incumplet u sch'el stat en cuntradicziun cun la motivaziun, explitgescha u rectifitgescha l'autoritad penala che ha pronunzià la sentenzia la decisiun, e quai sin dumonda d'ina partida u d'uffizi.

² La dumonda sto vegnir inoltrada en scrit; las passaschas contestadas respectivamain las midadas giavischadas ston vegnir inditgadas.

³ L'autoritad penala dat la pussaivladad a las autras partidas da s'exprimer davart la dumonda.

⁴ La decisiun explitgada u rectifitgada vegn communitgada a las partidas.

¹ Sche la procedura è publica, communitgescha la dretgira a bucca la sentenzia suenter la deliberaziun da la sentenzia, motivond quella curtamain.

² La dretgira consegna il dispositiv da la sentenzia a las partidas a la fin da la tractativa principala u las trametta quest dispositiv entaifer 5 dis.

³ Sche la dretgira na po betg pronunziar immediatamain la sentenzia, fa ella quai uschè prest sco pussaivel e communitgescha la sentenzia en ina nova tractativa principala. Sche las partidas renunzian en quest cas da laschar communitgar publicamain la sentenzia, las trametta la dretgira immediatamain il dispositiv suenter avair pronunzià la sentenzia.

⁴ Sche la dretgira sto motivar la sentenzia, trametta ella entaifer 60 dis, excepziunalmain entaifer 90 dis, la sentenzia cumpletta e motivada a la persuna inculpada ed a la procura publica, a las autras partidas mo quellas parts da la sentenzia che concernan lur pretensiuns.

⁵ L'autoritad penala communitgescha a las partidas en scrit u a bucca las disposiziuns ed ils conclus procedurals simpels.

⁶ Las decisiuns ston vegnir communitgadas ad autras autoritads tenor las disposiziuns dal dretg federal e chantunal, las decisiuns da recurs er a l'instanza precedenta e las decisiuns ch'èn entradas en vigur sche necessari a las autoritads d'execuziun ed a las autoritads dal register penal.

¹ Per lur communicaziuns dovran las autoritads penalas la furma scritta, nun che questa lescha fixeschia insatge auter.

² La consegna ha lieu tras spediziun postala recumandada u en autra moda cun confermar la recepziun, en spezial tras la polizia.

³ La consegna vegn considerada sco succedida, sche la spediziun è vegnida recepida da l'adressat u d'ina persuna che ha almain 16 onns e ch'è emploiada u che viva en la medema chasada. Resalvadas restan ordinaziuns da las autoritads penalas da consegnar ina communicaziun persunalmain a l'adressat.

⁴ Plinavant vegn la consegna considerada sco succedida:

a.

en cas d'ina spediziun postala recumandada che n'è betg vegnida retratga: il 7. di suenter ch'igl è vegnì empruvà da consegnar la spediziun senza success, sche la persuna stueva far quint cun ina consegna;

b.

en cas d'ina consegna persunala, sche l'adressat refusescha da recepir la spediziun e sche quai vegn attestà dal consegnader: il di da la refusaziun.

¹ Cun il consentiment da la persuna pertutgada pon communicaziuns vegnir consegnadas sin via electronica. Ellas ston vegnir munidas cun ina signatura electronica tenor la Lescha federala dals 18 da mars 2016³⁷ davart la signatura electronica.

² Il Cussegl federal regla:

a.

la signatura che sto vegnir utilisada;

b.

il format da las communicaziuns e da sias agiuntas;

c.

la moda e maniera da la transmissiun;

d.

il mument, il qual la communicaziun vala sco consegnada.

¹ Las communicaziuns ston vegnir tramessas als adressats a lur domicil, a lur lieu da dimora usità u a lur sedia.

² Las partidas ed ils assistents giuridics cun domicil, cun lieu da dimora usità u cun sedia a l'exteriur ston designar in domicil da consegna en Svizra; resalvadas restan cunvegnas sin basa da contracts internaziunals, tenor las qualas las communicaziuns pon vegnir tramessas directamain.

³ Sche las partidas han nominà in assistent giuridic, vegnan las communicaziuns tramessas valaivlamain a quel.

⁴ Sch'ina partida sto cumparair persunalmain ad ina tractativa u exequir sezza acts processuals, la vegn la communicaziun tramessa directamain. A l'assistent giuridic vegn tramessa ina copia.

¹ La consegna ha lieu tras ina publicaziun en il fegl uffizial designà tras la Confederaziun u tras il chantun, sche:

a.

il lieu da dimora da l'adressat n'è betg enconuschent e na po betg vegnir eruì, malgrà retschertgas pretendiblas;

b.

ina consegna n'è betg pussaivla u fiss colliada cun malcumadaivladads extraordinarias;

c.

ina partida u ses assistent giuridic cun domicil, cun lieu da dimora usità u cun sedia a l'exteriur n'ha betg designà in domicil da consegna en Svizra.

² La consegna vegn considerada sco succedida il di da la publicaziun.

³ Da decisiuns finalas vegn publitgà mo il dispositiv.

⁴ Disposiziuns da sistida e mandats penals vegnan considerads sco consegnads er senza publicaziun.

¹ Termins legals na pon betg vegnir prolungads.

² En la procedura penala na datti naginas vacanzas da dretgira.

¹ Termins che vegnan activads tras ina communicaziun u tras l'entrada d'in eveniment cumenzan a currer il di suenter.

² Sche l'ultim di dal termin è ina sonda, ina dumengia u in firà ch'è renconuschì tras il dretg federal u chantunal, finescha il termin l'emprim lavurdi suandant. Decisiv è il dretg dal chantun, en il qual la partida u ses assistent giuridic ha ses domicil u sia sedia.³⁸

¹ Il termin è observà, sche l'act processual vegn exequì tar l'autoritad cumpetenta il pli tard l'ultim di dal termin.

² Las inoltraziuns ston vegnir consegnadas a l'autoritad penala il pli tard l'ultim di dal termin u surdadas - per mauns da l'autoritad penala - a la Posta svizra u ad ina represchentanza svizra diplomatica u consulara u, en cas da persunas arrestadas, a la direcziun da l'instituziun.

³ Per l'observaziun d'in termin en cas d'ina inoltraziun electronica è decisiv il mument, il qual vegn emessa la quittanza che conferma che la partida ha terminà tut ils pass ch'èn necessaris per la transmissiun.³⁹

⁴ Il termin vala medemamain sco observà, sche l'inoltraziun entra il pli tard l'ultim di dal termin tar in'autoritad svizra betg cumpetenta. Quella trametta immediatamain vinavant l'inoltraziun a l'autoritad penala cumpetenta.

⁵ Il termin per in pajament ad in'autoritad penala è observà, sche l'import è vegnì surdà a la Posta svizra u pajà sin in conto da posta u da banca en Svizra a favur da l'autoritad penala, e quai il pli tard l'ultim di dal termin.

Las autoritads pon prolungar ils termins ch'ellas han fixà e spustar las datas da las tractativas, e quai d'uffizi u sin dumonda. La dumonda sto vegnir fatga avant la scadenza dal termin ed esser motivada suffizientamain.

Ina partida è negligenta, sch'ella n'exequescha betg in act processual entaifer il termin fixà u sch'ella na cumpara betg ad in termin.

¹ Sch'ina partida ha negligì in termin e sche quai chaschunass per ella ina perdita da dretg considerabla e nunremplazzabla, po ella pretender la restituziun dal termin; per quest intent sto ella far valair vardaivlamain ch'ella na saja betg la culpa da la negligientscha.

² La dumonda da restituziun sto vegnir inoltrada en scrit e cun ina motivaziun a l'autoritad, tar la quala l'act processual negligì avess stuì vegnir exequì, e quai entaifer 30 dis suenter ch'il motiv da negligientscha è crudà davent. Entaifer il medem termin sto vegnir prendì suenter l'act processual negligì.

³ La dumonda ha mo in effect suspensiv, sche l'autoritad cumpetenta conceda in tal.

⁴ Davart la dumonda da restituziun decida l'autoritad penala en ina procedura en scrit.

⁵ Ils alineas 1-4 valan confurm al senn en cas da datas negligidas. Sche la restituziun vegn concedida, fixescha la direcziun da la procedura ina nova data. Resalvadas restan las disposiziuns davart la procedura contumaziala.

¹ Las datas persunalas ston vegnir procuradas tar la persuna pertutgada u en ina moda ch'è visibla per ella, sche quai na periclitescha betg la procedura u na chaschuna betg in volumen da lavur sproporziunà.

² Sche la procuraziun da datas persunalas n'è betg stada visibla per la persuna pertutgada, sto ella vegnir infurmada immediatamain en chaussa. Per proteger interess publics u privats predominants po l'infurmaziun vegnir tralaschada u suspendida.

Elavurond datas persunalas guardan las autoritads penalas cumpetentas da distinguer uschè bain sco pussaivel:

a.

tranter las differentas categorias da persunas pertutgadas;

b.

tranter datas persunalas che sa basan sin fatgs e datas persunalas che sa basan sin valitaziuns persunalas.

¹ L'autoritad penala dastga communitgar datas persunalas d'ina procedura pendenta per utilisar quellas en in'autra procedura pendenta, sch'ins dastga supponer che las datas possian furnir infurmaziuns essenzialas.

² Resalvads restan:

a.⁴¹

ils artitgels 14 e 20 da la Lescha federala dals 21 da mars 1997⁴² davart mesiras per mantegnair la segirezza interna;

a^bis.⁴³

ils artitgels 19 e 20 da la Lescha federala dals 25 da settember 2015⁴⁴ davart il servetsch d'infurmaziun;

b.

las prescripziuns da la Lescha federala dals 13 da zercladur 2008⁴⁵ davart ils sistems d'infurmaziun da polizia da la Confederaziun;

c.

las prescripziuns da la Lescha federala dals 7 d'october 1994⁴⁶ davart ils posts centrals da polizia criminala da la Confederaziun.⁴⁷

Uschè ditg ch'ina procedura è pendenta, han las partidas e las autras persunas participadas a la procedura il dretg da vegnir infurmadas davart las datas persunalas che las concernan, e quai a norma da lur dretg da prender invista da las actas.

¹ Datas persunalas incorrectas vegnan rectifitgadas immediatamain da las autoritads penalas cumpetentas.

² Ellas infurmeschan immediatamain l'autoritad, la quala las ha transmess u mess a disposiziun questas datas u a la quala ellas han communitgà questas datas, che questas datas sajan vegnidas rectifitgadas.⁴⁸

¹ Suenter la terminaziun da la procedura sa drizzan l'elavuraziun da las datas persunalas, la procedura e la protecziun giuridica tenor las disposiziuns dal dretg da protecziun da datas da la Confederaziun e dals chantuns.

² La durada da la conservaziun da datas persunalas suenter la terminaziun d'ina procedura sa drizza tenor l'artitgel 103.

³ Resalvadas restan las prescripziuns da la Lescha federala dals 7 d'october 1994⁴⁹ davart ils posts centrals da polizia criminala da la Confederaziun, da la Lescha federala dals 13 da zercladur 2008⁵⁰ davart ils sistems d'infurmaziun da polizia da la Confederaziun sco er las disposiziuns da questa lescha davart ils documents dal servetsch d'identificaziun e davart ils profils dal DNA.⁵¹

¹ Per mintga chaussa penala vegn manà in dossier. Quel cuntegna:

a.

ils protocols da proceduras e d'interrogaziuns;

b.

las actas rimnadas da l'autoritad penala;

c.

las actas inoltradas da las partidas.

² La direcziun da la procedura procura che las actas vegnian archivadas sistematicamain e ch'ellas vegnian registradas cuntinuadamain en ina glista; en cas simpels po ella desister d'ina glista.

¹ Il pli tard suenter l'emprima interrogaziun da la persuna inculpada e suenter la registraziun da las ulteriuras cumprovas las pli impurtantas tras la procura publica pon las partidas prender invista da las actas; l'artitgel 108 resta resalvà.

² Autras autoritads pon prender invista da las actas, sch'ellas dovran quellas per elavurar proceduras civilas, penalas u administrativas pendentas e sche nagins interess publics u privats predominants na s'opponan a quai.

³ Terzas persunas pon prender invista da las actas, sch'ellas pon far valair per quest intent in interess scientific u in auter interess degn da vegnir protegì e sche nagins interess publics u privats predominants na s'opponan a quai.

¹ La direcziun da la procedura decida davart l'invista da las actas. Ella prenda las mesiras necessarias per impedir abus e retardaments e per proteger interess giustifitgads da mantegnair il secret.

² Da las actas stoi vegnir prendì invista a la sedia da l'autoritad penala respectiva u - sco assistenza giudiziala - tar in'autra autoritad penala. Ad autras autoritads sco er als assistents giuridics da las partidas vegnan ellas per regla tramessas.

³ Tgi che ha il dretg da prender invista, po pretender ch'el survegnia - cunter ina taxa - copias da las actas.

¹ Las actas ston vegnir conservadas almain fin a la scadenza da la surannaziun da la persecuziun penala e da l'execuziun.

² Exceptads èn documents originals ch'èn vegnids prendids tar las actas; els ston vegnir returnads a las persunas autorisadas cunter ina quittanza, uschespert che la decisiun davart la chaussa penala è entrada en vigur.

¹ Partidas èn:

a.

la persuna inculpada;

b.

l'accusader privat;

c.

en la procura principala ed en la procedura da recurs: la procura publica.

² La Confederaziun ed ils chantuns pon conceder dretgs da partida cumplains u limitads ad ulteriuras autoritads che han da defender interess publics.

¹ Autras persunas participadas a la procedura èn:

a.

la persuna donnegiada;

b.

la persuna che fa la denunzia;

c.

la perditga;

d.

l'infurmatur;

e.

l'expert;

f.

ina terza persuna ch'è engrevgiada tras acts processuals.

² Sch'ils dretgs da persunas, ch'èn participadas a la procedura e ch'èn numnadas en l'alinea 1, vegnan pertutgads directamain, han questas persunas ils dretgs processuals d'ina partida ch'èn necessaris per defender lur interess.

¹ Ina partida po mo exequir valaivlamain acts processuals, sch'ella è abla d'agir.

² Ina persuna inabla d'agir vegn represchentada tras ses represchentant legal.

³ Ultra da ses represchentant legal po ina persuna ch'è abla da giuditgar, ma inabla d'agir, exequir quels dretgs processuals ch'èn da natira strictamain persunala.

¹ Las partidas han il dretg sin attenziun giuridica; en spezial pon ellas:

a.

prender invista da las actas;

b.

sa participar ad acts processuals;

c.

engaschar in assistent giuridic;

d.

s'exprimer davart la chaussa e davart la procedura;

e.

far propostas da cumprova.

² Sche las partidas n'han naginas enconuschientschas giuridicas, las rendan las autoritads penalas attentas a lur dretgs.

¹ Las autoritads penalas pon restrenscher l'attenziun giuridica, sche:

a.

igl exista in suspect motivà ch'ina partida fetschia abus da ses dretgs;

b.

quai è necessari per garantir la segirezza da persunas u per defender ils interess publics u privats da mantegnair il secret.

² Restricziuns envers ils assistents giuridics èn mo admissiblas, sche l'assistent giuridic dat sez il motiv per la restricziun.

³ Las restricziuns ston vegnir limitadas areguard il temp u areguard singuls acts processuals.

⁴ Sch'il motiv da la restricziun exista vinavant, dastgan las autoritads penalas mo prender lur decisiuns sin basa dad actas che n'èn betg vegnidas communitgadas ad ina partida, uschenavant ch'il cuntegn essenzial da talas è vegnì rendì enconuschent a questa partida.

⁵ Sch'il motiv da la restricziun è crudà davent, sto l'attenziun giuridica vegnir concedida posteriuramain en ina furma adequata.

¹ Las partidas pon suttametter da tut temp inoltraziuns a la direcziun da la procedura; resalvadas restan disposiziuns spezialas da questa lescha.

² La direcziun da la procedura examinescha las inoltraziuns e dat a las autras partidas la pussaivladad da prender posiziun.

¹ Las inoltraziuns pon vegnir suttamessas en scrit u - per mauns dal protocol - a bucca. Las inoltraziuns en scrit ston vegnir datadas e suttascrittas.

² En cas d'ina consegna electronica sto l'inoltraziun vegnir munida cun ina signatura electronica qualifitgada tenor la Lescha federala dals 18 da mars 2016⁵² davart la signatura electronica. Il Cussegl federal regla:

a.

il format da l'inoltraziun e da sias agiuntas;

b.

la moda e maniera da la transmissiun;

c.

las premissas, sut las qualas i po vegnir pretendì ch'ils documents vegnian anc tramess sin palpiri en cas da problems tecnics.⁵³

³ Dal rest na suttastattan ils acts processuals a naginas prescripziuns formalas, nun che questa lescha fixeschia insatge auter.

⁴ La direcziun da la procedura po refusar inoltraziuns illegiblas, nunchapiblas, nuncunvegnentas u bler memia extendidas; ella fixescha in termin per curreger l'inoltraziun e renda attent che l'inoltraziun na vegnia betg resguardada, sch'ella na vegn betg curregida.

¹ Sco persuna donnegiada vala quella persuna ch'è vegnida violada directamain en ses dretgs tras il malfatg.

² La persuna ch'è autorisada da purtar in plant penal vala en mintga cas sco persuna donnegiada.

¹ Sco victima vala la persuna donnegiada ch'è vegnida violada directamain en sia integritad corporala, sexuala u psichica tras il malfatg.

² Sco confamigliars da la victima valan ses conjugal, ses uffants e ses geniturs sco er persunas che han lioms sumegliants cun la victima.

¹ La victima ha dretgs particulars, en spezial:

a.

il dretg sin protecziun da la persunalitad (art. 70 al. 1 lit. a, 74 al. 4, 152 al. 1);

b.

il dretg sin accumpagnament tras ina persuna da confidenza (art. 70 al. 2, 152 al. 2);

c.

il dretg sin mesiras da protecziun (art. 152-154);

d.

il dretg da refusar da far deposiziuns (art. 169 al. 4);

e.

il dretg da survegnir infurmaziuns (art. 305 e 330 al. 3);

f.

il dretg sin ina cumposiziun speziala da la dretgira (art. 335 al. 4);

g.⁵⁴

il dretg da survegnir gratuitamain da la dretgira u da la procura publica la decisiun u il mandat penal en il cas giuridic, en il qual ella è victima, nun ch'ella desistia explicitamain da quai.

² Sche la victima ha main che 18 onns, vegnan ultra da quai applitgadas las disposiziuns spezialas per proteger sia persunalitad, en spezial concernent:

a.

restricziuns a chaschun da la confruntaziun cun la persuna inculpada (art. 154 al. 4);

b.

mesiras da protecziun spezialas per interrogaziuns (art. 154 al. 2-4);

c.

la sistida da la procedura (art. 319 al. 2).

³ Sch'ils confamigliars da la victima fan valair pretensiuns civilas, han els ils medems dretgs sco la victima.

¹ Sco accusadra privata vala la persuna donnegiada che declera explicitamain ch'ella sa participeschia a la procedura penala sco accusadra penala u civila.

² Il plant penal ha il medem status giuridic sco questa decleranza.

³ La decleranza sto vegnir fatga davant in'autoritad da persecuziun penala il pli tard fin a la terminaziun da la procedura preliminara.

⁴ Sche la persuna donnegiada n'ha betg fatg da sai anora ina tala decleranza, la renda la procura publica attenta a questa pussaivladad suenter l'avertura da la procedura preliminara.

¹ La persuna donnegiada po far sia decleranza en scrit u - per mauns dal protocol - a bucca.

² En questa decleranza po la persuna donnegiada, en moda cumulativa u alternativa:

a.

pretender che la persuna ch'è responsabla per il malfatg vegnia persequitada e chastiada (plant penal);

b.

far valair sin via d'adesiun pretensiuns da dretg privat che vegnan deducidas dal malfatg (plant civil).

¹ La persuna donnegiada po declerar da tut temp en scrit u - per mauns dal protocol - a bucca ch'ella renunzia a ses dretgs. La renunzia è definitiva.

² Sche la renunzia na vegn betg restrenschida expressivamain, cumpiglia ella il plant penal ed il plant civil.

¹ Sche la persuna donnegiada mora senza avair renunzià a ses dretgs processuals sco accusader privat, vegnan ses dretgs transferids sin ils confamigliars en il senn da l'artitgel 110 alinea 1 CP⁵⁵ tenor l'urden da la successiun d'ierta.

² Tgi ch'è entrà tras lescha en ils dretgs da la persuna donnegiada, è mo autorisà da purtar plant civil ed ha mo quels dretgs processuals che sa refereschan directamain a l'execuziun dal plant civil.

¹ Pretensiuns civilas che resultan dal malfatg po la persuna donnegiada far valair sco accusader privat sin via d'adesiun en la procedura penala.

² Il medem dretg han er ils confamigliars da la victima, sch'els fan valair atgnas pretensiuns civilas envers la persuna inculpada.

³ Il plant civil daventa pendent tras la decleranza tenor l'artitgel 119 alinea 2 litera b.

⁴ Sche l'accusader privat retira ses plant civil avant la terminaziun da la tractativa principala d'emprima instanza, po el danovamain far valair il plant civil sin via civila.

¹ La pretensiun che vegn fatga valair en il plant civil sto sche pussaivel vegnir quantifitgada en la decleranza tenor l'artitgel 119 e vegnir motivada curtamain en scrit, inditgond ils meds da cumprova appellads.

² La quantificaziun e la motivaziun ston vegnir preschentadas entaifer il termin che vegn fixà da la direcziun da la procedura tenor l'artitgel 331 alinea 2.⁵⁶

¹ La dretgira che sa fatschenta cun la chaussa penala giuditgescha la pretensiun civila senza resguardar la valur en dispita.

² La persuna inculpada survegn il pli tard en la procedura principala d'emprima instanza la pussaivladad da s'exprimer davart il plant civil.

³ Sch'ella renconuscha il plant civil, vegn quai menziunà en il protocol ed en la decisiun che maina a fin la procedura.

¹ L'accusader privat, cun excepziun da la victima, ha da prestar - sin dumonda da la persuna inculpada - ina cauziun per sias expensas presumtivas chaschunadas tras las pretensiuns davart l'aspect civil, sche:

a.

ses domicil u sia sedia n'è betg en Svizra;

b.

el para dad esser insolvent, en spezial sch'il concurs è vegnì declerà cunter el, sch'igl ha lieu ina procedura d'accumodament cunter el u sch'i èn avant maun attests da perdita;

c.

igl è da temair per auters motivs che la pretensiun da la persuna inculpada saja periclitada considerablamain u vegnia impedida intenziunadamain.

² Davart la pretensiun decida la direcziun da la procedura da la dretgira.⁵⁷ Ella fixescha l'autezza da la cauziun sco er in termin per prestar la cauziun.

³ La cauziun po vegnir pajada en daner blut u prestada tras ina garanzia d'ina banca u d'ina assicuranza domiciliada en Svizra.

⁴ Pli tard po ella vegnir augmentada, reducida u annullada.

¹ La dretgira decida davart il plant civil ch'è vegnì purtà davant ella, sch'ella declera che la persuna inculpada:

a.

saja culpabla;

b.

saja libra ed ils fatgs èn madirs per la decisiun.

² Il plant civil vegn renvià a la giurisdicziun civila, sche:

a.⁵⁸

la procedura penala vegn messa ad acta;

a^bis.⁵⁹

i na po betg vegnir decidì davart la procedura penala en la procedura da mandat penal;

b.

l'accusader privat n'ha betg motivà u quantifitgà suffizientamain ses plant;

c.

l'accusader privat na presta betg la cauziun per las pretensiuns da la persuna inculpada;

d.

la persuna inculpada vegn declerada libra, ma ils fatgs n'èn betg madirs per la decisiun.

³ Sch'i chaschunass in volumen da lavur sproporziunà da giuditgar cumplettamain la pretensiun civila, po la dretgira decider il plant civil mo da princip ed al renviar dal rest a la giurisdicziun civila. Pretensiuns da pitschna valur vegnan sche pussaivel giuditgadas da la dretgira sezza.

⁴ En cas, nua che victimas èn involvidas, po la dretgira giuditgar l'emprim mo la culpaivladad e l'aspect penal; suenter in'ulteriura tractativa da las partidas giuditgescha la direcziun da la procedura alura en cumpetenza da derschader singul il plant civil, e quai senza resguardar la valur en dispita.

¹ Per defender lur interess pon la persuna inculpada, l'accusader privat e las autras persunas ch'èn participadas a la procedura nominar in assistent giuridic.

² Las partidas pon nominar duas u dapli persunas sco assistentas giuridicas, sche quai na retardescha betg nuncunvegnentamain la procedura. En quest cas ston ellas designar ina da las assistentas giuridicas sco represchentanta principala ch'è autorisada d'exequir ils acts da represchentanza davant las autoritads penalas; ses domicil vala sco unica adressa da consegna.

³ Entaifer ils limits da la lescha e da las reglas professiunalas po l'assistent giuridic defender en la medema procedura ils interess da pliras persunas participadas a la procedura.

⁴ Sco assistent giuridic pon las partidas nominar mintga persuna fidabla ch'è abla d'agir e che ha ina buna reputaziun; resalvadas restan las restricziuns dal dretg d'advocats.

⁵ La defensiun da la persuna inculpada è resalvada als advocats ch'èn autorisads da represchentar partidas davant autoritads giudizialas tenor la Lescha dals 23 da zercladur 2000⁶⁰ davart las advocatas ed ils advocats; resalvadas restan disposiziuns divergentas dals chantuns per la defensiun en la procedura penala per surpassaments.

Entaifer il limits da la lescha e da las reglas professiunalas è la defensiun suttamessa mo als interess da la persuna inculpada.

¹ En mintga procedura penala ed en mintga stadi da la procedura è la persuna inculpada autorisada da surdar sia defensiun ad in assistent giuridic en il senn da l'artitgel 127 alinea 5 (defensiun privata) u - cun resalva da l'artitgel 130 - da defender sasezza.

² Per exequir la defensiun privata vegni premess in plainpudair en scrit u ina decleranza protocollada da vart da la persuna inculpada.

La persuna inculpada sto vegnir defendida, sche:

a.

l'arrest d'inquisiziun inclusiv in'arrestaziun provisorica ha durà passa 10 dis;

b.⁶¹

ella sto far quint da vegnir chastiada cun in chasti da detenziun da passa 1 onn, cun ina mesira da detenziun u cun in'expulsiun;

c.

ella na po - pervia da ses stadi corporal u spiertal u per auters motivs - betg defender suffizientamain ses interess processuals e la represchentanza legala n'è betg en cas da far quai;

d.

la procura publica sa preschenta persunalmain davant la dretgira d'emprima instanza u davant la dretgira d'appellaziun;

e.

i vegn exequida ina procedura scursanida (art. 358-362).

¹ Sch'igl è avant maun in cas da defensiun obligatorica, guarda la direcziun da la procedura ch'ina defensiun vegnia nominada immediatamain.

² Sche las premissas d'ina defensiun obligatorica èn ademplidas, cura che la procedura vegn iniziada, stoi vegnir procurà per la defensiun avant l'emprima interrogaziun che vegn realisada da la procura publica u - per incumbensa da tala - da la polizia.⁶²

³ Sche cumprovas èn vegnidas registradas avant ch'in defensur è vegnì nominà, e quai en cas, nua che la defensiun fiss stada visiblamain necessaria, èn questas cumprovas utilisablas mo, sche la persuna inculpada renunzia a la repetiziun da la registraziun da las cumprovas.⁶³

¹ La direcziun da la procedura ordinescha ina defensiun uffiziala, sche:

a.

en cas d'ina defensiun obligatorica:

1.

la persuna inculpada na fixescha betg ina defensiun privata malgrà l'intimaziun da la direcziun da la procedura,

2.

il mandat è vegnì prendì davent da la defensiun privata u la defensiun privata ha remess il mandat e la persuna inculpada n'ha betg fixà ina nova defensiun privata entaifer in tschert termin;

b.

la persuna inculpada n'ha betg ils meds finanzials necessaris e la defensiun s'impona per defender ses interess.

² Per defender ils interess da la persuna inculpada s'impona la defensiun en spezial, sch'i na sa tracta betg d'in cas da bagatella e sch'il cas penal porscha - en reguard effectiv u giuridic - difficultads che la persuna inculpada na fiss betg en cas da dumagnar suletta.

³ In cas da bagatella n'è en mintga cas betg pli avant maun, sch'igl è da far quint cun in chasti da detenziun da passa 4 mais u cun in chasti pecuniar da passa 120 taxas per di.⁶⁴

¹ La defensiun uffiziala vegn nominada da la direcziun da la procedura ch'è cumpetenta en il stadi respectiv da la procedura.

^1bis La Confederaziun ed ils chantuns pon delegar la tscherna da la defensiun uffiziala ad in'autra autoritad u a terzas persunas.⁶⁵

² Cun tscherner la defensiun uffiziala èsi da tegnair quint da sias qualificaziuns e, sche pussaivel, dals giavischs da la persuna inculpada.⁶⁶

¹ Sch'il motiv per la defensiun uffiziala croda davent, revochescha la direcziun da la procedura il mandat.

² Sche la relaziun da confidenza tranter la persuna inculpada e sia defensiun uffiziala è disturbada considerablamain u sch'ina defensiun efficazia n'è betg pli garantida per auters motivs, surdat la direcziun da la procedura la defensiun uffiziala ad in'autra persuna.

¹ La defensiun uffiziala vegn indemnisada tenor la tariffa d'advocats da la Confederaziun u da quel chantun, en il qual la procedura penala è vegnida manada.

² La procura publica u la dretgira sentenzianta fixescha l'indemnisaziun a la fin da la procedura. Sch'il mandat s'extenda sur in lung temp u sch'i n'è per auters motivs betg raschunaivel da spetgar fin la fin da la procedura, vegnan concedids pajaments anticipads a la defensiun uffiziala; la direcziun da la procedura fixescha l'autezza da quests pajaments anticipads.⁶⁷

³ Cunter la decisiun d'indemnisaziun po la defensiun uffiziala prender il med legal ch'è admissibel cunter la decisiun finala.⁶⁸

⁴ Sche la persuna inculpada vegn sentenziada da surpigliar ils custs da procedura, è ella obligada da restituir l'indemnisaziun a la Confederaziun u al chantun, uschespert che sias relaziuns economicas permettan quai.⁶⁹

⁵ La pretensiun da la Confederaziun u dal chantun surannescha 10 onns suenter che la decisiun è entrada en vigur.

¹ Sin dumonda conceda la direcziun da la procedura dal tuttafatg u per part la giurisdicziun gratuita:

a.

a l'accusader privat per far valair sias pretensiuns civilas, sch'el n'ha betg ils meds finanzials necessaris e sch'il plant civil na para betg dad esser invan;

b.

a la victima per far valair ses plant penal, sch'ella n'ha betg ils meds finanzials necessaris e sch'il plant penal na para betg dad esser invan.⁷¹

² La giurisdicziun gratuita cumpiglia:

a.

la liberaziun da la prestaziun da pajaments anticipads e da cauziuns;

b.

la liberaziun dals custs da procedura;

c.⁷²

la nominaziun d'in assistent giuridic, sche quai è necessari per defender ils dretgs da l'accusader privat u da la victima.

³ En la procedura da meds legals sto la giurisdicziun gratuita vegnir dumandada da nov.⁷³

La nominaziun, la revocaziun e la midada da l'assistenza giudiziala sa drizzan confurm al senn tenor ils artitgels 133 e 134.

¹ L'indemnisaziun da l'assistent giuridic sa drizza confurm al senn tenor l'artitgel 135; resalvada resta la decisiun definitiva davart la surpigliada dals custs da l'assistent giuridic e da quels acts processuals, per ils quals il pajament anticipà era vegnì relaschà.

^1bis La victima e ses confamigliars n'èn betg obligads da restituir ils custs da la giurisdicziun gratuita.⁷⁴

² Sch'ina indemnisaziun da process vegn concedida a l'accusader privat sin donn e cust da la persuna inculpada, va questa indemnisaziun a la Confederaziun respectivamain al chantun, e quai en la dimensiun dals custs per la giurisdicziun gratuita.

¹ Per chattar la vardad sa servan las autoritads penalas da tut ils meds da cumprova ch'èn adattads tenor il stadi da la scienza e da l'experientscha e ch'èn admissibels dal puntg da vista giuridic.

² Ils fatgs ch'èn irrelevants, evidents, enconuschents a l'autoritad penala u gia cumprovads en moda giuridicamain suffizienta n'èn betg object da la registraziun da cumprovas.

¹ Meds da sforz, applicaziun da violenza, smanatschas, empermischuns, engions e meds che pon disturbar la capacitad da pensar u la libertad da la voluntad d'ina persuna n'èn betg permess per registrar las cumprovas.

² Talas metodas èn inadmissiblas er alura, sche la persuna pertutgada dat ses consentiment a lur applicaziun.

¹ Cumprovas ch'èn vegnidas registradas violond l'artitgel 140 na dastgan vegnir duvradas en nagin cas. Il medem vala, sche questa lescha designescha ina cumprova sco betg utilisabla.

² Cumprovas che autoritads penalas han registrà en moda chastiabla u violond prescripziuns da valaivladad na dastgan betg vegnir duvradas, nun che lur utilisabladad saja indispensabla per sclerir malfatgs grevs.

³ Cumprovas ch'èn vegnidas registradas violond prescripziuns disciplinaras èn utilisablas.

⁴ Sch'ina cumprova che na dastga betg vegnir duvrada tenor l'alinea 1 u 2 gidass a registrar in'ulteriura cumprova, dastga questa cumprova mo vegnir duvrada, sch'ella avess pudì vegnir registrada er senza la registraziun precedenta.⁷⁵

⁵ Las annotaziuns davart cumprovas betg utilisablas vegnan allontanadas da las actas penalas conservadas separadamain, fin che la procedura è terminada cun vigur legala ed alura destruidas.

¹ Interrogaziuns vegnan fatgas da la procura publica, da las autoritads penalas per surpassaments e da las dretgiras. La Confederaziun ed ils chantuns fixeschan, en tge dimensiun che collavuraturs da questas autoritads pon far interrogaziuns.

² La polizia po interrogar persunas inculpadas ed infurmaturs. La Confederaziun ed ils chantuns pon fixar appartegnents da la polizia che pon interrogar perditgas per incumbensa da la procura publica.

¹ Al cumenzament da l'interrogaziun vegn - en ina lingua ch'ella chapescha - la persuna che duai vegnir interrogada:

a.

dumandada davart sias persunalias;

b.

infurmada davart l'object da la procedura penala e davart la qualitad, en la quala ella vegn interrogada;

c.

sclerida en moda cumplessiva davart ses dretgs e davart sias obligaziuns.

² En il protocol stoi vegnir remartgà che las disposiziuns tenor l'alinea 1 sajan vegnidas observadas.

³ L'autoritad penala po far ulteriuras retschertgas davart l'identitad da la persuna che duai vegnir interrogada.

⁴ Ella envida la persuna che duai vegnir interrogada da s'exprimer davart l'object da l'interrogaziun.

⁵ Cun dumondas e cun objecziuns ch'èn formuladas en moda clera tschertga ella da cumplettar las deposiziuns e da sclerir cuntradicziuns.

⁶ La persuna che duai vegnir interrogada fa sias deposiziuns sin basa da sia memoria. Cun il consentiment da la direcziun da la procedura po ella duvrar documents en scrit; quels vegnan mess tar las actas cur che l'interrogaziun è terminada.

⁷ Persunas cun impediments da discurrer e da l'udida vegnan interrogadas en scrit u cun agid d'ina persuna adattada.

¹ La procura publica e las dretgiras pon far ina interrogaziun per conferenza da video, sch'i n'è betg pussaivel u sch'igl è pussaivel mo cun gronds sforzs a la persuna che duai vegnir interrogada da cumparair persunalmain.

² Da l'interrogaziun vegnan fatgas tant registraziuns visualas sco er sonoras.

L'autoritad penala po envidar ina persuna che duai vegnir interrogada da dar giu in rapport en scrit empè da far l'interrogaziun u per cumplettar l'interrogaziun.

¹ Las persunas che duain vegnir interrogadas vegnan interrogadas separadamain.

² Las autoritads penalas pon confruntar persunas ina cun l'autra, inclusiv talas che han il dretg da refusar da far deposiziuns. Ils dretgs spezials da la victima restan resalvads.

³ Ellas pon obligar persunas ch'èn vegnidas interrogadas e che ston probablamain vegnir confruntadas cun ulteriuras persunas a la terminaziun da la procedura da restar al lieu da l'act processual, fin che la confruntaziun po vegnir realisada.

⁴ La direcziun da la procedura po excluder temporarmain ina persuna da la tractativa, sche:

a.

igl è avant maun ina collisiun d'interess; u

b.

questa persuna sto anc vegnir interrogada en la procedura sco perditga, sco infurmatura u sco experta.

¹ Las partidas han il dretg dad esser preschentas, cur che la procura publica e las dretgiras registreschan las cumprovas, e da tschentar dumondas a las persunas interrogadas. La preschientscha da la defensiun tar interrogaziuns da la polizia sa drizza tenor l'artitgel 159.

² Tgi che fa valair ses dretg da participaziun, na po betg deducir da quai il dretg da spustar la registraziun da las cumprovas.

³ La partida u ses assistent giuridic po pretender che la registraziun da las cumprovas vegnia repetida, sche l'assistent giuridic u la partida senza assistent giuridic è - per motivs stringents - stada impedida da sa participar a la registraziun da las cumprovas. I po vegnir renunzià da repeter la registraziun da las cumprovas, sche quai fiss collià cun custs e cun sforzs sproporziunads e sch'i po vegnir tegnì quint en autra moda dal dretg da la partida da survegnir attenziun giuridica, en spezial dal dretg da pudair tschentar dumondas.

⁴ Cumprovas ch'èn vegnidas registradas violond las disposiziuns da quest artitgel na dastgan betg vegnir duvradas a disfavur da la partida che n'è betg stada preschenta.

¹ Sche cumprovas vegnan registradas a l'exteriur en il rom d'ina dumonda d'assistenza giudiziala, è il dretg da participaziun da las partidas ademplì, sch'ellas:

a.

pon formular dumondas per mauns da l'autoritad estra dumandada;

b.

survegnan invista dal protocol suenter che la dumonda d'assistenza giudiziala ch'è liquidada è entrada; e

c.

pon tschentar en scrit dumondas cumplementaras.

² L'artitgel 147 alinea 4 è applitgabel.

¹ Sch'i dat in motiv da supponer ch'ina perditga, in infurmatur, ina persuna inculpada, in expert u in translatur pudess - cooperond a la procedura - exponer sasez u ina persuna ch'è stat cun el en ina relaziun tenor l'artitgel 168 alineas 1-3 ad in privel considerabel per il corp e per la vita u ad in auter dischavantatg grev, prenda la direcziun da la procedura sin dumonda u d'uffizi las mesiras da protecziun adequatas.

² Per quest intent po la direcziun da la procedura restrenscher adequatamain ils dretgs processuals da las partidas, en spezial cun:

a.

garantir l'anonimitad;

b.

far interrogaziuns cun exclusiun da las partidas u da la publicitad;

c.

verifitgar las persunalias cun exclusiun da las partidas u da la publicitad;

d.

modifitgar la cumparsa u la vusch da la persuna che sto vegnir protegida u la mascrar cunter la vesida d'autras persunas;

e.

restrenscher l'invista da las actas.

³ La direcziun da la procedura po permetter a la persuna che sto vegnir protegida da sa laschar accumpagnar d'in assistent giuridic u d'ina persuna da confidenza.

⁴ Sch'ina persuna sut 18 onns vegn interrogada sco perditga u sco infurmatura, po la direcziun da la procedura ultra da quai ordinar mesiras da protecziun tenor l'artitgel 154 alineas 2 e 4.

⁵ Tar tut las mesiras da protecziun procura la direcziun da la procedura che l'attenziun giuridica da las partidas, en spezial ils dretgs da defensiun da la persuna inculpada, sajan garantids.

⁶ Sche l'observaziun da sia anonimitad è vegnida garantida a la persuna che sto vegnir protegida, prenda la direcziun da la procedura las mesiras ch'èn adattadas per impedir confusiuns u scumbigls da persunas.

¹ La direcziun da la procedura po garantir l'anonimitad a la persuna che sto vegnir protegida.

² Entaifer 30 dis suttametta la procura publica la garanzia, ch'ella ha dà, a la dretgira da mesiras repressivas per l'approvaziun; per quest intent sto ella inditgar exactamain tut ils detagls ch'èn necessaris per giuditgar la legalitad. …⁷⁶

³ Sche la dretgira da mesiras repressivas refusescha l'approvaziun, na dastgan las cumprovas ch'èn gia vegnidas registradas cun l'anonimitad garantida betg vegnir duvradas.

⁴ In'anonimitad ch'è vegnida approvada u concedida lia tut las autoritads penalas che han da far cun il cas.

⁵ La persuna che sto vegnir protegida po renunziar da tut temp a sia anonimitad.

⁶ La procura publica e la direcziun da la procedura da la dretgira revocheschan la garanzia, sch'il basegn da protecziun è evidentamain scrudà.

¹ Agents secrets, als quals l'anonimitad è vegnida garantida, han il dretg che:

a.

lur vaira identitad vegnia tegnida secreta envers mintgin durant tut la procedura e cur ch'ella è terminada, cun excepziun dals commembers da las dretgiras che tractan il cas;

b.

naginas indicaziuns davart la vaira identitad na vegnian registradas en las actas da procedura.

² La direcziun da la procedura prenda las mesiras da protecziun necessarias.

¹ Las autoritads penalas observan ils dretgs persunals da la victima sin tut ils stgalims da la procedura.

² Tar tut ils acts processuals po la victima sa laschar accumpagnar - ultra da ses assistent giuridic - d'ina persuna da confidenza.

³ Las autoritads penalas eviteschan ina scuntrada da la victima cun la persuna inculpada, sche la victima pretenda quai. En quest cas tegnan ellas quint en autra moda dal dretg da la persuna inculpada sin attenziun giuridica. En spezial pon ellas interrogar la victima applitgond mesiras da protecziun tenor l'artitgel 149 alinea 2 literas b e d.

⁴ Ina confruntaziun po vegnir ordinada, sche:

a.

il dretg da la persuna inculpada sin attenziun giuridica na po betg vegnir garantì en autra moda; u

b.

in interess predominant da la persecuziun penala la pretenda stringentamain.

¹ Victimas da malfatgs cunter l'integritad sexuala pon pretender da vegnir interrogadas d'ina persuna da la medema schlattaina.

² Ina confruntaziun cun la persuna inculpada dastga vegnir ordinada cunter la voluntad da la victima mo, sch'il dretg da la persuna inculpada sin attenziun giuridica na po betg vegnir garantì en autra moda.

¹ Sco uffant en il senn da quest artitgel vala la victima ch'è pli giuvna che 18 onns il mument da l'interrogaziun u da la confruntaziun.

² L'emprima interrogaziun da l'uffant sto avair lieu uschè svelt sco pussaivel.

³ L'autoritad po excluder la persuna da confidenza da la procedura, sche quella pudess influenzar l'uffant en moda determinanta.

⁴ Sch'ins po percorscher che l'interrogaziun u la confruntaziun pudess chaschunar ina greva chargia psichica per l'uffant, valan las suandantas reglas:

a.

Ina confruntaziun cun la persuna inculpada dastga vegnir ordinada mo, sche l'uffant pretenda explicitamain la confruntaziun u sch'il dretg da la persuna inculpada sin attenziun giuridica na po betg vegnir garantì en autra moda.

b.

L'uffant na dastga per regla betg vegnir interrogà dapli che duas giadas durant tut la procedura.

c.

Ina segunda interrogaziun dastga vegnir fatga mo, sche las partidas n'han betg pudì exequir lur dretgs a chaschun da l'emprima interrogaziun u sch'ina tala è inevitabla en l'interess da las investigaziuns u da l'uffant. Sche pussaivel vegn la segunda interrogaziun fatga da quella persuna che ha fatg l'emprima interrogaziun.

d.

Las interrogaziuns vegnan fatgas d'in uffiziant d'interrogaziun ch'è vegnì scolà per quest intent en preschientscha d'in spezialist. Sch'i na vegn betg fatga ina confruntaziun, vegnan fatgas tant registraziuns visualas sco er sonoras da las interrogaziuns.

e.

Las partidas exequeschan lur dretgs tras la persuna che fa l'interrogaziun.

f.

La persuna che fa l'interrogaziun ed il spezialist menziuneschan lur observaziuns spezialas en in rapport.

⁵ Sch'igl è previsibel che la preschientscha da la persuna inculpada a l'interrogaziun pudess chaschunar ina greva chargia psichica per l'uffant malgrà mesiras da protecziun, po la persuna inculpada vegnir exclusa da l'interrogaziun, uschenavant che ses dretg sin attenziun giuridica po vegnir garantì en autra moda.⁷⁷

⁶ L'exclusiun na vala betg per la defensiun; i ston però vegnir prendidas mesiras da protecziun adequatas per evitar ina greva chargia psichica da l'uffant.⁷⁸

¹ Interrogaziuns da persunas cun in disturbi psichic vegnan restrenschidas a quai ch'è necessari; interrogaziuns multiplas vegnan evitadas.

² La direcziun da la procedura po incumbensar autoritads penalas u socialas cun l'interrogaziun u engaschar per l'interrogaziun confamigliars, autras persunas da confidenza u experts.

La Confederaziun ed ils chantuns pon prevair mesiras per proteger persunas ordaifer ina procedura.

Ina perditga è ina persuna che n'è betg participada al malfatg, che po far deposiziuns che servan a sclerir il malfatg e che n'è betg infurmatura.

¹ Abla da dar perditga è ina persuna ch'è pli veglia che 15 onns e ch'è abla da giuditgar en quai che reguarda l'object da l'interrogaziun.

² Mintga persuna ch'è abla da dar perditga è obligada da dar perditga e da dir la vardad; resalvà resta il dretg da refusar da dar perditga.

¹ La vita precedenta e las relaziuns persunalas d'ina perditga vegnan sclerids mo, uschenavant che quai è necessari per examinar sia credibladad.

² Sch'i dat dubis davart l'abilitad da giuditgar da la perditga u sch'i èn avant maun indizis per disturbis psichics, po la direcziun da la procedura ordinar in'expertisa ambulanta da la perditga, sche l'impurtanza da la procedura penala e da la testimonianza giustifitgescha quai.

¹ Renviond a la smanatscha da chasti da l'artitgel 292 CP⁷⁹ po l'autoritad interroganta obligar ina perditga da taschair davart l'interrogaziun intenziunada u realisada e davart ses object.

² L'obligaziun vegn limitada areguard il temp.

³ Questa ordinaziun po vegnir colliada cun la citaziun da la perditga.

¹ La persuna donnegiada vegn interrogada sco perditga.

² Resalvada resta l'interrogaziun sco infurmatura tenor l'artitgel 178.

La perditga ha il dretg da survegnir ina indemnisaziun adequata per la perdita da gudogn e per las expensas.

¹ Refusar da dar perditga pon:

a.

il conjugal da la persuna inculpada u tgi che maina facticamain ina communitad da vita cun quella;

b.

tgi che ha uffants cuminaivels cun la persuna inculpada;

c.

ils parents u ils quinads en lingia directa da la persuna inculpada;

d.

ils fragliuns ed ils mezs fragliuns da la persuna inculpada sco er il conjugal d'in fragliun u d'in mez fragliun;

e.

ils fragliuns ed ils mezs fragliuns da la persuna ch'è maridada cun la persuna inculpada sco er il conjugal d'in fragliun u d'in mez fragliun;

f.

ils geniturs da tgira, ils uffants confidads ed ils uffants tratgs si sco fragliuns da la persuna inculpada;

g.⁸⁰

la persuna nominada sco avugada u sco procuratura da la persuna inculpada.

² Il dretg da refusar da dar perditga tenor l'alinea 1 literas a ed f exista vinavant, er sche la lètg vegn schliada u sche la relaziun da tgira n'exista betg pli en ina famiglia da tgira⁸¹.

³ Il partenadi registrà ha il medem status sco la lètg.

⁴ Il dretg da refusar da dar perditga scroda, sche:

a.⁸²

la procedura penala sa referescha ad in malfatg tenor ils artitgels 111-113, 122, 124, 140, 184, 185, 187, 189, 190 u 191 CP⁸³; e

b.

il malfatg è stà drizzà cunter ina persuna, cun la quala la perditga ha ina relaziun tenor ils alineas 1-3.

¹ Ina persuna po refusar da dar perditga, sch'ella engrevgiass sasezza uschè ferm cun sia deposiziun ch'ella:

a.

pudess vegnir fatga responsabla tenor il dretg penal;

b.

pudess vegnir fatga responsabla tenor il dretg civil, e sche l'interess da protecziun predominescha l'interess da la persecuziun penala.

² Il dretg da refusar da dar perditga exista er alura, sche la persuna engrevgiass cun sia deposiziun ses proxims en il senn da l'artitgel 168 alineas 1-3; resalvà resta l'artitgel 168 alinea 4.

³ Ina persuna po refusar da dar perditga, sch'ella sezza u sche ses proxims en il senn da l'artitgel 168 alineas 1-3 vegnan - pervia da sia deposiziun - smanatschada d'in privel considerabel per il corp e per la vita u d'in auter dischavantatg grev che na po betg vegnir impedì cun mesiras da protecziun.

⁴ Ina victima d'in malfatg cunter l'integritad sexuala po refusar en mintga cas da respunder dumondas che pertutgan sia sfera intima.

¹ Funcziunaris en il senn da l'artitgel 110 alinea 3 CP⁸⁴ e lur persunas auxiliaras sco er commembers d'autoritads e lur persunas auxiliaras pon refusar da dar perditga davart secrets ch'als èn vegnids confidads en lur qualitad uffiziala u ch'els han percepì exequind lur uffizi u lur activitad auxiliara.⁸⁵

² Els ston far ina deposiziun, sch'els:

a.

èn suttamess ad in'obligaziun d'annunzia; u

b.

èn vegnids autorisads en scrit da lur autoritad superiura da far la deposiziun.⁸⁶

³ L'autoritad superiura conceda l'autorisaziun da far la deposiziun, sche l'interess da chattar la vardad predominescha l'interess da mantegnair il secret.

¹ Spirituals, advocats, defensurs, notars, advocats da patenta, medis, dentists, chiropratichers, apotechers, psicologs, tgirunzs, fisioterapeuts, ergoterapeuts, spendreras, cussegliaders da nutriment, optometrists, osteopats sco er lur persunal auxiliar pon refusar da dar perditga davart secrets ch'als èn vegnids confidads pervia da lur professiun u ch'els han percepì exequind questa professiun.⁸⁷

² Els ston far ina deposiziun, sch'els:

a.

èn suttamess ad in'obligaziun d'annunzia; u

b.

èn vegnids deliberads tenor l'artitgel 321 alinea 2 CP⁸⁸ da l'obligaziun da mantegnair il secret, e quai dal titular dal secret u en scrit dal post cumpetent.

³ L'autoritad penala resguarda er il secret professiunal, sch'il titular dal secret è vegnì deliberà da l'obligaziun da mantegnair il secret, sch'el fa valair vardaivlamain che l'interess da mantegnair ses secret predomineschia l'interess da chattar la vardad.

⁴ La Lescha dals 23 da zercladur 2000⁸⁹ davart las advocatas ed ils advocats resta resalvada.

¹ Persunas che s'occupan professiunalmain da la publicaziun d'infurmaziuns en la part redacziunala d'in medium che cumpara regularmain sco er lur persunal auxiliar pon refusar da dar perditga davart l'identitad d'in autur u davart il cuntegn e davart las funtaunas da lur infurmaziuns.

² Els ston far ina deposiziun, sche:

a.

la perditga è necessaria per salvar ina persuna d'in privel direct per il corp e per la vita;

b.

in dals suandants malfatgs na pudess betg vegnir sclerì e la persuna che vegn inculpada d'avair commess il malfatg na pudess betg vegnir tschiffada senza la perditga:

1.

delicts da mazzament en il senn dals artitgels 111-113 CP⁹⁰,

2.

crims ch'èn chastiabels cun in chasti da detenziun da dapli che 3 onns,

3.⁹¹

malfatgs tenor ils artitgels 187, 189, 190, 191, 197 alinea 4, 260^ter, 260^quinquies, 260^sexies, 305^bis, 305^ter e 322^ter-322^septies CP,

4.⁹²

malfatgs tenor l'artitgel 19 alinea 2 da la Lescha da narcotics dals 3 d'october 1951⁹³ (LN).

¹ Tgi che sto mantegnair secrets professiunals tenor ina da las suandantas disposiziuns, sto far sia deposiziun mo, sche l'interess da chattar la vardad predominescha l'interess da mantegnair il secret:

a.

artitgel 321^bis CP⁹⁴;

b.

artitgel 139 alinea 3 dal Cudesch civil svizzer⁹⁵;

c.

artitgel 2 da la Lescha federala dals 9 d'october 1981⁹⁶ davart ils posts da cussegliaziun per dumondas da gravidanza;

d.⁹⁷

artitgel 11 da la Lescha dals 23 da mars 2007⁹⁸ davart l'agid a victimas;

e.⁹⁹

artitgel 3c alinea 4 LN¹⁰⁰;

f.¹⁰¹

…

² Titulars d'auters secrets protegids tras lescha èn obligads da far ina deposiziun. La direcziun da la procedura als po deliberar da l'obligaziun da dar perditga, sch'els pon far valair vardaivlamain che l'interess da mantegnair il secret predomineschia l'interess da chattar la vardad.

¹ Davart l'admissibladad dal dretg da refusar da dar perditga decida:

a.

en la procedura preliminara: l'autoritad interroganta;

b.

suenter che l'accusaziun è vegnida fatga: la dretgira.

² La perditga po pretender immediatamain suenter che la decisiun è vegnida communitgada che l'instanza da recurs giuditgeschia la decisiun.

³ Fin a la decisiun da l'instanza da recurs ha la perditga il dretg da refusar da dar perditga.

¹ La perditga po da tut temp far valair ses dretg da refusar da dar perditga u revocar sia renunzia da tal.

² Deposiziuns ch'ina perditga ha fatg suenter ch'ella è vegnida infurmada davart il dretg da refusar da dar perditga pon vegnir duvradas sco cumprova er en cas che la perditga fa valair pli tard ses dretg da refusar da dar perditga u revochescha la renunzia al dretg da refusar da dar perditga.

¹ Tgi che refusescha da dar perditga senza ch'el haja il dretg da far quai, po vegnir chastià cun ina multa disciplinara u po vegnir obligà da pajar ils custs e las indemnisaziuns ch'èn vegnids chaschunads tras sia refusaziun.

² Sche la perditga ch'è obligada da dar perditga insista sin sia refusaziun, vegn ella - renviond a l'artitgel 292 CP¹⁰² - intimada anc ina giada da far sia deposiziun. Sch'ella refusescha anc ina giada da dar perditga, vegn averta ina procedura penala.

¹ Al cumenzament da mintga interrogaziun renda l'autoritad interroganta attenta la perditga a las obligaziuns da dar perditga e da dir la vardad ed a la chastiabladad d'ina perditga faussa tenor l'artitgel 307 CP¹⁰³. Sche questa indicaziun vegn tralaschada, è l'interrogaziun nunvalaivla.

² Al cumenzament da l'emprima interrogaziun dumonda l'autoritad interroganta la perditga davart las relaziuns ch'ella ha cun las partidas sco er davart autras circumstanzas che pudessan esser impurtantas per sia credibladad.

³ Ella renda attenta la perditga a ses dretgs da refusar da dar perditga, uschespert ch'ella vesa tals dretgs sin basa da l'interrogaziun u da las actas. Sche quest renviament vegn tralaschà e sche la perditga fa valair posteriuramain ses dretg da refusar da dar perditga, na po l'interrogaziun betg vegnir duvrada.

¹ Las citaziuns da la procura publica, da las autoritads penalas per surpassaments e da las dretgiras vegnan decretadas en scrit.

² Ella cuntegnan:

a.

la designaziun da l'autoritad penala citanta e da las persunas che vegnan ad exequir l'act processual;

b.

la designaziun da la persuna citada e da la qualitad, en la quala ella duai sa participar a l'act processual;

c.

il motiv da la citaziun, nun che l'intent da l'inquisiziun scumondia questa infurmaziun;

d.

il lieu, la data e las uras che la persuna citada sto cumparair;

e.

il cumond da vegnir persunalmain;

f.

il renviament a las consequenzas giuridicas en cas d'ina absenza nunperstgisada;

g.

la data da l'emissiun da la citaziun;

h.

la suttascripziun da la persuna citanta.

¹ Citaziuns vegnan consegnadas:

a.

en la procedura preliminara: almain 3 dis avant l'act processual;

b.

en la procedura davant dretgira: almain 10 dis avant l'act processual.

² Citaziuns publicas vegnan publitgadas almain 1 mais avant l'act processual.

³ Cun fixar il termin vegni tegnì quint commensuradamain da la disponibladad da la persuna citada.

¹ Ina citaziun po vegnir decretada en in'autra furma che quella prescritta e cun termins pli curts:

a.

en cas urgents; u

b.

cun il consentiment da la persuna che duai vegnir citada,

² Tgi che sa chatta al lieu da l'act processual u en arrest, po vegnir interrogà immediatamain e senza citaziun.

¹ Sch'i ston vegnir citadas persunas che sa chattan a l'exteriur, po la procura publica u la direcziun da la procedura garantir ad ellas in accumpagnament liber.

² Persunas, a las qualas è vegnì garantì in accumpagnament liber, na pon betg vegnir arrestadas u suttamessas ad autras mesiras che restrenschan la libertad en Svizra per acts u per condemnaziuns che dateschan dal temp avant ch'ellas èn partidas da la Svizra.

³ L'accumpagnament liber po vegnir collià cun cundiziuns. En quest cas ston las persunas pertutgadas vegnir rendidas attentas al fatg che l'accumpagnament liber extinguia, sch'ellas cuntrafetschian a las cundiziuns ch'èn colliadas cun l'accumpagnament liber.

¹ Tgi che vegn cità d'ina autoritad penala ha da dar suatientscha a la citaziun.

² Tgi ch'è impedì da dar suatientscha ad ina citaziun, sto communitgar quai immediatamain a l'autoritad citanta; el sto motivar ed - uschenavant che quai è pussaivel - cumprovar l'impediment.

³ Per motivs impurtants po ina citaziun vegnir revocada. La revocaziun ha in effect pir, cur ch'ella è vegnida communitgada a la persuna citada.

⁴ Tgi che na dat nunperstgisadamain betg suatientscha ad ina citaziun da la procura publica, da l'autoritad penala per surpassaments u da la dretgira u tgi che dat memia tard suatientscha ad ina tala citaziun, po vegnir chastià cun ina multa disciplinara e po ultra da quai vegnir manà da la polizia davant l'autoritad respectiva.

⁵ Resalvadas restan las disposiziuns davart la procedura contumaziala.

¹ En la procedura poliziala d'investigaziun po la polizia citar persunas per las interrogar, per constatar lur identitad u per las suttametter ad in tractament dal servetsch d'identificaziun, e quai senza resguardar furmas spezialas e termins.

² Tgi che na dat betg suatientscha ad ina citaziun da vart da la polizia po vegnir manà davant l'autoritad cumpetenta, sche questa mesira è vegnida smanatschada en scrit a la persuna citada.

¹ Ina persuna po vegnir manada da la polizia davant in'autoritad, sche:

a.

ella n'ha betg dà suatientscha ad ina citaziun;

b.

i sto vegnir supponì sin basa d'indizis concrets ch'ella na vegnia betg a dar suatientscha ad ina citaziun;

c.

igl è indispensabel ch'ella cumparia immediatamain - en cas da proceduras pervia da crims e pervia da delicts - en l'interess da la procedura;

d.

ella vegn suspectada urgentamain d'avair commess in crim u in delict ed i ston vegnir supponids motivs d'arrest.

² Ch'ina persuna vegnia manada davant in'autoritad vegn ordinà da la direcziun da la procedura.

¹ Sch'ina persuna duai vegnir manada davant in'autoritad, sto l'ordinaziun respectiva vegnir fatga en scrit. En cas urgents po ella vegnir fatga a bucca; ella sto dentant vegnir confermada posteriuramain en scrit.

² Il cumond cuntegna las medemas indicaziuns sco la citaziun ed ultra da quai explicitamain l'autorisaziun da la polizia da duvrar sche necessari violenza per exequir il cumond sco er da pudair metter pe en chasas, en abitaziuns ed en autras localitads che n'èn betg generalmain accessiblas.

¹ La polizia exequescha il cumond da manar ina persuna davant in'autoritad cun prender uschè bler resguard da la persuna pertutgada sco pussaivel.

² Ella preschenta a la persuna pertutgada il cumond da la manar davant in'autoritad e la maina davant l'autoritad respectiva, e quai immediatamain u sin il temp che vegn numnà en il cumond.

³ L'autoritad infurmescha la persuna ch'è vegnida manada davant ella immediatamain ed en ina lingua che questa persuna chapescha davart il motiv, pertge ch'ella è vegnida manada davant ella, exequescha ils acts processuals e la relascha alura immediatamain, nun che l'autoritad pretendia l'ordinaziun da l'arrest d'inquisiziun u da l'arrest da segirezza.

¹ La procura publica, las autoritads penalas per surpassaments e las dretgiras pon laschar publitgar persunas, da las qualas la dimora n'è betg enconuschenta e da las qualas la preschientscha en la procedura è necessaria, per eruir il lieu da dimora. En cas urgents po la polizia ordinar ina publicaziun da sai anor.

² Ina persuna inculpada po vegnir publitgada per l'arrestar e per la manar davant in'autoritad (cumond d'arrest), sch'ella vegn suspectada urgentamain d'avair commess in crim u in delict e sch'i ston vegnir supponids motivs d'arrest.¹⁰⁷

³ Sche la procura publica, l'autoritad penala per surpassaments u la dretgira n'ordinescha nagut auter, è la polizia cumpetenta per far la publicaziun.

⁴ Per la tschertga d'objects e da valurs da facultad valan ils alineas 1-3 tenor il senn. En la procedura preliminara po la polizia ordinar da sai anora la tschertga d'objects e da valurs da facultad.¹⁰⁸

¹ La publicitad po vegnir supplitgada da cooperar tar la tschertga.

² La Confederaziun ed ils chantuns pon decretar disposiziuns, tenor las qualas persunas privatas pon vegnir remuneradas per avair cooperà cun success tar la tschertga.

¹ La persuna inculpada resta en libertad. Ella dastga vegnir suttamessa a mesiras repressivas da detenziun mo en il rom da las disposiziuns da questa lescha.

² Mesiras repressivas da detenziun ston vegnir abolidas, uschespert che:

a.

lur premissas n'èn betg pli ademplidas

b.

la durada, ch'è previsa da questa lescha u ch'è vegnida permessa d'ina dretgira, è scadida; u

c.

mesiras da cumpensaziun permettan da cuntanscher la medema finamira.

³ L'arrest d'inquisiziun e l'arrest da segirezza na dastgan betg durar pli ditg ch'il chasti da detenziun previsibel.

¹ Sch'igl è necessari - per fermar u per arrestar ina persuna - da metter pe en chasas, en abitaziuns u en autras localitads che n'èn betg generalmain accessiblas, ston vegnir observadas las disposiziuns davart la perquisiziun da chasas.

² Sch'i nascha in privel dal retard, po la polizia metter pe en localitads er senza in cumond da perquisiziun da la chasa.

¹ Sch'ina persuna vegn arrestada provisoricamain u sch'ella vegn messa en arrest d'inquisiziun u en arrest da segirezza, infurmescha l'autoritad penala cumpetenta immediatamain:

a.

ses confamigliars;

b.

sin ses giavisch ses patrun u la represchentanza estra ch'è responsabla per ella.

² I vegn desistì d'infurmar las persunas e l'autoritad tenor l'alinea 1, sche l'intent d'inquisiziun scumonda quai u sche la persuna pertutgada refusescha quai explicitamain.

³ Sche las mesiras repressivas da detenziun mettan en difficultads ina persuna ch'è dependenta da la persuna arrestada, infurmescha l'autoritad penala las autoritads socialas cumpetentas.

⁴ La victima vegn orientada davart l'ordinaziun e davart l'annullaziun da l'arrest d'inquisiziun e da l'arrest da segirezza e davart ina mesira da cumpensaziun tenor l'artitgel 237 alinea 2 litera c u g sco er davart la fugia da la persuna inculpada, nun ch'ella haja renunzià explicitamain da vegnir orientada.¹⁰⁹ L'autoritad po renunziar d'orientar davart l'annullaziun da l'arrest, sche la persuna inculpada vegniss exponida ad in privel serius tras questa infurmaziun.

¹ En l'interess dal scleriment d'in malfatg po la polizia fermar e sche necessari manar ina persuna al post da polizia per:

a.

constatar sia identitad;

b.

l'interrogar curtamain;

c.

sclerir, sch'ella ha commess in malfatg;

d.

sclerir, sch'ella u sche objects che sa chattan en ses possess vegnan tschertgads.

² Ella po obligar la persuna fermada:

a.

d'inditgar sias persunalias;

b.

da preschentar ils document d'identitad;

c.

da mussar las chaussas ch'ella maina cun sai;

d.

d'avrir recipients u vehichels.

³ Ella po dumandar persunas privatas da la sustegnair per fermar ina persuna.

⁴ Sch'i sto vegnir supponì sin basa d'indizis concrets ch'i vegnian commess malfatgs en in tschert lieu u ch'i sa trategnian là persunas inculpadas, po la polizia bloccar l'access a quest lieu e fermar las persunas che sa trategnan là.

¹ En cas urgents ha la polizia il dretg da persequitar ina persuna inculpada sin il territori d'ina autra vischnanca, d'in auter chantun ed, en il rom da contracts internaziunals, a l'exteriur e da la fermar là.

² Sche la persuna fermada duai alura vegnir arrestada, vegn ella surdada immediatamain a l'autoritad ch'è cumpetenta al lieu, nua che la persuna è vegnida fermada.

¹ La polizia è obligada d'arrestar provisoricamain e da manar al post da polizia ina persuna:

a.

ch'ella ha tschiffà en flagranti tar in crim u tar in delict u chattà immediatamain suenter ch'ella ha commess in crim u in delict;

b.

ch'è publitgada per l'arrestaziun.

² Ella po arrestar provisoricamain e manar al post da polizia ina persuna che vegn suspectada - sin basa d'investigaziuns u d'autras infurmaziuns fidadas - d'avair commess in crim u in delict.

³ Ella po arrestar provisoricamain e manar al post da polizia ina persuna ch'ella ha tschiffà en flagranti tar in surpassament u ch'ella ha chattà immediatamain suenter ch'ella ha commess in surpassament, sche:

a.

la persuna na dat betg enconuschent sias persunalias;

b.

la persuna na viva betg en Svizra e na presta betg immediatamain ina cauziun per la multa previsa;

c.

l'arrestaziun è necessaria per impedir la persuna da commetter ulteriurs surpassaments.

¹ Sche l'agid da la polizia na po betg vegnir obtegnì ad ura, han persunas privatas il dretg d'arrestar provisoricamain ina persuna, sche:

a.

ellas han tschiffà questa persuna en flagranti tar in crim u tar in delict u chattà immediatamain suenter ch'ella ha commess in crim u in delict;

b.

la publicitad è vegnida dumandada da cooperar tar la tschertga da questa persuna.

² Tar l'arrestaziun dastgan persunas privatas applitgar violenza mo a norma da l'artitgel 200.

³ Persunas arrestadas ston vegnir surdadas a la polizia uschè svelt sco pussaivel.

¹ Suenter l'arrestaziun constatescha la polizia immediatamain l'identitad da la persuna arrestada, infurmescha quella en ina lingua che quella chapescha davart ils motivs da l'arrestaziun e la renviescha en il senn da l'artitgel 158 a ses dretgs. Alura infurmescha ella immediatamain la procura publica davart l'arrestaziun.

² Suenter interroghescha ella la persuna arrestada - applitgond l'artitgel 159 - davart il suspect ch'è avant maun cunter ella e fa immediatamain ils scleriments ch'èn adattads per confermar u per refutar il suspect d'avair commess in malfatg ed ils ulteriurs motivs d'arrest.

³ Sch'i resulta dals scleriments ch'ils motivs d'arrest n'existan betg u betg pli, lascha ella immediatamain liber la persuna arrestada. Sch'ils scleriments conferman il suspect d'avair commess in malfatg ed in motiv d'arrest, maina ella la persuna immediatamain davant la procura publica.

⁴ La persuna arrestada vegn en mintga cas laschada libra u manada davant la procura publica il pli tard suenter 24 uras; sche la persuna è vegnida fermada avant ch'ella è vegnida arrestada, sto la durada da la fermanza vegnir attribuida a quest termin.

⁵ Sche la polizia ha arrestà provisoricamain ina persuna en il senn da l'artitgel 217 alinea 3 e sche la persuna duai vegnir tegnida en fermanza pli ditg che 3 uras, sto quai vegnir ordinà d'appartegnents da la polizia che han l'autorisaziun da la Confederaziun u dal chantun per far quai.

¹ L'arrest d'inquisiziun cumenza cun sia ordinaziun tras la dretgira da mesiras repressivas e finescha cun l'entrada da l'accusaziun tar la dretgira d'emprima instanza, cun il cumenzament anticipà d'ina sancziun da detenziun u cun la relaschada da la persuna inculpada durant l'inquisiziun.

² Sco arrest da segirezza vala l'arrest durant il temp tranter l'entrada da l'acta d'accusaziun tar la dretgira d'emprima instanza e la vigur legala da la sentenzia, il cumenzament d'ina sancziun da detenziun, l'execuziun da l'expulsiun u la relaschada.¹¹⁰

¹ L'arrest d'inquisiziun e l'arrest da segirezza èn mo admissibels, sche la persuna vegn inculpada urgentamain d'avair commess in crim u in delict e sch'i sto vegnir temì seriusamain ch'ella:

a.

sa retiria tras fugia da la procedura penala u da la sancziun previsa;

b.

influenzeschia persunas e sfalsifitgeschia meds da cumprova per cumprometter uschia da chattar la vardad; u

c.¹¹¹

pericliteschia considerablamain e da maniera imminenta la segirezza d'autras persunas cun commetter crims u grevs delicts, suenter ch'ella ha commess gia pli baud malfatgs dal medem gener.

^1bis L'arrest d'inquisiziun e l'arrest da segirezza èn excepziunalmain admissibels, sche:

a.

la persuna inculpada vegn suspectada urgentamain d'avair violà grevamain l'integritad fisica, psichica u sexuala d'ina persuna tras in crim u tras in grev delict; e

b.

igl exista in privel serius ed imminent che la persuna inculpada commettia in grev crim dal medem gener.¹¹²

² L'arrest è er admess, sch'igl exista in privel serius ed imminent ch'ina persuna realiseschia propi sia smanatscha da commetter in grev crim.¹¹³

Sulettamain la persuna arrestada po contestar decisiuns davart l'ordinaziun, davart la prolungaziun e davart l'annullaziun da l'arrest d'inquisiziun u da l'arrest da segirezza tar l'instanza da recurs. L'artitgel 233 resta resalvà.

¹ En la procedura d'arrest po la defensiun esser preschenta a las interrogaziuns da la persuna inculpada ed ad ulteriuras registraziuns da las cumprovas.

² En la procedura d'arrest davant la procura publica e davant las dretgiras po la persuna inculpada contactar da tut temp en scrit u a bucca la defensiun, e quai senza vegnir survegliada.

¹ La procura publica interroghescha immediatamain la persuna inculpada e la dat la pussaivladad da s'exprimer davart il suspect d'avair commess in malfatg e davart ils motivs d'arrest. Ella retschertga immediatamain quellas cumprovas ch'èn adattadas e senz'auter disponiblas per confermar u per refutar il suspect d'avair commess in malfatg ed ils motivs d'arrest.

² Sch'il suspect d'avair commess in malfatg ed ils motivs d'arrest sa conferman, pretenda la procura publica immediatamain da la dretgira da mesiras repressivas, il pli tard dentant entaifer 48 uras dapi l'arrestaziun, d'ordinar l'arrest d'inquisiziun u ina mesira da cumpensaziun. Ella inoltrescha sia pretensiun en scrit, la motivescha curtamain ed agiunta las actas essenzialas.

³ Sch'ella renunzia da pretender l'arrest, decretescha ella da laschar immediatamain liber la persuna arrestada. Sch'ella pretenda ina mesira da cumpensaziun, prenda ella las mesiras da segirezza necessarias.

¹ La dretgira da mesiras repressivas fixescha immediatamain suenter l'entrada da la pretensiun da la procura publica ina tractativa betg publica cun la procura publica, cun la persuna inculpada e cun sia defensiun; ella po obligar la procura publica da sa participar a questa tractativa.

² Sin dumonda conceda ella a la persuna inculpada ed a la defensiun ordavant invista da las actas che stattan a sia disposiziun.

³ Tgi che manca giustifitgadamain a la tractativa po inoltrar giavischs en scrit u renviar ad anteriuras inoltraziuns.

⁴ La dretgira da mesiras repressivas retschertga las cumprovas ch'èn immediatamain disponiblas e ch'èn adattadas per confermar u per refutar il suspect d'avair commess in malfatg ubain ils motivs d'arrest.

⁵ Sche la persuna inculpada renunzia explicitamain ad ina tractativa, po la dretgira da mesiras repressivas decider en ina procedura en scrit sin basa da la pretensiun da la procura publica e da las inoltraziuns da la persuna inculpada.¹¹⁵

¹ La dretgira da mesiras repressivas decida immediatamain, il pli tard però entaifer 48 uras dapi l'entrada da la pretensiun.

² Ella communitgescha immediatamain sia decisiun a la procura publica, a la persuna inculpada ed a sia defensiun a bucca u, en cas ch'els èn absents, en scrit. Alura las trametta ella ina curta motivaziun en scrit.

³ Sch'ella ordinescha in arrest d'inquisiziun, renda ella attenta la persuna inculpada ch'ella possia far da tut temp ina dumonda da vegnir relaschada or da l'arrest.

⁴ En sia decisiun po ella:

a.

fixar la durada maximala da l'arrest d'inquisiziun;

b.

incumbensar la procura publica d'exequir tscherts acts d'inquisiziun;

c.

ordinar mesiras da cumpensaziun empè da l'arrest d'inquisiziun.

⁵ Sch'ella n'ordinescha betg l'arrest d'inquisiziun, vegn la persuna inculpada immediatamain laschada libra.

¹ Sche la durada da l'arrest d'inquisiziun ch'è vegnida fixada da la dretgira da mesiras repressivas scada, po la procura publica far ina dumonda per prolungar l'arrest d'inquisiziun. Sche la dretgira da mesiras repressivas n'ha betg limità la durada da l'arrest d'inquisiziun, sto questa dumonda vegnir fatga avant che 3 mais d'arrest d'inquisiziun èn passads.

² La procura publica inoltrescha la dumonda motivada en scrit a la dretgira da mesiras repressivas il pli tard 4 dis avant la scadenza da la durada da l'arrest ed agiunta las actas essenzialas.

³ La dretgira da mesiras repressivas dat a la persuna inculpada ed a sia defensiun la pussaivladad da prender invista da las actas che la stattan a disposiziun e da prender posiziun en scrit davart la dumonda entaifer 3 dis.

⁴ Ella po ordinar che l'arrest d'inquisiziun vegnia prolungà provisoricamain, fin ch'ella ha prendì sia decisiun.

⁵ La dretgira da mesiras repressivas decida il pli tard entaifer 5 dis suenter che la posiziun è entrada respectivamain suenter ch'il termin menziunà en l'alinea 3 è scadì. Ella po incumbensar la procura publica da far tscherts acts d'inquisiziun ubain ordinar mesiras da cumpensaziun.

⁶ Per regla vegn la procedura fatga en scrit, ma la dretgira da mesiras repressivas po ordinar ina tractativa; quella n'è dentant betg publica.

⁷ La prolungaziun da l'arrest d'inquisiziun vegn mintgamai permessa per maximalmain 3 mais, en cas excepziunals per maximalmain 6 mais.

¹ La persuna inculpada po inoltrar tar la procura publica da tut temp ina dumonda da vegnir relaschada or da l'arrest, saja quai en scrit u - per mauns dal protocol - a bucca; resalvà resta l'alinea 5. La dumonda sto vegnir motivada curtamain.

² Sche la procura publica accepta la dumonda, relascha ella la persuna inculpada immediatamain da l'arrest. Sch'ella na vul betg acceptar la dumonda, transmetta ella quella - ensemen cun las actas e cun ina posiziun motivada - a la dretgira da mesiras repressivas, e quai il pli tard 3 dis suenter che la dumonda è entrada.

³ La dretgira da mesiras repressivas trametta la posiziun a la persuna inculpada ed a sia defensiun e fixescha in termin da 3 dis per la replica.

⁴ La dretgira da mesiras repressivas decida il pli tard entaifer 5 dis suenter che la replica è entrada respectivamain suenter ch'il termin menziunà en l'alinea 3 è scadì en ina tractativa betg publica. Sche la persuna inculpada renunzia explicitamain ad ina tractativa, po la decisiun er vegnir decretada en scrit. Dal rest è applitgabel l'artitgel 226 alineas 2-5 confurm al senn.

⁵ En sia decisiun po la dretgira da mesiras repressivas fixar in termin da maximalmain 1 mais, durant il qual la persuna inculpada na po betg far ina dumonda da relaschada.

¹ Sin ina dumonda en scrit da la procura publica decida la dretgira da mesiras repressivas davart l'ordinaziun da l'arrest da segirezza, sche la persuna inculpada sa chatta gia en arrest d'inquisiziun.

² Sch'i resultan motivs d'arrest pir suenter che l'accusaziun è vegnida fatga, fa la direcziun da la procedura da la dretgira d'emprima instanza - applitgond l'artitgel 224 confurm al senn - ina procedura d'arrest da segirezza e pretenda da la dretgira da mesiras repressivas d'ordinar l'arrest da segirezza.

³ La procedura davant la dretgira da mesiras repressivas sa drizza:

a.

confurm al senn tenor ils artitgels 225 e 226, sche la persuna inculpada na sa chatta betg gia en arrest d'inquisiziun;

b.

confurm al senn tenor l'artitgel 227, sche la persuna inculpada sa chatta gia en arrest d'inquisiziun.

¹ Durant la procedura d'emprima instanza pon la persuna inculpada e la procura publica far ina dumonda da vegnir relaschà respectivamain da relaschar or da l'arrest.

² La dumonda sto vegnir drizzada a la direcziun da la procedura da la dretgira d'emprima instanza.

³ Sche la direcziun da la procedura accepta la dumonda, relascha ella la persuna inculpada immediatamain or da l'arrest. Sch'ella na vul betg acceptar la dumonda, la transferescha ella a la dretgira da mesiras repressivas per laschar decider.

⁴ Cun il consentiment da la procura publica po la direcziun da la procedura da la dretgira d'emprima instanza er ordinar sezza la relaschada or da l'arrest. Sche la procura publica na dat betg ses consentiment, decida la dretgira da mesiras repressivas.

⁵ Dal rest valan las disposiziuns da l'artitgel 228 confurm al senn.

¹ La dretgira d'emprima instanza decida en sia sentenzia, sch'ina persuna inculpada duai vegnir messa u tegnida en arrest da segirezza:

a.

per segirar l'execuziun dal chasti u da las mesiras;

b.

en vista a la procedura d'appellaziun.

² Sche la persuna inculpada ed arrestada vegn declerada per nunculpanta e sche la dretgira d'emprima instanza ordinescha da la laschar libra, po la procura publica:

a.

proponer a la dretgira d'emprima instanza da colliar la liberaziun cun mesiras, renviond a la smanatscha da chasti da l'artitgel 292 CP¹¹⁶, per garantir che la persuna declerada per nunculpanta saja preschenta en la procedura d'appellaziun. La persuna declerada per nunculpanta e la procura publica pon contestar las decisiuns davart l'ordinaziun da mesiras tar l'instanza da recurs;

b.

proponer a la dretgira d'emprima instanza - per mauns da la direcziun da la procedura da la dretgira d'appellaziun - che l'arrest da segirezza vegnia cuntinuà, sch'igl exista in privel serius ed imminent che la persuna declerada per nunculpanta pericliteschia considerablamain e da maniera imminenta la segirezza d'autras persunas cun commetter crims u grevs delicts. En quest cas resta la persuna respectiva en arrest, fin che la direcziun da la procedura da la dretgira d'appellaziun ha prendì sia decisiun. Ella decida entaifer 5 dis suenter l'inoltraziun da la proposta da la procura publica.¹¹⁷

³ Sch'ina appellaziun vegn retratga, decida la dretgira d'emprima instanza, sche la durada da l'arrest suenter la sentenzia duai vegnir messa a quint.

¹ Sch'i resultan motivs d'arrest pir durant ina procedura davant la dretgira d'appellaziun, lascha la direcziun da la procedura da la dretgira d'appellaziun immediatamain manar davant sai la persuna che sto vegnir messa en arrest e la taidla.

² Ella decida entaifer 48 uras dapi che la persuna inculpada è vegnida manada davant ella; questa decisiun n'è betg contestabla.

La direcziun da la procedura da la dretgira d'appellaziun decida entaifer 5 dis davart dumondas da vegnir relaschà or da l'arrest; questa decisiun n'è betg contestabla.

¹ L'arrest d'inquisiziun e l'arrest da segirezza vegnan exequids per regla en stabiliments d'arrest ch'èn resalvads a quest intent e che servan ultra da quai mo a l'execuziun da chastis da detenziun curts.

² Sche quai è inditgà per motivs medicinals, po l'autoritad chantunala cumpetenta collocar la persuna arrestada en in ospital u en ina clinica psichiatrica.

¹ La persuna arrestada na dastga betg vegnir restrenschida en sia libertad persunala dapli che quai ch'i vegn pretendì dal motiv da l'arrest sco er da l'urden e da la segirezza en il stabiliment d'arrest.

² Ils contacts tranter la persuna arrestada ed autras persunas ston vegnir permess da la direcziun da la procedura. Visitas han lieu sche necessari sut surveglianza.

³ La direcziun da la procedura controllescha la posta che entra e che sorta, cun excepziun da la correspundenza cun autoritads da surveglianza e cun autoritads penalas. Durant l'arrest da segirezza po ella surdar questa incumbensa a la procura publica.

⁴ La persuna arrestada po avair contact liber cun la defensiun, senza ch'il cuntegn vegnia controllà. Sch'igl exista in suspect motivà ch'i vegnia fatg abus da quai, po la direcziun da la procedura restrenscher - cun approvaziun da la dretgira da mesiras repressivas - il contact liber per in tschert temp; ella communitgescha la restricziun ordavant a la persuna arrestada ed a la defensiun.

⁵ Ils chantuns reglan ils dretgs e las obligaziuns da las persunas arrestadas, lur pussaivladads da far recurs, las mesiras disciplinaras sco er la surveglianza sur dals stabiliments d'arrest.

¹ La direcziun da la procedura po permetter a la persuna inculpada da cumenzar anticipadamain cun l'expiaziun da chastis u da mesiras da detenziun, sch'il stadi da la procedura permetta quai e sche l'intent da l'arrest d'inquisiziun u da l'arrest da segirezza na s'oppona betg a quai.¹¹⁸

² Sche l'accusaziun è gia vegnida fatga, dat la direcziun da la procedura la pussaivladad a la procura publica da prender posiziun.

³ La Confederaziun ed ils chantuns pon prescriver che l'execuziun anticipada da mesiras stoppia vegnir approvada da las autoritads d'execuziun.

⁴ Cun entrar en il stabiliment d'execuziun cumenza la persuna inculpada cun l'expiaziun da ses chasti u da sia mesira; a partir da quest mument è ella suttamessa al reschim d'execuziun.¹¹⁹

¹ Empè da l'arrest d'inquisiziun u da l'arrest da segirezza ordinescha la dretgira cumpetenta ina u pliras mesiras main severas, sch'ellas adempleschan la medema finamira sco l'arrest.

² Mesiras da cumpensaziun èn en spezial:

a.

la prestaziun d'ina cauziun;

b.

la bloccada da documents d'identitad e d'autras scrittiras;

c.

la cundiziun u il scumond da sa trategnair en in tschert lieu u en ina tscherta chasa;

d.

la cundiziun da s'annunziar regularmain tar in uffizi;

e.

la cundiziun da pratitgar ina lavur regulara;

f.

la cundiziun da sa suttametter ad in tractament medicinal u ad ina controlla;

g.

il scumond d'avair contact cun tschertas persunas.

³ Per survegliar talas mesiras da cumpensaziun po la dretgira ordinar ch'i vegnian duvrads apparats tecnics e che quels vegnian fixads vi da la persuna che sto vegnir survegliada.

⁴ L'ordinaziun e la contestaziun da mesiras da cumpensaziun sa drizzan confurm al senn tenor las prescripziuns davart l'arrest d'inquisiziun e davart l'arrest da segirezza.

⁵ La dretgira po revocar da tut temp las mesiras da cumpensaziun, ordinar autras mesiras da cumpensaziun ubain l'arrest d'inquisiziun u l'arrest da segirezza, sche novas circumstanzas pretendan quai u sche la persuna inculpada n'ademplescha betg las cundiziuns che l'èn vegnidas imponidas.

¹ Sch'igl exista il privel che la persuna inculpada fugia, po la dretgira cumpetenta prescriver ch'i vegnia pajà in import en daners per segirar che la persuna inculpada saja da tut temp preschenta als acts processuals u sa suttamettia ad ina sancziun da detenziun.

² La cauziun sa drizza tenor la grevezza dals acts chastiabels che vegnan renfatschads a la persuna inculpada e tenor sias relaziuns persunalas.

³ La cauziun po vegnir pajada en daner blut u tras ina garanzia d'ina banca u d'ina assicuranza domiciliada en Svizra.

¹ La cauziun vegn deliberada, sche:

a.

il motiv da l'arrest è crudà davent;

b.

la procedura penala è vegnida terminada cun vigur legala tras ina sistida u tras in acquittament;

c.

la persuna inculpada ha cumenzà ad expiar la sancziun da detenziun.

² Sche la cauziun pajada da la persuna inculpada vegn restituida, po ella vegnir duvrada per pajar ils chastis pecuniars, las multas, ils custs e las indemnisaziuns ch'èn vegnids imponids a la persuna inculpada.

³ Davart la deliberaziun decida l'autoritad, davant la quala la chaussa è pendenta u è stada pendenta sco ultim.

¹ Sch'ina persuna inculpada sa sustira da la procedura u da l'execuziun d'ina mesira da detenziun, scroda la cauziun a la Confederaziun u al chantun, dal qual la dretgira l'ha ordinà.

² Sch'ina terza persuna ha pajà la cauziun, po l'autoritad desister d'al laschar scrudar, sche la terza persuna ha dà ad ura las infurmaziuns che avessan pussibilità da tschiffar la persuna inculpada.

³ Davart la scrudada da la cauziun decida l'autoritad, davant la quala la chaussa è pendenta u è stada pendenta sco ultim.

⁴ Ina cauziun scrudada vegn duvrada - applitgond tenor il senn l'artitgel 73 CP¹²⁰ - per cuvrir las pretensiuns da las persunas donnegiadas ed, en cas ch'i resta in surpli, per cuvrir ils chastis pecuniars, las multas ed ils custs da procedura. In eventual ulteriur surpli scroda a la Confederaziun u al chantun.

¹ Perquisiziuns ed inspecziuns vegnan ordinadas en in cumond en scrit. En cas urgents pon ellas vegnir ordinadas a bucca; ellas sto dentant vegnir confermadas posteriuramain en scrit.

² Il cumond designescha:

a.

las persunas, las localitads, ils objects u las registraziuns che ston vegnir perquirids u inspectads;

b.

l'intent da la mesira;

c.

las autoritads u las persunas ch'èn incumbensadas da far las perquisiziuns u las inspecziuns.

³ Sch'i resulta in privel dal retard, po la polizia ordinar che las chavorgias e las averturas betg visiblas dal corp vegnian inspectadas e far senza cumond perquisiziuns; ella infurmescha immediatamain en chaussa l'autoritad penala cumpetenta.

⁴ La polizia po perquirir ina persuna fermada u arrestada, en spezial per garantir la segirezza da persunas.

¹ Las autoritads u las persunas ch'èn incumbensadas da realisar las mesiras fan las preparativas da segirezza ch'èn adattadas per cuntanscher las finamiras da las mesiras.

² Ellas pon scumandar a persunas da s'allontanar durant la perquisiziun u durant l'inspecziun.

¹ Fastizs u objects ch'èn vegnids scuvrids casualmain e che na stattan betg en in connex cun il malfatg che sto vegnir sclerì, che renvieschan dentant ad in auter malfatg, vegnan mess en salv.

² Ils objects vegnan transferids a la direcziun da la procedura ensemen cun in rapport; quella decida davart l'ulteriur proceder.

¹ Chasas, abitaziuns ed autras localitads che n'èn betg generalmain accessiblas dastgan vegnir perquiridas mo cun il consentiment da la persuna autorisada.

² Il consentiment da la persuna autorisada n'è betg necessaria, sch'i sto vegnir supponì che:

a.

persunas tschertgadas sajan preschentas;

b.

fastizs dal malfatg ubain objects e valurs da facultad che ston vegnir sequestrads sajan avant maun;

c.

i vegnian commess malfatgs.

¹ Las persunas ch'èn incumbensadas da far la perquisiziun mussan al cumenzament da la mesira il cumond da perquirir la chasa.

² Ils possessurs preschents da las localitads che ston vegnir perquiridas ston assister a la perquisiziun da la chasa. Sch'els èn absents, sto sche pussaivel vegnir clamà in commember maioren da la famiglia u in'autra persuna adattada.

Documents, registraziuns sonoras, registraziuns visualas ed autras registraziuns, purtaders da datas sco er indrizs per elavurar e per arcunar infurmaziuns dastgan vegnir perquirids, sch'i sto vegnir supponì ch'els cuntegnian infurmaziuns ch'èn suttamessas a la sequestraziun.

¹ Il possessur po ordavant prender posiziun davart il cuntegn da las registraziuns.

² Per controllar il cuntegn da las registraziuns, en spezial per zavrar registraziuns che han in cuntegn protegì, pon vegnir engaschads spezialists.

³ Il possessur po metter a disposiziun a l'autoritad penala copias da registraziuns e stampats d'infurmaziuns arcunadas, sche quai basta per la tractativa.

¹ Sch'il possessur fa valair che tschertas registraziuns u tscherts objects na dastgian betg vegnir sequestrads sin basa da l'artitgel 264, als sigillescha l'autoritad penala. Il possessur sto far la dumonda entaifer 3 dis suenter che las registraziuns ed ils objects èn vegnids mess en segirezza. Durant quest termin e suenter in'eventuala sigillaziun na dastga l'autoritad penala ni examinar ni utilisar las registraziuns ed ils objects.

² Uschespert che l'autoritad penala constatescha ch'il possessur n'è betg la persuna che ha il dretg da las registraziuns u dals objects, dat l'autoritad penala la pussaivladad a questa persuna da pretender la sigillaziun entaifer 3 dis.

³ Sche l'autoritad penala na fa betg ina dumonda da dissigillar questas registraziuns e quests objects entaifer 20 dis, vegnan las registraziuns ed ils objects sigillads returnads al possessur.

¹ Sche l'autoritad penala fa ina dumonda da dissigillaziun, èn las suandantas autoritads cumpetentas per la decisiun:

a.

en la procedura preliminara ed en la procedura davant la dretgira d'emprima instanza: la dretgira da mesiras repressivas;

b.

en ils auters cas: la direcziun da la procedura da la dretgira, davant la quala il cas è pendent.

² Sche la dretgira constatescha, suenter l'entrada da la dumonda da dissigillaziun, ch'il possessur n'è betg la persuna che ha il dretg da las registraziuns u dals objects, infurmescha ella questa persuna davart la sigillaziun. Sin dumonda dat la dretgira a la persuna autorisada il dretg da prender invista da las actas.

³ La dretgira dat a la persuna autorisada in termin betg prolungabel da 10 dis per far valair objecziuns cunter la dumonda da dissigillaziun e per s'exprimer, en tge dimensiun ch'ella vul mantegnair la sigillaziun. Sche la persuna autorisada tascha, vala quai sco retratga da la dumonda da sigillaziun.

⁴ Sche la chaussa è madira per la sentenzia, decida la dretgira definitivamain en ina procedura en scrit entaifer 10 dis suenter l'entrada da la posiziun.

⁵ Cas cuntrari fixescha ella, entaifer 30 dis suenter l'entrada da la posiziun, ina tractativa betg publica cun la procura publica e cun la persuna autorisada. La persuna autorisada sto render vardaivels ils motivs, pertge ed en tge dimensiun che las registraziuns u ils objects na dastgan betg vegnir dissigillads. La dretgira decida immediatamain; la decisiun è definitiva.

⁶ La dretgira po:

a.

consultar in expert per laschar examinar il cuntegn da las registraziuns e dals objects, per survegnir access a tals e per garantir lur integritad;

b.

designar appartegnents da la polizia sco experts per survegnir access al cuntegn da las registraziuns e dals objects e per garantir lur integritad.

⁷ Sche la persuna autorisada na cumpara nunperstgisadamain betg a la tractativa e sch'ella na sa lascha er betg represchentar, vala sia dumonda da sigillaziun sco retratga. Sche la procura publica na cumpara betg, decida la dretgira en absenza da tala.

Persunas ed objects dastgan vegnir perquirids senza consentiment mo, sch'i sto vegnir supponì che fastizs dal malfatg u objects e valurs da facultad che ston vegnir sequestrads possian vegnir chattads.

¹ La perquisiziun da persunas cumpiglia la controlla da la vestgadira, dals objects, dals recipients e dals vehichels che las persunas han cun sai, da la surfatscha dal corp sco er da las averturas dal corp e da las chavorgias dal corp visiblas.

² Perquisiziuns che pertutgan las parts intimas da las persunas pertutgadas vegnan fatgas da persunas da la medema schlattaina u d'in medi, nun che la mesira na supportia nagin retard.

¹ L'inspecziun d'ina persuna cumpiglia l'inspecziun da ses stadi corporal u spiertal.

² La persuna inculpada po vegnir inspectada per:

a.

constatar ils fatgs;

b.

sclerir, sch'ella è abla da surpigliar la responsabladad per il malfatg, da suandar las tractativas e d'expiar l'arrest.

³ Intervenziuns en l'integritad corporala da la persuna inculpada pon vegnir ordinadas, sch'ellas na chaschunan betg dolurs spezialas e na pericliteschan betg la sanadad.

⁴ Envers ina persuna betg inculpada èn inspecziuns ed intervenziuns en l'integritad corporala cunter sia voluntad ultra da quai mo admessas, sch'ellas èn indispensablas per sclerir in malfatg tenor ils artitgels 111-113, 122, 124, 140, 184, 185, 187, 189, 190 u 191 CP¹²³.¹²⁴

Per constatar l'inabilitad da manischar po la polizia:

a.

analisar l'alcohol en il flad;

b.

ordinar la prelevaziun e l'analisa dal sang, en ils cas ch'il dretg federal prescriva in'analisa dal sang;

c.

ordinar la prelevaziun e l'analisa da l'urin.

Inspecziuns da persunas ed intervenziuns en l'integritad corporala vegnan fatgas d'in medi u d'ina autra persuna medicinala spezialisada.

¹ Sch'i dat en cas d'in mortori indizis per ina mort betg natirala, en spezial per in malfatg, u sche l'identitad da la bara n'è betg enconuschenta, ordinescha la procura publica ina inspecziun da la bara tras in medi expert per sclerir la moda e maniera da la mort u per identifitgar la bara.

² Sch'i na resultan tras l'inspecziun da la bara nagins indizis per in malfatg e sche l'identitad da la persuna morta è clera, deliberescha la procura publica la bara per la sepultura.

³ Cas cuntrari ordinescha la procura publica da metter en segirezza la bara e da far ulteriuras inspecziuns tras ina instituziun da la medischina legala, sche necessari in'autopsia. Ella po retegnair la bara u parts da la bara, uschenavant che l'intent da l'inspecziun pretenda quai.

⁴ Ils chantuns fixeschan tge persunas medicinalas ch'èn obligadas d'annunziar mortoris extraordinaris a las autoritads penalas.

Sch'i para dad esser necessari per sclerir in malfatg, po vegnir ordinà ch'ina bara sepulida vegnia exhumada u ch'ina urna da tschendra vegnia averta.

¹ Per sclerir il crim u il delict ch'è l'object da la procedura, po vegnir prendida in'emprova e fatg in profil dal DNA:¹²⁷

a.

da la persuna inculpada;

b.

d'autras persunas, en spezial da victimas u da persunas che dastgan entrar en il lieu dal malfatg, uschenavant che quai è necessari per distinguer il material biologic che deriva dad ellas da tal da la persuna inculpada;

c.

da persunas mortas;

d.

da material biologic ch'è relevant per il malfatg.

^1bis Da la persuna inculpada po er vegnir prendida in'emprova e fatg in profil dal DNA, sch'ins sto supponer sin basa d'indizis concrets, ch'ella pudess avair commess ulteriurs crims u delicts.¹²⁸

² La polizia po ordinar che:

a.

emprovas vegnian prendidas da persunas en moda betg invasiva;

b.

in profil dal DNA vegnia fatg or da material biologic ch'è relevant per il malfatg.

³ Sch'il material biologic ch'è relevant per il malfatg permetta da crear mo il profil dal DNA dal cromosom Y, po la procura publica ordinar, per sclerir il crim, che quest profil vegnia cumpareglià en il sistem d'infurmaziun tenor l'artitgel 10 da la Lescha dals 20 da zercladur 2003¹²⁹ davart ils profils dal DNA.¹³⁰

¹ Sin dumonda da la procura publica po la dretgira da mesiras repressivas ordinar, per sclerir in crim, ch'i vegnian prendidas emprovas e ch'i vegnian creads profils dal DNA da persunas cun tschertas caracteristicas ch'èn vegnidas constatadas areguard la commessa dal malfatg. Il circul da las persunas che duain vegnir examinadas, po vegnir reducì anc pli fitg tras ina fenotipisaziun tenor l'artitgel 258b.

² Sche la cumparegliaziun dal profil tenor l'alinea 1 na mussa nagina concordanza, po la dretgira da mesiras repressivas ordinar sin proposta da la procura publica, ch'i vegnia examinà, sco basa per las ulteriuras investigaziuns, sch'igl è avant maun ina relaziun da parentella cun il donatur dals fastizs.

En sia sentenzia po la dretgira ordinar ch'i vegnia prendida in'emprova e fatg in profil dal DNA d'ina persuna ch'è sentenziada pervia d'in crim u d'in delict, sch'ins sto supponer sin basa d'indizis concrets, ch'ella pudess commetter ulteriurs crims u delicts.

Emprovas invasivas vegnan prendidas d'in medi u d'ina autra persuna medicinala spezialisada.

Per sclerir in crim tenor ils artitgels 111-113, 118 alinea 2, 122, 124, 140, 156 cifras 2-4, 182, 184, 185, 187, 189 alineas 1 e 3, 190 alineas 1 e 3, 191, 260^ter u 264-264l CP¹³⁴ po vegnir ordinada ina tschertga da relaziuns da parentella tenor l'artitgel 2a da la Lescha dals 20 da zercladur 2003¹³⁵ davart ils profils dal DNA, sche las mesiras d'examinaziun gia prendidas n'han gì nagin success u sche las investigaziuns fissan uschiglio invanas u vegnissan engrevgiadas sproporziunadamain.

La fenotipisaziun tenor l'artitgel 2b da la Lescha dals 20 da zercladur 2003¹³⁸ davart ils profils dal DNA po vegnir ordinada per sclerir ils crims ch'èn enumerads en ils artitgels 111-113, 118 alinea 2, 122, 124, 140, 156 cifras 2-4, 182, 184, 185, 187, 189 alineas 1 e 3, 190 alineas 1 e 3, 191, 260^ter u 264-264l CP¹³⁹.

Dal rest vegn applitgada la Lescha dals 20 da zercladur 2003¹⁴⁰ davart ils profils dal DNA.

¹ La procura publica po laschar survegliar il traffic da posta e da telecommunicaziun, sche:

a.

igl exista in suspect serius ch'i saja vegnì commess in dals malfatgs ch'èn menziunads en l'alinea 2;

b.

la grevezza dal malfatg giustifitgescha la surveglianza; e

c.

ils acts d'inquisiziun d'enfin ussa n'han gì nagin success u las investigaziuns fissan uschiglio invanas u vegnissan engrevgiadas sproporziunadamain.

² Ina surveglianza dastga vegnir ordinada per persequitar ils malfatgs ch'èn enumerads en ils suandants artitgels:

a.¹⁵⁴

CP¹⁵⁵: artitgels 111-113, 115, 118 alinea 2, 122, 124, 127, 129, 135, 138-140, 143, 144 alinea 3, 144^bis cifra 1 alinea 2 e cifra 2 alinea 2, 146-148, 156, 157 cifra 2, 158 cifra 1 alinea 3 e cifra 2, 160, 163 cifra 1, 180-185^bis, 187, 188, 189-191, 193, 193a, 195-197, 220, 221 alineas 1 e 2, 223 cifra 1, 224 alinea 1, 226-226^ter, 227 cifra 1 alinea 1, 228 cifra 1 alinea 1, 230^bis, 231, 232 cifra 1, 233 cifra 1, 234 alinea 1, 237 cifra 1, 240 alinea 1, 242, 244, 251 cifra 1, 258, 259 alinea 1, 260^bis-260^sexies, 261^bis, 264-267, 271, 272 cifra 2, 273, 274 cifra 1 alinea 2, 285, 301, 303 cifra 1, 305, 305^bis cifra 2, 310, 312, 314, 317 cifra 1, 319, 322^ter, 322^quater e 322^septies;

b.¹⁵⁶

Lescha federala dals 16 da december 2005¹⁵⁷ davart las persunas estras e l'integraziun¹⁵⁸: artitgels 116 alinea 3 e 118 alinea 3;

c.

Lescha federala dals 22 da zercladur 2001¹⁵⁹ tar la Convenziun da Den Haag davart las adopziuns e davart las mesiras per proteger l'uffant en adopziuns internaziunalas: artitgel 24;

d.¹⁶⁰

Lescha federala dals 13 da december 1996¹⁶¹ davart il material da guerra: artitgels 33 alinea 2 e 34-35b;

e.

Lescha federala dals 21 da mars 2003¹⁶² davart l'energia nucleara: artitgels 88 alineas 1 e 2, 89 alineas 1 e 2 e 90 alinea 1;

f.¹⁶³

LN¹⁶⁴: artitgels 19 alinea 2 e 20 alinea 2;

g.

Lescha federala dals 7 d'october 1983¹⁶⁵ davart la protecziun da l'ambient: artitgel 60 alinea 1 literas g-i sco er m ed o;

h.

Lescha dals 13 da december 1996¹⁶⁶ davart la controlla da bains: artitgel 14 alinea 2;

i.¹⁶⁷

Lescha dals 17 da zercladur 2011¹⁶⁸ per promover il sport: artitgels 22 alinea 2 e 25a alinea 3;

j.¹⁶⁹

Lescha da las infrastructuras da finanzas dals 19 da zercladur 2015¹⁷⁰: artitgels 154 e 155;

k.¹⁷¹

Lescha d'armas dals 20 da zercladur 1997¹⁷²: artitgel 33 alinea 3;

l.¹⁷³

Lescha dals 15 da december 2000¹⁷⁴ davart ils products terapeutics: artitgel 86 alineas 2 e 3;

m.¹⁷⁵

Lescha da gieus per daners dals 29 da settember 2017¹⁷⁶: artitgel 130 alinea 2 per ils malfatgs tenor l'artitgel 130 alinea 1 litera a;

n.¹⁷⁷

Lescha federala dals 25 da settember 2015¹⁷⁸ davart il servetsch d'infurmaziun: artitgel 74 alinea 4.

³ Sch'il giudicament d'in malfatg ch'è suttamess a la giurisdicziun militara vegn surdà a la giurisdicziun civila, po la surveglianza dal traffic da posta e da telecommunicaziun er vegnir ordinada per persequitar ils malfatgs che vegnan enumerads en l'artitgel 70 alinea 2 da la Procedura penala militara dals 23 da mars 1979¹⁷⁹.

¹ La procura publica po ordinar l'applicaziun d'apparats tecnics spezials per survegliar il traffic da telecommunicaziun, per tadlar u per registrar discurs ubain per identifitgar u per localisar ina persuna u ina chaussa, sche:

a.

las premissas da l'artitgel 269 èn ademplidas;

b.

las mesiras vertentas per survegliar il traffic da telecommunicaziun tenor l'artitgel 269 èn restadas senza success, u la surveglianza fiss invana u vegniss engrevgiada sproporziunadamain cun questas mesiras;

c.

las permissiuns necessarias tenor il dretg da telecommunicaziun per applitgar quests apparats èn avant maun il mument da l'applicaziun.

² La procura publica maina ina statistica davart questas surveglianzas. Il Cussegl federal regla ils detagls.

¹ La procura publica po ordinar l'introducziun da programs d'informatica spezials en in sistem d'elavuraziun da datas per tschiffar e per transferir il cuntegn da la communicaziun e las metadatas dal traffic da communicaziun en furma nuncodada, sche:

a.

las cundiziuns da l'artitgel 269 alineas 1 e 3 èn ademplidas;

b.

i sa tracta da la persecuziun d'in malfatg numnà en l'artitgel 286 alinea 2;

c.

las mesiras vertentas per survegliar il traffic da telecommunicaziun tenor l'artitgel 269 èn restadas senza success, u la surveglianza fiss invana u vegniss engrevgiada sproporziunadamain cun questas mesiras.

² En l'ordinaziun da la surveglianza designescha la procura publica:

a.

ils tips da datas giavischadas; e

b.

las localitads betg publicas, en las qualas igl è eventualmain necessari d'entrar per introducir programs d'informatica spezials en il sistem d'elavuraziun da datas respectiv.

³ Sch'i vegnan rimnadas - tras l'applicaziun da tals programs d'informatica - datas betg menziunadas en l'alinea 1, ston questas datas vegnir destruidas immediatamain. Enconuschientschas obtegnidas tras talas datas na dastgan betg vegnir utilisadas.

⁴ La procura publica maina ina statistica davart questas surveglianzas. Il Cussegl federal regla ils detagls.

¹ I dastgan vegnir applitgads mo programs d'informatica spezials che protocolleschan la surveglianza en moda cumpletta e nunmidabla. Il protocol tutga tar las actas da procedura.

² Las datas dal sistem d'elavuraziun da datas surveglià vegnan transferidas en moda protegida fin tar l'autoritad da persecuziun penala responsabla.

³ L'autoritad da persecuziun penala procura ch'il code da funtauna possia vegnir examinà per pudair verifitgar ch'il program disponia mo da las funcziuns admessas tras lescha.

I dastgan vegnir survegliads il traffic da posta e da telecommunicaziun da las suandantas persunas:¹⁸³

a.

da la persuna inculpada;

b.

da terzas persunas, sch'i sto vegnir supponì sin basa da tscherts fatgs che:

1.¹⁸⁴

la persuna inculpada sa servia da l'adressa postala u dal servetsch da telecommunicaziun da la terza persuna, u

2.

la terza persuna prendia en consegna tschertas communicaziuns per la persuna inculpada u transmettia ad in'ulteriura persuna communicaziuns che derivan da tala.

¹ Sch'ina persuna che appartegna ad ina gruppa professiunala che vegn menziunada en ils artitgels 170-173 vegn survegliada, ston infurmaziuns che na stattan betg en connex cun l'object da las investigaziuns e cun il motiv, per il qual questa persuna vegn survegliada, vegnir zavradas sut la direcziun d'ina dretgira. En quest connex na dastga l'autoritad da persecuziun penala betg survegnir enconuschientscha da secrets professiunals. Las datas zavradas ston vegnir destruidas immediatamain; ellas na dastgan betg vegnir evaluadas.

² Infurmaziuns tenor l'alinea 1 na ston betg vegnir zavradas ordavant, sche:

a.

igl exista in suspect serius ch'il titular dal secret professiunal haja sez commess in malfatg; e

b.

motivs spezials pretendan quai.

³ Sche autras persunas vegnan survegliadas, ston infurmaziuns davart la communicaziun cun ina persuna menziunada en ils artitgels 170-173 vegnir zavradas tenor l'alinea 1, uschespert ch'igl è cler che quellas communitgeschan cun questa persuna. Infurmaziuns, davart las qualas ina persuna menziunada en ils artitgels 170-173 po refusar da dar perditga, ston vegnir zavradas da las actas da procedura e destruidas immediatamain; ellas na dastgan betg vegnir evaluadas.

¹ La surveglianza dal traffic da posta e da telecommunicaziun sto vegnir approvada da la dretgira da mesiras repressivas.

² Sch'i resulta da las investigaziuns che la persuna da survegliar mida en intervals svelts il servetsch da telecommunicaziun, po la dretgira da mesiras repressivas permetter excepziunalmain la surveglianza da tut ils servetschs identifitgads, sur ils quals la persuna da survegliar liquidescha sia telecommunicaziun, senza ch'i stoppia vegnir dada in'approvaziun per mintga singul cas (permissiun generala).¹⁸⁶ La procura publica suttametta a la dretgira da mesiras repressivas in rapport per l'approvaziun, e quai mintga mais e suenter ch'ina surveglianza è terminada.

³ Sche la surveglianza d'in servetsch en il rom d'ina permissiun generala pretenda ch'i vegnian prendidas mesiras per proteger secrets professiunals e sche questas mesiras n'èn betg cuntegnidas en la permissiun generala, sto questa surveglianza particulara vegnir suttamessa a la dretgira da mesiras repressivas per l'approvaziun.¹⁸⁷

¹ Sch'igl exista in suspect urgent ch'in crim, in delict u in surpassament saja vegnì commess e sche las premissas tenor l'artitgel 269 alinea 1 literas b e c èn ademplidas, po la procura publica pretender:¹⁸⁹

a.

las metadatas dal traffic da telecommunicaziun tenor l'artitgel 8 litera b da la Lescha federala dals 18 da mars 2016¹⁹⁰ davart la surveglianza da la correspundenza postala e dal traffic da telecommunicaziun (LSPT) da la persuna inculpada, d'ina terza persuna tenor l'artitgel 270 litera b da questa lescha u d'ina persuna donnegiada;

b.

las metadatas dal traffic postal tenor l'artitgel 19 alinea 1 litera b LSPT da la persuna inculpada u d'ina terza persuna tenor l'artitgel 270 litera b da questa lescha.¹⁹¹

² L'ordinaziun sto vegnir approvada da la dretgira da mesiras repressivas.

³ Infurmaziuns tenor l'alinea 1 pon vegnir pretendidas independentamain da la durada da la surveglianza e retroactivamain fin a 6 mais.

¹ La procura publica inoltrescha ils suandants documents a la dretgira da mesiras repressivas entaifer 24 uras dapi che la surveglianza è vegnida ordinada u dapi che infurmaziuns èn vegnidas pretendidas:

a.

l'ordinaziun;

b.

la motivaziun e las actas da procedura ch'èn impurtantas per dar l'approvaziun.

² Cun ina curta motivaziun decida la dretgira da mesiras repressivas entaifer 5 dis dapi che la surveglianza è vegnida ordinada u dapi che infurmaziuns èn vegnidas pretendidas. Ella po conceder l'approvaziun provisoricamain u cun cundiziuns u pretender ina cumplettaziun da las actas u ulteriurs scleriments.

³ La dretgira da mesiras repressivas communitgescha immediatamain sia decisiun a la procura publica sco er al servetsch da surveglianza dal traffic da posta e da telecommunicaziun tenor l'artitgel 3 LSPT¹⁹².¹⁹³

⁴ L'approvaziun inditgescha explicitamain:

a.

tge mesiras che ston vegnir prendidas per proteger secrets professiunals;

b.

sch'igl è permess d'entrar en localitads betg publicas per introducir programs d'informatica spezials en il sistem d'elavuraziun da datas respectiv cun l'intent da survegliar il traffic da telecommunicaziun.¹⁹⁴

⁵ La dretgira da mesiras repressivas conceda l'approvaziun per maximalmain 3 mais. L'approvaziun po vegnir prolungada ina u pliras giadas, mintgamai maximalmain per 3 mais. Sch'ina prolungaziun è necessaria, fa la procura publica ina dumonda da prolungaziun motivada avant che la durada permessa è scadida.

¹ La procura publica terminescha immediatamain la surveglianza, sche:

a.

las premissas n'èn betg pli ademplidas; u

b.

l'approvaziun u la prolungaziun vegn refusada.

² En cas da l'alinea 1 litera a communitgescha la procura publica a la dretgira da mesiras repressivas che la surveglianza saja terminada.

¹ Las registraziuns che derivan da surveglianzas permessas e che n'èn betg necessarias per la procedura penala vegnan conservadas en moda separada da las actas da procedura e vegnan destruidas immediatamain suenter che la procedura è terminada.

² Spediziuns postalas dastgan vegnir messas en segirezza uschè ditg sco che quai è necessari per la procedura penala; ellas ston vegnir restituidas als adressats, uschespert ch'il stadi da la procedura permetta quai.

¹ Documents e purtaders da datas che derivan da surveglianzas betg approvadas ston vegnir destruids immediatamain. Spediziuns postalas ston vegnir restituidas immediatamain als adressats.

² Enconuschientschas ch'èn vegnidas gudagnadas tras la surveglianza na dastgan betg vegnir duvradas.

¹ Sche la surveglianza maina a la glisch auters malfatgs che quels che vegnan enumerads en l'ordinaziun da surveglianza, dastgan las enconuschientschas vegnir duvradas cunter la persuna inculpada, sch'ina surveglianza avess dastgà vegnir ordinada per persequitar quests malfatgs.

^1bis Sch'i vegnan scuvrids malfatgs en il rom d'ina surveglianza tenor ils artitgels 35 e 36 LSPT¹⁹⁵, dastgan questas enconuschientschas vegnir duvradas sut las premissas dals alineas 2 e 3.¹⁹⁶

² Enconuschientschas da malfatgs d'ina persuna che na vegn betg suspectada en l'ordinaziun da surveglianza d'avair commess malfatgs pon vegnir duvradas, sche las premissas per survegliar questa persuna èn ademplidas.

³ En cas tenor ils alineas 1, 1^bis e 2 ordinescha la procura publica immediatamain la surveglianza ed iniziescha la procedura d'approvaziun.¹⁹⁷

⁴ Registraziuns che na dastgan betg vegnir duvradas sco chats casuals ston vegnir conservads en moda separada da las actas da procedura e ston vegnir destruidas suenter che la procedura è terminada.

⁵ Per tschertgar ina persuna dastgan vegnir duvradas tut las enconuschientschas d'ina surveglianza.

¹ Il pli tard a la terminaziun da la procedura preliminara communitgescha la procura publica a la persuna inculpada survegliada ed a terzas persunas ch'èn vegnidas survegliadas tenor l'artitgel 270 litera b il motiv, il gener e la durada da la surveglianza.

² Cun il consentiment da la dretgira da mesiras repressivas po questa communicaziun vegnir suspendida u tralaschada, sche:

a.

las enconuschientschas na vegnan betg duvradas per motivs da cumprova; e

b.

la suspensiun u la tralaschada è necessaria per proteger interess publics u privats predominants.

³ Persunas, da las qualas il traffic da posta u da telecommunicaziun è vegnì surveglià u las qualas han cunduvrà l'adressa postala survegliada u il servetsch da telecommunicaziun surveglià, pon far recurs tenor ils artitgels 393-397.¹⁹⁸ Il termin da recurs cumenza a currer il mument che la communicaziun è vegnida retschavida.

La procura publica po far diever d'apparats da surveglianza tecnics per:

a.

tadlar u registrar il pled che na vegn betg discurrì publicamain;

b.

observar u registrar andaments a lieus betg publics u a lieus che n'èn betg generalmain accessibels;

c.

constatar il lieu da persunas u da chaussas.

¹ L'applicaziun dastga vegnir ordinada mo envers la persuna inculpada.

² Localitads u vehichels da terzas persunas dastgan vegnir survegliads mo, sch'i sto vegnir supponì sin basa da tscherts fatgs che la persuna inculpada sa trategnia en questas localitads u dovria quest vehichel.

³ L'applicaziun na dastga betg vegnir ordinada per:

a.

registrar - per motivs da cumprova - andaments, vi dals quals è participada ina persuna inculpada ch'expiescha in chasti da detenziun;

b.

survegliar localitads u vehichels d'ina terza persuna che appartegna ad ina da las gruppas professiunalas che vegnan menziunadas en ils artitgels 170-173.

⁴ Dal rest sa drizza l'applicaziun d'apparats da surveglianza tecnics tenor ils artitgels 269-279.

¹ La procura publica ed, en la procedura d'investigaziun, la polizia pon observar secretamain persunas e chaussas a lieus ch'èn generalmain accessibels e far latiers registraziuns sonoras e visualas, sche:

a.

i sto vegnir supponì sin basa d'indizis concrets che crims u delicts sajan vegnids commess; e

b.

las investigaziuns fissan uschiglio invanas u vegnissan engrevgiadas en moda sproporziunada.

² Sch'ina observaziun ch'è vegnida ordinada da la polizia ha durà 1 mais, sto sia cuntinuaziun vegnir approvada da la procura publica.

¹ Il pli tard a la terminaziun da la procedura preliminara communitgescha la procura publica a las persunas ch'èn stadas pertutgadas directamain d'ina observaziun il motiv, il gener e la durada da l'observaziun.

² Questa communicaziun vegn suspendida u tralaschada, sche:

a.

las enconuschientschas na vegnan betg duvradas per motivs da cumprova; e

b.

la suspensiun u la tralaschada è necessaria per proteger interess publics u privats predominants.

Per sclerir crims u delicts po la dretgira da mesiras repressivas ordinar - sin dumonda da la procura publica - la surveglianza da relaziuns tranter ina persuna inculpada ed ina banca ubain in institut sumegliant.

¹ Sche la dretgira da mesiras repressivas approvescha questa dumonda, dat ella en scrit directivas a la banca u a l'institut sumegliant:

a.

tge infurmaziuns e tge documents che ston vegnir furnids;

b.

tge mesiras per tegnair secret questa surveglianza che ston vegnir prendidas.

² La banca u l'institut sumegliant na sto furnir naginas infurmaziuns u nagins documents, sch'ella engrevgiass sasezza talmain cun furnir questas infurmaziuns u quests documents:

a.

ch'ella pudess vegnir fatga responsabla tenor il dretg penal; u

b.

ch'ella pudess vegnir fatga responsabla tenor il dretg civil, e sche l'interess da protecziun predominescha l'interess da la persecuziun penala.

³ Las persunas che han il dretg da disponer dal conto vegnan infurmadas posteriuramain - a norma da l'artitgel 279 alineas 1 e 2 - davart la surveglianza.

⁴ Persunas, da las qualas il traffic cun la banca è vegnì surveglià, pon far recurs tenor ils artitgels 393-397. Il termin da recurs cumenza a currer il mument che la communicaziun è vegnida retschavida.

Ina investigaziun secreta è dada, sche appartegnents da la polizia u persunas ch'èn engaschadas temporarmain per ademplir incumbensas da la polizia nuan contacts cun persunas cun agid d'ina faussa identitad ch'è attestada tras documents (identitad fictiva) e cun agid d'in cumportament engianant, cun la finamira da stabilir ina relaziun da confidenza e d'entrar en in ambient criminal per sclerir malfatgs spezialmain grevs.

¹ La procura publica po ordinar ina investigaziun secreta, sche:

a.

igl exista in suspect ch'i saja vegnì commess in dals malfatgs ch'èn menziunads en l'alinea 2;

b.

la grevezza dal malfatg giustifitgescha l'investigaziun secreta; e

c.

ils acts d'inquisiziun d'enfin ussa n'han gì nagin success u las investigaziuns fissan uschiglio invanas u vegnissan engrevgiadas sproporziunadamain.

² L'investigaziun secreta po vegnir applitgada per persequitar ils malfatgs ch'èn enumerads en ils suandants artitgels:

a.²⁰¹

CP²⁰²: artitgels 111-113, 122, 124, 129, 135, 138-140, 143 alinea 1, 144 alinea 3, 144^bis cifra 1 alinea 2 e cifra 2 alinea 2, 146 alineas 1 e 2, 147 alineas 1 e 2, 148, 156, 160, 182-185^bis, 187, 188, 189-191, 193, 193a, 195, 196, 197 alineas 3-5, 221 alineas 1 e 2, 223 cifra 1, 224 alinea 1, 226^bis, 226^ter, 227 cifra 1 alinea 1, 228 cifra 1 alinea 1, 230^bis, 231, 232 cifra 1, 233 cifra 1, 234 alinea 1, 237 cifra 1, 240 alinea 1, 242, 244 alinea 2, 251 cifra 1, 260^bis-260^sexies, 264-267, 271, 272 cifra 2, 273, 274 cifra 1 alinea 2, 301, 305^bis cifra 2, 310, 322^ter, 322^quater e 322^septies;

b.²⁰³

Lescha federala dals 16 da december 2005²⁰⁴ davart las persunas estras e l'integraziun: artitgels 116 alinea 3 e 118 alinea 3;

c.

Lescha federala dals 22 da zercladur 2001²⁰⁵ tar la Convenziun da Den Haag davart las adopziuns e davart las mesiras per proteger l'uffant en adopziuns internaziunalas: artitgel 24

d.²⁰⁶

Lescha federala dals 13 da december 1996²⁰⁷ davart il material da guerra: artitgels 33 alinea 2 e 34-35b;

e.

Lescha federala dals 21 da mars 2003²⁰⁸ davart l'energia nucleara: artitgels 88 alineas 1 e 2, 89 alineas 1 e 2 e 90 alinea 1;

f.²⁰⁹

LN²¹⁰: artitgels 19 alinea 2 e 20 alinea 2;

g.

Lescha dals 13 da december 1996²¹¹ davart la controlla da bains: artitgel 14 alinea 2;

h.²¹²

Lescha dals 17 da zercladur 2011²¹³ per promover il sport: artitgels 22 alinea 2 e 25a alinea 3;

i.²¹⁴

Lescha d'armas dals 20 da zercladur 1997²¹⁵: artitgel 33 alinea 3;

j.²¹⁶

Lescha dals 15 da december 2000²¹⁷ davart ils products terapeutics: artitgel 86 alineas 2 e 3;

k.²¹⁸

Lescha da gieus per daners dals 29 da settember 2017²¹⁹: artitgel 130 alinea 2 per ils malfatgs tenor l'artitgel 130 alinea 1 litera a;

l.²²⁰

Lescha federala dals 25 da settember 2015²²¹ davart il servetsch d'infurmaziun: artitgel 74 alinea 4.

³ Sch'il giudicament d'in malfatg ch'è suttamess a la giurisdicziun militara vegn surdà a la giurisdicziun civila, po l'investigaziun secreta er vegnir ordinada per persequitar ils malfatgs che vegnan enumerads en l'artitgel 70 alinea 2 da la Procedura penala militara dals 23 da mars 1979²²².

¹ Sco investigaturs secrets pon vegnir incaricads:

a.

appartegnents d'in corp da polizia svizzer u ester;

b.

persunas che vegnan engaschadas temporarmain per incumbensas polizialas, er sch'ellas na disponan betg d'ina scolaziun poliziala.

² Sco persunas directivas dastgan vegnir incaricadas mo appartegnents d'in corp da polizia.

³ Sche appartegnents d'in corp da polizia ester vegnan incaricads, vegnan els per regla manads da lur persuna directiva vertenta.

¹ Ad investigaturs secrets dat la polizia ina identitad fictiva.²²³

² La procura publica po garantir ad investigaturs secrets che lur vaira identitad na vegnia er alura betg tradida, sch'els cumparan en ina procedura giudiziala sco infurmaturs u sco perditgas.²²⁴

³ Sche investigaturs secrets commettan in malfatg durant lur incarica, decida la dretgira da mesiras repressivas, sut tge identitad che la procedura penala vegn manada.

¹ L'incarica d'in investigatur secret sto vegnir approvada da la dretgira da mesiras repressivas.

² La procura publica inoltrescha ils suandants documents a la dretgira da mesiras repressivas entaifer 24 uras dapi che l'investigaziun secreta è vegnida pretendida:

a.

l'ordinaziun;

b.

la motivaziun e las actas da procedura ch'èn necessarias per dar l'approvaziun.

³ Cun ina curta motivaziun decida la dretgira da mesiras repressivas entaifer 5 dis dapi che l'investigaziun secreta è vegnida pretendida. Ella po conceder l'approvaziun provisoricamain u cun cundiziuns u pretender ina cumplettaziun da las actas u ulteriurs scleriments.

⁴ L'approvaziun inditgescha explicitamain, sch'igl è permess:

a.

da far u da midar documents per crear u per mantegnair ina identitad fictiva;

b.

da garantir l'anonimitad;

c.

d'incaricar persunas che na disponan betg d'ina scolaziun poliziala.

⁵ L'approvaziun vegn concedida per maximalmain 12 mais. Ella po vegnir prolungada ina u pliras giadas, mintgamai maximalmain per 6 mais. Sch'ina prolungaziun è necessaria, fa la procura publica ina dumonda da prolungaziun motivada avant che la durada permessa è scadida.

⁶ Sch'ina approvaziun na vegn concedida u sche l'approvaziun n'è betg vegnida dumandada, terminescha la procura publica immediatamain l'incarica. Tut las registraziuns ston vegnir destruidas immediatamain. Enconuschientschas ch'èn vegnidas gudagnadas tras l'investigaziun secreta na dastgan betg vegnir duvradas.

La procura publica instruescha la persuna directiva sco er l'investigatur secret avant il cumenzament da l'intervenziun.

¹ Durant sia intervenziun è l'investigatur secret suttamess directamain a la cumpetenza da la persuna directiva da decretar directivas. Durant l'intervenziun vegn il contact tranter la procura publica e l'investigatur secret stabilì sulettamain sur la persuna directiva.

² La persuna directiva ha en spezial las suandantas incumbensas:

a.

ella instruescha detagliadamain e permanentamain l'investigatur secret davart l'incumbensa e davart las cumpetenzas sco er davart la moda e maniera co ch'el duai ir enturn cun sia identitad fictiva;

b.

ella maina ed assista l'investigatur secret e giuditgescha permanentamain ils ristgs da la situaziun;

c.

ella fixescha en scrit ils rapports a bucca da l'investigatur secret e maina in dossier cumplet da l'intervenziun;

d.

ella infurmescha permanentamain e cumplettamain la procura publica davart l'intervenziun.

¹ Investigaturs secrets exequeschan lur intervenziun en il rom da las instrucziuns confurm a l'obligaziun.

² Els rapporteschan permanentamain e cumplettamain a la persuna directiva davart lur activitad e davart lur constataziuns.

¹ Ils investigaturs secrets na dastgan betg encuraschar ina terza persuna da commetter in malfatg u incitar ella da commetter in malfatg pli grev. Lur intervenziun duai sa restrenscher a la concretisaziun d'ina decisiun existenta da commetter in malfatg.

² Lur activitad dastga esser mo d'ina impurtanza subordinada per la decisiun da commetter in malfatg concret.

³ Sche quai è necessari per instradar la fatschenta principala, dastgan els far acquists d'emprova u documentar lur capacitad economica.

⁴ Sch'in investigatur secret surpassa ils limits da l'intervenziun admissibla, sto quai vegnir resguardà commensuradamain cun fixar la dimensiun dal chasti, u igl è da desister da dar in chasti.

Uschenavant che investigaturs secrets ageschan en il rom d'ina investigaziun secreta approvada, n'èn els betg chastiabels tenor las suandantas disposiziuns:

a.

en il rom da la persecuziun da pornografia cun persunas minorennas u d'acts sexuals cun persunas minorennas: tenor l'artitgel 197 alineas 4 e 5 CP²²⁶, uschenavant ch'ils objects u las preschentaziuns na cuntegnan betg acts sexuals reals cun persunas minorennas;

b.

en il rom da la persecuziun da delicts cunter la LN²²⁷: tenor ils artitgels 19 e 20-22 LN.

¹ Sin dumonda da la procura publica po la Confederaziun metter a disposiziun sur la Banca naziunala ils imports en daners ch'èn necessaris per far ina fatschenta fictiva e per documentar la capacitad economica, e quai en la quantitad necessaria ed en la moda giavischada.

² La dumonda sto vegnir drizzada a l'Uffizi federal da polizia e sto cuntegnair ina curta preschentaziun dals fatgs.

³ La procura publica prenda las mesiras ch'èn necessarias per proteger ils daners ch'èn vegnids mess a disposiziun. Sch'els van a perder, stat buna la Confederaziun u il chantun, al qual appartegna la procura publica.

¹ Resultats d'ina investigaziun secreta che mainan a la glisch auters malfatgs che quels che vegnan enumerads en l'ordinaziun da l'investigaziun secreta dastgan vegnir duvrads, sch'ina investigaziun secreta avess dastgà vegnir ordinada per persequitar ils malfatgs ch'èn vegnids chattads da nov.

² La procura publica ordinescha immediatamain l'investigaziun secreta ed iniziescha la procedura d'approvaziun.

¹ La procura publica terminescha immediatamain l'intervenziun, sche:

a.

las premissas n'èn betg pli ademplidas;

b.

l'approvaziun u la prolungaziun vegn refusada; u

c.

l'investigatur secret u la persuna directiva n'observa betg las instrucziuns u n'ademplescha betg sias obligaziuns en autra moda, en spezial cun dar intenziunadamain infurmaziuns faussas a la procura publica.

² En ils cas tenor l'alinea 1 literas a e c communitgescha ella la terminaziun da l'intervenziun a la dretgira da mesiras repressivas.

³ Terminond l'intervenziun stoi vegnir dà attenziun che ni l'investigatur secret ni terzas persunas ch'èn vegnidas involvidas en l'investigaziun vegnian exposts a privels evitabels.

¹ Il pli tard a la terminaziun da la procedura preliminara communitgescha la procura publica a la persuna inculpada ch'igl haja dà ina investigaziun secreta cunter ella.

² Cun il consentiment da la dretgira da mesiras repressivas po questa communicaziun vegnir suspendida u tralaschada, sche:

a.

las enconuschientschas na vegnan betg duvradas per motivs da cumprova; e

b.

la suspensiun u la tralaschada è necessaria per proteger interess publics u privats predominants.

³ Persunas, cunter las qualas igl è vegnida fatga ina investigaziun secreta, pon far recurs tenor ils artitgels 393-397. Il termin da recurs cumenza a currer il mument che la communicaziun è vegnida retschavida.

¹ Ina retschertga secreta è dada, sche appartegnents da la polizia emprovan da sclerir crims e delicts en il rom da curtas acziuns, uschia che lur vaira identitad e funcziun n'èn betg visiblas, e sch'els fan en quest connex en spezial fatschentas fictivas u dattan da crair da vulair far talas fatschentas.

² Retschertgaders secrets na survegnan betg ina identitad fictiva en il senn da l'artitgel 285a. Lur vaira identitad e funcziun vegnan rendidas enconuschentas en las actas da procedura ed a chaschun d'interrogaziuns.

¹ La procura publica ed - en proceduras d'investigaziun - la polizia pon ordinar ina retschertga secreta, sche:

a.

igl exista in suspect ch'in crim u in delict saja vegnì commess; e

b.

las acziuns da retschertga e d'investigaziun d'enfin ussa n'han gì nagin success u sche las retschertgas fissan uschiglio invanas u vegnissan engrevgiadas sproporziunadamain.

² Sch'ina retschertga secreta ch'è vegnida ordinada da la polizia ha durà 1 mais, dovri l'approvaziun da la procura publica per pudair cuntinuar cun la retschertga secreta.

¹ Per las pretensiuns envers las persunas incaricadas vala l'artitgel 287 tenor il senn. L'engaschament da persunas tenor l'artitgel 287 alinea 1 litera b è exclus.

² Per la posiziun, per las incumbensas e per las obligaziuns dals retschertgaders secrets e da las persunas directivas valan ils artitgels 291-294 tenor il senn.

¹ La polizia u la procura publica che ha ordinà la retschertga secreta terminescha immediatamain quella, sche:

a.

las premissas n'èn betg pli ademplidas;

b.

la procura publica refusescha l'approvaziun da la cuntinuaziun da la retschertga secreta en cas che quella era vegnida ordinada da la polizia; u

c.

il retschertgader secret u la persuna directiva n'observa betg las instrucziuns u n'ademplescha betg sias obligaziuns en autra moda, en spezial cun dar intenziunadamain infurmaziuns faussas a la procura publica u cun empruvar d'influenzar en moda inadmissibla la persuna en mira.

² La polizia communitgescha a la procura publica che la retschertga secreta saja finida.

³ Cun finir la retschertga secreta stoi vegnir guardà ch'il retschertgader secret na vegnia betg exponì ad in privel evitabel.

⁴ Per la communicaziun da la retschertga secreta vala l'artitgel 298 alineas 1 e 3 tenor il senn.

¹ En l'inquisiziun sclerescha la procura publica realmain e legalmain ils fatgs uschenavant, ch'ella po terminar la procura preliminara.

² Sch'ins sto far quint cun in'accusaziun u cun il decret d'in mandat penal, sclerescha ella las relaziuns persunalas da la persuna inculpada.

³ Sche la persuna inculpada duai vegnir accusada, ha l'inquisiziun da furnir a la dretgira la basa essenziala per giuditgar la culpa e per fixar il chasti.

¹ La procura publica avra ina inquisiziun, sche:

a.

i resulta in suspect suffizient tras las infurmaziuns e tras ils rapports da la polizia, tras la denunzia penala u tras sias atgnas constataziuns;

b.

ella ordinescha mesiras repressivas;

c.

ella è vegnida infurmada da la polizia en il senn da l'artitgel 307 alinea 1.

² Rapports da la polizia e denunzias penalas, dals quals i na resorta betg cleramain il suspect concernent la commessa dal malfatg po ella returnar a la polizia per far investigaziuns cumplementaras.

³ Ella avra l'inquisiziun en ina disposiziun; en quella numna ella la persuna inculpada ed il malfatg che vegn incriminà a la persuna inculpada. La disposiziun na sto betg vegnir motivada e communitgada. Ella na po betg vegnir contestada.

⁴ La procura publica renunzia a l'avertura, sch'ella decretescha immediatamain ina disposiziun da betg avrir l'inquisiziun penala ubain in mandat penal.

¹ La procura publica decretescha ina disposiziun da betg avrir l'inquisiziun penala, uschespert ch'igl è cler sin basa da la denunzia penala u dal rapport da la polizia che:

a.

ils causals penals en dumonda u las premissas da process n'èn evidentamain betg ademplids;

b.

i èn avant maun impediments da la procedura;

c.

i sto vegnir renunzià ad ina persecuziun penala per ils motivs ch'èn numnads en l'artitgel 8.

² Dal rest sa drizza la procedura tenor las disposiziuns davart la sistida d'ina procedura.

¹ Ils procuraturs publics fan sezs la registraziun da las cumprovas. La Confederaziun ed ils chantuns decidan, en tge dimensiun ch'els pon transferir singuls acts d'inquisiziun a lur collavuraturs.

² La procura publica po extender l'inquisiziun sin ulteriuras persunas u sin ulteriurs malfatgs. L'artitgel 309 alinea 3 è applitgabel.

¹ La procura publica po incumbensar la polizia da far investigaziuns cumplementaras, er suenter che la procedura è vegnida averta. Per quai la dat ella directivas en scrit, en cas urgents a bucca, che sa restrenschan a scleriments circumscrits concretamain.

² En cas d'interrogaziuns che la polizia fa per incumbensa da la procura publica han las persunas ch'èn participadas a la procedura ils medems dretgs processuals, sco cur ch'ellas vegnan interrogadas da la procura publica.

¹ La procura publica registrescha las cumprovas ch'èn necessarias per giuditgar il plant civil, nun che la procedura vegnia extendida u retardada tras quai en moda essenziala.

² La registraziun da las cumprovas che servan en emprima lingia a far valair il plant civil po ella colliar cun la cundiziun ch'ils accusaders privats prestian in pajament anticipà dals custs.

¹ La procura publica po suspender ina inquisiziun, en spezial, sche:

a.

il delinquent u sia dimora n'è betg enconuschent u igl existan auters impediments temporars da la procedura;

b.

il resultat da la procedura penala dependa d'ina autra procedura ed i para dad esser inditgà da spetgar sin il resultat da tala;

c.

ina procedura d'enclegientscha è pendenta ed i para dad esser inditgà da spetgar sin il resultat da tala;

d.

ina decisiun en chaussa dependa da l'ulteriur svilup da las consequenzas dal malfatg.

² En cas da l'alinea 1 litera c è la suspensiun limitada a 3 mais; ella po vegnir prolungada ina giada per 3 mais.

³ Avant la suspensiun registrescha la procura publica las cumprovas ch'èn periclitadas d'ir a perder. Sch'il delinquent u sche sia dimora n'è betg enconuschent, iniziescha ella sia tschertga.

⁴ La procura publica communitgescha la suspensiun a la persuna inculpada, a l'accusader privat sco er a la victima.

⁵ Dal rest sa drizza la procedura tenor las disposiziuns davart la sistida d'ina procedura.

¹ La procura publica prenda d'uffizi puspè per mauns ina inquisiziun suspendida, sch'il motiv da la suspensiun è crudà davent.

² La represa n'è betg contestabla.

¹ Uschenavant che delicts, che vegnan persequitads sin plant, èn l'object da la procedura, po la procura publica citar la persuna petenta e la persuna inculpada ad ina tractativa cun la finamira da cuntanscher in'enclegientscha. Sche la persuna petenta na cumpara betg, vala il plant penal sco retratg.

² Sch'i vegn en dumonda ina liberaziun dal chasti pervia da reparaziun tenor l'artitgel 53 CP²³⁵, envida la procura publica la persuna donnegiada e la persuna inculpada ad ina tractativa cun l'intent da cuntanscher ina reparaziun.

³ Sch'i vegn cuntanschida ina reconciliaziun, sto quella vegnir fixada en il protocol e suttascritta dals participants. Alura sistescha la procura publica la procedura.

⁴ Sche la persuna inculpada na cumpara betg ad ina tractativa tenor l'alinea 1 u 2 u sch'i na vegn betg cuntanschida ina reconciliaziun, prenda la procura publica immediatamain per mauns l'inquisiziun. En cas motivads po ella obligar la persuna petenta da prestar entaifer 10 dis ina cauziun per ils custs e per las indemnisaziuns.

En proceduras preliminaras voluminusas e cumplitgadas interroghescha la procura publica la persuna inculpada - avant che terminar l'inquisiziun - anc ina giada en ina interrogaziun finala e la dat la pussaivladad da prender posiziun davart ils resultats.

¹ Sche la procura publica resguarda l'inquisiziun sco cumpletta, decretescha ella in mandat penal u annunzia la terminaziun previsa en scrit a las partidas che han in domicil enconuschent e las communitgescha, sch'ella vul far l'accusaziun u sch'ella vul sistir la procedura. Il medem mument fixescha ella in termin per las partidas per far propostas da cumprova.

^1bis A las persunas donnegiadas cun domicil enconuschent, che n'èn anc betg vegnidas infurmadas davart lur dretgs, communitgescha la procura publica en scrit, ch'ella veglia decretar in mandat penal, far in'accusaziun u terminar la procedura tras ina sistida; la procura publica dat ad ellas in termin per sa constituir sco accusaders privats e per preschentar propostas da cumprova.²³⁶

² Propostas da cumprova po ella refusar mo, sch'i vegn pretendì tras talas da registrar las cumprovas davart fatgs ch'èn irrelevants, evidents, enconuschents a l'autoritad penala u gia cumprovads en moda giuridicamain suffizienta. La decisiun vegn decretada en scrit e sto vegnir motivada curtamain. Propostas da cumprova refusadas pon vegnir inoltradas danovamain en la procedura principala.

³ Communicaziuns tenor ils alineas 1 ed 1^bis sco er decisiuns tenor l'alinea 2 n'èn betg contestablas.²³⁷

¹ La procura publica dispona la sistida cumpletta u parziala da la procedura, sche:

a.

nagin suspect che giustifitgescha in'accusaziun n'è confermà;

b.

nagin causal penal n'è ademplì;

c.

motivs da giustificaziun fan ch'in causal penal n'è betg applitgabel;

d.

premissas da process na pon definitivamain betg vegnir ademplidas u impediments en il process èn resultads;

e.

i po - tenor la prescripziun legala - vegnir renunzià ad ina persecuziun penala u ad in chasti.

² Ella po sistir la procedura excepziunalmain er, sche:

a.

l'interess d'ina victima che aveva main che 18 onns il mument, ch'il malfatg è vegnì commess, pretenda quai stringentamain e quest interess predominescha evidentamain l'interess dal stadi vi d'ina persecuziun penala; e

b.

la victima u - en cas ch'ella n'è betg abla da giuditgar - sia represchentanza legala approvescha la sistida.

¹ La furma ed il cuntegn general da la disposiziun da sistida sa drizzan tenor ils artitgels 80 ed 81.

² En la disposiziun da sistida abolescha la procura publica mesiras repressivas existentas. Ella po ordinar la sequestraziun d'objects e da valurs da facultad.

³ En la disposiziun da sistida na vegnan tractads nagins plants civils. La via civila è averta a l'accusader privat a partir dal mument che la disposiziun da sistida è entrada en vigur.

⁴ Ina disposiziun da sistida cun vigur legala correspunda ad ina decisiun finala d'acquittament.

¹ La procura publica communitgescha la disposiziun da sistida:

a.

a las partidas;

b.

a la victima;

c.

a las autras persunas ch'èn participadas a la procedura e ch'èn pertutgadas da la disposiziun;

d.

eventualmain ad autras autoritads che vegnan designadas dals chantuns, sch'ellas han il dretg da far recurs.

² Resalvada resta la renunzia explicita d'ina persuna ch'è participada a la procedura.

³ Dal rest èn applitgabels ils artitgels 84-88 confurm al senn.

¹ La Confederaziun ed ils chantuns pon fixar che la disposiziun da sistida stoppia vegnir approvada da la procura publica superiura u da la procura publica generala.

² Las partidas pon contestar la disposiziun da sistida entaifer 10 dis davant l'instanza da recurs.

³ Cunter ina decisiun da confiscaziun che vegn decretada en il rom da la disposiziun da sistida, poi vegnir fatg protesta. La procedura da protesta sa drizza tenor las disposiziuns davart il mandat penal. In'eventuala decisiun da la dretgira vegn decretada en furma d'in conclus u d'ina disposiziun.²³⁸

¹ La procura publica dispona la reavertura d'ina procedura ch'è vegnida terminada en moda legalmain valaivla tras ina disposiziun da sistida, sch'ella survegn enconuschientscha da meds da cumprova u da fatgs novs che:

a.

pledan per ina responsabladad penala da la persuna inculpada; e

b.

na resultan betg da las actas da la procedura terminada.

² Ella communitgescha la reavertura a quellas persunas ed a quellas autoritads, a las qualas ella aveva gia communitgà la sistida.

¹ La procura publica fa l'accusaziun davant la dretgira cumpetenta, sch'ella resguarda - sin basa da l'inquisiziun - ils motivs da suspect sco suffizients e sch'ella na po betg decretar in mandat penal.

² L'accusaziun n'è betg contestabla.

¹ L'acta d'accusaziun numna:

a.

il lieu e la data;

b.

la procura publica che fa l'accusaziun;

c.

la dretgira, a la quala l'accusaziun sa drizza;

d.

la persuna inculpada e sia defensiun;

e.

la persuna donnegiada;

f.

uschè curt, ma uschè precis sco pussaivel: ils malfatgs che vegnan reproschads a la persuna inculpada, il lieu, la data, las uras, il gener e las consequenzas dals malfatgs commess;

g.

ils causals penals che la procura publica resguarda sco ademplids, cun indicaziun da las disposiziuns legalas applitgablas.

² La procura publica po far in'accusaziun alternativa u - en cas che sia accusaziun principala vegn sbittada - in'accusaziun eventuala.

¹ La procura publica fa a la dretgira las suandantas indicaziuns e las suandantas pretensiuns, nun che quellas resultian gia da l'acta d'accusaziun:

a.

l'accusader privat sco er ses plants civils eventuals;

b.

las mesiras repressivas ordinadas;

c.

ils objects sequestrads e las valurs da facultad sequestradas;

d.

ils custs d'inquisiziun resultads;

e.

sia eventuala pretensiun d'ordinar l'arrest da segirezza;

f.

sias pretensiuns davart las sancziuns u l'annunzia che questas pretensiuns vegnian fatgas en la tractativa principala;

g.

sias pretensiuns per decisiuns giudizialas posteriuras;

h.

sia dumonda da vegnir citada a la tractativa principala.

² Sche la procura publica na sa preschenta betg persunalmain davant dretgira, po ella - per declerar ils fatgs - agiuntar a sia accusaziun in rapport final che cuntegna er explicaziuns concernent l'appreziaziun da las cumprovas.

¹ La procura publica transmetta immediatamain l'acta d'accusaziun sco er in eventual rapport final:

a.

a la persuna inculpada, da la quala il lieu da dimora è enconuschent;

b.

a l'accusader privat;

c.

a la victima;

d.

a la dretgira cumpetenta ensemen cun las actas sco er cun ils objects sequestrads e cun las valurs da facultad sequestradas.

² Sche la procura publica pretenda che l'arrest da segirezza vegnia ordinà, transmetta ella in exemplar da l'acta d'accusaziun - ensemen cun la dumonda correspundenta - er a la dretgira da mesiras repressivas.

¹ La dretgira sa raduna durant l'entira tractativa principala tenor la lescha ed en preschientscha d'in actuar.

² Sch'in derschader croda davent durant la tractativa principala, vegn repetida l'entira tractativa principala, nun che las partidas renunzian a quai.

³ La direcziun da la procedura po ordinar ch'in suppleant da la dretgira prendia part dal bel cumenzament da las tractativas per remplazzar sche necessari in commember da la dretgira.

⁴ Sche la dretgira sto giuditgar malfatgs cunter l'integritad sexuala, sto ella cumpigliar - sin giavisch da la victima - almain ina persuna da la medema schlattaina sco la victima. En cas da derschaders singuls poi vegnir divergià da questa regulaziun, sch'i èn participadas victimas da tuttas duas schlattainas.

¹ La persuna inculpada sto sa participar persunalmain a la tractativa principala, sche:

a.

i vegnan tractads crims u delicts; u

b.

la direcziun da la procedura ordinescha sia participaziun persunala.

² La defensiun uffiziala e la defensiun obligatorica ston sa participar persunalmain a la tractativa principala.

³ La direcziun da la procedura po dispensar la persuna inculpada sin sia dumonda da sa participar persunalmain a la tractativa, sche quella fa valair motivs impurtants e sche sia preschientscha n'è betg necessaria.

⁴ Sche la persuna inculpada resta absenta senza sa perstgisar, èn applitgablas las prescripziuns davart la procedura contumaziala.

⁵ Sche la defensiun uffiziala u la defensiun obligatorica resta absenta, vegn la tractativa spustada.

¹ La procura publica po far propostas en scrit a la dretgira u sa preschentar persunalmain davant dretgira.

² Ella n'è liada ni vi da l'appreziaziun giuridica fatga en l'acta d'accusaziun ni vi da las pretensiuns fatgas en quella.

³ Sch'ella pretenda in chasti da detenziun da passa 1 onn u ina mesira da detenziun, sto ella represchentar persunalmain l'accusaziun davant dretgira.

⁴ La direcziun da la procedura po obligar la procura publica er en auters cas da represchentar persunalmain l'accusaziun davant dretgira, sch'ella è da l'avis che quai saja necessari.

⁵ Sche la procura publica na cumpara betg a la tractativa principala, malgrà ch'ella fiss obligada da far quai, vegn la tractativa spustada.

¹ La direcziun da la procedura po dispensar l'accusader privat sin sia dumonda da sa participar persunalmain a la tractativa, sche sia preschientscha n'è betg necessaria.

² La terza persuna ch'è pertutgada d'ina confiscaziun pretendida è libra da sa participar persunalmain a la tractativa.

³ Sche l'accusader privat u la terza persuna ch'è pertutgada d'ina confiscaziun pretendida na sa participescha betg persunalmain a la tractativa, po el u ella sa laschar represchentar u far propostas en scrit.

¹ La direcziun da la procedura avra la tractativa principala, communitgescha la cumposiziun da la dretgira e constatescha la preschientscha da las persunas citadas.

² Suenter pon la dretgira e las partidas far dumondas pregiudizialas, en spezial concernent:

a.

la valaivladad da l'accusaziun;

b.

las premissas da process;

c.

ils impediments da la procedura;

d.

las actas e las cumprovas registradas;

e.

la publicitad da la tractativa;

f.

la divisiun da la tractativa.

³ La dretgira decida immediatamain davart las dumondas pregiudizialas, suenter ch'ella ha concedì l'attenziun giuridica a las partidas preschentas.

⁴ Sche las partidas fan dumondas intermediaras durant la tractativa principala, las tracta la dretgira sco dumondas pregiudizialas.

⁵ Per tractar dumondas pregiudizialas u dumondas intermediaras po la dretgira spustar da tut temp la tractativa principala per cumplettar las actas u las cumprovas ubain per als laschar cumplettar tras la procura publica.

¹ Il fatg che eventualas dumondas pregiudizialas èn vegnidas tractadas, ha per consequenza che:

a.

la tractativa principala sto vegnir manada a fin senza interrupziuns nunnecessarias;

b.

l'accusaziun na po betg pli vegnir retratga e midada, cun resalva da l'artitgel 333;

c.

partidas ch'èn obligadas dad esser preschentas dastgan bandunar il lieu da la tractativa mo pli cun il consentiment da la dretgira; sch'ina partida banduna il lieu da la tractativa, vegn la tractativa tuttina cuntinuada.

² Suenter che eventualas dumondas pregiudizialas èn vegnidas tractadas, communitgescha la direcziun da la procedura las pretensiuns da la procura publica, nun che las partidas renunzian a quai.

¹ La direcziun da la procedura ubain in commember da la dretgira che la direcziun da la procedura ha fixà fa las interrogaziuns.

² Ils ulteriurs commembers da la dretgira e las partidas pon laschar far la direcziun da la procedura dumondas cumplementaras ubain pon las far sezs cun l'autorisaziun da la direcziun da la procedura.

³ Al cumenzament da la procedura da cumprova fa la direcziun da la procedura dumondas detagliadas a la persuna inculpada davart sia persuna, davart l'accusaziun e davart ils resultats da la procedura preliminara.

¹ Sin dumonda da la persuna inculpada u da la procura publica ubain d'uffizi po la tractativa principala vegnir dividida en duas parts; en quest connex poi vegnir fixà il suandant:

a.

en in'emprima part da la procedura vegn tractada mo la dumonda concernent ils fatgs e la culpabilitad, en ina segunda part las consequenzas d'ina sentenzia da culpabilitad u d'in acquittament; u

b.

en in'emprima part da la procedura vegn tractada mo la dumonda concernent ils fatgs ed en ina segunda part la culpabilitad sco er las consequenzas d'ina sentenzia da culpabilitad u d'in acquittament.

^1bis Per la decisiun è cumpetenta:

a.

fin a l'avertura da la tractativa principala: la direcziun da la procedura;

b.

suenter l'avertura da la tractativa principala: la dretgira.²⁴⁰

^1ter Sche la direcziun da la procedura refusa la dumonda da divider la tractativa principala en duas parts, communitgescha ella quai a las partidas cun ina curta motivaziun. La dumonda po vegnir fatga danovamain en la tractativa principala.²⁴¹

² La decisiun davart la divisiun da la tractativa principala è incontestabla.

³ Sch'ina tractativa principala vegn dividida en duas parts, dastgan las relaziuns persunalas d'ina persuna inculpada esser object da la tractativa principala mo en cas d'ina sentenzia da culpabilitad, nun che quellas hajan ina impurtanza per la dumonda davart il causal objectiv u subjectiv.

⁴ Las decisiuns davart la dumonda concernent ils fatgs e davart la culpabilitad vegnan communitgadas suenter la deliberaziun, dastgan dentant vegnir contestadas pir cun l'entira sentenzia.

¹ La dretgira registrescha novas cumprovas e cumplettescha cumprovas incumplettas.

² Ella registrescha anc ina giada cumprovas che n'èn betg vegnidas registradas confurm a l'urden en la procedura preliminara.

³ Ella registrescha anc ina giada cumprovas ch'èn vegnidas registradas confurm a l'urden en la procedura preliminara, sche l'enconuschientscha directa dal med da cumprova para dad esser necessari per pronunziar la sentenzia.

Sche la dretgira vul divergiar da l'appreziaziun giuridica dals fatgs che la procura publica ha formulà en l'acta d'accusaziun, communitgescha ella quai a las partidas preschentas e las dat la pussaivladad da prender posiziun en chaussa.

Avant che la procedura da cumprova vegn terminada, dat la dretgira a las partidas la pussaivladad da far ulteriuras propostas da cumprova.