¹ Tgi che tegna u ha quità d'animals, als sto nutrir e tgirar adequatamain, als conceder l'occupaziun e la libertad da sa mover ch'èn necessarias per lur bainesser sco er - sche quai fa da basegn - in alloschi.

² Suenter avair consultà ils circuls interessads decretescha il Cussegl federal - resguardond las experientschas scientificas e tegnend quint dal stadi da l'experientscha e dal svilup tecnic - prescripziuns davart la tegnida d'animals, particularmain pretensiuns minimalas. El scumonda geners da tegnair animals che cuntrafan als princips da la protecziun dals animals.

³ El po fixar las pretensiuns a la scolaziun ed a la furmaziun supplementara da las possessuras e dals possessurs d'animals sco er da quellas persunas che scoleschan u che tgiran animals.¹⁰

¹ Il Cussegl federal po suttametter a l'obligaziun d'annunzia u da dumandar ina permissiun tscherts geners da tegnair animals, la tegnida da tschertas spezias d'animals sco er tschertas tgiras d'animals.¹²

² Il commerzi cun sistems ed indrizs da stallaziun che vegnan producids en seria per animals da niz dovra ina permissiun federala. La permissiun vegn concedida mo, sch'ils sistems ed ils indrizs correspundan a las pretensiuns d'ina tegnida d'animals confurma a lur natira. Il Cussegl federal regla la procedura da permissiun e determinescha per tge animals da niz ch'ella è applitgabla. Per tscherts geners da tegnair animals po el prevair excepziuns da l'obligaziun da dumandar ina permissiun.

³ La tegnida professiunala e privata d'animals selvadis, che fan pretensiuns spezialas a la tegnida d'animals ed a la tgira d'animals, basegna ina permissiun. L'import da delfins e d'autras spezias da balenas (cetacea) è scumandà.¹³

⁴ Il Cussegl federal po declerar sco obligatoric da dumandar ina permissiun per il commerzi e l'utilisaziun da meds auxiliars e d'apparats che chaschunan suffrientschas e che vegnan duvrads per instruir e per controllar animals u als po scumandar.¹⁴

Ils edifizis ed ils indrizs che vegnan permess tenor questa lescha per animals da niz pon vegnir duvrads - suenter lur construcziun - almain durant la durada ordinaria d'amortisaziun.

Il Cussegl federal po determinar en tge secturs ordaifer l'agricultura che l'engaschament da tgiradras e da tgiraders d'animals è necessari.

¹ L'applicaziun da metodas da tratga e da producziun natiralas sco er artifizialas na dastga betg chaschunar - als animals geniturs ed a lur descendents - dolurs, suffrientschas, donns u disturbis dal cumportament che vegnan chaschunads u ch'èn liads a la finamira da tratga; resalvadas restan las disposiziuns davart experiments cun animals.

² Il Cussegl federal decretescha prescripziuns davart la tratga e davart la producziun d'animals e fixescha ils criteris per giuditgar l'admissibladad da las finamiras da tratga e da las metodas da reproducziun; per quest intent resguarda el la dignitad da l'animal. El po scumandar la tratga, la producziun, la tegnida, l'import, il transit e l'export sco er il commerzi cun animals che han tschertas caracteristicas, en spezial abnormitads dal corp e dal cumportament.¹⁵

¹ Tgi che producescha, tira, tegna, dovra u fa commerzi cun animals modifitgads geneticamain dovra ina permissiun chantunala. Tgi che producescha, tira, tegna u fa commerzi cun tals animals per intents da perscrutaziun, da terapia e da diagnostica, dovra ina permissiun chantunala tenor l'artitgel 19 alinea 1. En ils auters cas sa drizza la procedura da permissiun tenor las disposiziuns davart experiments cun animals e tenor la Lescha dals 21 da mars 2003¹⁶ davart la tecnica genetica.

² Suenter avair consultà ils circuls interessads, la Cumissiun federala d'etica per la biotecnologia en il sectur betg uman, la Cumissiun federala spezialisada per la segirezza biologica e la Cumissiun federala per ils experiments cun animals fixescha il Cussegl federal criteris che permettan da considerar ils interess cun producir, cun trair, cun tegnair e cun duvrar animals modifitgads geneticamain sco er cun far commerzi cun tals animals.

³ Il Cussegl federal regla las pretensiuns als instituts, en ils quals vegnan realisadas activitads tenor l'alinea 1 segunda frasa, en spezial las pretensiuns a l'infrastructura, al persunal, a la surveglianza ed a la documentaziun.

⁴ Il Cussegl federal po prevair excepziuns da l'obligaziun da dumandar ina permissiun ubain simplificaziuns en la procedura da permissiun particularmain, sch'igl è cler, ch'i na resultan betg dolurs, suffrientschas, donns u disturbis dal cumportament tar ils animals, pervia da las metodas da producziun u da tratga, e sch'i vegn tegnì quint da la dignitad da l'animal en in'autra moda.

¹ Ils animals modifitgads geneticamain che subeschan dolurs, suffrientschas, donns u disturbis dal cumportament pervia da la producziun u pervia da la tratga, ubain dals quals la dignitad na vegn betg resguardada en in'autra moda ston vegnir annunziads a l'autoritad chantunala.

² L'autoritad chantunala transferescha questas annunzias a la Cumissiun chantunala per experiments cun animals e decida - sin fundament da la proposta da tala - davart l'admissibladad da la tratga.

³ Il Cussegl federal regla ils detagls da l'annunzia.

¹ Il commerzi professiunal cun animals e l'utilisaziun d'animals vivs per far reclama dovran ina permissiun.

² Il Cussegl federal po declerar occurrenzas surregiunalas cun animals sco suttamessas a l'obligaziun d'annunzia e po dumandar ina permissiun.

¹ Per motivs da la protecziun dals animals e da la protecziun da las spezias po il Cussegl federal liar a cundiziuns, restrenscher u scumandar l'import, il transit e l'export d'animals u da products d'animals.²⁰ Resalvà resta l'import da charn koschra e da charn halal, per garantir il provediment suffizient cun tala charn da las communitads gidieua ed islamica. Il dretg d'importar e da retrair tala charn è reservà a las commembras ed als commembers da questas communitads sco er a lur persunas giuridicas ed a lur societads da persunas appartegnentas.

² Scumandads èn l'import, il transit e l'export da fols da giat e da chaun e da products da tals sco er il commerzi cun tals fols e cun tals products.²¹

¹ Ils transports d'animals ston vegnir fatgs cun schanetg e senza in retard nunnecessari. La durada dal viadi importa maximalmain 6 uras a partir da la plazza da chargiada. Il Cussegl federal decretescha las disposiziuns excepziunalas.

² Suenter avair consultà las organisaziuns da branscha regla el las pretensiuns a la scolaziun ed a la furmaziun supplementara dal persunal incumbensà cun il transport professiunal d'animals.

¹ Tgi che organisescha professiunalmain transports internaziunals d'animals dovra ina permissiun.

² Il Cussegl federal po determinar tge normas internaziunalas che ston vegnir observadas tar transports internaziunals d'animals.

³ Il transit tras la Svizra d'arments, da nursas, da chauras, da portgs, da chavals da maz e da giaglinom da maz dastga vegnir fatg mo cun la viafier u cun aviuns.

Las intervenziuns che chaschunan dolurs dastgan vegnir fatgas mo cun ina suppressiun generala u locala da las dolurs che vegn exequida d'ina persuna cumpetenta. Il Cussegl federal fixescha las excepziuns. El determinescha tge persunas che valan sco cumpetentas. Resalvadas restan las disposiziuns da questa lescha concernent ils experiments cun animals.

Ils experiments cun animals che chaschunan dolurs, suffrientschas u donns als animals, che als tementeschan, che pregiuditgeschan considerablamain lur stadi general u che na resguardan betg lur dignitad en in'autra moda ston vegnir restrenschids a la dimensiun indispensabla.

¹ Tgi che vul far experiments cun animals dovra ina permissiun da l'autoritad chantunala cumpetenta.

² Las praticas tenor l'artitgel 11 alinea 1 ultima frasa han il medem status da procedura sco ils experiments cun animals.

³ L'autoritad chantunala cumpetenta suttametta las dumondas da permissiun per experiments cun animals tenor l'artitgel 17 a la Cumissiun chantunala per experiments cun animals.

⁴ Las permissiuns ston vegnir limitadas. Ellas pon vegnir colliadas cun cundiziuns e cun pretensiuns.

⁵ Ils instituts ed ils labors che fan experiments cun animals sco er las tratgas d'animals d'experiment ston tegnair ina controlla dal dumber d'animals.

¹ Il Cussegl federal fixescha las pretensiuns als instituts ed als labors, en ils quals dastgan vegnir fatgs experiments cun animals, a la scolaziun ed a la furmaziun supplementara dal persunal sco er a la permissiun da tegnidas, da tratgas e da negozis d'animals d'experiment.

² Il Cussegl federal determinescha ils criteris per giuditgar la dimensiun indispensabla en il senn da l'artitgel 17.

³ Il Cussegl federal po declerar sco inadmissibels tscherts intents d'experiments.

⁴ In experiment cun animals è en spezial inadmissibel, sch'el chaschuna dolurs, suffrientschas u donns memia gronds a l'animal en cumparegliaziun cun il gudogn d'enconuschientschas ubain sch'el tementescha memia fitg l'animal.

¹ Dolurs, suffrientschas u donns dastgan mo vegnir chaschunads ad in animal, u in animal dastga mo vegnir tementà, sche quai è inevitabel per ademplir l'intent da l'experiment cun animals.

² Ils experiments dastgan vegnir fatgs mo cun animals d'in stgalim superiur da la scala da l'evoluziun, sche l'intent na po betg vegnir cuntanschì cun animals d'in stgalim inferiur da la scala da l'evoluziun e sch'i na dat naginas metodas alternativas adattadas.

³ Il Cussegl federal fixescha las ulteriuras pretensiuns a l'execuziun dals experiments.

¹ Suenter la terminaziun d'in experiment cun animals publitgescha l'Uffizi federal da segirezza alimentara e fatgs veterinars (USAV)²⁵ las suandantas indicaziuns:

a.

il titel ed il sectur spezial da l'experiment cun animals;

b.

l'intent da l'experiment;

c.

il dumber d'animals duvrads da mintga spezia d'animals;

d.

il grad da grevezza, al qual ils animals involvids èn stads suttamess.

² Il Cussegl federal po prevair ch'i vegnian publitgadas ulteriuras indicaziuns, sche nagins interess publics u privats predominants degns da vegnir protegids na s'opponan a quai.

³ El regla ils detagls, en spezial il grad da precisaziun da las indicaziuns che ston vegnir furnidas da las persunas responsablas per in experiment cun animals. En quest connex resguarda el ils interess publics u privats predominants degns da vegnir protegids.

¹ La Confederaziun maina in sistem d'infurmaziun en il sectur dals experiments cun animals per sustegnair las incumbensas legalas da la Confederaziun e dals chantuns.

² Il sistem d'infurmaziun cuntegna las suandantas datas da persuna:

a.

datas davart persecuziuns e sancziuns administrativas e penalas;

b.

datas davart permissiuns e davart surveglianzas dals experiments cun animals;

c.

datas davart permissiuns e davart surveglianzas da las tegnidas, da las tratgas e dals negozis d'animals d'experiment;

d.

datas per annunziar lingias u tscheps d'animals engrevgiads;

e.²⁷

datas davart la scolaziun e davart la furmaziun supplementara;

f.

datas ch'èn necessarias per publitgar la statistica d'experiments cun animals;

g.

datas ch'èn necessarias per administrar las applicaziuns ed ils sistems.

¹ En il rom da lur incumbensas legalas dastgan las suandantas persunas elavurar datas persunalas, inclusiv datas persunalas spezialmain sensiblas, ed avair access a questas datas en la procedura d'invista:²⁸

a.

las collavuraturas ed ils collavuraturs da l'Uffizi federal veterinar (UFV) che adempleschan incumbensas che stattan en connex cun la surveglianza suprema;

b.

las collavuraturas ed ils collavuraturs da las autoritads chantunalas da permissiun, en lur champ da cumpetenza;

c.

las commembras ed ils commembers da las cumissiuns chantunalas per experiments cun animals, en lur champ da cumpetenza;

d.

las collavuraturas ed ils collavuraturs dals instituts, dals labors sco er da las tegnidas, da las tratgas e dals negozis d'animals d'experiment, en lur champ da cumpetenza.

² Las collavuraturas ed ils collavuraturs da las autoritads chantunalas da permissiun ed ils commembers da las cumissiuns chantunalas per experiments cun animals dastgan - en ina procedura d'invista - prender cogniziun da datas d'auters chantuns davart dumondas e decisiuns da permissiun, sche quai è necessari per ademplir lur incumbensas legalas.

La Confederaziun incassescha taxas dals chantuns per l'utilisaziun dal sistem d'infurmaziun. Il Cussegl federal fixescha las taxas.

Il Cussegl federal regla:

a.

la collavuraziun cun ils chantuns;

b.

il catalog da datas;

c.

las responsabladads per l'elavuraziun da las datas;

d.

ils dretgs d'access, particularmain la dimensiun dals access en la procedura d'invista;

e.

las mesiras organisatoricas e tecnicas ch'èn necessarias per garantir la protecziun da las datas e la segirezza da las datas, particularmain las premissas per conceder l'access;

f.

l'archivaziun;

g.

il termin da tegnair en salv e da stizzar las datas.

¹ Ils mammals dastgan vegnir mazzads mo, sch'els èn vegnids sturnids avant che cumenzar a trair il sang.

² Il Cussegl federal po suttametter il mazzament d'auters animals a l'obligaziun da sturnir.

³ El determinescha las metodas da sturnir admessas.

⁴ Suenter avair consultà las organisaziuns da branscha regla el las pretensiuns a la scolaziun ed a la furmaziun supplementara dal persunal dals stabiliments da maz.

¹ Il Cussegl federal decretescha las prescripziuns executivas. El po autorisar l'UFV da decretar prescripziuns executivas da caracter tecnic.⁵⁵

² L'execuziun è chaussa dals chantuns, nun che la lescha prevesia insatge auter. Ils chantuns pon regiunalisar l'execuziun.

^2bis Il Cussegl federal po obligar ils chantuns d'infurmar la Confederaziun davart las mesiras executivas ch'els han prendì e davart ils resultats da las controllas e da las examinaziuns ch'els han fatg.⁵⁶

³ Il Cussegl federal determinescha en tge dimensiun ch'ils manaschis che tegnan animals ston vegnir controllads e co che la realisaziun dals experiments cun animals sto vegnir survegliada. La controlla dals manaschis che tegnan animals e la registraziun correspundenta da datas ston vegnir coordinadas cun las controllas che vegnan pretendidas en la legislaziun davart l'agricultura, las epidemias d'animals e las victualias.

⁴ Il Cussegl federal regla la scolaziun e la furmaziun supplementara da las persunas che adempleschan funcziuns en connex cun l'execuziun da questa lescha.⁵⁷

⁵ Tenor l'artitgel 7 alinea 2 èn l'execuziun da la procedura da permissiun e la surveglianza da l'import, dal transit e da l'export d'animals e da products d'animals als posts da controlla da cunfin admess chaussa da la Confederaziun.⁵⁸

Il Cussegl federal po far contracts internaziunals davart la scolaziun, la realisaziun da controllas ed il barat d'infurmaziuns sin il champ da la protecziun dals animals.

¹ Las disposiziuns da l'UFV pon vegnir contestadas cun ina protesta.

² L'effect suspensiv po vegnir privà da la protesta.

³ Il termin da protesta dura 10 dis.

Ils chantuns installeschan mintgamai in post spezialisà che stat sut la responsabladad da la veterinaria chantunala u dal veterinari chantunal; in post ch'è adattà per garantir l'execuziun da questa lescha u da las prescripziuns ch'èn vegnidas decretadas sin basa dad ella.

¹ Ils chantuns nomineschan mintgamai ina Cumissiun per experiments cun animals che sa cumpona da spezialistas e da spezialists, ch'è independenta da l'autoritad da permissiun ed en la quala èn represchentadas adequatamain las Organisaziuns per la protecziun dals animals. Plirs chantuns pon instituir ina cumissiun cuminaivla.

² La Cumissiun per experiments cun animals examinescha las dumondas e fa ina proposta a l'autoritad da permissiun. Ella vegn consultada per controllar la tratga d'animals d'experiment e l'execuziun dals experiments cun animals. Ils chantuns la pon delegar ulteriuras incumbensas.

¹ Il Cussegl federal instituescha ina Cumissiun per experiments cun animals che sa cumpona da spezialistas e da spezialists. Questa cumissiun cusseglia l'UFV e stat a disposiziun als chantuns per dumondas da princip e per cas contestads.⁶¹

² La Cumissiun federala per experiments cun animals collavura cun la Cumissiun federala d'etica per la biotecnologia en il sectur betg uman.

¹ Il Cussegl federal po nominar cumissiuns d'examen che organiseschan examens da persunas che adempleschan funcziuns en connex cun l'execuziun da questa lescha.

² Las cumissiuns d'examen communitgeschan ils resultats dals examens en furma d'ina disposiziun.

³ Il Cussegl federal po delegar als chantuns l'organisaziun dals examens.

L'UFV publitgescha annualmain ina statistica davart tut ils experiments cun animals che vegnan realisads en Svizra.⁶³ La statistica infurmescha la publicitad davart dumondas concernent ils experiments cun animals e concernent las modificaziuns geneticas vi d'animals.

Cun ils chantuns po il Cussegl federal concluder cunvegnas da finamiras davart secturs parzials da l'execuziun da questa lescha.

¹ La Confederaziun ed ils chantuns pon consultar organisaziuns e firmas per l'execuziun da questa lescha u crear organisaziun adattadas per quest intent.

² Els surveglian la cooperaziun da questas organisaziuns e da questas firmas. L'autoritad cumpetenta descriva en ina incarica da prestaziun las incumbensas e las cumpetenzas che vegnan surdadas a questas organisaziuns ed a questas firmas. Davart lur gestiun e lur contabilitad ston ellas render quint a questa autoritad. La controlla parlamentara en la Confederaziun ed en ils chantuns resta resalvada.

³ Il Cussegl federal ed ils chantuns pon autorisar las organisaziuns e las firmas incumbensadas da metter a quint taxas per lur activitad.

Las autoritads ch'èn incumbensadas cun l'execuziun da questa lescha han access als locals, als indrizs, als vehichels, als objects ed als animals; per quest intent han ellas la qualitad d'organs da la polizia giudiziala.

La surveglianza suprema da la Confederaziun davart l'execuziun da questa lescha tras ils chantuns è chaussa dal Departament federal da l'intern⁶⁴.

¹ Nun che la lescha disponia insatge auter, è sia execuziun libra da taxas.

² Ils chantuns èn autorisads d'incassar taxas per:

a.

permissiuns e disposiziuns;

b.

controllas che han chaschunà reclamaziuns;

c.

servetschs spezials che han chaschunà lavur che surpassan l'activitad administrativa usitada.

³ Il Cussegl federal fixescha il rom per las taxas chantunalas.

¹ Uschenavant che questa lescha basegna dretg chantunal cumplementar per sia execuziun, èn ils chantuns obligads da far las prescripziuns correspundentas.

² Ils chantuns communitgeschan las prescripziuns executivas al Departament federal da l'intern.

La Lescha federala dals 9 da mars 1978⁶⁵ davart la protecziun dals animals vegn abolida.

A partir dal 1. da schaner 2009 èsi scumandà da chastrar chirurgicamain purschels senza supprimer las dolurs. Sch'i n'è betg avant maun per quest termin ina metoda alternativa ch'è adattada per la pratica, po il Cussegl federal suspender l'entrada en vigur da quest scumond maximalmain per 2 onns.

Fin a l'entrada en vigur da la Lescha dals 17 da zercladur 2005⁶⁶ davart il Tribunal administrativ federal vegn reglada la protecziun giuridica cumplementarmain a las disposiziuns generalas davart l'Organisaziun giudiziala sco suonda: La Cumissiun da recurs dal Departament federal d'economia giuditgescha ils recurs cunter disposiziuns da l'UFV.

Independentamain dal fatg, sche la Lescha federala dals 16 da mars 2012⁶⁸ davart la circulaziun da las spezias da fauna e da flora protegidas (LFCITES) u sche la midada dals 15 da zercladur 2012 da la LPAn entra en vigur sco emprima, vegnan midads ils artitgels 27 alinea 1, 31 sco er 32 alinea 5 LPAn - cun l'entrada en vigur da la lescha che entra pli tard en vigur sco er sche omaduas leschas entran en vigur a medem temp - sco suonda:

…⁶⁹

¹ Questa lescha è suttamessa al referendum facultativ.

² Ella vegn publitgada en il Fegl uffizial federal, sche l'iniziativa dal pievel «per ina protecziun dals animals confurma al temp (Gea a la protecziun dals animals!)» vegn retratga u refusada⁷⁰.

³ Il Cussegl federal fixescha l'entrada en vigur.

Data da l'entrada en vigur: 1. da settember 2008⁷¹