Sch'in giuvenil commetta in malfatg chastiabel avant ch'el ha cumplenì 15avel onn da vegliadetgna, na vegn el betg persequità penalmain.

L'instigaziun e la cumplicitad ad in surpassament èn chastiablas, nun ch'i sa tracti da violaziuns da l'urden.

¹ Uschenavant ch'ina multa na po betg vegnir incassada, la transfurma il derschader en arrest, en cas da giuvenils en fermanza. La multa pervia d'ina violaziun da l'urden na po betg vegnir transfurmada.

² Il derschader po excluder la transfurmaziun, sch'il sentenzià cumprova ch'el n'è - senza esser sez la culpa - betg en cas da pajar la multa. L'exclusiun da la transfurmaziun n'è dentant betg admissibla, sch'il sentenzià ha commess intenziunadamain la cuntravenziun e sch'i n'èn - il mument ch'il malfatg è vegnì commess - betg anc passads 5 onns, dapi ch'el è vegnì sentenzià pervia d'ina cuntravenziun cunter la medema lescha administrativa, premess che questa cuntravenziun n'era betg mo ina violaziun da l'urden.⁷

³ En cas d'ina transfurmaziun vegnan 30 francs quintads sco in di arrest u fermanza, ma il chasti da transfurmaziun na dastga betg durar pli ditg che 3 mais. Sch'i èn vegnidas pajadas ratas, reducescha il derschader il chasti da transfurmaziun en la proporziun tranter questas ratas e la summa da l'entira multa.

⁴ Sche la multa vegn pajada, suenter ch'ella è vegnida transfurmada, scada il chasti da transfurmaziun, uschenavant che quel n'è betg anc vegnì exequì.

¹ In surpassament surannescha suenter 4 onns.⁸

² Sch'il surpassament è dentant in'omissiun u ina periclitaziun da taxas ubain in'obtenziun illegala d'ina restituziun, d'ina reducziun u d'in relasch da taxas, importa il termin da surannaziun 7 onns.⁹

³ En cas da crims, da delicts e da surpassaments vegn suspendida la surannaziun:

a.

durant ina procedura da protesta u da recurs u durant ina procedura giudiziala davart l'obligaziun da prestaziun e da restituziun u davart in'autra dumonda preliminara ch'è da giuditgar tenor la singula lescha administrativa; u

b.

uschè ditg ch'il delinquent expiescha in chasti da detenziun a l'exteriur.¹⁰

⁴ Il chasti d'in surpassament surannescha suenter 5 onns.

¹ Sche:

a.

ina taxa n'è betg vegnida incassada, restituida, reducida u relaschada; u

b.

ina indemnisaziun u ina contribuziun è vegnida concedida u ina pretensiun n'è betg vegnida fatga valair da la Confederaziun, d'in chantun, d'ina vischnanca, d'in institut u d'ina corporaziun da dretg public u d'ina organisaziun incaricada cun incumbensas da dretg public;

nungiustifitgadamain en consequenza d'ina cuntravenziun cunter la legislaziun administrativa federala, ston la taxa, l'indemnisaziun, la contribuziun u la summa betg pretendida sco er ils tschains vegnir pajads suenter u restituids, senza resguardar la chastiabladad d'ina tscherta persuna.

² Suttamess a l'obligaziun da prestaziun e da restituziun è, tgi che ha profità da l'avantatg illegal, en spezial tgi ch'è stà obligà da pajar la taxa u tgi che ha retschavì l'indemnisaziun u da la contribuziun.

³ Tgi che ha commess intenziunadamain la cuntravenziun u è sa participà a tala, stat bun - solidaricamain cun quel ch'è obligà da pajar tenor l'alinea 2 - per la summa ch'è da pajar suenter u da restituir.

⁴ L'obligaziun da prestaziun e da restituziun na surannescha betg, uschè ditg che la persecuziun penala e l'execuziun penala n'èn betg surannadas.

Sch'il delinquent ha denunzià da sai anora la cuntravenziun che chaschuna in'obligaziun da prestaziun e da restituziun,
sch'el ha ultra da quai fatg - uschenavant ch'igl è stà supportabel per el - indicaziuns cumplettas ed exactas davart las basas da l'obligaziun da prestaziun e da restituziun, ha gidà a sclerir ils fatgs ed ha ademplì l'obligaziun ch'el aveva,
e sch'el n'ha fin ussa anc mai denunzià sasez pervia d'ina cuntravenziun intenziunada dal medem gener,
na vegn el betg chastià.

¹ Tgi che cugliuna malignamain l'administraziun, in'autra autoritad u ina terza persuna cun dar da crair u cun taschentar chaussas u tgi che affirmescha malignamain lur errur ed obtegna uschia per sai u per in auter senza dretg ina concessiun, ina permissiun u in contingent, ina contribuziun, la restituziun da taxas u in'autra prestaziun da la communitad u tgi ch'effectuescha uschia ch'ina concessiun, ina permissiun u in contingent na vegn betg retratg, vegn chastià cun in chasti da detenziun da fin 3 onns u in chasti pecuniar.

² Sch'il delinquent effectuescha tras ses cumportament malign che la communitad vegn privada senza dretg ed en ina dimensiun considerabla d'ina taxa, d'ina contribuziun u d'ina autra prestaziun u che la facultad da la communitad vegn donnegiada en autra moda, vegn il delinquent chastià cun in chasti da detenziun da fin 3 onns u in chasti pecuniar.

³ Tgi che commetta da professiun u en cooperaziun cun terzas persunas cuntravenziuns tenor l'alinea 1 u 2 en chaussas da taxas u da duana e procura uschia a sasez u ad in auter in avantatg illegal d'ina dimensiun spezialmain considerabla u donnegescha da maniera spezialmain considerabla la facultad u auters dretgs da la communitad, vegn chastià cun in chasti da detenziun da fin 5 onns u cun in chasti pecuniar.

⁴ Sch'ina lescha administrativa prevesa ina multa per ina cuntravenziun che correspunda a l'alinea 1, 2 u 3, ma che n'è betg vegnida commessa malignamain, stoi er anc vegnir pronunzià ina multa en ils cas tenor ils alineas 1-3. La multa vegn fixada tenor la lescha administrativa correspundenta.

1. Tgi che producescha in document fauss u sfalsifitgescha in document, utilisescha la suttascripziun originala u il segn manual original d'insatgi auter per producir in document fauss u dovra in document da quest gener per engianar auters cun l'intent da procurar per sai u per in auter in avantatg illegal tenor la legislaziun administrativa federala u cun l'intent da donnegiar la facultad u auters dretgs da la communitad,

tgi ch'effectuescha tras engion che l'administraziun u in'autra autoritad u in funcziunari public documentescha incorrectamain in fatg relevant per realisar la legislaziun administrativa federala e tgi che utilisescha in document obtegnì en tala moda per engianar l'administraziun u in'autra autoritad,

vegn chastià cun in chasti da detenziun da fin 3 onns u cun in chasti pecuniar.¹²

2. La cifra 1 vala er per documents da l'exteriur.

¹ Tgi che donnegescha, destruescha u lascha svanir documents ch'el fiss obligà da tegnair en salv tenor questa legislaziun, cun l'intent da procurar per sai u per in auter in avantatg illegal tenor la legislaziun administrativa federala u cun l'intent da donnegiar la facultad u auters dretgs da la communitad, vegn chastià cun in chasti da detenziun da fin 3 onns u cun in chasti pecuniar.¹³

² Sch'il delinquent apporta da sai anora ils documents ch'el aveva laschà svanir ed avant che l'administraziun ha terminà l'inquisiziun, poi vegnir desistì d'in chasti.

³ Ils alineas 1 e 2 valan er per documents da l'exteriur.

1. Tgi che privescha en ina procedura penala administrativa insatgi da la persecuziun penala u da l'execuziun dal chasti, uschenavant che tala è chaussa da l'administraziun respectiva,

tgi che gida a segirar ad in delinquent u ad in participant ils avantatgs d'ina cuntravenziun cunter la legislaziun administrativa federala,

vegn chastià cun in chasti da detenziun da fin 3 onns u cun in chasti pecuniar.

2. Sch'il malfatg precedent è in surpassament, vegn il delinquent chastià cun ina multa.

3. Tgi che gida ad impedir illegalmain l'execuziun d'ina mesira penala administrativa, vegn chastià cun in chasti da detenziun da fin 1 onn u cun in chasti pecuniar.

4. Sch'il delinquent favurisescha ses confamigliars u in'autra persuna, cun la quala el ha ina relaziun persunala uschè stretga, che ses cumportament è perstgisabel, na vegn el betg chastià.

¹ Denunzias penalas pervia da cuntravenziuns cunter ina lescha administrativa federala ston vegnir inoltradas ad in funcziunari da l'administraziun federala respectiva u ad in post da polizia.

² L'administraziun federala sco er la polizia chantunala e communala èn obligadas da denunziar a l'administraziun respectiva cuntravenziuns, las qualas lur organs constateschan u da las qualas els survegnan enconuschientscha en lur activitad uffiziala.

³ Sch'ils organs da l'administraziun federala e da la polizia èn perditgas da la cuntravenziun u èn vegnids natiers directamain suenter il malfatg, han els - sch'in privel resulta dal retard - il dretg da prender provisoricamain en fermanza il delinquent, da sequestrar provisoricamain ils objects che stattan en connex cun la cuntravenziun e da persequitar per quest intent il delinquent u il possessur da l'object en abitaziuns ed en auters locals sco er sin bains immobigliars ch'èn circumdads d'ina saiv e che tutgan directamain tar ina chasa.

⁴ Ina persuna prendida provisoricamain en fermanza sto vegnir manada immediatamain davant il funcziunari che appartegna a l'administraziun respectiva e che fa l'inquisiziun; ils objects sequestrads ston vegnir consegnads immediatamain.

¹ Per l'inquisiziun è cumpetenta l'administraziun respectiva. Cun la realisaziun d'interrogaziuns, d'inspecziuns al lieu e da mesiras da sforz ston vegnir incumbensads funcziunaris ch'èn scolads spezialmain per quest intent.

² La polizia chantunala e communala sustegna l'administraziun tar sia inquisiziun; en spezial dastga il funcziunari che fa l'inquisiziun far diever da l'agid polizial, sch'i vegn fatg resistenza cunter in act d'inquisiziun che tutga tar sias cumpetenzas uffizialas.

³ Sche tant la cumpetenza da l'administraziun respectiva sco er la giurisdicziun federala u chantunala èn dadas en ina chaussa penala, po il departament, al qual l'administraziun respectiva appartegna, ordinar d'unir la persecuziun penala tar l'autoritad da persecuziun penala che s'occupa gia da la chaussa, premess ch'igl existia in stretg connex da la materia e premess che l'autoritad da persecuziun penala haja dà ordavant ses consentiment d'unir la persecuziun penala.¹⁶

¹ Sch'in giuvenil commetta in malfatg chastiabel suenter ch'el ha cumplenì 15avel, ma avant ch'el ha cumplenì 18avel onn da vegliadetgna, èn las prescripziuns da questa lescha decisivas per l'inquisiziun e per il giudicament. Sche retschertgas spezialas paran dentant necessarias per giuditgar il giuvenil u per ordinar mesiras previsas dal dretg da giuvenils u sche l'autoritad chantunala cumpetenta per la giurisdicziun da giuvenils dumonda quai u sch'il giuvenil pertutgà da la disposiziun penala da l'administraziun ha pretendì in giudicament giudizial, sto l'administraziun surdar la procedura a l'autoritad chantunala cumpetenta per la giurisdicziun da giuvenils, eventualmain cun separar la procedura da quella cunter auters inculpads; ils artitgels 73-83 da questa lescha valan tenor il senn.²³

² En divergenza da l'artitgel 22 vegn la dretgira cumpetenta fixada tenor l'artitgel 10 da la Procedura penala per giuvenils dals 20 da mars 2009²⁴.²⁵

³ Ultra dal titular da la tgira genituriala, da l'avugà u dal procuratur po il minoren ch'è abel da giuditgar prender independentamain ils meds legals.²⁶

La Procura publica da la Confederaziun po intervegnir en mintga procedura giudiziala.

¹ La Chombra da recurs dal Tribunal penal federal²⁹ decida davart ils recurs e las contestaziuns che la vegnan attribuids tenor questa lescha.

² Sche quai è necessari per sia decisiun, ordinescha la Chombra da recurs ina registraziun da las cumprovas; per quest intent po ella far diever dals servetschs da l'administraziun respectiva e da l'inquisitur federal dal territori linguistic correspundent.

³ Sche quai è necessari per proteger interess publics u privats impurtants, sto la Chombra da recurs prender enconuschientscha d'in mussament cun exclusiun dal recurrent u dal petent.

⁴ L'obligaziun da surpigliar ils custs en la procedura da recurs davant la Chombra da recurs sa drizza tenor l'artitgel 73 da la Lescha dals 19 da mars 2010³⁰ davart l'organisaziun da las autoritads penalas.³¹

¹ Cunter mesiras da sforz (art. 45 ss.) sco er cunter acts uffizials e cunter negligientschas che stattan en quest connex poi vegnir fatg recurs tar la Chombra da recurs dal Tribunal penal federal.

² Il recurs sto vegnir inoltrà:

a.

a la Chombra da recurs, sch'el sa drizza cunter in'autoritad giudiziala chantunala u cunter il directur u il schef da l'administraziun respectiva;

b.

al directur u al schef da l'administraziun respectiva en ils ulteriurs cas.

³ Sch'il directur u il schef da l'administraziun respectiva curregia l'act uffizial u la negligientscha en ils cas da l'alinea 2 litera b en il senn da las propostas dal recurrent, scada il recurs; cas cuntrari sto el surdar il recurs cun sias remartgas il pli tard il terz di da lavur suenter sia entrada a la Chombra da recurs.

¹ Uschenavant ch'il recurs tenor l'artitgel 26 n'è betg applitgabel, poi vegnir fatg recurs cunter acts uffizials e cunter negligientschas dal funcziunari che fa l'inquisiziun tar il directur u tar il schef da l'administraziun respectiva.

² La decisiun da recurs sto vegnir communitgada en scrit al recurrent e sto cuntegnair ina indicaziun dals meds legals.

³ Cunter la decisiun da recurs poi vegnir fatg recurs tar la Chombra da recurs dal Tribunal penal federal, dentant mo pervia da violaziun dal dretg federal, inclusiv il surpassament u l'abus da l'appreziar.

⁴ Per recurs cunter acts d'inquisiziun e cunter negligientschas d'organs da las organisaziuns incaricadas cun incumbensas federalas da dretg public valan ils alineas 1-3 tenor il senn; l'emprima instanza da recurs è dentant il departament surordinà.

¹ Il dretg da far recurs ha, tgi ch'è pertutgà da l'act uffizial contestà, da la negligientscha reclamada u da la decisiun da recurs (art. 27 al. 2) ed ha in interess degn da protecziun che quai vegnia abolì u midà; il dretg da far recurs cunter la liberaziun d'ina persuna arrestada u prendida provisoricamain en fermanza tras l'autoritad giudiziala chantunala (art. 51 al. 5, 59 al. 3) ha er il directur u il schef da l'administraziun respectiva.

² Cun il recurs po vegnir contestada la violaziun dal dretg federal, la constataziun incorrecta u incumpletta dals fatgs giuridicamain relevants u la inadequatezza; resalvà resta l'artitgel 27 alinea 3.

³ Il recurs cunter in act uffizial u cunter ina decisiun da recurs sto vegnir inoltrà en scrit cun ina proposta e cun ina curta motivaziun a l'autoritad cumpetenta, e quai entaifer 3 dis, suenter ch'il recurrent ha survegnì enconuschientscha da l'act uffizial u suenter che la decisiun da recurs è vegnida communitgada ad el; sch'il recurrent è en arrest, basti, sch'el surdat il recurs a la direcziun da la praschun, ch'è obligada da consegnar immediatamain il recurs a l'autoritad cumpetenta.

⁴ In recurs che vegn inoltrà ad in'autoritad betg cumpetenta sto vegnir surdà immediatamain a l'autoritad cumpetenta; sch'il recurs vegn inoltrà a temp a l'autoritad betg cumpetenta, vala il termin da recurs sco observà.

⁵ Uschenavant che la lescha na dispona betg autramain, n'ha il recurs nagin effect suspensiv, nun ch'il recurs survegnia in effect suspensiv tras ina disposiziun preventiva da l'instanza da recurs u da ses president.

¹ Funcziunaris che han da far ina inquisiziun, da pronunziar u da preparar ina decisiun, sco er experts, translaturs ed interprets prendan recusaziun, sch'els:

a.

han in interess persunal da la chaussa;

b.³²

èn colliads cun l'inculpà tras lètg u tras partenadi registrà u mainan facticamain ina communitad da vita cun el;

b^bis.³³

èn parents u quinads da l'inculpà en lingia directa u fin al terz grad en lingia laterala;

c.

pudessan esser implitgads per auters motivs en la chaussa.

² Sche la recusaziun è dispitaivla, vegn la chaussa decidida - cun resalva dal recurs tar la Chombra da recurs dal Tribunal penal federal (art. 27 al. 3) - tras il superiur dal funcziunari respectiv u da quel che ha consultà l'expert, il translatur u l'interpret.

³ En la procedura giudiziala e per ils funcziunaris ed ils emploiads chantunals sa drizza la recusaziun tenor il dretg federal u chantunal respectiv.

¹ Ademplind lur incumbensas ston las autoritads administrativas federalas, chantunalas e communalas prestar assistenza giudiziala a las autoritads ch'èn incaricadas da persequitar e da giuditgar chaussas penalas administrativas; en spezial ston ellas dar las infurmaziuns necessarias e permetter da prender invista d'actas uffizialas che pudessan avair ina impurtanza per la persecuziun penala.

² L'assistenza giudiziala dastga vegnir refusada mo, sch'i s'opponan interess publics impurtants, en spezial la segirezza interna ed externa da la Confederaziun u dals chantuns, u sche l'assistenza giudiziala pregiuditgass considerablamain l'autoritad contactada da realisar sias incumbensas. Ils secrets professiunals en il senn dals artitgels 171-173 CPP³⁴ ston vegnir mantegnids.³⁵

³ Dal rest èn ils artitgels 43-48 CPP applitgabels per l'assistenza giudiziala.³⁶

⁴ En il rom da questas incumbensas èn las organisaziuns ch'èn incaricadas cun incumbensas da dretg public obligadas da prestar assistenza giudiziala da medema maniera sco las autoritads.

⁵ Differenzas tranter las autoritads federalas vegnan decidas dal Cussegl federal, differenzas tranter la Confederaziun ed ils chantuns u tranter singuls chantuns da la Chombra da recurs dal Tribunal penal federal. Las mesiras da segirezza ordinadas ston vegnir mantegnidas, fin che la decisiun è avant maun.

¹ Per la calculaziun e per la prolungaziun dals termins sco er per il restabiliment da termins pervia da l'inobservanza da tals valan ils artitgels 20-24 da la Lescha federala dals 20 da december 1968³⁷ davart la procedura administrativa tenor il senn.

² En la procedura giudiziala sa drizzan ils termins tenor il CPP³⁸.³⁹

¹ Las communicaziuns vegnan fatgas en scrit, nun che questa lescha fixeschia insatge auter.

² La consegna ha lieu tras ina spediziun postala recumandada u en autra moda cun laschar confermar la recepziun.

³ La communicaziun vala sco consegnada, sche la spediziun è vegnida recepida da l'adressat ubain d'ina persuna ch'è emploiada u che viva en la medema chasada e che ha almain 16 onns. Resalvadas restan ordinaziuns da consegnar la communicaziun persunalmain a l'adressat.

⁴ Plinavant vala la communicaziun sco consegnada:

a.

en cas d'ina spediziun postala recumandada che n'è betg vegnida retratga: il 7. di suenter ch'igl è vegnì empruvà da consegnar la spediziun senza success, sche l'adressat stueva far quint cun ina consegna;

b.

en cas d'ina consegna persunala, sche l'adressat refusa da recepir la spediziun e sche quai vegn attestà dal consegnader: il di da la refusa.

¹ Il funcziunari che fa l'inquisiziun permetta a l'inculpà ed a ses defensur da sa participar a la registraziun da las cumprovas, premess che la lescha n'excludia betg ina participaziun e premess che nagins interess publics u privats impurtants na s'opponian a quai.

² Il funcziunari che fa l'inquisiziun dastga scumandar a l'inculpà ed al defensur da sa participar a la registraziun da las cumprovas, sche lur preschientscha disturba la registraziun.

Ils artitgels 26-28 da la Lescha federala dals 20 da december 1968⁴³ davart la procedura administrativa valan tenor il senn.

¹ Il funcziunari da l'administraziun respectiva che fa l'inquisiziun retschertga ils fatgs e segirescha las cumprovas.

² L'inculpà po pretender da tut temp ch'i vegnian fatgs tscherts acts d'inquisiziun.

³ Sch'i na dovra nagins acts d'inquisiziun spezials, vegn fatg immediatamain il protocol final tenor l'artitgel 61.

⁴ Resalvadas restan las prescripziuns da l'artitgel 65 davart il mandat penal en la procedura scursanida.

¹ L'avertura da l'inquisiziun, ses andament e las constataziuns essenzialas fatgas en quest connex ston resortir da las actas uffizialas.

² Il protocol d'ina interrogaziun vegn scrit durant la tractativa e sia correctadad sto, uschespert che l'interrogaziun è finida, vegnir confermada tras la suttascripziun da l'interrogà, suenter ch'il protocol è vegnì rendì enconuschent ad el, sco er dal funcziunari che fa l'inquisiziun; sche la suttascripziun da l'interrogà manca, sto vegnir inditgà il motiv.

³ Auters acts d'inquisiziun ston vegnir protocollads uschè spert sco pussaivel, il pli tard il lavurdi che suonda; la correctadad dal protocol sto vegnir confermada tras la suttascripziun dal funcziunari che fa l'inquisiziun.

⁴ Mintga protocol sto cuntegnair il lieu e las uras da l'act d'inquisiziun sco er ils nums dals participads. Plinavant sto il protocol inditgar, tge percepziuns ch'il funcziunari che fa l'inquisiziun ha fatg sez e tge ch'è vegnì communitgà da terzas persunas.

¹ Sch'i dovra enconuschientschas spezialas per constatar u per giuditgar ils fatgs, pon vegnir consultads experts.

² L'inculpà sto survegnir la chaschun da pudair s'exprimer davart l'elecziun dals experts e davart las dumondas che vegnan tschentadas a quels.⁴⁸ Per la nominaziun dals experts sco er per lur dretgs e per lur obligaziuns valan dal rest tenor il senn ils artitgels 183-185, 187, 189 sco er 191 CPP⁴⁹ e l'artitgel 61 da la Lescha federala dals 4 da december 1947⁵⁰ davart la procedura civila.⁵¹

¹ Il funcziunari che fa l'inquisiziun ordinescha ina inspecziun al lieu, sche quella po gidar a sclerir ils fatgs. L'inculpà e ses defensur han il dretg d'assister a l'inspecziun al lieu.

² Sche indrizs commerzials ed industrials vegnan suttamess ad ina inspecziun al lieu, stoi vegnir tegnì quint dals interess legitims dal possessur.

¹ Sch'il funcziunari che fa l'inquisiziun è da l'avis che l'inquisiziun saja cumpletta e sch'el è da l'opiniun ch'ina cuntravenziun saja vegnida commessa, fa el in protocol final; quel cuntegna las persunalias da l'inculpà e circumscriva il causal da la cuntravenziun.

² Il funcziunari che fa l'inquisiziun communitgescha il protocol final a l'inculpà ed al dat immediatamain la chaschun da prender posiziun en chaussa, da prender invista da las actas e da proponer ina cumplettaziun da l'inquisiziun.

³ Sche l'inculpà è absent, cur ch'il protocol final vegn redigì, u sche l'inculpà è preschent e fa ina dumonda correspundenta u sche quai è necessari pervia da las circumstanzas, en spezial pervia la grevezza dal cas, ston il protocol final e las communicaziuns necessarias tenor l'alinea 2 vegnir communitgadas en scrit, inditgond il lieu, nua che las actas pon vegnir consultadas. Il termin per s'exprimer e per far propostas finescha en quest cas 10 dis suenter la consegna dal protocol final; el po vegnir prolungà, sch'igl èn avant maun motivs suffizients e sche la prolungaziun vegn dumandada avant la scadenza dal termin.

⁴ Cunter la communicaziun dal protocol final e da ses cuntegn na poi betg vegnir fatg recurs. Cunter la refusa d'ina dumonda da cumplettar l'inquisiziun poi vegnir fatg recurs mo ensemen cun il mandat penal.

⁵ …⁶⁰

¹ Tgi ch'è pertutgà d'ina disposiziun penala u d'ina disposiziun da confiscaziun, po pretender entaifer 10 dis dapi la communicaziun in giudicament tras la dretgira penala.

² La dumonda d'in giudicament giudizial sto vegnir inoltrada en scrit a l'administraziun che ha pronunzià la disposiziun penala u la disposiziun da confiscaziun.

³ Sch'in giudicament tras la dretgira penala na vegn betg pretendì entaifer il termin legal, ha la disposiziun penala u la disposiziun da confiscaziun il medem status sco ina sentenzia cun vigur legala.

¹ Sch'igl è vegnì pretendì in giudicament giudizial u sch'il departament surordinà è da l'avis che las premissas per in chasti da detenziun, per ina mesira da detenziun u per in'expulsiun tenor l'artitgel 66a u 66a^bis dal Cudesch penal⁶³ sajan dadas, accepta l'administraziun respectiva las actas da la procura publica chantunala per mauns da la dretgira penala cumpetenta.⁶⁴ Uscheditg che l'obligaziun da prestaziun u da restituziun, sin la quala sa basa la procedura penala, n'è betg vegnida decidida cun vigur legala u uscheditg ch'ella n'è betg renconuschida tras in pajament senza resalvas, na vegnan las actas betg surdadas.

² La surdada da las actas vala sco accusaziun. Ella sto cuntegnair ils fatgs ed inditgar las disposiziuns penalas applitgablas u renviar a la disposiziun penala.

³ Ina inquisiziun tenor il CPP⁶⁵ n'ha betg lieu; resalvada resta la cumplettaziun da las actas tenor l'artitgel 75 alinea 2.⁶⁶

¹ Partidas en la procedura giudiziala èn l'inculpà, la procura publica dal chantun respectiv u da la Confederaziun e l'administraziun respectiva.⁶⁷

² La persuna pertutgada da la confiscaziun ha ils medems dretgs da partida e po prender ils medems meds legals sco l'inculpà.

¹ La dretgira infurmescha las partidas davart il deposit da las actas. Ella examinescha, sch'in giudicament giudizial è vegnì dumandà a temp.

² La dretgira po, da sai anora u sin proposta d'ina partida, cumplettar u laschar cumplettar las actas avant la tractativa principala.

³ Las partidas ston vegnir infurmadas a temp davart la tractativa principala.

⁴ Ils represchentants da la Procura publica da la Confederaziun e da l'administraziun na ston betg cumparair persunalmain.⁶⁸

⁵ Sin sia dumonda po l'inculpà vegnir dispensà da cumparair.

¹ La tractativa principala po er avair lieu, sche l'inculpà n'è betg cumparì malgrà ina citaziun regulara e sch'el n'ha betg preschentà ina perstgisa suffizienta. In defensur sto vegnir admess.

² Tgi che vegn sentenzià en absenza po, entaifer 10 dis dapi ch'el ha survegnì enconuschientscha da la sentenzia, dumandar in nov giudicament, sch'el è vegnì impedì senza culpa da cumparair a la tractativa principala. Sche la dumonda vegn acceptada, ha lieu ina nova tractativa principala.

³ La dumonda d'in nov giudicament suspenda l'execuziun da la sentenzia mo, sche la dretgira u ses president dispona quai.

⁴ Per la persuna pertutgada d'ina confiscaziun valan questas prescripziuns tenor il senn.

¹ Las actas da l'administraziun davart las cumprovas ch'ella ha rimnà servan er a la dretgira sco mussaments; quella po, da sai anora u sin proposta d'ina partida, rimnar ulteriuras cumprovas che gidan a sclerir ils fatgs u a repeter la registraziun da cumprovas rimnadas da l'administraziun.

² Sch'igl è necessari d'observar interess publics u privats essenzials, en spezial secrets d'uffizi, da professiun u da fatschenta d'ina partida u d'ina terza persuna, sto la dretgira excluder per part u dal tuttafatg la publicitad da las tractativas e da las cussegliaziuns.

³ La dretgira valitescha libramain las cumprovas.

⁴ La decisiun legalmain valaivla davart l'obligaziun da prestaziun u da restituziun è impegnativa per la dretgira; sch'i sa tracta d'ina decisiun da l'administraziun e sche la dretgira considerescha che tala sa basia sin ina violaziun evidenta da la lescha u sin in abus dal liber appreziar, suspenda ella la tractativa principala e returna las actas a l'administraziun respectiva per laschar prender ina nova decisiun. L'artitgel 63 alinea 3 vala tenor il senn.

¹ Cun il consentiment da la Procura publica da la Confederaziun po l'administraziun revocar la disposiziun penala u la disposiziun da confiscaziun, nun che la sentenzia d'emprima instanza saja vegnida communitgada.⁶⁹

² Fin a quest termin po er l'inculpà revocar la dumonda d'in giudicament giudizial.

³ En quests cas vegn suspendida la procedura giudiziala.

⁴ Ils custs da la procedura giudiziala surpiglia quella partida che ha dumandà la revocaziun.

¹ La sentenzia constatescha:

-

l'inculpà;

-

il malfatg;

-

las disposiziuns legalas che vegnan applitgadas;

-

il chasti, la cunresponsabladad tenor l'artitgel 12 alinea 3 e las mesiras spezialas;

-

ils custs da la procedura giudiziala e da la procedura administrativa;

-

il dretg d'indemnisaziun (art. 99 e 101);

-

la disposiziun davart objects sequestrads.

² La sentenzia cun ils motivs da decisiun essenzials sto vegnir communitgada en scrit a las partidas; ella inditgescha ils termins per ils meds legals e las autoritads da recurs.

¹ Cunter decisiuns da las dretgiras chantunalas pon ins prender ils meds legals dal CPP⁷¹.

² Er la Procura publica da la Confederaziun e l'administraziun respectiva pon prender mintgina independentamain quests meds legals.

¹ Ina procedura penala terminada da l'administraziun cun vigur legala tras in mandat penal, tras ina disposiziun penala u tras ina disposiziun da sistida po, sin proposta u d'uffizi, puspè vegnir reprendida:

a.

sche fatgs u mussaments considerabels n'eran betg enconuschents a l'administraziun il mument da la procedura anteriura;

b.

sch'igl è vegnì pronunzià posteriuramain ina sentenzia penala cunter in participant e sche questa sentenzia penala stat en ina cuntradicziun incumpatibla cun il mandat penal u cun la disposiziun penala;

c.

sche la decisiun da l'administraziun è vegnida influenzada tras in act chastiabel.

² La revisiun a favur da l'inculpà è admissibla da tut temp. La surannaziun da la persecuziun penala ch'è resultada suenter che la decisiun contestada è entrada en vigur na cuntrafa betg ad ina nova sentenzia.

³ La revisiun a disfavur da l'inculpà è mo admissibla sin basa da l'alinea 1 literas a e c ed uscheditg che la persecuziun da la cuntravenziun n'è betg surannada. La surannaziun cumenza a currer il mument da la cuntravenziun; la decisiun anteriura na la suspenda betg.

⁴ Per il mandat da confiscaziun e per la disposiziun da confiscaziun valan las prescripziuns dals artitgels 84-88 tenor il senn.

¹ Ils custs da la procedura giudiziala e lur adossament vegnan fixads, cun resalva da l'artitgel 78 alinea 4, tenor ils artitgels 417-428 CPP⁸¹.⁸²

² Ils custs da la procedura davant l'administraziun pon vegnir adossads en la sentenzia da medema maniera sco ils custs da la procedura giudiziala.

¹ Il chantun po pretender da la Confederaziun la restituziun dals custs da process e d'execuziun, per ils quals l'inculpà n'è betg vegnì sentenzià u ch'il sentenzià n'è betg abel da pajar. Exceptads èn salarisaziuns e diarias da funcziunaris sco er taxas e buls.

^1bis Sch'i èn resultads custs extraordinaris pervia da la delegaziun da proceduras tenor l'artitgel 20 alinea 3, po la Confederaziun, sin dumonda, als rembursar per part u dal tuttafatg als chantuns.⁸³

² Differenzas tranter la Confederaziun ed in chantun pertutgant il rembursament dals custs vegnan decididas da la Chombra da recurs dal Tribunal penal federal (art. 25 al. 1).

¹ En la procedura giudiziala vala l'artitgel 99 tenor il senn. La dretgira decida er davart l'indemnisaziun per dischavantatgs subids en proceduras davant l'administraziun.

² Avant che la dretgira fixescha ina indemnisaziun, sto ella dar la chaschun a l'administraziun respectiva da s'exprimer davart il dretg e davart l'autezza da quella sco er da far propostas.

¹ Tgi che ha chaschunà la procedura malignamain, po vegnir obligà da restituir per part u dal tuttafatg a la Confederaziun las indemnisaziuns che ston vegnir pajadas sin fundament dals artitgels 99 u 101.

² L'administraziun respectiva decida davart il dretg da prender regress.

³ Cunter la decisiun poi vegnir fatg recurs entaifer 30 dis dapi la communicaziun tar la Chombra da recurs dal Tribunal penal federal (art. 25 al. 1); las prescripziuns da procedura da l'artitgel 28 alineas 2-5 valan tenor il senn. Sch'i na vegn betg fatg recurs entaifer il termin legal, ha la decisiun il medem status sco ina sentenzia cun vigur legala.

⁴ Il dretg da prender regress scroda, sch'el na vegn betg fatg valair entaifer 3 mais dapi l'entrada en vigur da la decisiun u da la sentenzia davart il dretg d'indemnisaziun.