Questa lescha regla la publicaziun tras la Chanzlia federala:⁵

a.

da las collecziuns dal dretg federal (Collecziun uffiziala da las leschas federalas, CULF e Collecziun sistematica dal dretg federal, CS);

b.

dal Fegl uffizial federal;

c.⁶

d'auters texts che han in connex cun la legislaziun.

¹ La publicaziun tenor questa lescha ha lieu en moda centrala sur ina plattafurma online ch'è accessibla publicamain (plattafurma da publicaziun).

² Ella succeda da princip er en ina furma ch'è legibla d'ina maschina e che permetta da consultar la versiun actuala e las versiuns anteriuras. Il Cussegl federal fixescha las excepziuns.

En la CULF vegnan publitgads:

a.

la Constituziun federala;

b.

las leschas federalas;

c.

las ordinaziuns da l'Assamblea federala;

d.

las ordinaziuns dal Cussegl federal;

e.

ils ulteriurs decrets legislativs da las autoritads federalas sco er d'organisaziuns e da persunas dal dretg public u dal dretg privat che adempleschan incumbensas administrativas, ma che n'appartegnan betg a l'administraziun federala;

f.

ils conclus federals che suttastattan al referendum facultativ;

g.

ils conclus federals davart l'approvaziun da contracts internaziunals;

h.

conclus federals simpels, uschenavant che l'Assamblea federala concluda quai.

¹ Uschenavant ch'els èn liants per la Svizra, vegnan publitgads en la CULF:

a.

ils contracts internaziunals ed ils conclus dal dretg internaziunal che suttastattan al referendum obligatoric tenor l'artitgel 140 alinea 1 litera b u al referendum facultativ tenor l'artitgel 141 alinea 1 litera d Cst.;

b.

ils ulteriurs contracts internaziunals e conclus dal dretg internaziunal che cuntegnan normas da dretg u che autoriseschan da decretar talas.⁸

² Il Cussegl federal po decider che conclus e contracts, che na cuntegnan naginas normas da dretg, vegnian publitgads en la CULF.

³ Il Cussegl federal fixescha las premissas, sut las qualas contracts e conclus che valan maximalmain 6 mais sco er contracts e conclus d'ina impurtanza restrenschida na vegnan betg publitgads en la CULF.⁹

En la CULF vegnan publitgads:

a.

ils contracts tranter la Confederaziun ed ils chantuns che cuntegnan normas da dretg u che autoriseschan da decretar talas;

b.

auters contracts tranter la Confederaziun ed ils chantuns, uschenavant ch'il Cussegl federal decida quai;

c.¹¹

contracts tranter ils chantuns che la Confederaziun ha declerà sco generalmain liants (art. 48a Cst.).

¹ Ils texts tenor ils artitgels 2-4, che n'èn betg adattads da vegnir publitgads en la CULF pervia da lur caracter spezial, vegnan integrads en la CULF mo cun il titel e cun la funtauna sin la plattafurma da publicaziun, en spezial sche:

a.

els concernan mo in pitschen circul da persunas;

b.

els èn da natira tecnica e sa drizzan mo a persunas spezialisadas;

c.

els ston vegnir publitgads en in format che n'è betg adattà per ina publicaziun en la CULF; u

d.

ina lescha federala u in'ordinaziun da l'Assamblea federala ordinescha la publicaziun ordaifer la CULF.

² Texts tenor ils artitgels 2-4 ch'èn publitgads en in auter organ da publicaziun accessibel gratuitamain en Svizra, vegnan menziunads en la CULF mo cun il titel sco er cun la referenza a quest organ u cun la funtauna.

³ Ils artitgels 6-10 e 14 èn applitgabels.

¹ Decrets da la Confederaziun sco er contracts internaziunals e conclus dal dretg internaziunal che ston vegnir tegnids secrets per mantegnair la segirezza interna ed externa da la Svizra u pervia d'obligaziuns che resultan dal dretg internaziunal, na vegnan betg publitgads en la CULF.

² Uschenavant ch'ils texts tenor l'alinea 1 prevesan obligaziuns internaziunalas, vegnan obligadas mo quellas persunas, a las qualas èn vegnidas communitgadas las disposiziuns correspundentas.

¹ Ils texts tenor ils artitgels 2-4 vegnan publitgads en la CULF almain 5 dis avant ch'els entran en vigur.

² Contracts e conclus tenor ils artitgels 3 e 4, dals quals l'entrada en vigur n'è betg anc enconuschenta il mument ch'els vegnan approvads, vegnan publitgads immediatamain suenter che lur entrada en vigur è enconuschenta.

³ In text vegn publitgà excepziunalmain il pli tard il di da l'entrada en vigur (publicaziun urgenta), sche quai è necessari per garantir l'effect.

⁴ Sche la plattafurma da publicaziun n'è betg accessibla, vegnan ils texts publitgads cun auters meds (publicaziun extraordinaria).

¹ Obligaziuns giuridicas da texts tenor ils artitgels 2-4 resultan, uschespert ch'ils texts èn vegnids publitgads tenor las disposiziuns da questa secziun.

² Sch'in decret vegn publitgà en la CULF suenter ch'el è entrà en vigur, resultan obligaziuns da quel decret pir il di suenter sia publicaziun. L'artitgel 7 alinea 3 resta resalvà.

³ Sch'in decret vegn publitgà en ina procedura extraordinaria, ha la persuna pertutgada il dretg da cumprovar ch'ella n'ha betg enconuschì il decret e ch'ella na l'ha betg pudì enconuscher malgrà ch'ella ha duvrà tut la premura pretendida da las circumstanzas.

¹ La Chanzlia chantunala curregia en la CULF sbagls che midan il senn e formulaziuns che na correspundan betg al conclus da l'organ decretant:

a.

en decrets da la Confederaziun, cun excepziun dals decrets da l'Assamblea federala: en atgna responsabladad;

b.

en contracts internaziunals ed en conclus dal dretg internaziunal: en enclegientscha cun ils partenaris da contract.¹⁶

² Per rectifitgar decrets da l'Assamblea federala valan ils artitgels 57 alinea 1^bis e 58 da la Lescha dal parlament dals 13 da december 2002¹⁷.¹⁸

³ Sbagls en decrets da l'Assamblea federala ch'èn resultads tras la publicaziun, vegnan curregids da la Chanzlia federala en la CULF en enclegientscha cun la Cumissiun da redacziun da l'Assamblea federala.¹⁹

La CS è ina collecziun rectifitgada, ordinada tenor domenas ed actualisada permanentamain:

a.

dals texts publitgads en la CULF, cun excepziun dals conclus federals che concernan l'approvaziun da contracts internaziunals u da conclus dal dretg internaziunal e che na cuntegnan naginas normas da dretg; e

b.

da las constituziuns chantunalas.

¹ La Chanzlia federala rectifitgescha nunformalmain en la CS sbagls che na midan betg il senn.

² Ella adatta nunformalmain en la CS indicaziuns sco designaziuns d'unitads administrativas, renviaments, referenzas u abreviaziuns.

³ Per rectifitgar decrets da l'Assamblea federala vala l'artitgel 58 da la Lescha dal parlament dals 13 da december 2002²¹.

¹ En il Fegl uffizial federal vegnan publitgads:

a.

las missivas ed ils sbozs dal Cussegl federal tar decrets da l'Assamblea federala;

b.²²

ils rapports ed ils sbozs da cumissiuns da l'Assamblea federala tar decrets da l'Assamblea federala e las posiziuns correspundentas dal Cussegl federal;

c.²³

...

d.

ils conclus federals davart midadas da la Constituziun sco er davart l'approvaziun da contracts internaziunals tenor l'artitgel 140 alinea 1 litera b Cst.;

e.

las leschas federalas ed ils conclus federals che suttastattan al referendum facultativ;

f.

ils conclus federals simpels che na vegnan betg publitgads en la CULF tenor l'artitgel 2 litera h;

f^bis.²⁴

directivas dal Cussegl federal;

g.

ulteriurs texts che ston vegnir publitgads tenor la legislaziun federala.

² En il Fegl uffizial federal pon ultra da quai vegnir publitgads:

a.

rapports, posiziuns u cunvegnas dal Cussegl federal, da las cumissiuns da l'Assamblea federala u dals tribunals da la Confederaziun, sche quests texts na ston betg vegnir publitgads tenor l'alinea 1;

b.

conclus e communicaziuns dal Cussegl federal;

c.

conclus, directivas e communicaziuns da l'administraziun federala sco er d'organisaziuns e da persunas dal dretg public e dal dretg privat ch'adempleschan incumbensas administrativas, ma che n'appartegnan betg a l'administraziun federala.²⁵

³ Uschenavant che quai para d'esser cunvegnent po la publicaziun vegnir restrenschida al titel sco er a la referenza u a la funtauna (art. 5).

⁴ Per rectifitgar ils texts vala l'artitgel 10 tenor il senn.

¹ Plinavant vegnan publitgads sin la plattafurma da publicaziun:

a.

ils texts cumplets publitgads tras renviament tenor ils artitgels 5 alinea 1 e 13 alinea 3;

b.²⁷

ils documents da consultaziuns en il senn da la Lescha da consultaziun dals 18 da mars 2005²⁸;

c.

versiuns anteriuras dal dretg federal;

d.

translaziuns da publicaziuns uffizialas, en spezial en rumantsch ed en englais.

² Il Cussegl federal po prevair che ulteriurs texts che han in connex cun la legislaziun vegnian publitgads sin la plattafurma da publicaziun.

¹ La publicaziun vegn fatga a medem temp en las linguas uffizialas tudestg, franzos e talian. En cas da decrets èn liantas da medema maniera las trais versiuns.

² Il Cussegl federal po decider che texts publitgads tras renviament tenor l'artitgel 13a alinea 1 litera a ed ulteriurs texts tenor l'artitgel 13a alinea 2 na vegnian betg publitgads en tuttas trais linguas uffizialas u na vegnian publitgads en naginas linguas uffizialas, sche:³⁰

a.

las disposiziuns che quests texts cuntegnan n'obligheschan betg directamain las persunas pertutgadas; u

b.

las persunas pertutgadas dovran quests texts exclusivamain en la lingua originala.

³ La Chanzlia federala po decretar che conclus e communicaziuns da l'administraziun federala sco er d'organisaziuns e da persunas dal dretg public e dal dretg privat vegnian publitgads tenor l'artitgel 13 alinea 2 mo en la lingua uffiziala dal territori linguistic pertutgà, uschenavant ch'els èn exclusivamain d'impurtanza locala.

⁴ Per translatar ils documents tar consultaziuns vala la legislaziun davart la procedura da consultaziun³¹.³²

⁵ La publicaziun da texts en rumantsch sa drizza tenor l'artitgel 11 da la Lescha da linguas dals 5 d'october 2007³³.³⁴

⁶ Ils texts publitgads sin la plattafurma da publicaziun che han ina impurtanza speziala u ch'èn d'in interess internaziunal pon vegnir publitgads en autras linguas, en spezial en englais.³⁵

¹ La Chanzlia federala publitgescha en il Fegl uffizial federal ed en la CULF en las trais linguas uffizialas ils decrets da l'Assamblea federala en la versiun definitiva acceptada da las chombras.

² Per quest intent dastga ella unicamain agiuntar l'infurmaziun davart il termin da referendum, la scadenza dal termin da referendum e l'entrada en vigur, cumplettar renviaments a la CULF, al Fegl uffizial federal ed a la CS sco er far adattaziuns dal format.

¹ Per ils decrets da la Confederaziun, per ils contracts tranter la Confederaziun ed ils chantuns sco er per ils contracts tranter ils chantuns (art. 2 e 4) è decisiva la versiun publitgada en la CULF. Sch'in text vegn publitgà tras in renviament, è decisiva la versiun, a la quala i vegn renvià.

² Decisiva è la versiun publitgada sin la plattafurma da publicaziun.

³ La versiun decisiva da contracts internaziunals e da conclus dal dretg internaziunal resulta da lur disposiziuns.

¹ Ils texts publitgads sin la plattafurma da publicaziun pon vegnir retratgs en furma stampada.

² Il Cussegl federal fixescha sut tge cundiziuns ch'ediziuns periodicas da texts publitgads sin la plattafurma da publicaziun vegnan producidas e distribuidas en furma stampada.

³ El fixescha il dumber minimal d'exemplars da texts publitgads en la CULF ed en il Fegl uffizial federal che vegnan mess a disposiziun en furma stampada, sco er ils lieus nua ch'els vegnan depositads.

Il Cussegl federal fixescha las mesiras necessarias per garantir l'autenticitad, l'integritad e la conservaziun dals texts publitgads sin la plattafurma da publicaziun sco er in manaschi da la plattafurma da publicaziun senza disturbis; per quest intent resguarda el il stadi da la tecnica.

¹ Las publicaziuns tenor questa lescha pon cuntegnair datas persunalas; en spezial pon ellas er cuntegnair datas persunalas spezialmain sensiblas tenor l'artitgel 5 litera c da la Lescha federala dals 25 da settember 2020⁴¹ davart la protecziun da datas, uschenavant che quai è necessari per ina publicaziun previsa en ina lescha federala.⁴²

² Texts che cuntegnan datas persunalas spezialmain sensiblas na dastgan betg restar pli ditg accessibels publicamain online e betg cuntegnair dapli infurmaziuns che quai ch'i dovra tenor lur intent.

³ Il Cussegl federal fixescha las ulteriuras mesiras necessarias per garantir la protecziun da datas persunalas spezialmain sensiblas tar la publicaziun online; per quest intent resguarda el il stadi da la tecnica.

Tar la Chanzlia federala e tar ils posts designads dals chantuns poi vegnir prendì invista:

a.

dals cuntegns da la plattafurma da publicaziun; e

b.

dals decrets publitgads sin via extraordinaria che n'èn betg anc vegnids integrads en la CULF (art. 7 al. 4).

¹ La consultaziun da la plattafurma da publicaziun sco er l'invista en il senn da l'artitgel 18 èn gratuitas.

² Il Cussegl federal regla las taxas per consegnar texts stampads e datas electronicas tenor questa lescha.

Per terzs offerents po il Cussegl federal prevair cundiziuns spezialas, en spezial pretensiuns per l'utilisaziun da datas.

¹ La Chanzlia federala maina la plattafurma da publicaziun.

² Ella ademplescha las ulteriuras incumbensas tenor questa lescha, nun che autras unitads administrativas sajan cumpetentas per talas.

La Lescha da publicaziun dals 21 da mars 1986⁴⁸ vegn abolida.

Las leschas federalas qua sutvart vegnan midadas sco suonda:

…⁴⁹

¹ Questa lescha è suttamessa al referendum facultativ.

² Il Cussegl federal fixescha l'entrada en vigur.

Data da l'entrada en vigur: 1. da schaner 2005⁵⁰