¹ La Confederaziun conceda la permissiun da natiralisaziun mo, sch'il petent:

a.

posseda, il mument da la dumonda, ina permissiun da domicil; e

b.

cumprova, il mument da la dumonda, ina dimora da totalmain 10 onns en Svizra, e trais da quels durant ils ultims 5 onns avant l'inoltraziun da la dumonda.

² Per calcular la durada da la dimora tenor l'alinea 1 litera b vegn il temp, ch'il petent ha vivì en Svizra tranter ses 8. e 18. onn da vita cumplenì, quintà duas giadas. La dimora effectiva sto dentant avair durà almain 6 onns.

¹ Sch'in petent viva en in partenadi registrà cun in burgais svizzer, sto el cumprovar, il mument da la dumonda, ch'el:

a.

ha gì ina dimora da totalmain 5 onns en Svizra, ed in da quels directamain avant l'inoltraziun da la dumonda; e

b.

viva dapi 3 onns en in partenadi registrà cun questa persuna.

² La durada da la dimora pli curta tenor l'alinea 1 litera a vala er per il cas ch'in dals dus partenaris acquista il dretg da burgais svizzer suenter la registraziun dal partenadi:

a.

tras renatiralisaziun; u

b.

tras ina natiralisaziun facilitada grazia a la derivanza d'in genitur svizzer.

La permissiun federala da natiralisaziun vegn concedida, sch'il petent:

a.

è integrà cun success;

b.

enconuscha las relaziuns da viver svizras; e

c.

na periclitescha betg la segirezza interna u externa da la Svizra.

¹ Ina integraziun da success sa mussa en spezial tras quai che la persuna estra:

a.

resguarda la segirezza publica e l'urden public;

b.

respecta las valurs da la Constituziun federala;

c.

è abla da communitgar en il mintgadi a bucca ed en scrit en ina lingua naziunala;

d.

è participada a la vita economica u a l'acquist da furmaziun; e

e.

promova e sustegna l'integraziun dal consort, dal partenari registrà u dals uffants minorens che stattan sut l'atgna tgira genituriala.

² Da la situaziun da persunas che n'adempleschan betg u che adempleschan mo cun grondas difficultads ils criteris d'integraziun da l'alinea 1 literas c e d pervia d'in impediment u d'ina malsogna u pervia d'autras circumstanzas persunalas relevantas, stoi vegnir tegnì quint adequatamain.

³ Ils chantuns pon prevair ulteriurs criteris d'integraziun.

¹ Il chantun designescha l'autoritad, a la quala la dumonda da natiralisaziun sto vegnir inoltrada.

² Sch'il chantun ed - en cas ch'il dretg chantunal prevesa quai - la vischnanca pon garantir la natiralisaziun, tramettan els la dumonda da natiralisaziun al Secretariat da stadi per migraziun (SEM), suenter che l'examinaziun chantunala è terminada.

³ Sche tut las premissas formalas e materialas èn ademplidas, conceda il SEM la permissiun federala da natiralisaziun e trametta quella a l'autoritad chantunala da natiralisaziun per laschar decider davart la natiralisaziun.

⁴ La permissiun federala da natiralisaziun po vegnir midada posteriuramain areguard l'inclusiun d'uffants.

¹ L'autoritad chantunala cumpetenta decida davart la natiralisaziun entaifer 1 onn suenter la concessiun da la permissiun federala da natiralisaziun. Suenter la scadenza da quest termin perda la permissiun federala da natiralisaziun sia valaivladad.

² L'autoritad chantunala cumpetenta refusa la natiralisaziun, sch'ella vegn - suenter la concessiun da la permissiun federala da natiralisaziun - a savair davart fatgs, sin basa dals quals ella n'avess betg concedì la natiralisaziun.

³ Cur che la decisiun chantunala da natiralisaziun entra en vigur, vegn acquistà il dretg da burgais communal e chantunal sco er il dretg da burgais svizzer.

¹ La procedura en il chantun ed en la vischnanca vegn reglada dal dretg chantunal.

² Il dretg chantunal po prevair ch'ina dumonda da natiralisaziun vegnia suttamessa a la decisiun da las persunas cun dretg da votar u da la radunanza communala.

¹ La refusa d'ina dumonda da natiralisaziun sto vegnir motivada.

² Las persunas cun dretg da votar pon refusar ina dumonda da natiralisaziun mo sin fundament d'ina proposta correspundenta motivada.

¹ Ils chantuns procuran che la sfera privata vegnia resguardada a chaschun da la natiralisaziun sin plaun chantunal e communal.

² A las persunas cun dretg da votar ston vegnir communitgadas las suandantas datas:

a.

naziunalitad;

b.

durada da la dimora;

c.

indicaziuns ch'èn necessarias per giuditgar las premissas da natiralisaziun, en spezial da l'integraziun cun success.

³ Cun tscherner las datas tenor l'alinea 2 resguardan ils chantuns il circul dals adressats.

¹ La legislaziun chantunala prevesa ina durada minimala da la dimora da 2 fin 5 onns.

² En cas ch'il petent transferescha ses domicil en in'autra vischnanca u en in auter chantun, restan il chantun e la vischnanca che han survegnì la dumonda da natiralisaziun, vinavant cumpetents, sch'els han examinà definitivamain las premissas da natiralisaziun tenor ils artitgels 11 e 12.³

Sch'in chantun u ina vischnanca conceda il dretg da burgais d'onur ad ina persuna estra senza permissiun federala da natiralisaziun, n'ha quai betg l'effect d'ina natiralisaziun.

¹ Per ina natiralisaziun facilitada ston esser ademplids ils criteris d'integraziun tenor l'artitgel 12 alineas 1 e 2.

² Ultra da quai premetta ina natiralisaziun facilitada ch'il petent na pericliteschia betg la segirezza interna ed externa da la Svizra.

³ Per petents che n'han nagina dimora en Svizra valan las premissas dals alineas 1 e 2 tenor il senn.

¹ Tgi che posseda ina naziunalitad estra po, suenter avair maridà in burgais svizzer, inoltrar ina dumonda per ina natiralisaziun facilitada, sch'el:

a.

viva dapi 3 onns en ina cuminanza conjugala cun il consort; e

b.

ha gì ina dimora da totalmain 5 onns en Svizra, ed in da quels directamain avant l'inoltraziun da la dumonda.

² Tgi che viva u ha vivì a l'exteriur, po er inoltrar la dumonda, sch'el:

a.

viva dapi 6 onns en ina cuminanza conjugala cun il consort; e

b.

ha ina stretga relaziun cun la Svizra.

³ In burgais ester po er inoltrar ina dumonda per ina natiralisaziun facilitada tenor ils alineas 1 e 2, sch'il consort acquista il dretg da burgais svizzer suenter la maridaglia:

a.

tras renatiralisaziun; u

b.

tras ina natiralisaziun facilitada grazia a la derivanza d'in genitur svizzer.

⁴ La persuna natiralisada acquista il dretg da burgais chantunal e communal da ses consort svizzer. Sch'il consort posseda plirs dretgs da burgais chantunals e communals, po la persuna natiralisada sa decider d'acquistar mo in sulet da quels.

¹ Tgi che ha vivì durant 5 onns en buna fai cun la persvasiun da posseder il dretg da burgais svizzer ed è effectivamain vegnì tractà da las autoritads chantunalas u communalas sco burgais svizzer durant quest temp, po inoltrar ina dumonda per ina natiralisaziun facilitada.

² La persuna natiralisada survegn il dretg da burgais da quel chantun ch'è responsabel per il sbagl. Quel decida tge dretg da burgais communal che vegn acquistà il medem mument.

¹ In uffant minoren senza naziunalitad po inoltrar ina dumonda per ina natiralisaziun facilitada, sch'el cumprova ina dimora da totalmain 5 onns en Svizra, ed in da quels directamain avant l'inoltraziun da la dumonda.

² Mintga dimora en Svizra en concordanza cun las prescripziuns dal dretg d'esters vegn messa a quint.

³ L'uffant natiralisà acquista il dretg da burgais da la vischnanca e dal chantun da domicil.

¹ In uffant ester ch'era minoren cur ch'in genitur ha inoltrà la dumonda da natiralisaziun e che n'è betg vegnì inclus en la natiralisaziun dal genitur, po inoltrar - avant la cumplenida dal 22. onn da vegliadetgna - ina dumonda per ina natiralisaziun facilitada, sch'el cumprova ina dimora da totalmain 5 onns en Svizra, e trais da quels directamain avant l'inoltraziun da la dumonda.

² L'uffant natiralisà acquista il dretg da burgais dal genitur svizzer.

¹ Sin dumonda po l'uffant da geniturs esters vegnir natiralisà en moda facilitada, sche las suandantas premissas èn ademplidas:

a.

almain in dals tats è naschì en Svizra u i vegn fatg valair vardaivlamain che tal haja acquistà in dretg da dimora;

b.

almain in genitur ha acquistà ina permissiun da domicil, è sa trategnì durant almain 10 onns en Svizra ed ha visità durant almain 5 onns la scola obligatorica en Svizra;

c.

l'uffant è naschì en Svizra;

d.

l'uffant posseda ina permissiun da domicil ed ha visità durant almain 5 onns la scola obligatorica en Svizra.

² La dumonda sto vegnir inoltrada avant la cumplenida dal 25. onn da vegliadetgna.

³ L'uffant natiralisà acquista il dretg da burgais da la vischnanca e dal chantun, nua ch'el è domicilià il mument da l'acquist dal dretg da burgais.

¹ Il SEM decida davart la natiralisaziun facilitada; avant che approvar ina dumonda, taidla el il chantun.

² Il Cussegl federal regla la procedura.

¹ Ina renatiralisaziun premetta ch'il petent:

a.

saja integrà cun success, sch'el sa trategna en Svizra;

b.

haja ina stretga relaziun cun la Svizra, sch'el viva a l'exteriur;

c.

resguardia la segirezza publica e l'urden public;

d.

respectia las valurs da la Constituziun federala; e

e.

na pericliteschia betg la segirezza interna u externa da la Svizra.

² Per petents che na sa trategnan betg en Svizra valan las premissas da l'alinea 1 literas c-e tenor il senn.

¹ Tgi che ha pers il dretg da burgais svizzer, po inoltrar entaifer 10 onns ina dumonda da renatiralisaziun.

² Persunas che han dapi 3 onns dimora en Svizra pon dumandar la renatiralisaziun er suenter la scadenza dal termin tenor l'alinea 1.

Tras la renatiralisaziun acquista il petent il dretg da burgais chantunal e communal ch'el aveva sco ultim.

¹ Il SEM decida davart la renatiralisaziun; avant che approvar ina dumonda, taidla el il chantun.

² Il Cussegl federal regla la procedura.

Ils uffants minorens dal petent vegnan per regla inclus en la natiralisaziun, sch'els vivan ensemen cun il petent. Per uffants da 12 onns e dapli ston las premissas tenor ils artitgels 11 fin 12 vegnir examinadas en moda independenta e resguardond la vegliadetgna.

¹ Uffants minorens pon inoltrar la dumonda da natiralisaziun mo tras lur represchentanza legala.

² Uffants minorens da 16 onns e dapli ston ultra da quai declerar en scrit lur atgna intenziun da vulair acquistar il dretg da burgais svizzer.

La maiorennitad e la minorennitad en il senn da questa lescha sa drizzan tenor l'artitgel 14 dal Cudesch civil svizzer⁵.

¹ A la durada da la dimora vegn messa a quint la dimora en Svizra cun titels da dimora en furma:

a.

d'ina permissiun da dimora u da domicil;

b.

d'ina admissiun provisorica; en quest cas vegn messa a quint la mesadad da la durada da la dimora; u

c.

d'ina carta da legitimaziun emessa dal Departament federal d'affars exteriurs u d'in titel da dimora cumparegliabel.

² La dimora na vegn betg interrutta, sche la persuna estra banduna per in curt temp la Svizra cun l'intenziun da returnar en Svizra.

³ En cas d'ina partenza a l'exteriur vala la dimora en Svizra sco annullada, sche la persuna estra annunzia sia partenza a l'autoritad cumpetenta u viva durant dapli che 6 mais effectivamain a l'exteriur.

¹ Sch'i vegn inoltrada ina dumonda per ina natiralisaziun ordinaria e sche las premissas tenor l'artitgel 9 èn ademplidas, examinescha l'autoritad chantunala cumpetenta, sche las premissas da l'artitgel 11 literas a e b èn ademplidas.

² Il SEM incumbensescha l'autoritad chantunala da natiralisaziun da far las retschertgas ch'èn necessarias per giuditgar las premissas d'ina natiralisaziun facilitada u d'ina renatiralisaziun, per annullar ina natiralisaziun u per retrair il dretg da burgais svizzer.

³ Il Cussegl federal regla la procedura. El po decretar directivas unitaras per rediger rapports da retschertga e prevair termins regulars per far las retschertgas menziunadas en l'alinea 2.

¹ Las autoritads federalas, chantunalas e communalas pon incassar taxas per las proceduras da natiralisaziun u per las proceduras concernent annullaziuns da natiralisaziuns.

² Las taxas dastgan sin il pli cuvrir ils custs.

³ Per las proceduras da ses champ da cumpetenza po la Confederaziun pretender in pajament anticipà da las taxas.

¹ Il SEM po annullar la natiralisaziun, sch'ella è vegnida obtegnida cun far faussas indicaziuns u cun zuppentar fatgs relevants.

² La natiralisaziun po vegnir annullada entaifer 2 onns, suenter ch'il SEM è vegnì a savair davart ils fatgs giuridicamain relevants, dentant fin il pli tard entaifer 8 onns suenter l'acquist dal dretg da burgais svizzer. Suenter mintga act d'inquisiziun che vegn communitgà a la persuna natiralisada, cumenza in nov termin da surannaziun da 2 onns. Durant ina procedura da recurs èn ils termins suspendids.

³ Sut las medemas premissas po la natiralisaziun tenor ils artitgels 9-19 er vegnir annullada da las autoritads chantunalas.

⁴ L'annullaziun s'extenda sin tut ils uffants che han acquistà il dretg da burgais svizzer sin basa da la natiralisaziun annullada. Exceptads èn uffants che:

a.

han - il mument che la decisiun davart l'annullaziun vegn prendida - cumplenì il 16. onn da vegliadetgna ed adempleschan las premissas da domicil tenor l'artitgel 9 sco er las premissas da qualificaziun tenor l'artitgel 11; u

b.

daventassan senza naziunalitad pervia da l'annullaziun.

⁵ Suenter che l'annullaziun d'ina natiralisaziun è entrada en vigur, po ina nova dumonda da natiralisaziun vegnir inoltrada pir suenter la scadenza da 2 onns.

⁶ Il termin da spetga da l'alinea 5 na vala betg per ils uffants inclus en l'annullaziun.

⁷ Ensemen cun l'annullaziun vegn disponida er la retratga dals documents d'identitad.

¹ Sin lur dumonda vegnan burgais svizzers relaschads or dal dretg da burgais, sch'els n'han nagin domicil en Svizra e possedan in'autra naziunalitad u han la garanzia da survegnir in tala. L'artitgel 31 vala tenor il senn.

² La relaschada vegn pronunziada da l'autoritad dal chantun d'origin.

³ La perdita dal dretg da burgais chantunal e communal ed uschia dal dretg da burgais svizzer entra en vigur cun la consegna dal document da relaschada.

¹ En la relaschada vegnan inclus ils uffants minorens che:

a.

stattan sut la tgira genituriala da las persunas relaschadas;

b.

n'han nagin domicil en Svizra; e

c.

possedan in'autra naziunalitad u han la garanzia da survegnir in tala.

² Uffants minorens da 16 onns e dapli vegnan inclus en la relaschada mo, sch'els dattan lur consentiment en scrit a tala.

¹ Il chantun d'origin emetta in document da relaschada che cuntegna tut las persunas pertutgadas da la relaschada.

² Il SEM procura per la consegna dal document da relaschada ed infurmescha il chantun, ch'il document saja vegnì consegnà.

³ El suspenda la consegna, sch'i na po betg vegnir fatg quint che la persuna relaschada survegnia la naziunalitad estra garantida.

⁴ Sch'il lieu da dimora da la persuna relaschada n'è betg enconuschent, po la relaschada vegnir publitgada en il Fegl uffizial federal. Questa publicaziun ha ils medems effects sco la consegna dal document da relaschada.

Per tractar ina dumonda da relaschada pon ils chantuns incassar taxas che cuvran ils custs.

¹ Persunas svizras che possedan il dretg da burgais da plirs chantuns, pon inoltrar la dumonda ad in dals chantuns d'origin.

² Sch'in chantun d'origin decida davart la relaschada, ha la consegna da la decisiun per consequenza ch'il dretg da burgais svizzer sco er tut ils dretgs da burgais chantunals e communals van a perder.

³ Il chantun che ha decidì davart la relaschada, infurmescha d'uffizi ils auters chantuns d'origin.

Cun il consentiment da l'autoritad dal chantun d'origin po il SEM retrair il dretg da burgais svizzer, chantunal e communal d'in burgais dubel, sche ses cumportament è in dischavantatg considerabel per ils interess u per la reputaziun da la Svizra.