¹ La procuraziun e l'elavuraziun d'infurmaziuns dal SIC serva:

a.

a percepir ad ura ed ad impedir smanatschas da la segirezza interna u externa che vegnan chaschunadas da:

1.

terrorissem,

2.

spiunascha,

3.

la derasaziun d'armas nuclearas, biologicas u chemicas, inclusiv lur sistems purtaders, sco er tut la rauba e tut las tecnologias da gener civil e militar che pon vegnir duvradas per construir questas armas (proliferaziun NBC) u dal commerzi illegal cun substanzas radioactivas, cun material da guerra u cun auter material d'armament,

4.⁴

attatgas sin il provediment d'aua da baiver e d'energia, sin infrastructuras d'infurmaziun, da communicaziun e da transport sco er sin ulteriurs process, sistems ed indrizs ch'èn essenzials per il funcziunament da l'economia respectivamain per il bainstar da la populaziun (infrastructuras criticas),

5.

extremissem violent;

b.

a constatar, observar e giuditgar andaments a l'exteriur ch'èn relevants per la politica da segirezza;

c.

a proteger l'abilitad d'agir da la Svizra;

d.

a proteger ulteriurs interess impurtants da la Svizra tenor l'artitgel 3, sch'igl è avant maun ina incumbensa concreta dal Cussegl federal per quai.

² Il SIC giuditgescha la situaziun da smanatscha ed orientescha cuntinuadamain ils uffizis federals pertutgads e las autoritads executivas chantunalas pertutgadas davart eventualas smanatschas sco er davart mesiras prendidas e planisadas tenor questa lescha. En cas da basegn alarmescha el ils uffizis statals cumpetents.

³ El infurmescha - resguardond la protecziun da la funtauna - auters uffizis da la Confederaziun e dals chantuns davart andaments e davart enconuschientschas che concernan las incumbensas legalas da quests uffizis per proteger la segirezza interna u externa.

⁴ El tgira, en connex cun il servetsch d'infurmaziun, las relaziuns cun posts da servetsch da l'exteriur.

⁵ El garantescha in preavertiment tras il servetsch d'infurmaziun per proteger las infrastructuras criticas.

⁶ El realisescha programs per infurmar e per sensibilisar davart smanatschas da la segirezza interna u externa.

⁷ El protegia ses collavuraturs, sias installaziuns, sias funtaunas e las datas ch'el tracta.

¹ Il SIC prenda mesiras per garantir la protecziun e la segirezza da ses collavuraturs, da sias installaziuns e da las datas ch'el tracta. Per quest intent po el:

a.

far en sias localitads controllas da las tastgas e da persunas tar:

1.

collavuraturs dal SIC,

2.

persunas che lavuran per in temp limità per il SIC,

3.

collavuraturs d'interpresas che furneschan servetschs a favur dal SIC en sias localitads;

b.

far controllas en las localitads dal SIC per verifitgar, sche las prescripziuns per proteger infurmaziuns classifitgadas vegnan observadas;

c.

survegliar cun video locals d'archiv, da tresor e da deposit sco er las zonas d'access a las localitads dal SIC;

d.

metter en funcziun en las localitads che vegnan duvradas dad el indrizs da telecommunicaziun disturbants tenor l'artitgel 34 alinea 1^ter da la Lescha da telecommunicaziun dals 30 d'avrigl 1997⁵.

² Il SIC maina ina rait da computer protegida per impedir che persunas nunautorisadas hajan access a ses sistems d'infurmaziun che ston vegnir protegids spezialmain.

¹ Per lur acziuns en Svizra dastgan ils collavuraturs dal SIC vegnir equipads cun armas, sch'els èn exposts a periclitaziuns spezialas en il rom da lur funcziun e da lur incumbensa uffiziala.

² Collavuraturs armads dastgan duvrar lur arma mo en cas da defensiun legitima u da situaziuns d'urgenza e mo en ina moda e maniera ch'è adequata a las circumstanzas.

³ Il Cussegl federal fixescha las categorias da collavuraturs armads sco er lur scolaziun.

¹ Mintga chantun designescha in'autoritad che collavura cun il SIC cun l'intent d'exequir questa lescha (autoritad executiva chantunala). El procura che questa autoritad possia exequir las incumbensas dal SIC senza retard.

² Il SIC dat las incumbensas a las autoritads executivas chantunalas en scrit; en cas urgents po el dar ina incumbensa a bucca e confermar tala posteriuramain en scrit.

¹ Il Departament federal da defensiun, protecziun da la populaziun e sport (DDPS) infurmescha las conferenzas interchantunalas da las regenzas regularmain sco er en cas d'eveniments spezials davart il giudicament da la situaziun da smanatscha.

² Il SIC infurmescha las autoritads executivas chantunalas davart eveniments che concernan l'execuziun da lur incumbensas.

¹ Il SIC infurmescha las instanzas cumpetentas dal Servetsch d'infurmaziun da l'armada e dal servetsch da segirezza militara davart eveniments che concernan l'execuziun da lur incumbensas.

² En il sectur dals contacts militars internaziunals po el collavurar cun las instanzas da l'armada, po dumandar infurmaziuns da talas e dar ad ellas incumbensas per la collavuraziun internaziunala.

³ Il Cussegl federal regla:

a.

la collavuraziun ed il barat d'infurmaziuns tranter il SIC e las instanzas cumpetentas dal Servetsch d'infurmaziun da l'armada;

b.

la repartiziun da las incumbensas tranter il SIC ed il servetsch da segirezza militara durant in servetsch che promova la pasch, durant in servetsch d'assistenza u durant in servetsch activ.

¹ En il rom da l'artitgel 70 alinea 1 litera f po il SIC collavurar cun servetschs d'infurmaziun e cun autoritads da segirezza da l'exteriur per exequir questa lescha:

a.

cun prender encunter u cun dar enavant infurmaziuns utilas;

b.

cun far cuminaivlamain discurs spezials e dietas;

c.

cun realisar activitads cuminaivlas per acquirir e per evaluar infurmaziuns sco er per giuditgar la situaziun da smanatscha;

d.

cun acquirir infurmaziuns per il stadi che fa la dumonda e cun las dar vinavant per giuditgar, sch'ina persuna po cooperar a projects da l'exteriur classifitgads en il sectur da la segirezza interna u externa u survegnir access ad infurmaziuns, a materialias u ad installaziuns da l'exteriur classifitgadas;

e.

cun sa participar a sistems d'infurmaziun internaziunals automatisads en il rom da l'artitgel 70 alinea 3.

² En enclegientscha cun il Departament federal d'affars exteriurs (DFAE) po el emploiar collavuraturs en las represchentanzas svizras a l'exteriur per promover contacts internaziunals. Per exequir questa lescha collavuran quels directamain cun las autoritads cumpetentas dal stadi d'accoglientscha e da terzs stadis.

³ La collavuraziun cun servetschs d'infurmaziun esters per ademplir incumbensas dal servetsch d'infurmaziun tenor questa lescha è chaussa dal SIC.

⁴ Ils chantuns pon collavurar cun las autoritads da polizia estras ch'èn cumpetentas per quai en cas da dumondas da segirezza en la regiun da cunfin.

Funtaunas d'infurmaziun publicas èn en spezial:

a.

las medias accessiblas a la publicitad;

b.

ils registers da las autoritads da la Confederaziun e dals chantuns ch'èn accessibels a la publicitad;

c.⁶

las datas persunalas che persunas privatas han rendì accessiblas a la publicitad;

d.

las decleraziuns fatgas en la publicitad.

¹ Il SIC dastga observar andaments ed instituziuns en lieus publics ed accessibels libramain e far da quai registraziuns audiovisualas. El po utilisar per quai urdains sgulants e satellits.

² L'observaziun e la registraziun audiovisuala d'andaments e d'installaziuns ch'èn dad attribuir a la sfera privata protegida n'èn betg admessas. Registraziuns audiovisualas che ston vegnir attribuidas a la sfera privata protegida, che na pon per motivs tecnics però betg vegnir impedidas, ston vegnir destruidas immediatamain.

¹ Funtaunas umanas èn persunas che:

a.

communitgeschan al SIC infurmaziuns u enconuschientschas;

b.

prestan servetschs per il SIC che servan ad ademplir las incumbensas tenor questa lescha;

c.

sustegnan il SIC a procurar infurmaziuns.

² Il SIC po indemnisar adequatamain las funtaunas umanas per lur activitad. Sche quai è necessari per proteger la funtauna u per l'ulteriura procuraziun d'infurmaziuns, na valan questas indemnisaziuns ni sco entradas suttamessas a la taglia, ni sco entradas en il senn da la Lescha federala dals 20 da december 1946⁷ davart l'assicuranza per vegls e survivents.

³ Il SIC prenda las mesiras ch'èn necessarias per proteger corp e vita da las funtaunas umanas. Las mesiras pon er vegnir prendidas per persunas che stattan datiers a las funtaunas umanas.

⁴ Il schef dal DDPS po autorisar il SIC en il cas singul da dar a las funtaunas umanas, cur che la collavuraziun è terminada, ina legenda u ina identitad da finta, sche quai è necessari per proteger il corp e la vita da las persunas pertutgadas.

⁵ Las mesiras tenor ils alineas 3 e 4 èn limitadas a la perioda da la periclitaziun concreta. Excepziunalmain poi vegnir desistì d'ina limitaziun temporara u ina mesira limitada temporarmain po vegnir midada en ina mesira illimitada temporarmain, sche las ristgas per las persunas pertutgadas èn spezialmain grondas e sch'i sto vegnir fatg quint ch'ellas existian vinavant.

¹ Il SIC po publitgar il signalament da persunas e da vehichels en il sistem informatisà da retschertga da la polizia tenor l'artitgel 15 alinea 1 da la Lescha federala dals 13 da zercladur 2008⁸ davart ils sistems d'infurmaziun da polizia federala (LSIP) sco er en la part naziunala dal sistem d'infurmaziun da Schengen tenor l'artitgel 16 alinea 2 LSIP.

² La publicaziun d'in signalament d'ina persuna u d'in vehichel è mo admessa, sche indizis motivads èn avant maun, che:

a.

la persuna pertutgada represchenta ina smanatscha concreta per la segirezza interna u externa tenor l'artitgel 6 alinea 1 litera a;

b.

il vehichel vegn duvrà d'ina persuna en il senn da la litera a;

c.

il vehichel vegn duvrà per in'autra smanatscha concreta per la segirezza interna u externa tenor l'artitgel 6 alinea 1 litera a;

d.

igl è necessari da determinar il lieu, nua ch'ina persuna u in vehichel sa chatta per proteger ulteriurs interess impurtants da la Svizra tenor l'artitgel 3.

³ Il signalament na dastga betg vegnir publitgà per survegliar il vehichel d'ina persuna che appartegna ad ina da las gruppas professiunalas menziunadas en ils artitgels 171-173 dal Cudesch da procedura penala svizzer (CPP)⁹.

¹ Il directur dal SIC po permetter ch'ils collavuraturs dal SIC vegnian munids cun ina legenda, per che lur appartegnientscha al SIC na saja betg percorschibla.

² Ultra da quai po el permetter en enclegientscha u sin dumonda d'in chantun ch'il SIC muneschia cun ina legenda er appartegnents da las autoritads executivas chantunalas.

³ Per crear e per mantegnair ina legenda po il SIC far u midar documents. Las autoritads cumpetentas federalas, chantunalas e communalas èn obligadas da collavurar cun il SIC.

⁴ Il directur dal SIC rapportescha mintga onn al schef dal DDPS, co che las creaziuns da legendas vegnan pratitgadas ed applitgadas.

⁵ Per mascrar l'appartegnientscha al SIC u ad ina autoritad executiva chantunala na dovri nagina permissiun speziala, sche quai vegn fatg senza duvrar documents ch'èn vegnids creads u midads spezialmain per quai.

¹ Il schef dal DDPS po permetter che las suandantas persunas vegnian munidas cun ina identitad da finta, che las dat ina identitad, che divergescha da la vaira identitad, per garantir lur segirezza u la procuraziun d'infurmaziuns:

a.

collavuraturs dal SIC;

b.

collavuraturs da las autoritads executivas chantunalas che lavuran per incumbensa da la Confederaziun, sch'il chantun respectiv è perencletg cun quai u sch'el dumonda quai;

c.

funtaunas umanas en il rom d'ina tscherta operaziun.

² L'identitad da finta po vegnir duvrada uschè ditg, sco che quai è necessari per garantir la segirezza da la persuna pertutgada u la procuraziun d'infurmaziuns. Sia utilisaziun è limitada:

a.

a maximalmain 5 onns per collavuraturs dal SIC u dals organs da segirezza dals chantuns; la durada po vegnir prolungada en cas da basegn mintgamai per maximalmain 3 ulteriurs onns;

b.

a maximalmain 12 mais per funtaunas umanas; la durada po vegnir prolungada en cas da basegn mintgamai per maximalmain 12 ulteriurs mais.

³ L'utilisaziun d'ina identitad da finta per procurar infurmaziuns è admessa mo, sche quai pertutga in champ d'incumbensas tenor l'artitgel 6 alinea 1 e sche:

a.

la procuraziun d'infurmaziuns senza identitad da finta è restada senza success, fiss vana senza l'utilisaziun da l'identitad da finta u vegniss engrevgiada en moda sproporziunada; u

b.

in bain giuridic sco il corp e la vita u l'integritad corporala da la persuna ch'è fatschentada da procurar l'infurmaziun u d'ina persuna che stat datiers ad ella è smanatschà.

⁴ Per crear e per mantegnair ina identitad da finta po il SIC far u midar documents d'identitad, attestats ed ulteriurs documents sco er datas che sa refereschan a la persuna. Las autoritads cumpetentas federalas, chantunalas e communalas èn obligadas da collavurar cun il SIC.

⁵ Il SIC prenda las mesiras necessarias per che las persunas munidas cun ina identitad da finta na vegnian betg scuvridas.

¹ Autoritads da la Confederaziun e dals chantuns sco er organisaziuns, a las qualas la Confederaziun u ils chantuns han delegà l'adempliment d'incumbensas publicas, èn obligadas en il cas singuls da dar al SIC, sin sia dumonda motivada, quellas infurmaziuns ch'èn necessarias per percorscher u per dustar ina smanatscha concreta da la segirezza interna u externa u per proteger ulteriurs interess impurtants da la Svizra tenor l'artitgel 3.

² Ina smanatscha concreta da la segirezza interna u externa è avant maun, sch'in bain giuridic impurtant sco il corp e la vita u la libertad da persunas u l'existenza ed il funcziunament dal stadi è pertutgà e sche la smanatscha deriva da:

a.

activitads terroristicas en il senn da stentas per influenzar u per midar l'urden dal stadi che duain vegnir realisadas u favurisadas cun commetter u cun smanatschar grevs malfatgs u cun derasar tema ed anguscha;

b.

spiunascha tenor ils artitgels 272-274 e 301 dal Cudesch penal svizzer (CP)¹⁰ sco er tenor ils artitgels 86 e 93 da la Lescha penala militara dals 13 da zercladur 1927¹¹;

c.

proliferaziun NBC u commerzi illegal cun substanzas radioactivas, cun material da guerra u cun auter material d'armament;

d.

in'attatga sin ina infrastructura critica; u

e.

activitads d'in extremissem violent en il senn da stentas d'organisaziuns che refusan la basa democratica e dal stadi da dretg e che commettan, promovan u sustegnan acts violents per cuntanscher lur finamiras.

³ Las autoritads e las organisaziuns tenor l'alinea 1 èn obligadas da taschair envers terzas persunas davart la dumonda dal SIC e davart infurmaziuns ch'èn eventualmain vegnidas dadas. Exceptada da quai è l'infurmaziun da posts superiurs e d'organs da surveglianza.

⁴ Ellas pon - senza ch'ellas sajan vegnidas intimadas - communitgar infurmaziuns, sch'ellas constateschan ina smanatscha concreta da la segirezza interna u externa tenor l'alinea 2.

⁵ Il Cussegl federal determinescha en in'ordinaziun las organisaziuns ch'èn obligadas da dar infurmaziuns; latiers tutgan en spezial organisaziuns dal dretg public e dal dretg privat che n'appartegnan betg a l'administraziun federala, uschenavant ch'ellas relaschan decrets u disposiziuns d'emprima instanza en il senn da l'artitgel 5 da la Lescha federala dals 20 december 1968¹² davart la procedura administrativa u uschenavant ch'ellas adempleschan incumbensas d'execuziun ch'èn vegnidas delegadas ad ellas da la Confederaziun; exceptads en ils chantuns.

¹ Las suandantas autoritads èn obligadas da dar infurmaziuns al SIC per che quel possia ademplir sias incumbensas:

a.

dretgiras, autoritads da persecuziun penala sco er autoritads da l'execuziun da chastis e da mesiras;

b.

guardias da cunfin ed autoritads da duana;

c.

autoritads da la segirezza militara, dal Servetsch d'infurmaziun da l'armada e dals fatgs da controlla militars;

d.

autoritads da la Confederaziun e dals chantuns ch'èn cumpetentas per l'entrada en Svizra e per la dimora da persunas estras sco er per dumondas d'asil;

e.

autoritads che coopereschan ad incumbensas da la polizia da segirezza;

f.

controllas d'abitants;

g.

autoritads ch'èn responsablas per il traffic diplomatic e consular;

h.

autoritads ch'èn responsablas per permetter il traffic cun tscherta rauba;

i.

autoritads ch'èn responsablas per il funcziunament da sistems d'informatica;

j.

autoritads ch'èn responsablas per la surveglianza dal martgà da finanzas e per prender encunter annunzias en cas da suspect da la lavada da daners tar cas da finanziaziun dal terrorissem e da finanziaziun d'activitads da proliferaziun NBC a norma da la Lescha dals 10 d'october 1997¹³ davart la lavada da daners suspectus.

² Las autoritads tenor l'alinea 1 èn obligadas da taschair envers terzas persunas davart la dumonda dal SIC e davart infurmaziuns ch'èn eventualmain vegnidas dadas. Exceptada da quai è l'infurmaziun da posts superiurs e d'organs da surveglianza.

³ Las autoritads tenor l'alinea 1 communitgeschan - senza ch'ellas sajan vegnidas intimadas - infurmaziuns, sch'ellas constateschan ina smanatscha concreta e greva da la segirezza interna u externa.¹⁴

⁴ Il Cussegl federal fixescha en ina glista betg publica, tge andaments e tge constataziuns che ston vegnir communitgads al SIC senza intimaziun da sia vart. El circumscriva la dimensiun da l'obligaziun d'annunzia e la procedura d'al dar infurmaziuns.

En cas d'infurmaziuns tenor l'artitgel 19 u 20 resta observà il secret professiunal protegì tras lescha.

¹ En cas da divergenzas d'opiniun tranter il SIC ed in'autra unitad da l'administraziun federala areguard l'obligaziun da dar infurmaziuns tenor l'artitgel 19 u 20 decida mintgamai l'autoritad da surveglianza cuminaivla definitivamain.

² En cas da divergenzas d'opiniun tranter il SIC ed in'organisaziun, in organ u in'autoritad, che n'appartegna betg a l'administraziun federala, areguard l'obligaziun da dar infurmaziuns tenor l'artitgel 19 u 20 decida il Tribunal administrativ federal tenor l'artitgel 36a da la Lescha dals 17 da zercladur 2005¹⁵ davart il Tribunal administrativ federal.

¹ Il SIC po prender encunter annunzias da mintga persuna.

² Cun dumondas a bucca u en scrit po el sa procurar sistematicamain infurmaziuns ch'el dovra per ademplir sias incumbensas. El po envidar en scrit persunas ad interrogaziuns.

³ El renda attent la persuna che vegn dumandada da dar infurmaziuns, ch'ella fetschia quai facultativamain; exceptà è la procuraziun d'infurmaziuns cun duvrar ina legenda.

¹ Per ademplir sias incumbensas tenor l'artitgel 6 alinea 1 litera a po il SIC laschar tegnair si ina persuna per constatar sia identitad e per l'interrogar curtamain en il senn da l'artitgel 23.

² La fermada vegn fatga dals appartegnents d'in corp da polizia chantunals.

³ Il SIC po obligar la persuna tegnida si dad inditgar sias persunalias e da preschentar ses documents d'identitad.

¹ Sch'igl è necessari per percorscher, per impedir u per dustar ina smanatscha concreta da la segirezza interna u externa tenor l'artitgel 19 alinea 2 po il SIC pretender en il cas singuls las suandantas infurmaziuns e registraziuns:

a.

d'ina persuna natirala u giuridica che fa transports da professiun u che metta a disposiziun u intermediescha meds da transport: infurmaziuns davart ina prestaziun ch'ella ha furnì;

b.

da gestiunaris privats d'infrastructuras da segirezza, en spezial d'apparats per transmetter e per registrar maletgs: la consegna da registraziuns inclusiv registraziuns d'andaments sin terren public.

² Plinavant po il SIC sa procurar infurmaziuns tenor l'artitgel 15 da la Lescha federala dals 18 da mars 2016¹⁶ davart la surveglianza da la posta e da la telecommunicaziun (LSPT).¹⁷

¹ Per las suandantas mesiras da procuraziun dovri in'autorisaziun:

a.¹⁸

survegliar il traffic da posta e da telecommunicaziun e pretender metadatas dal traffic da posta e da telecommunicaziun tenor la LSPT¹⁹;

a^bis.²⁰

applitgar apparats tecnics spezials per survegliar il traffic da telecommunicaziun cun l'intent da registrar communicaziuns, d'identifitgar u da localisar ina persuna u ina chaussa, premess che las mesiras da surveglianza tenor la litera a sajan restadas senza success, fissan invanas u vegnissan engrevgiadas sproporziunadamain e premess che las permissiuns tenor il dretg da telecommunicaziun sajan avant maun per ils apparats tecnics spezials;

b.

applitgar instruments da localisaziun per constatar il lieu ed ils moviments da persunas u da chaussas;

c.

applitgar instruments da surveglianza per tadlar u per registrar il pled che na vegn betg pronunzià publicamain ubain per observar u per registrar andaments a lieus betg publics u a lieus che n'èn betg generalmain accessibels;

d.

infiltrar sistems da computer e raits da computer per:

1.

sa procurar infurmaziuns ch'èn avant maun là u che vegnan transmessas da là,

2.

disturbar, impedir u render pli plaun l'access ad infurmaziuns en cas ch'ils sistems da computer e las raits da computer vegnan duvrads per attatgar infrastructuras criticas;

e.

perquirir localitads, vehichels u recipients per sa procurar objects u infurmaziuns ch'èn avant maun là u infurmaziuns che vegnan transmessas da là.

² Las mesiras vegnan fatgas en moda zuppada; la persuna pertutgada na vegn betg infurmada en chaussa.

¹ Il SIC po ordinar ina mesira da procuraziun suttamessas ad in'autorisaziun, sche:

a.

igl è avant maun ina smanatscha concreta en il senn da l'artitgel 19 alinea 2 literas a-d u sche la protecziun d'ulteriurs interess impurtants da la Svizra tenor l'artitgel 3 pretenda quai;

b.

la grevezza da la smanatscha giustifitgescha la mesira; e

c.

ils scleriments dal servetsch d'infurmaziun èn stads senza success fin ussa, fissan vans uschiglio u vegnissan engrevgiads en moda sproporziunada.

² Avant che realisar la mesira sa procura il SIC l'approvaziun dal Tribunal administrativ federal sco er l'autorisaziun dal schef dal DDPS.

³ Sch'igl è necessari che auters uffizis da la Confederaziun e dals chantuns coopereschan tar la realisaziun da la mesira, als trametta il SIC in'ordinaziun en scrit, apaina che l'approvaziun dal Tribunal administrativ federal sco er l'autorisaziun dal schef dal DDPS èn avant maun. La mesira da procuraziun sto vegnir tegnida secreta.

¹ Il SIC po er ordinar envers ina terza persuna ina mesira da procuraziun suttamessa ad in'autorisaziun, sch'i èn avant maun indizis motivads che la persuna, sur da la quala duain vegnir procuradas infurmaziuns, dovra localitads, vehichels u recipients da la terza persuna u las adressas postalas, ils attatgs da telecommunicaziun, ils sistems da computer u las raits da computer da quella persuna per transmetter, per retschaiver u per metter a salv infurmaziuns.

² La mesira na dastga betg vegnir ordinada, sche la persuna appartegna ad ina da las gruppas professiunalas menziunadas en ils artitgels 171-173 CPP²¹.

¹ Sch'il SIC ha l'intenziun d'ordinar ina mesira da procuraziun suttamessa ad in'autorisaziun, suttametta el al Tribunal administrativ federal ina dumonda cun:

a.

l'indicaziun da la finamira specifica da la mesira da procuraziun e la motivaziun da sia necessitad sco er l'explicaziun, pertge ch'ils scleriments ch'èn vegnids fatgs fin ussa n'han gì nagin success, fissan uschiglio invans u vegnissan engrevgiads sproporziunadamain;

b.

l'indicaziun da las persunas ch'èn pertutgadas da la mesira da procuraziun;

c.

la designaziun precisa da la mesira da procuraziun sco er da la basa legala;

d.

la designaziun d'eventuals auters uffizis che duain vegnir incumbensads cun la realisaziun da la mesira da procuraziun;

e.

l'indicaziun dal cumenzament e da la fin da la mesira da procuraziun sco er da la perioda, entaifer la quala ella sto vegnir realisada;

f.

las actas ch'èn essenzialas per l'approvaziun.

² Il president da la partiziun cumpetenta dal Tribunal administrativ federal decida sco derschader singul cun ina curta motivaziun entaifer 5 dis da lavur suenter avair survegnì l'incumbensa; el po incaricar in auter derschader cun questa incumbensa.

³ Il president da la partiziun cumpetenta dal Tribunal administrativ federal n'approvescha betg ina mesira da procuraziun dumandada, sch'ina tala mesira è gia vegnida approvada sin basa d'ina procedura penala cunter la persuna pertutgada tenor l'alinea 1 litera b e sche l'inquisiziun penala ha in connex cun la smanatscha concreta che duai vegnir sclerida cun la mesira da procuraziun dal SIC. Las dretgiras da mesiras repressivas cumpetentas sco er il Servetsch da surveglianza dal traffic da posta e da telecommunicaziun dattan al Tribunal administrativ federal las infurmaziuns necessarias.

⁴ Il president da la partiziun cumpetenta dal Tribunal administrativ federal po ordinar en il rom dal process da decisiun che represchentants dal SIC vegnan tadlads en chaussa.

⁵ El po conceder l'approvaziun cun cundiziuns u pretender che las actas vegnian cumplettadas u che ulteriurs scleriments vegnian fatgs.

⁶ L'approvaziun vala maximalmain 3 mais. Ella po vegnir prolungada mintgamai per maximalmain 3 mais.

⁷ Sch'ina prolungaziun è necessaria, fa il SIC ina dumonda da prolungaziun motivada tenor l'alinea 1 avant che la durada permessa è scadida.

⁸ Il president da la partiziun cumpetenta dal Tribunal administrativ federal fa mintga onn in rapport da lavur per mauns da la Delegaziun da las Cumissiuns da gestiun (DelCdG).

¹ Sche la mesira da procuraziun è approvada, decida il schef dal DDPS, suenter avair consultà ordavant il schef dal DFAE ed il schef dal Departament federal da giustia e polizia (DFGP), davart la dumonda, sche la mesira duai vegnir dada liber per l'execuziun. Cas d'ina impurtanza speziala pon vegnir suttamess al Cussegl federal.

² La procedura da consultaziun sto vegnir fatga en scrit.

¹ Sch'il cas è urgent, po il schef dal SIC ordinar che las mesiras da procuraziun suttamessas ad in'autorisaziun vegnian applitgadas immediatamain. El orientescha immediatamain il Tribunal administrativ federal ed il schef dal DDPS. Quel po terminar immediatamain la mesiras da procuraziun.

² Il directur dal SIC suttametta la dumonda entaifer 24 uras al president da la partiziun cumpetenta dal Tribunal administrativ federal e motivescha l'urgenza.

³ Il president da la partiziun cumpetenta dal Tribunal administrativ federal communitgescha sia decisiun entaifer 3 dis da lavur al SIC.

⁴ Sche la mesira da procuraziun è approvada, decida il schef dal DDPS, suenter avair consultà ordavant il schef dal DFAE ed il schef dal DFGP, davart la dumonda, sche la mesira duai vegnir dada liber per la cuntinuaziun.

¹ Il SIC terminescha immediatamain la mesira da procuraziun suttamessas ad in'autorisaziun, sche:

a.

il termin è scadì;

b.

las premissas per cuntinuar cun tala n'èn betg pli ademplidas;

c.

ella na vegn betg approvada dal Tribunal administrativ federal u na vegn betg dada liber dal schef dal DDPS.

² En cas urgents procura il SIC che las datas procuradas vegnian destruidas immediatamain, sche:

a.

il president da la partiziun cumpetenta dal Tribunal administrativ federal refusa la dumonda;

b.

il schef dal DDPS terminescha immediatamain la mesira da procuraziun u refusa da dar liber sia cuntinuaziun.

³ Sche auters posts coopereschan a realisar la mesira da procuraziun suttamessa ad in'autorisaziun, als communitgescha il SIC cur ch'ella è terminada.

⁴ Il SIC communitgescha al Tribunal administrativ federal sco er al schef dal DDPS che la mesira da procuraziun è terminada.

¹ Cur che l'operaziun è terminada, communitgescha il SIC entaifer 1 mais a la persuna survegliada il motiv, il gener e la durada da la surveglianza cun mesiras da procuraziun suttamessas ad in'autorisaziun.

² El po suspender u desister da la communicaziun, sche:

a.

quai è necessari per betg periclitar ina mesira da procuraziun currenta u ina procedura giuridica currenta;

b.

quai è necessari pervia d'in auter interess public predominant per proteger la segirezza interna u externa u las relaziuns da la Svizra cun l'exteriur pretendan quai;

c.

terzas persunas pudessan vegnir periclitadas considerablamain pervia da la communicaziun;

d.

la persuna pertutgada n'è betg cuntanschibla.

³ La suspensiun u la renunzia da la communicaziun sto vegnir approvada e deliberada tenor la procedura d'approvaziun tenor l'artitgel 29.

¹ Il SIC po exequir sez las mesiras da procuraziun, collavurar cun uffizis naziunals u da l'exteriur u incumbensar quels cun l'execuziun da questas mesiras, sche l'auter uffizi porscha la garanzia d'exequir la procuraziun tenor las disposiziuns da questa lescha.

² Excepziunalmain po el er collavurar cun persunas privatas u dar incaricas a persunas privatas, sche quai è necessari per motivs tecnics u pervia da l'access a l'object da procuraziun e sche la persuna respectiva porscha la garanzia d'exequir la procuraziun tenor las disposiziuns da questa lescha.

¹ Il SIC garantescha la protecziun da sias funtaunas e mantegna lur anonimitad, oravant tut quella da servetschs d'infurmaziun e d'autoritads da segirezza da l'exteriur sco er da persunas che procuran infurmaziuns sur l'exteriur e ch'èn periclitadas pervia da quai. Exceptadas èn persunas che vegnan inculpadas en ina procedura penala da grevs crims cunter l'umanitad u d'in crim da guerra.

² Il SIC renda enconuschenta l'identitad d'ina funtauna umana che viva en Svizra ad autoritads svizras da la persecuziun penala, sche la persuna respectiva vegn inculpada d'in delict che vegn persequità d'uffizi u sch'igl è indispensabel da render enconuschent l'identitad per sclerir in delict grev.

³ Tar la protecziun da funtaunas ston vegnir resguardads:

a.

ils interess dal SIC da duvrar vinavant la funtauna per activitads d'infurmaziun;

b.

il basegna da protecziun spezialmain da funtaunas umanas envers terzas persunas;

c.

en cas da funtaunas tecnicas: indicaziuns che ston vegnir tegnidas secretas davart l'infrastructura, davart la prestaziun, davart las metodas operativas e davart proceduras da la procuraziun d'infurmaziuns.

⁴ En cas da dispita decida il Tribunal penal federal. Dal rest valan las disposiziuns decisivas davart l'assistenza giudiziala.

¹ Il SIC po sa procurar en moda secreta infurmaziuns davart andaments a l'exteriur.

² Sch'il SIC sa procura en Svizra infurmaziuns davart andaments a l'exteriur, è el lià a las disposiziuns da la 4. secziun; resalvà resta l'artitgel 37 alinea 2.

³ Il SIC procura che las ristgas da la procuraziun na stattan betg en ina disproporziun cun il gudogn d'infurmaziun spetgà e che las intervenziuns en ils dretgs fundamentals da persunas pertutgadas restan limitadas a quai ch'è indispensabel.

⁴ El documentescha la procuraziun d'infurmaziuns davart andaments a l'exteriur per mauns dals organs da surveglianza e da controlla.

⁵ El po arcunar separadamain datas da procuraziuns a l'exteriur che pon vegnir cumparegliadas cun mesiras da procuraziun suttamessas ad in'autorisaziun, sche la dimensiun da las datas, la discreziun u la segirezza pretenda quai.

⁶ Durant lur acziun a l'exteriur èn ils collavuraturs dal SIC ch'èn activs a l'exteriur assicurads cunter malsogna e cunter accident tenor la Lescha federala dals 19 da zercladur 1992²² davart l'assicuranza militara.

⁷ Il SIC procura per la protecziun da ses collavuraturs ch'èn activs a l'exteriur.

¹ Sche sistems da computer e raits da computer che sa chattan a l'exteriur vegnan duvrads per attatgar infrastructuras criticas en Svizra, po il SIC infiltrar quests sistems da computer e questas raits da computer per disturbar, per impedir u per render pli plaun l'access ad infurmaziuns. Il Cussegl federal decida davart la realisaziun d'ina tala mesira.

² Il SIC po infiltrar sistems da computer e raits da computer a l'exteriur per sa procurar infurmaziuns davart andaments a l'exteriur ch'èn avant maun là u che vegnan transmessas da là. Il schef dal DDPS decida, suenter avair consultà ordavant il schef dal DFAE ed il schef dal DFGP, davart la realisaziun d'ina tala mesira.

¹ La Confederaziun po manar in servetsch per registrar emissiuns electromagneticas da sistems da telecommunicaziun che sa chattan a l'exteriur (exploraziun radiofonica).

² L'exploraziun radiofonica serva a:

a.

procurar infurmaziuns che han ina relevanza per la politica da segirezza davart andaments a l'exteriur, oravant tut dals secturs dal terrorissem, da la derasaziun d'armas da destrucziun en massa e da conflicts a l'exteriur che han consequenzas per la Svizra;

b.

proteger ulteriurs interess impurtants da la Svizra tenor l'artitgel 3.

³ Il Cussegl federal regla ils secturs d'exploraziun, l'organisaziun e la procedura da l'exploraziun radiofonica. El fixescha quant ditg che las communicaziuns e las datas da colliaziun registradas dastgan restar arcunadas tar il servetsch che fa l'exploraziun radiofonica.

⁴ En quest connex garantescha el en spezial ch'il servetsch che fa l'exploraziun radiofonica transferescha da las communicaziuns registradas:

a.

mo infurmaziuns davart andaments a l'exteriur che han ina relevanza per la politica da segirezza;

b.

mo infurmaziuns davart persunas en Svizra, sch'ellas èn necessarias per encleger in andament a l'exteriur e sch'ellas èn vegnidas anonimisadas ordavant.

⁵ Il servetsch che fa l'exploraziun radiofonica transferescha da las communicaziuns registradas infurmaziuns davart andaments en Svizra, sch'ellas renvieschan ad ina smanatscha concreta da la segirezza interna tenor l'artitgel 6 alinea 1 litera a.

⁶ Sch'el frunta tar sia activitad sin communicaziuns registradas che na cuntegnan naginas infurmaziuns davart andaments a l'exteriur che han ina relevanza per la politica da segirezza e nagins renviaments ad ina smanatscha concreta da la segirezza interna, destruescha el quellas communicaziuns uschè svelt sco pussaivel.

¹ Il SIC po incumbensar il servetsch che fa l'exploraziun da procurar infurmaziuns davart andaments a l'exteriur che han ina relevanza per la politica da segirezza (art. 6 al. 1 lit. b) sco er per proteger ulteriurs interess impurtants da la Svizra tenor l'artitgel 3 da registrar signals transcunfinals or da raits da cabel.

² Sche tant l'emettur sco er il retschavider sa chattan en Svizra, n'è l'utilisaziun dals signals registrads tenor l'alinea 1 betg admessa. Sch'il servetsch che fa l'exploraziun n'è betg en cas da zavrar tals signals gia tar la registraziun, ston las datas procuradas vegnir destruidas, apaina ch'igl è cler ch'ellas derivan da tals signals.

³ Datas da signals registrads dastgan vegnir transferids al SIC mo, sche lur cuntegn correspunda a las noziuns da tschertga ch'èn vegnidas definidas per ademplir l'incumbensa. Las noziuns da tschertga ston vegnir definidas uschia che lur applicaziun chaschuna intervenziuns uschè pitschnas sco pussaivel en la sfera privata da persunas. Indicaziuns davart persunas svizras natiralas u giuridicas n'èn betg admessas sco noziuns da tschertga.

⁴ Il Cussegl federal regla:

a.

ils secturs d'exploraziun admess;

b.

l'organisaziun ed ils detagls da la procedura da l'exploraziun via cabel;

c.

la durada maximala da la perioda, durant la quala il servetsch che fa l'exploraziun dastga conservar las registraziuns da las datas da cuntegn e da colliaziun che derivan da l'exploraziun via cabel.

¹ Incumbensas per far exploraziuns via cabel dovran in'autorisaziun.

² Avant ch'il SIC dat l'incumbensa per in'exploraziun via cabel, sa procura el l'approvaziun dal Tribunal administrativ federal sco er l'autorisaziun dal schef dal DDPS.

³ Il schef dal DDPS consultescha ordavant il schef dal DFAE ed il schef dal DFGP.

¹ Sch'il SIC ha l'intenziun da dar ina incumbensa per in'exploraziun via cabel, suttametta el al Tribunal administrativ federal ina dumonda cun:

a.

la descripziun da l'incumbensa al servetsch che fa l'exploraziun;

b.

la motivaziun da la necessitad da l'exploraziun;

c.

l'indicaziun da las categorias da noziuns da tschertga;

d.

l'indicaziun da las gestiunarias da raits da cabel e da las purschidras da servetschs da telecommunicaziun che ston furnir ils signals ch'èn necessaris per far l'exploraziun via cabel; e

e.

l'indicaziun dal cumenzament e da la fin da l'incumbensa.

² La procedura sa drizza tenor ils artitgels 29-32.

³ L'approvaziun vala maximalmain 6 mais. Tenor la medema procedura po ella vegnir prolungada mintgamai per maximalmain 3 mais.

¹ Il servetsch che fa l'exploraziun prenda en consegna ils signals da las gestiunarias e da las purschidras tenor l'artitgel 41 alinea 1 litera d, transfurma els en datas e giuditgescha a maun dal cuntegn, tge datas ch'el transferescha al SIC.

² El transmetta al SIC mo datas che cuntegnan infurmaziuns concernent las noziuns da tschertga ch'èn vegnidas definidas per ademplir l'incumbensa. Infurmaziuns davart persunas en Svizra transmetta el al SIC mo, sch'ellas èn necessarias per encleger in andament a l'exteriur e sch'ellas èn vegnidas anonimisadas ordavant.

³ Sche las datas cuntegnan infurmaziuns davart andaments en Svizra u a l'exteriur, che renvieschan ad ina smanatscha concreta da la segirezza interna tenor l'artitgel 6 alinea 1 litera a, renviescha il servetsch che fa l'exploraziun quellas senza midadas al SIC.

⁴ Datas che na cuntegnan naginas infurmaziuns tenor ils alineas 2 e 3 ston vegnir destruidas uschè svelt sco pussaivel dal servetsch che fa l'exploraziun.

⁵ Per analisar las datas tenor criteris che servan a la procuraziun d'infurmaziuns è cumpetent il SIC.

¹ Las gestiunarias da raits da cabel e las purschidras da servetschs da telecommunicaziun èn obligadas da dar al servetsch che fa l'exploraziun u al SIC indicaziuns tecnicas ch'èn necessarias per far l'exploraziun via cabel.

² Sche l'autorisaziun per ina incumbensa è avant maun, èn las gestiunarias da raits da cabel e las purschidras da servetschs da telecommunicaziun obligadas da furnir ils signals al servetsch che fa l'exploraziun. Ils criptadis fatgs dad ellas ston ellas allontanar.

³ Las gestiunarias da raits da cabel e las purschidras da servetschs da telecommunicaziun èn obligadas da tegnair secret las incumbensas.

⁴ La Confederaziun indemnisescha las gestiunarias da raits da cabel e las purschidras da servetschs da telecommunicaziun. Il Cussegl federal regla l'autezza da l'indemnisaziun a norma dals custs per furnir ils signals al servetsch che fa l'exploraziun.

¹ Il SIC e las autoritads executivas chantunalas dastgan elavurar datas persunalas, inclusiv datas persunalas che permettan da giuditgar il grad da privlusadad d'ina persuna, e quai independentamain dal fatg, sch'i sa tracta da datas persunalas spezialmain sensiblas u betg.²³

² Il SIC po cuntinuar ad elavurar infurmaziuns che sa mussan sco dischinfurmaziuns u sco infurmaziuns faussas, sche quai è necessari per giuditgar la situaziun u ina funtauna. El designescha las datas respectivas sco betg correctas.

³ El po transferir las medemas datas en plirs sistems d'infurmaziun. Valair valan las prescripziuns dal sistem d'infurmaziun respectiv.

⁴ El po correlar las datas entaifer in sistem d'infurmaziun ed evaluar quellas en moda automatisada.

¹ Il SIC giuditgescha la relevanza e la correctadad da las datas da persunas, avant ch'el las registrescha en in sistem d'infurmaziun. Communicaziuns che cuntegnan pliras datas da persunas giuditgescha el globalmain, avant che las registrar en l'archiv da datas.

² El registrescha mo datas che servan ad ademplir las incumbensas tenor l'artitgel 6, resguardond l'artitgel 5 alineas 5-8.

³ El eliminescha datas che na dastgan betg vegnir registradas en in sistem d'infurmaziun u trametta quellas enavos al speditur per far ulteriurs scleriments u elavuraziuns en atgna cumpetenza.

⁴ El controllescha periodicamain en tut ils sistems d'infurmaziun, sche las unitads da datas da persunas registradas èn vinavant necessarias per ademplir sias incumbensas. El stizza las unitads da datas ch'el na dovra betg pli. Datas betg correctas vegnan curregidas u stizzadas immediatamain; resalvà resta l'artitgel 44 alinea 2.

⁵ Il post intern per la garanzia da qualitad dal SIC ademplescha las suandantas incumbensas:

a.

controllar las datas da persunas en il sistem IASA-GEX SIC (art. 50) areguard lur relevanza ed areguard lur correctadad;

b.

controllar periodicamain ils rapports da las autoritads executivas chantunalas ch'èn registrads en il sistem INDEX SIC (art. 51) areguard lur relevanza ed areguard lur correctadad;

c.

controllar en tut ils sistems d'infurmaziun dal SIC en furma d'emprovas da controlla la legitimitad, l'adequatezza, l'efficacitad e la correctadad da las elavuraziuns da datas;

d.

stizzar datas en il sistem INDEX SIC che derivan da scleriments preliminars dals chantuns e ch'èn vegnidas elavuradas l'ultima giada avant passa 5 onns, sco er datas ch'il chantun dumonda da stizzar;

e.

procurar per scolaziuns internas dals collavuraturs dal SIC davart dumondas da la protecziun da datas.

¹ Las autoritads executivas chantunalas na mainan naginas atgnas bancas da datas en applicaziun da questa lescha.²⁴

² Sch'ils chantuns elavuran datas en atgna cumpetenza, procuran els che las datas chantunalas na cuntegnian naginas infurmaziuns davart l'existenza e davart il cuntegn da las datas da la Confederaziun.

³ Las autoritads executivas chantunalas dastgan dar vinavant giudicaments da la situaziun e datas ch'ellas han survegnì dal SIC, sche quai è necessari per giuditgar mesiras per proteger la segirezza u per impedir ina periclitaziun considerabla. Il Cussegl federal regla a tge posts che questas datas dastgan vegnir surdadas ed en tge dimensiun che quai è admess.

¹ Per ademplir sias incumbensas tenor l'artitgel 6 maina il SIC ils suandants sistems d'infurmaziun:

a.

IASA SIC (art. 49);

b.

IASA-GEX SIC (art. 50);

c.

INDEX SIC (art. 51);

d.

GEVER SIC (art. 52);

e.

PES (art. 53);

f.

portal OSINT (art. 54);

g.

Quattro P (art. 55);

h.

ISCO (art. 56);

i.

sistem d'arcun da datas restantas (art. 57).

² Il Cussegl federal regla per mintga sistem d'infurmaziun dal SIC:

a.

il catalog da las datas da persunas;

b.

las cumpetenzas tar l'elavuraziun da datas;

c.

ils dretgs d'access;

d.

la frequenza da la garanzia da qualitad, resguardond la grevezza da l'intervenziun en ils dretgs constituziunals che vegn chaschunada tras l'elavuraziun da datas;

e.

la durada che las datas vegnan tegnidas en salv, resguardond ils basegns specifics dal SIC areguard ils champs d'incumbensas respectivs;

f.

l'extincziun da las datas;

g.

la segirezza da las datas.

Il SIC attribuescha las datas ch'entran sco suonda:

a.

las datas cun infurmaziuns davart extremissem violent: al sistem IASA-GEX SIC;

b.

las datas cun infurmaziuns che chaschunan sulettamain process administrativs: al sistem GEVER SIC;

c.

las datas cun infurmaziuns che pertutgan exclusivamain mesiras da la polizia da segirezza: al sistem PES

d.

las datas che derivan da funtaunas publicas: al sistem dal portal OSINT;

e.

las datas da controllas da cunfins e da duana: al sistem Quattro P;

f.

las datas che servan sulettamain per controllar las incumbensas e per diriger l'exploraziun via radio e via cabel: al sistem ISCO;

g.

las ulteriuras datas: al sistem d'arcun da datas restantas.

¹ Il sistem d'analisa integral dal SIC (IASA SIC) serva ad evaluar datas dal puntg da vista da l'infurmaziun.

² El cuntegna datas che pertutgan ils champs d'incumbensas tenor l'artitgel 6 alinea 1, cun excepziun da las datas davart l'extremissem violent.

³ Ils collavuraturs dal SIC ch'èn incumbensads cun la registraziun, cun la retschertga, cun l'evaluaziun e cun la garanzia da qualitad da las datas han en la procedura d'invista in access al sistem IASA SIC. Cun agid dad IASA SIC pon els far retschertgas da datas en tut ils sistems d'infurmaziun dal SIC, per ils quals els han l'autorisaziun d'access.

¹ Il sistem d'analisa integral dal SIC pertutgant l'extremissem violent (IASA GEX SIC) serva a la registraziun, a l'elavuraziun ed a l'evaluaziun d'infurmaziuns che pertutgan l'extremissem violent.

² El cuntegna las datas che pertutgan l'extremissem violent.

³ Ils collavuraturs dal SIC ch'èn incumbensads cun la registraziun, cun la retschertga, cun l'evaluaziun e cun la garanzia da qualitad da las datas han en la procedura d'invista in access al sistem IASA-GEX SIC.

¹ Il sistem d'infurmaziun INDEX SIC serva:

a.

a constatar, sch'il SIC elavura datas davart ina persuna, in'organisaziun, ina gruppaziun, in object u in eveniment;

b.

ad archivar ils rapports che las autoritads executivas chantunalas han fatg;

c.

ad elavurar datas da scleriments preliminars da las autoritads executivas chantunalas.

² El permetta a las autoritads che n'èn betg colliadas cun la rait spezialmain segira dal SIC l'access a las datas ch'ellas dovran per ademplir lur incumbensas legalas e la transmissiun segira da quellas.

³ El cuntegna:

a.

las datas per identifitgar las persunas, las organisaziuns, las gruppaziuns, ils objects ed ils eveniments ch'èn registrads en ils sistems d'infurmaziun IASA SIC ed IASA-GEX SIC;

b.

ils rapports che las autoritads executivas chantunalas han fatg autonomamain u per incumbensa dal SIC;

c.

las datas da scleriments preliminars da las autoritads executivas chantunalas.

⁴ Las suandantas persunas han en la procedura d'invista access a las suandantas datas en INDEX SIC:

a.

ils collavuraturs dal SIC a las datas tenor l'alinea 3 literas a e b, sch'els èn incumbensads da scuvrir a temp e d'impedir smanatschas per la Svizra e per sia populaziun;

b.

ils collavuraturs da las autoritads executivas chantunalas per ademplir lur incumbensas tenor questa lescha sco er per elavurar e per transmetter lur datas da scleriments preliminars e lur rapports al SIC ed ad autras autoritads executivas chantunalas; access a las datas tenor l'alinea 3 litera c han exclusivamain ils collavuraturs da l'autoritad executiva chantunala che ha fatg ils scleriments preliminars sco er ils collavuraturs dal post per la garanzia da qualitad dal SIC;

c.

ils collavuraturs da l'Uffizi federal da polizia a las datas tenor l'alinea 3 litera a per ademplir incumbensas da la polizia da segirezza, da la polizia criminala e da la polizia administrativa sco er per examinar cas da suspect da lavada da daners suspectus e da finanziaziun da terrorissem en cas d'annunzias d'instituts da finanzas svizzers;

d.²⁵

ils collavuraturs dals posts spezialisads ch'èn cumpetents per realisar las controllas da segirezza da persunas tenor l'artitgel 31 alinea 2 da la Lescha dals 18 da december 2020²⁶ davart la segirezza da las infurmaziuns a las datas tenor l'alinea 3 litera a per realisar controllas da segirezza da persunas, per examinar la confidenza sco er per giuditgar il potenzial da violenza.

¹ Il sistem d'infurmaziun per l'administraziun da las fatschentas dal SIC (GEVER SIC) serva ad elavurar ed a controllar las fatschentas sco er a garantir andaments da lavur effizients.

² El cuntegna:

a.

las datas da fatschentas administrativas;

b.

tut ils products infurmativs ch'il SIC trametta a l'exteriur;

c.

las datas ch'èn vegnidas duvradas per furmar ils cuntegns tenor las literas a e b;

d.

las infurmaziuns ch'èn necessarias per la controlla da las fatschentas en spezial en il sectur da las controllas da segirezza relativas a persunas.

³ Ils collavuraturs dal SIC han en la procedura d'invista access a GEVER SIC.

¹ Il sistem d'infurmaziun per la preschentaziun electronica da la situaziun (PES) serva a las autoritads cumpetentas da la Confederaziun e dals chantuns sco instrument directiv e per derasar infurmaziuns en vista a la direcziun ed a la realisaziun da mesiras da la polizia da segirezza, en spezial en cas d'eveniments, nua ch'i vegnan temids acts da violenza.

² El cuntegna datas davart eveniments e davart mesiras per proteger la segirezza interna u externa.

³ Ils collavuraturs dal SIC e da las autoritads cumpetentas da la Confederaziun e dals chantuns ch'èn incumbensads cun la direcziun da la politica da segirezza u cun la valitaziun u cun il dumogn d'eveniments ch'èn relevants per la situaziun han en la procedura d'invista in access al PES.

⁴ En cas d'eveniments po il SIC er permetter a posts privats ed ad autoritads da polizia e da segirezza da l'exteriur en la procedura d'invista in access ch'è limità temporalmain. L'access è restrenschì a quellas datas dal sistem che quests posts e questas autoritads dovran per ademplir lur incumbensas en connex cun il dumogn d'in tal eveniment.

¹ Il portal «Open Source Intelligence» (portal OSINT) serva al SIC per metter a disposiziun datas da funtaunas publicas.

² El cuntegna datas che resultan da l'utilisaziun da funtaunas publicas.

³ Ils collavuraturs dal SIC han en la procedura d'invista access al portal OSINT.

⁴ Als collavuraturs da las autoritads executivas chantunalas poi vegnir permess en la procedura d'invista in access a tschertas datas dal portal OSINT.

¹ Il SIC po manar in sistem d'infurmaziun (Quattro P) che serva ad identifitgar tschertas categorias da persunas estras ch'entran en Svizra u che partan da la Svizra sco er per constatar las datas da l'entrada e da la partenza.

² El cuntegna datas che resultan tar ils posts da cunfin en il rom da controllas da cunfin e da duana e che servan ad identifitgar las persunas e lur viadis.

³ Ils collavuraturs dal SIC che han l'incumbensa d'identifitgar persunas en connex cun l'adempliment da las incumbensas tenor l'artitgel 6, han en la procedura d'invista in access a Quattro P.

⁴ Il Cussegl federal fixescha per Quattro P en ina glista betg publica las categorias da las persunas che ston vegnir registradas; el s'orientescha en quest connex vi da la situaziun da smanatscha actuala.

¹ Il sistem d'infurmaziun per l'exploraziun da la communicaziun (ISCO) serva a controllar ed a diriger l'exploraziun via radio e via cabel.

² El cuntegna datas per diriger ils meds d'exploraziun sco er per controllar e per rapportar.

³ Ils collavuraturs dal SIC ch'èn incumbensads cun la direcziun da l'exploraziun via radio e via cabel han en la procedura d'invista in access al sistem ISCO.

¹ Il sistem d'arcun da datas restantas serva ad archivar las datas che na pon betg vegnir attribuidas tenor l'artitgel 48 directamain ad in auter sistem.

² Sche infurmaziuns che entran e che ston vegnir archivadas en il sistem d'arcun da datas restantas cuntegnan datas da persunas, vegn il giudicament da la relevanza e da la correctadad tenor l'artitgel 45 alinea 1 fatg per las infurmaziuns sco talas e betg mo per las singulas datas da persunas. In giudicament en il cas singul vegn fatg, sche las datas da persunas vegnan transferidas en in auter sistem d'infurmaziun.

³ Ils collavuraturs dal SIC ch'èn incumbensads cun la registraziun, cun la retschertga, cun l'evaluaziun e cun la garanzia da qualitad da las datas han en la procedura d'invista in access al sistem d'arcun da datas restantas.

⁴ La durada da conservaziun maximala da las datas importa 10 onns.

¹ Il SIC arcunescha las datas che derivan da mesiras da procuraziun suttamessas ad in'autorisaziun tenor l'artitgel 26 cas per cas ed en moda separada dals sistems d'infurmaziun tenor l'artitgel 47.

² El procura che las datas da persunas che derivan da mesiras da procuraziun ch'èn suttamessas ad in'autorisaziun e che n'han nagin connex cun la situaziun da smanatscha specifica na vegnan betg duvradas e vegnan stizzadas il pli tard 30 dis suenter la terminaziun da la mesira.

³ Sche la mesira da procuraziun suttamessa ad in'autorisaziun pertutga ina persuna che tutga tar ina da las gruppas professiunalas che vegnan numnadas en ils artitgels 171-173 CPP²⁷, vegnan las datas che n'han nagin connex cun la situaziun da smanatscha specifica separadas e stizzadas sut la direcziun²⁸ dal Tribunal administrativ federal. Sche la mesira da procuraziun suttamessa ad in'autorisaziun pertutga in'autra persuna, ston las datas, per las qualas ina persuna ha il dretg da refusar da dar perditga tenor ils artitgels 171-173 CPP, medemamain vegnir stizzadas.

⁴ En il cas singul ed observond l'artitgel 5 alineas 5-8 po el archivar datas da persunas supplementarmain en il sistem d'infurmaziun ch'è previs per quai tenor l'artitgel 47 alinea 1, sche quellas cuntegnan infurmaziuns che vegnan duvradas per ademplir las incumbensas tenor l'artitgel 6 alinea 1.

⁵ Ils collavuraturs dal SIC ch'èn incumbensads cun la realisaziun d'ina mesira da procuraziun e cun l'evaluaziun dals resultats han en la procedura d'invista in access a las datas correspundentas.

⁶ Il Cussegl federal regla:

a.

il catalog da las datas da persunas;

b.

ils dretgs d'elavuraziun e d'access;

c.

la durada da la conservaziun da las datas e la procedura per stizzar las datas;

d.

la segirezza da las datas.

Il SIC examinescha avant mintga communicaziun da datas da persunas u da products che las datas da persunas correspundian a las prescripziuns giuridicas tenor questa lescha e che la communicaziun saja previsa giuridicamain e necessaria en il cas concret.

¹ Il SIC communitgescha datas da persunas ad autoritads svizras, sche quai è necessari per proteger la segirezza interna ed externa. Il Cussegl federal designescha las autoritads respectivas.

² Sche enconuschientschas dal SIC servan ad autras autoritads per realisar la persecuziun penala, per impedir delicts grevs u per proteger l'urden public, metta il SIC a disposiziun quellas senza vegnir intimà u sin dumonda mantegnend la protecziun da la funtauna.

³ Il SIC communitgescha datas che derivan da mesiras da procuraziun suttamessas ad in'autorisaziun adina ad in'autoritad da persecuziun penala, sch'ellas cuntegnan indizis concrets per in delict, per il qual l'autoritad da persecuziun penala dastgass ordinar ina mesira cumparegliabla da la procedura penala per l'intent da persequitar quel.

⁴ Il SIC inditgescha l'origin da las datas a las autoritads da persecuziun penala. L'ulteriura procedura sa drizza tenor il CPP²⁹ u tenor la Procedura penala militara dals 23 da mars 1979³⁰.

¹ Il SIC po communitgar datas da persunas u glistas da datas da persunas a l'exteriur. Avant mintga communicaziun examinescha el, sche las premissas giuridicas per la communicaziun èn ademplidas.

² Sche la legislaziun dal stadi che retschaiva las datas na garantescha nagina protecziun da datas adequata, pon vegnir communitgadas datas da persunas a quest stadi - en divergenza da l'artitgel 16 alinea 1 da la Lescha federala dals 25 da settember 2020³¹ davart la protecziun da datas (LPD) - mo, sche la Svizra tgira relaziuns diplomaticas cun tal e sch'ina da las suandantas premissas è ademplida:³²

a.

la Svizra è obligada da communitgar ad el las datas da persunas sin fundament d'ina lescha u d'in contract internaziunal;

b.

quai è necessari per proteger in interess da segirezza public predominant da la Svizra u dal stadi che retschaiva las datas da persunas sco per impedir u per sclerir in delict grev ch'è chastiabel er en Svizra;

c.

quai è necessari per motivar ina dumonda da la Svizra per infurmaziuns;

d.

quai è en l'interess da la persuna pertutgada e quella ha dà ses consentiment ordavant u ses consentiment po vegnir supponì cleramain tenor las circumstanzas;

e.

quai è necessari per proteger il corp e la vita da terzas persunas.

³ En il cas singul po il SIC communitgar datas da persunas a stadis, cun ils quals la Svizra tgira relaziuns diplomaticas, sch'il stadi petent garantescha en scrit da disponer dal consentiment da la persuna pertutgada, e sche questas datas permettan al stadi petent da giuditgar, sche la persuna pertutgada po cooperar a projects da l'exteriur classifitgads en il sectur da la segirezza interna u externa u survegnir access ad infurmaziuns, a materialias u ad installaziuns da l'exteriur classifitgadas.

⁴ El po communitgar en la procedura d'invista datas da persunas ad organs da segirezza da l'exteriur, dals quals ils stadis garanteschan in nivel da protecziun da datas adequat e cun ils quals la Svizra ha fatg in contract tenor l'artitgel 70 alinea 3.

⁵ Las datas da persunas na dastgan betg vegnir communitgadas ad in organ da segirezza da l'exteriur, sche la persuna pertutgada è exponida tras quai al privel d'in chasti dubel ubain a dischavantatgs serius per il corp e per la vita en il senn da la Convenziun dals 4 da november 1950³³ per la protecziun dals dretgs umans u d'autras cunvegnas internaziunalas ch'èn vegnidas ratifitgadas da la Svizra.

⁶ Sche las datas da persunas vegnan duvradas en ina procedura giuridica, valan las disposiziuns decisivas davart l'assistenza giudiziala.

La communicaziun da datas da persunas a terzas persunas è admissibla mo, sche:

a.

la persuna pertutgada ha dà ses consentiment en chaussa u sche la communicaziun è senza dubi en l'interess da la persuna pertutgada;

b.

la communicaziun è necessaria per impedir in grond privel direct;

c.

la communicaziun è necessaria per motivar ina dumonda d'infurmaziun.

¹ Il dretg da survegnir infurmaziuns concernent ils sistems d'infurmaziun PES, portal OSINT e Quattro P, concernent las datas administrativas en GEVER SIC sco er concernent las datas en ils sistems d'arcunaziun tenor ils artitgels 36 alinea 5 e 58 sa drizza tenor la LPD³⁴.

² Sch'ina persuna pretenda infurmaziuns davart la dumonda, sch'il SIC elavurescha datas davart ella en ils sistems d'infurmaziun IASA SIC, IASA-GEX SIC, INDEX SIC, ISCO ed en il sistem d'arcun da datas restantas sco er en las datas d'infurmaziun da GEVER SIC, suspenda il SIC questa infurmaziun:

a.

sche ed uschenavant ch'i dat interess predominants concernent las datas elavuradas ch'èn motivads en las actas per tegnair secret quellas en connex cun:

1.

l'adempliment d'ina incumbensa tenor l'artitgel 6, u

2.

ina persecuziun penala u in'autra procedura d'inquisiziun;

b.

sche ed uschenavant che quai è necessari pervia d'interess predominants da terzas persunas; u

c.

sch'i na vegnan betg elavuradas datas davart la persuna petenta.

³ Il SIC communitgescha a la persuna petenta la suspensiun da l'infurmaziun e la renviescha al fatg, ch'ella haja il dretg da pretender da l'incumbensà federal per la protecziun da datas e per la transparenza (IFPDT), ch'el examineschia, sche eventualas datas vegnian elavuradas en moda legala e sche interess da tegnair secret predominants giustifitgeschian la suspensiun.

⁴ Uschespert ch'i na dat pli nagins interess da tegnair secret, il pli tard dentant suenter che la durada da conservaziun è scadida, dat il SIC infurmaziuns a la persuna petenta tenor la LPD, nun che quai saja cumbinà cun lavur sproporziunada.

⁵ Persunas, da las qualas n'èn vegnidas elavuradas naginas datas, infurmescha il SIC davart quest fatg il pli tard 3 onns suenter che lur dumonda è entrada.

¹ Il IFPDT fa l'examinaziun tenor l'artitgel 63 alinea 3 sin dumonda da la persuna petenta.

² Il IFPDT communitgescha a la persuna petenta che naginas datas davart ella na vegnian elavuradas illegalmain, ubain ch'el haja constatà sbagls tar l'elavuraziun da las datas u concernent la suspensiun da l'infurmaziun ed haja avert ina inquisiziun tenor l'artitgel 49 LPD³⁵.³⁶

³ …³⁷

⁴ Sch'il IFPDT constatescha sbagls tar l'elavuraziun da las datas u concernent la suspensiun da l'infurmaziun, dispona el, ch'il SIC elimineschia quests sbagls.³⁸

⁵ Sche la persuna petenta preschenta en moda vardaivla ch'ella haja in donn considerabel ed irreparabel pervia da la suspensiun d'ina infurmaziun, po il IFPDT disponer, ch'il SIC dettia excepziunalmain immediatamain infurmaziuns, premess che quai na chaschunia betg ina periclitaziun da la segirezza interna u externa.³⁹

¹ Las communicaziuns tenor ils artitgels 63 alinea 3 e 64 alinea 2 vegnan adina formuladas da maniera identica e na vegnan betg motivadas.⁴¹

² Ellas na pon betg vegnir contestadas da las persunas pertutgadas cun meds legals.

La Lescha federala dals 17 da december 2004⁴² davart il princip da la transparenza da l'administraziun na vala betg per l'access a documents uffizials concernent la procuraziun d'infurmaziuns tenor questa lescha.

¹ Il SIC porscha las datas e las actas che na vegnan betg pli duvradas u che vegnan eliminadas a l'Archiv federal per l'archivaziun. L'Archiv federal archivescha las datas e las actas dal SIC en locals spezialmain segirs. Ellas èn suttamessas ad in temp da protecziun da 50 onns.

² Il Cussegl federal po prolungar il temp da protecziun per archivalias che derivan da servetschs da segirezza esters tenor l'artitgel 12 da la Lescha federala dals 26 da zercladur 1998⁴³ davart l'archivaziun pliras giadas per in temp limità, sch'il servetsch da segirezza ester pertutgà fa valair resalvas cunter in'eventuala invista.

³ En il cas singul po il SIC prender invista - durant il temp da protecziun - da datas da persunas ch'el ha surdà a l'Archiv federal per l'archivaziun, e quai per valitar smanatschas concretas da la segirezza interna u externa ubain per proteger in auter interess public predominant.

⁴ El eliminescha las datas e las actas ch'il Tribunal federal ha designà sco betg degnas da vegnir archivadas.

¹ Il Cussegl federal procura per la direcziun politica dal SIC ed ademplescha en quest connex en spezial las suandantas incumbensas:

a.

conceder al SIC l'incarica da basa e renovar tala almain mintga 4 onns; l'incarica da basa è secreta;

b.

approvar annualmain la glista d'observaziun tenor l'artitgel 72 e trametter questa glista a la DelCdG; la glista d'observaziun è confidenziala;

c.

determinar annualmain las gruppaziuns che ston vegnir consideradas sco extremisticas violentas e prender enconuschientscha dal dumber d'extremists violents che na pon anc vegnir attribuidas a naginas gruppaziuns enconuschentas;

d.

giuditgar annualmain e - sche necessari - en cas d'eveniments spezials la situaziun da smanatscha ed infurmar las Chombras federalas e la publicitad;

e.

ordinar las mesiras necessarias en cas da situaziuns da smanatscha spezialas;

f.

fixar annualmain la collavuraziun dal SIC cun autoritads estras.

² Ils documents en connex cun las incumbensas tenor l'alinea 1 n'èn betg accessibels al public.

³ Il Cussegl federal po concluder en moda autonoma contracts internaziunals davart la collavuraziun internaziunala dal SIC concernent la protecziun d'infurmaziuns u concernent la participaziun a sistems d'infurmaziun internaziunals automatisads tenor l'artitgel 12 alinea 1 litera e.

¹ En cas d'ina smanatscha greva ed imminenta po il Cussegl federal incumbensar il SIC da prender mesiras tenor questa lescha, sche quellas èn necessarias per proteger ulteriurs interess impurtants da la Svizra tenor l'artitgel 3.

² El fixescha en il cas singul la durada, l'intent, il gener e la dimensiun da la mesira.

³ En cas da mesiras da procuraziun suttamessas ad in'autorisaziun sto vegnir observada la procedura d'approvaziun tenor ils artitgels 26-33.

⁴ Sch'il Cussegl federal dat ina incumbensa tenor l'alinea 1, infurmescha el entaifer 24 uras la DelCdG en chaussa.

¹ La glista d'observaziun cuntegna organisaziuns e gruppaziuns, tar las qualas i dat in motiv da supponer ch'ellas pericliteschian la segirezza interna u externa.

² La supposiziun vala sco motivada, sch'ina organisaziun u gruppaziun figurescha sin ina glista da las Naziuns Unidas u da l'Uniun europeica; en quest cas po questa organisaziun u gruppaziun vegnir messa sin la glista d'observaziun.

³ In'organisaziun u gruppaziun vegn stritgada da la glista d'observaziun, sche:

a.

nagins motivs na laschan pli supponer ch'ella pericliteschia la segirezza interna u externa; u

b.

ella na figurescha pli sin naginas glistas tenor l'alinea 2 ed i n'existan nagins motivs particulars ch'ella pericliteschia la segirezza interna u externa.

⁴ En in'ordinaziun fixescha il Cussegl federal ils criteris che servan a stabilir la glista d'observaziun ed entaifer tge intervals che la glista vegn verifitgada.

¹ Il Cussegl federal po scumandar ad ina persuna natirala ubain ad in'organisaziun u gruppaziun da pratitgar in'activitad che periclitescha concretamain la segirezza interna u externa e che serva directamain u indirectamain a propagar, a sustegnair u a promover en autra moda activitads terroristicas u l'extremissem violent.

² In scumond po vegnir pronunzià per maximalmain 5 onns. Sche las premissas èn anc adina ademplidas suenter la scadenza da quest temp, po il scumond vegnir prolungà per maximalmain 5 ulteriurs onns.

³ Il departament che ha fatg la dumonda da scumandar l'activitad examinescha regularmain, sche las premissas èn anc ademplidas. Sche quai n'è betg pli il cas, propona el al Cussegl federal d'abolir il scumond.

¹ Il Cussegl federal po scumandar in'organisaziun u ina gruppaziun che propaghescha, sustegna e promova en autra moda directamain u indirectamain activitads terroristicas u l'extremissem violent e periclitescha uschia concretamain la segirezza interna u externa.

² In scumond sa basa sin in conclus da scumond u da sancziun che las Naziuns Unidas han pronunzià per l'organisaziun u per la gruppaziun respectiva; il Cussegl federal consultescha las cumissiuns ch'èn cumpetentas per la politica da segirezza.⁴⁴

³ In scumond po vegnir pronunzià per maximalmain 5 onns. Sche las premissas èn anc adina ademplidas suenter la scadenza da quest temp, po il scumond vegnir prolungà per maximalmain 5 ulteriurs onns.

⁴ Tgi che sa participescha - sin territori svizzer - ad in'organisaziun u ad ina gruppaziun ch'è scumandada tenor l'alinea 1, la sustegna persunalmain u materialmain, organisescha per ella u per sias finamiras acziuns da propaganda, recrutescha per ella u promova sias activitads en autra moda e maniera, vegn chastià cun in chasti da detenziun fin 5 onns u cun in chasti pecuniar.⁴⁵

^4bis La dretgira po diminuir il chasti tenor l'alinea 4 (art. 48a CP⁴⁶), sch'il delinquent sa stenta d'impedir ulteriuras activitads da l'organisaziun u da la gruppaziun.⁴⁷

⁵ Chastiabel è er tgi che commetta il malfatg a l'exteriur, sch'el vegn arrestà en Svizra e sch'el na vegn betg extradì. L'artitgel 7 alineas 4 e 5 CP⁴⁸ è applitgabel.

⁶ La persecuziun ed il giudicament da las acziuns tenor ils alineas 4 e 5 suttastattan a la giurisdicziun federala.⁴⁹

⁷ Las autoritads cumpetentas communitgeschan tut las sentenzias, tut las decisiuns penalas e tut ils conclus da sistida immediatamain, gratuitamain e cumplettamain al SIC.⁵⁰

Il SIC garantescha cun mesiras adattadas per segirar la qualitad e da controlla che l'execuziun confurma al dretg da questa lescha è garantida tant entaifer il SIC sco er tar las autoritads da segirezza dals chantuns.

¹ Il Cussegl federal nominescha in'autoritad independenta per survegliar il SIC.

² El elegia il manader da l'autoritad independenta da surveglianza sin proposta dal SIC per ina perioda d'uffizi da 6 onns.

³ Il manader vala sco elegì per in'ulteriura perioda d'uffizi, nun ch'il Cussegl federal decreteschia il pli tard 6 mais avant la scadenza da la perioda d'uffizi che quella na vegnia betg prolungada per motivs objectivs suffizients.

⁴ Resguardond in termin da 6 mais po il manader dumandar il Cussegl federal sia relaschada sin la fin d'in mais.

⁵ El po vegnir suspendì dal Cussegl federal da ses uffizi avant la scadenza da la perioda d'uffizi, sch'el:

a.

ha violà sapientivamain u per greva negligientscha en moda greva las obligaziuns d'uffizi; u

b.

ha pers a lunga vista la qualificaziun d'ademplir ses uffizi.

¹ L'autoritad independenta da surveglianza exequescha sia funcziun en moda autonoma; ella na sto betg observar instrucziuns. Administrativamain fa ella part dal DDPS.

² Ella ha in agen preventiv. Ella engascha sezza ses persunal.

³ Ella sa constituescha sezza. Ella regla sia organisaziun e sias metodas da lavur en in urden da gestiun.

⁴ La relaziun da lavur dal manader sco er dal persunal da l'autoritad independenta da surveglianza sa drizza tenor la Lescha dals 24 da mars 2000⁵¹ davart il persunal da la Confederaziun. Il manader n'è betg suttamess al sistem da giudicat tenor l'artitgel 4 alinea 3 da la Lescha davart il persunal da la Confederaziun.⁵²

¹ L'autoritad independenta da surveglianza surveglia l'activitad infurmativa dal SIC, da las autoritads executivas dals chantuns sco er da las terzas persunas e d'auters uffizis incumbensads dal SIC. Ella controlla, sche las activitads èn legalas, adequatas ed efficazias.

² Ella coordinescha sia activitad cun las activitads da surveglianza parlamentaras sco er cun ils auters posts da surveglianza da la Confederaziun e dals chantuns.

³ Ella infurmescha il DDPS davart sia activitad en in rapport annual; quest rapport vegn publitgà.

⁴ Ella ha access a tut las infurmaziuns utilas ed a tut ils documents utils sco er a tut las localitads dals posts survegliads. Ella po pretender copias dals documents. En il rom da sia activitad da surveglianza po ella pretender infurmaziuns e l'invista da las actas d'auters posts da la Confederaziun e dals chantuns, uschenavant che questas infurmaziuns han in connex cun la collavuraziun da quests posts cun ils posts survegliads.

⁵ Per ademplir sia activitad da surveglianza po ella acceder a tut ils sistems d'infurmaziun ed a tut las bancas da datas dals posts survegliads; ella po er acceder a datas persunalas spezialmain sensiblas. Las datas retschertgadas en quest connex dastga ella arcunar mo, fin che la controlla è terminada. La persuna responsabla sto protocollar ils access als differents sistems d'infurmaziun ed a las differentas bancas da datas.⁵³

⁶ L'autoritad independenta da surveglianza communitgescha al DDPS en scrit il resultat da sias controllas. Ella po far recumandaziuns.

⁷ Il DDPS procura che las recumandaziuns vegnian realisadas. Sch'il DDPS refusa ina recumandaziun, suttametta el quella al Cussegl federal per laschar decider en chaussa.

¹ Ina instanza independenta da controlla entaifer l'administraziun verifitgescha, sche l'exploraziun via radio è legala e surveglia l'execuziun da las incumbensas d'exploraziun via cabel approvadas e deliberadas. Ella exequescha sias incumbensas senza stuair observar instrucziuns. Il Cussegl federal elegia ses commembers.

² L'instanza da controlla verifitgescha las incumbensas che vegnan dadas al servetsch che fa l'exploraziun sco er l'elavuraziun ed il transferiment da las infurmaziuns che quel ha registrà. Per quest intent survegn ella dals posts cumpetents l'access a tut las infurmaziuns utilas ed a tut ils stabiliments.

³ Sin basa da la controlla po ella dar recumandaziuns e pretender tar il DDPS che incumbensas d'exploraziun via radio vegnian sistidas e che infurmaziuns vegnian stizzadas. Sias recumandaziuns, sias pretensiuns e ses rapports n'èn betg publics.

⁴ Il Cussegl federal regla la cumposiziun e l'organisaziun da l'instanza da controlla, l'indemnisaziun da ses commembers sco er l'organisaziun da ses secretariat. La perioda d'uffizi importa 4 onns.

¹ Il DDPS orientescha regularmain il Cussegl federal davart la situaziun da smanatscha e davart las activitads dal SIC.

² Il Cussegl federal regla:

a.

la surveglianza da las finanzas da quels champs d'activitad dal SIC ch'èn suttamess ad ina discreziun speziala;

b.

las pretensiuns minimalas a las controllas en ils chantuns e las cumpetenzas dals organs da surveglianza da la Confederaziun.

³ Cunvegnas administrativas internaziunalas che vegnan fatgas dal SIC, che cumpiglian ina perioda pli lunga, che han consequenzas finanzialas substanzialas u da las qualas il Cussegl federal stuess avair enconuschientscha per motivs giuridics u politics, ston vegnir approvadas dal Cussegl federal. La resalva d'approvaziun vala er per cunvegnas che na vegnan betg fixadas en scrit. Las cunvegnas dastgan vegnir exequidas pir suenter ch'ellas èn vegnidas approvadas.

⁴ Il DDPS orientescha il Cussegl federal e la DelCdG annualmain u tenor basegn davart l'intent ed il dumber da las identitads da finta che vegnan applitgadas dals collavuraturs dal SIC u dals organs da segirezza dals chantuns. Il dumber dals documents d'identitad emess da nov sto vegnir cumprovà separadamain.

⁵ Il Cussegl federal orientescha la DelCdG annualmain e tenor basegn davart scumonds d'activitads e davart ils resultats da la controlla regulara tenor l'artitgel 73 alinea 3 sco er davart scumonds d'organisaziuns.

¹ La surveglianza suprema parlamentara da l'activitad dal SIC e dals organs executivs dals chantuns che ageschan per incumbensa da la Confederaziun per exequir questa lescha è - tut tenor ils secturs da cumpetenza respectivs - chaussa da la DelCdG e da la Delegaziun da finanzas a norma da la Lescha dal parlament dals 13 da december 2002⁵⁴.

² Ils organs da surveglianza parlamentars chantunals pon controllar l'execuziun tenor l'artitgel 85 alinea 1.

¹ Collavuraturs da las autoritads executivas chantunalas ch'èn incaricads dals chantuns cun incumbensas tenor questa lescha suttastattan al dretg da lavur chantunal ed a la surveglianza ierarchica chantunala da lur superiurs.

² La surveglianza ierarchica en ils chantuns è chaussa da quels posts, als quals l'organ executiv chantunal respectiv è suttamess. Per sustegnair la surveglianza ierarchica pon quels posts installar in organ da controlla ch'è separà da l'organ executiv chantunal e che sto dar pled e fatg als posts superiurs.

³ Per sias controllas survegn la surveglianza chantunala ina glista da las incumbensas dadas dal SIC sco er la glista d'observaziun tenor l'artitgel 72.

⁴ La surveglianza ierarchica chantunala po prender invista da las datas ch'il chantun elavura per incumbensa da la Confederaziun. L'invista po vegnir refusada, sche interess da segirezza impurtants pretendan quai.

⁵ Il cussegl federal regla la procedura d'invista. En cas da dispitas èsi pussaivel da purtar plant tar il Tribunal federal svizzer tenor l'artitgel 120 alinea 1 litera b da la Lescha federala dals 17 da zercladur 2005⁵⁵ davart il Tribunal federal.

⁶ Il Cussegl federal regla il sustegn da la surveglianza ierarchica chantunala tras posts da la Confederaziun.

¹ Cunter disposiziuns ch'èn vegnidas decretadas d'organs federals sin basa da questa lescha po vegnir fatg recurs tar il Tribunal administrativ federal.

² Ils recurs cunter disposiziuns davart l'obligaziun speziala da persunas privatas da dar infurmaziuns sco er davart ils scumonds d'activitad u d'organisaziun n'han nagin effect suspensiv.

³ Il termin da recurs cunter l'ordinaziun d'ina mesira da procuraziun suttamessa ad in'autorisaziun cumenza a currer il di che suonda il di, che la communicaziun da la mesira è vegnida retschavida.

⁴ Cunter decisiuns da recurs dal Tribunal administrativ federal poi vegnir fatg recurs tar il Tribunal federal. La procedura sa drizza tenor la Lescha dals 17 da zercladur 2005⁵⁶ davart il Tribunal federal.