(art. 14 e 18 al. 1 LFPr)
1 Sch'in contract d'emprendissadi tenor l'artitgel 14 alinea 2 segunda frasa LFPr vegn concludì mo per ina part da la furmaziun, ston tut ils contracts per las singulas parts da la furmaziun vegnir suttascrits ed approvads da las autoritads chantunalas fin il cumenzament da l'emprendissadi.
2 Sche la furmaziun fundamentala ha lieu en ina cuminanza da manaschis d'emprendissadi, fa il manaschi principal u l'organisaziun principala in contract cun l'emprendist.
3 Il temp d'emprova cumenza cun il cumenzament da la furmaziun fundamentala sut il contract d'emprendissadi correspundent. Sch'i vegn concludì in contract d'emprendissadi tenor l'alinea 1 mo per ina part da la furmaziun, dura il temp d'emprova per questa part per regla 1 mais.
4 Las disposiziuns davart il contract d'emprendissadi valan per furmaziuns fundamentalas en in manaschi er, sche talas cumenzan cun ina part da scola pli lunga. L'autoritad chantunala po prevair excepziuns, sch'ella garantescha a l'emprendist ch'el po absolver ina furmaziun fundamentala cumpletta suenter la part da scola.
5 Il manaschi d'emprendissadi u la cuminanza da manaschis d'emprendissadi inoltrescha il contract d'emprendissadi suttascrit a l'autoritad chantunala per l'approvaziun avant il cumenzament da la furmaziun fundamentala.
6 Las parts contrahentas utiliseschan formulars da contract ch'ils chantuns mettan a disposiziun. Il SEFRI garantescha ch'ils formulars èn unitars en tut la Svizra.
7 Suenter avair tadlà las partidas dal contract d'emprendissadi e la scola professiunala spezialisada decida l'autoritad chantunala davart las cunvegnas contractualas da prolungaziun u da reducziun da la durada da la furmaziun tenor l'artitgel 18 alinea 1 LFPr.