1. Disposiziun transitorica da l'art. 13 (Mesiras disciplinaras)
L'artitgel 13 vegn applitgà per cuntravenziuns che vegnan commessas suenter che questa lescha è entrada en vigur.
2. Disposiziun transitorica dals art. 14 e 15 (Incumpatibilitads)
1 Per commembers dal Cussegl dals chantuns, dals quals la perioda d'uffizi dura sur la data da la renovaziun totala dal Cussegl naziunal ora, la quala ha lieu suenter ch'ils artitgels 14 e 15 èn entrads en vigur, vala la veglia regulaziun da las incumpatibilitads fin a la fin da lur perioda d'uffizi.
2 Sche questa lescha entra en vigur suenter ils 31 da fanadur da l'onn d'ina renovaziun totala dal Cussegl naziunal, entran ils artitgels 14 e 15 en vigur pir cun il cumenzament da l'emprima sessiun suenter la proxima renovaziun totala dal Cussegl naziunal.
3. Disposiziun transitorica dal 5. titel (Proceduras en l'Assamblea federala)
Per objects da tractativa ch'èn pendents en ina chombra il mument che questa lescha entra en vigur vala vinavant il dretg vertent.
4. Disposiziun transitorica dal 9. titel (Cumissiun parlamentara d'inquisiziun)
Ils artitgels 163-171 vegnan applitgads per las Cumissiuns parlamentaras d'inquisiziun che vegnan installadas suenter l'entrada en vigur da questa lescha.
5.186 Disposiziun transitorica da l'art. 40a (Cumissiun giudiziala)
1 La Cumissiun giudiziala è cumpetenta per constituir per l'emprima giada las partiziuns dal Tribunal administrativ federal.
2 Tar la nominaziun ston vegnir resguardadas adequatamain las enconuschientschas spezialas dals derschaders sco er las linguas uffizialas.
6.187 Disposiziun transitorica dals art. 86 al. 4, 97 al. 2 e 101 al. 2 e 3 (Iniziativas dal pievel)
Las midadas dals artitgels 86 alinea 4, 97 alinea 2 e 101 alineas 2 e 3 valan per iniziativas dal pievel, per las qualas il Cussegl federal n'ha betg anc suttamess a l'Assamblea federala in sboz per in conclus federal davart l'iniziativa dal pievel il mument che la midada dals 3 d'october 2008 da questa lescha entra en vigur.
7.188 Disposiziun transitorica da l'art. 105 al. 1bis tenor la midada dals 25 da settember 2009 (Prolungaziun dal termin per tractar ina iniziativa dal pievel)
Per las iniziativas federalas dal pievel ch'èn pendentas il mument che la midada dals 25 da settember 2009 entra en vigur vala il dretg nov.