Sche las persunas cun activitad da gudogn independenta èn assicuradas obligatoricamain per las ristgas vegliadetgna, mort ed invaliditad, èn applitgablas las disposiziuns davart l'assicuranza obligatorica dals lavurants.

¹ Sche l'assicuranza obligatorica cumpiglia mo las ristgas mort ed invaliditad, po il Cussegl federal permetter in sistem da prestaziuns che divergescha dal sistem da l'assicuranza obligatorica dals lavurants.

² Las disposiziuns davart il fond da garanzia n'èn betg applitgablas.

¹ Las instituziuns da provediment che vulan sa participar a la realisaziun da l'assicuranza obligatorica ston sa laschar inscriver en il register dal provediment professiunal tar l'autoritad da surveglianza, a la quala ellas èn suttamessas (art. 61).

² Instituziuns da provediment registradas ston avair la furma giuridica d'ina fundaziun u esser instituziuns da dretg public cun atgna persunalitad giuridica.¹⁴⁷ Ellas ston furnir prestaziuns tenor las prescripziuns davart l'assicuranza obligatorica e vegnir organisadas, finanziadas ed administradas tenor questa lescha.

³ Ina instituziun da provediment vegn stritgada or dal register, sch'ella:

a.

n'ademplescha betg pli las premissas legalas per la registraziun e na fa betg las adattaziuns necessarias entaifer il termin fixà da l'autoritad da surveglianza;

b.

desista da la registraziun.¹⁴⁸

⁴ Las instituziuns da provediment registradas e las terzas persunas participadas a lur realisaziun dal provediment professiunal han il dretg d'utilisar sistematicamain il numer da la AVS¹⁴⁹ tenor las disposiziuns da la LAVS¹⁵⁰ per ademplir lur incumbensas legalas.¹⁵¹

¹ En il rom da questa lescha èn las instituziuns da provediment libras en quai che reguarda la concepziun da lur prestaziuns, la finanziaziun da talas e lur organisaziun. En il reglament pon ellas prevair che prestaziuns, che surpassan las disposiziuns legalas minimalas, vegnian pajadas mo fin a la cumplenida da la vegliadetgna da referenza.

² Sche l'instituziun da provediment conceda dapli che las prestaziuns minimalas, valan per il provediment pli extendì mo las prescripziuns davart:¹⁵³

1.¹⁵⁴

la definiziun ed ils princips dal provediment professiunal sco er dal salari assicurabel u da las entradas assicurablas (art. 1, 33a e 33b);

2.¹⁵⁵

la retratga da la prestaziun da vegliadetgna (art. 13 al. 2, 13a e 13b);

3.

ils benefiziaris da prestaziuns per survivents (art. 20a);

3a.¹⁵⁶

l'adattaziun da la renta d'invaliditad suenter la cumpensaziun dal provediment professiunal (art. 24 al. 5);

3b.¹⁵⁷

la cuntinuaziun provisorica da l'assicuranza ed il mantegniment dal dretg da prestaziuns en cas che la renta da l'assicuranza d'invaliditad vegn reducida u abolida (art. 26a);

4.

la restituziun da prestaziuns retratgas nungiustifitgadamain (art. 35a);

5.¹⁵⁸

l'adattaziun al svilup dals pretschs (art. 36 al. 2-4);

5a.¹⁵⁹

il consentiment en cas d'ina cumpensaziun en chapital (art. 37a);

5b.¹⁶⁰

las mesiras en cas che l'obligaziun da mantegniment vegn negligida (art. 40);

6.

la surannaziun da dretgs e la conservaziun da documents da provediment (art. 41);

6a.¹⁶¹

la sortida da l'assicuranza obligatorica suenter la cumplenida dal 58. onn da vegliadetgna (art. 47a);

6b.¹⁶²

l'utilisaziun sistematica dal numer da la AVS (art. 48 al. 4);

7.¹⁶³

l'administraziun paritetica e las incumbensas da l'organ suprem da l'instituziun da provediment (art. 51 ed art. 51a);

8.

la responsabladad (art. 52);

9.¹⁶⁴

l'admissiun e las incumbensas dals organs da controlla (art. 52a-52e);

10.¹⁶⁵

l'integritad e la loialitad da las persunas responsablas, ils acts giuridics cun persunas da confidenza ed ils conflicts d'interess (art. 51b, 51c e 53a);

11.

la liquidaziun parziala u totala (art. 53b-53d);

12.¹⁶⁶

l'annullaziun da contracts (art. 53e-53f);

13.¹⁶⁷

il fond da garanzia (art. 56 al. 1 lit. c ed i ed al. 2-5, 56a, 57 e 59);

14.¹⁶⁸

la surveglianza e la surveglianza suprema (art. 61-62a e 64-64c);

15.¹⁶⁹

...

16.¹⁷⁰

la segirezza finanziala (art. 65, 65c, 65d al. 1, 2 e 3 lit. a segunda frasa e b, art. 65e, 66 al. 4, 67 e 72a-72g);

17.

la transparenza (art. 65a);

18.¹⁷¹

las retenziuns e las reservas da fluctuaziun da la valur (art. 65b);

19.

ils contracts d'assicuranza tranter instituziuns da provediment ed instituziuns d'assicuranza (art. 68 al. 3 e 4);

20.

las participaziuns al surpli che resulta da contracts d'assicuranza (art. 68a);

21.¹⁷²

l'administraziun da la facultad (art. 71) e l'obligaziun da votar sco acziunaria (art. 71a e 71b);

22.

la giurisdicziun (art. 73 e 74);

23.

las disposiziuns penalas (art. 75-79);

24.

la cumpra (art. 79b);

25.

il salari assicurabel e las entradas assicurablas (art. 79c);

25a.¹⁷³

l'elavuraziun da datas per attribuir u per verifitgar il numer da la AVS (art. 85a al. 1 lit. f);

25b.¹⁷⁴

la communicaziun da datas per attribuir u per verifitgar il numer da la AVS (art. 86a al. 2 lit. b^bis);

26.

l'infurmaziun da las persunas assicuradas (art. 86b).

¹ Las instituziuns da provediment decreteschan disposiziuns davart:

a.

las prestaziuns;

b.

l'organisaziun;

c.

l'administraziun e la finanziaziun;

d.

la controlla;

e.

la relaziun tar ils patruns, tar las persunas assicuradas e tar las persunas che han il dretg sin prestaziuns.

² Questas disposiziuns pon esser cuntegnidas en il document da fundaziun, en ils statuts u en il reglament. En cas d'instituziuns da dretg public po la corporaziun respectiva da dretg public decretar ubain las disposiziuns davart las prestaziuns ubain las disposiziuns davart la finanziaziun.¹⁷⁵

³ Las prescripziuns da questa lescha han la precedenza envers las disposiziuns decretadas da l'instituziun da provediment. Sche l'instituziun da provediment ha dentant pudì supponer da buna fai ch'ina da sias disposiziuns reglamentaras stettia en accordanza cun la lescha, n'è la lescha betg applitgabla retroactivamain.

¹ Ils lavurants ed ils patruns han il dretg da delegar il medem dumber da represchentants en l'organ suprem da l'instituziun da provediment.¹⁷⁶

² L'instituziun da provediment sto garantir l'execuziun correcta da l'administraziun paritetica. En spezial ston vegnir regladas:

a.

l'elecziun dals represchentants da las persunas assicuradas;

b.

ina represchentanza adequata da las differentas categorias da lavurants;

c.

l'administraziun paritetica da la facultad;

d.

la procedura en cas da paritad da las vuschs.

³ Las persunas assicuradas elegian lur represchentants directamain u tras delegads. Sche quai n'è betg pussaivel pervia da la structura da l'instituziun da provediment, en spezial en cas da fundaziuns collectivas, po l'autoritad da surveglianza permetter autras furmas da represchentanza. Presidià vegn l'organ paritetic en moda alternanta d'in represchentant dals lavurants e d'in represchentant dals patruns. L'organ paritetic po dentant reglar en autra moda l'attribuziun dal presidi.¹⁷⁷

⁴ Sche la procedura en cas da paritad da las vuschs n'è betg anc reglada, decida in derschader da cumpromiss neutral che vegn tschernì en enclegientscha vicendaivla. Sch'i na dat nagina enclegientscha davart il derschader da cumpromiss, vegn quel designà da l'autoritad da surveglianza.

⁵ ...¹⁷⁸

⁶ e ⁷ ...¹⁷⁹

¹ L'organ suprem da l'instituziun da provediment è responsabel per la direcziun generala da tala, procura per l'adempliment da las incumbensas legalas, fixescha las finamiras ed ils princips strategics da l'instituziun da provediment sco er ils meds finanzials per ademplir questas finamiras e quests princips. El fixescha l'organisaziun da l'instituziun da provediment, procura per sia stabilitad finanziala e surveglia la gestiun.

² El ademplescha las suandantas incumbensas intransferiblas e nunprivablas:

a.

fixar il sistem da finanziaziun;

b.

fixar finamiras da prestaziun e plans da provediment sco er ils princips per utilisar ils meds finanzials libers;

c.

decretar e midar reglaments;

d.

stabilir ed approvar il quint annual;

e.

fixar l'autezza da la tariffa da tschains tecnica e da las ulteriuras basas tecnicas;

f.

fixar l'organisaziun;

g.

concepir la contabilitad;

h.

determinar il circul da persunas assicuradas e garantir l'infurmaziun;

i.

garantir l'emprima scolaziun e la furmaziun supplementara dals represchentants dals lavurants e dals patruns;

j.

nominar e revocar las persunas ch'èn incumbensadas cun la gestiun;

k.

eleger e revocar l'expert per il provediment professiunal ed il post da revisiun;

l.

decider davart la reassicuranza totala u parziala da l'instituziun da provediment e davart l'eventual reassicurader;

m.

fixar las finamiras ed ils princips da l'administraziun da la facultad sco er la realisaziun e la surveglianza dal process d'investiziun;

n.

examinar periodicamain la concordanza a media ed a lunga vista tranter l'investiziun da la facultad e las obligaziuns;

o.

fixar las premissas per la recumpra da prestaziuns;

p.

en cas d'instituziuns da provediment da corporaziuns da dretg public: fixar la relaziun tar ils patruns affiliads e las premissas per subordinar ulteriurs patruns.

³ L'organ suprem da l'instituziun da provediment po surdar la preparaziun e l'execuziun da ses conclus u la surveglianza da fatschentas a cumissiuns u a singuls commembers. El procura che ses commembers vegnian infurmads adequatamain.

⁴ El fixescha ina indemnisaziun adequata per ses commembers che sa participeschan a sesidas ed a curs da scolaziun.

⁵ En cas d'instituziuns da provediment en furma d'associaziuns pon las incumbensas tenor ils alineas 1-4 vegnir ademplidas da l'administraziun, premess che questas incumbensas n'appartegnian betg a las cumpetenzas intransmissiblas da la radunanza generala tenor l'artitgel 879 DO¹⁸¹.

⁶ Resalvà resta l'artitgel 50 alinea 2 segunda frasa.

¹ Las persunas ch'èn incumbensadas cun la gestiun u cun l'administraziun da l'instituziun da provediment ubain cun l'administraziun da la facultad ston avair ina buna reputaziun e porscher la garanzia per in'activitad irreproschabla.

² Ellas èn suttamessas a l'obligaziun da diligenza fiduziara e ston exequir lur activitad en l'interess da las persunas assicuradas da l'instituziun da provediment. Per quest intent procuran ellas ch'i na resultian nagins conflicts d'interess en consequenza da lur relaziuns persunalas e professiunalas.

¹ Ils acts giuridics concludids da las instituziuns da provediment ston correspunder a las cundiziuns usitadas sin il martgà.

² Acts giuridics da l'instituziun da provediment cun commembers da l'organ suprem, cun patruns affiliads ubain cun persunas natiralas u giuridicas ch'èn incumbensadas cun la gestiun u cun l'administraziun da la facultad sco er acts giuridics da l'instituziun da provediment cun persunas natiralas u giuridicas che stattan datiers da las persunas numnadas qua survart, ston vegnir communitgads al post da revisiun a chaschun da la controlla annuala dal quint annual.

³ Il post da revisiun controllescha, sch'ils interess da l'instituziun da provediment èn garantids en ils acts giuridics communitgads.

⁴ En il rapport annual stoi vegnir inditgà il num e la funcziun dals experts, dals cussegliaders d'investiziun e dals managers d'investiziun ch'èn vegnids consultads da l'instituziun da provediment.

¹ Tut las persunas ch'èn incumbensadas cun l'administraziun u cun la gestiun da l'instituziun da provediment sco er ils experts per il provediment professiunal èn responsabels per il donn ch'els chaschunan intenziunadamain u per negligientscha.¹⁸⁵

² Il dretg d'indemnisaziun cunter ils organs responsabels tenor las disposiziuns qua survart surannescha entaifer 5 onns suenter il di che la persuna donnegiada ha survegnì enconuschientscha dal donn e da la persuna che sto pajar l'indemnisaziun, en mintga cas dentant suenter 10 onns quintà a partir dal di ch'il cumportament donnegiant ha gì lieu u è vegnì terminà.¹⁸⁶

³ Sch'in organ d'ina instituziun da provediment sto star bun per in donn, sto el infurmar ils ulteriurs organs obligads al regress. Il termin da surannaziun da 5 onns per far valair dretgs da regress tenor quest alinea cumenza il mument ch'ina indemnisaziun vegn pajada.

⁴ Per la responsabladad dal post da revisiun vala l'artitgel 755 DO¹⁸⁷ tenor il senn.¹⁸⁸

¹ Per la controlla designescha l'instituziun da provediment in post da revisiun sco er in expert per il provediment professiunal.

² L'organ suprem da l'instituziun da provediment sto trametter il rapport dal post da revisiun a l'autoritad da surveglianza ed a l'expert per il provediment professiunal ed al tegnair a la disposiziun da las persunas assicuradas.

Sco post da revisiun pon lavurar persunas natiralas ed interpresas da revisiun ch'èn admessas tras l'Autoritad federala da surveglianza en chaussas da revisiun sco experts da revisiun tenor la Lescha dals 16 da december 2005¹⁹¹ davart la surveglianza da la revisiun.

¹ Il post da revisiun controllescha, sche:

a.

il quint annual ed ils contos da vegliadetgna correspundan a las prescripziuns legalas;

b.

l'organisaziun, la gestiun sco er l'investiziun da la facultad correspundan a las disposiziuns legalas e reglamentaras;

c.

las mesiras per garantir la loialitad en l'administraziun da la facultad èn vegnidas prendidas e l'organ suprem controllescha suffizientamain l'observaziun da las obligaziuns da loialitad;

d.

ils meds finanzials libers u las participaziuns al surpli che resulta da contracts d'assicuranza èn vegnids utilisads tenor las disposiziuns legalas e reglamentaras;

e.

l'instituziun da provediment ha prendì las mesiras necessarias per restabilir la garanzia cumplaina en cas d'ina sutgaranzia;

f.

las indicaziuns ed annunzias prescrittas da questa lescha èn vegnidas communitgadas a l'autoritad da surveglianza;

g.

l'artitgel 51c è vegnì observà.

² Per mauns da l'organ suprem da l'instituziun da provediment fa il post da revisiun mintga onn in rapport che cuntegna sias constataziuns davart ils puncts da controlla tenor l'alinea 1. Quest rapport conferma l'observaziun da las prescripziuns correspundentas cun u senza restricziuns e cuntegna ina recumandaziun davart l'approvaziun u la refusa dal quint annual; la recumandaziun sto vegnir agiuntada al rapport.

³ En cas da basegn explitgescha il post da revisiun ils resultats da la controlla per mauns da l'organ suprem da l'instituziun da provediment.

¹ Experts per il provediment professiunal ston vegnir admess tras la Cumissiun da surveglianza suprema.

² Premissas d'admissiun èn:

a.

ina scolaziun ed experientscha professiunala adequata;

b.

enconuschientschas da las disposiziuns legalas respectivas;

c.

in buna reputaziun e fidabladad.

³ La Cumissiun da surveglianza suprema po circumscriver pli detagliadamain las premissas d'admissiun.

¹ L'expert per il provediment professiunal controllescha sut aspects tecnics d'assicuranza, sche l'instituziun da provediment porscha la garanzia da pudair ademplir sias obligaziuns; per quest intent:

a.

calculescha el annualmain ils chapitals da provediment e las retenziuns tecnicas da l'instituziun da provediment;

b.

fa el periodicamain, dentant almain mintga 3 onns, in'expertisa en chaussas tecnicas d'assicuranza.¹⁹⁵

^1bis Plinavant controllescha el periodicamain, sche las disposiziuns reglamentaras en chaussas tecnicas d'assicuranza davart las prestaziuns e davart la finanziaziun correspundan a las prescripziuns legalas.¹⁹⁶

² A l'organ suprem da l'instituziun da provediment suttametta el recumandaziuns en spezial davart:

a.¹⁹⁷

la tariffa da tschains tecnica e las ulteriuras basas tecnicas;

b.

las mesiras che ston vegnir prendidas en cas d'ina sutgaranzia.

^2bis L'organ suprem sto furnir a l'expert per il provediment professiunal las indicaziuns necessarias per la controlla e metter a disposiziun ils documents necessaris.¹⁹⁸

³ Sche l'organ suprem na suonda betg las recumandaziuns da l'expert per il provediment professiunal e sche la segirezza da l'instituziun da provediment para dad esser periclitada qua tras, infurmescha l'expert per il provediment professiunal l'autoritad da surveglianza.

⁴ En connex cun la surpigliada d'effectivs da persunas che retiran rentas (art. 53e^bis) consegna l'expert per il provediment professiunal da sai anora la conferma necessaria (art. 53e^bis al. 1) e, sin dumonda, il rapport (art. 53e^bis al. 3) a l'autoritad da surveglianza.¹⁹⁹

Il Cussegl federal decretescha disposiziuns davart:

a.

l'admissibladad da fatschentas che persunas, ch'èn incumbensadas cun l'administraziun da la facultad, pon manar sin agen quint;

b.

l'admissibladad d'avantatgs da facultad che persunas obtegnan en connex cun lur activitad per las instituziuns da provediment, e l'obligaziun da declerar quests avantatgs.

¹ En lur reglaments fixeschan las instituziuns da provediment las premissas e la procedura da la liquidaziun parziala. I vegn presumà che las premissas per ina liquidaziun parziala sajan ademplidas, sche:

a.

il persunal vegn reducì considerablamain;

b.

ina interpresa vegn restructurada;

c.

il contract d'affiliaziun vegn schlià.

² Las prescripziuns reglamentaras davart las premissas e davart la procedura da la liquidaziun parziala ston vegnir approvadas da l'autoritad da surveglianza.

En cas d'ina schliaziun d'ina instituziun da provediment (liquidaziun totala) decida l'autoritad da surveglianza, sche las premissas e la procedura èn ademplidas, ed approvescha il plan da repartiziun.

¹ La liquidaziun parziala e totala da l'instituziun da provediment sto respectar il princip dal tractament egual ed ils princips tecnics renconuschids. Il Cussegl federal designescha quests princips.

² Per calcular ils meds finanzials libers sto la facultad vegnir resguardada per la valur d'alienaziun.

³ Las instituziuns da provediment dastgan deducir proporziunalmain ils deficits tecnics d'assicuranza, sche quai na chaschuna betg ina reducziun dal dabun da vegliadetgna (art. 15).²⁰⁵

⁴ En il rom da las disposiziuns legalas e dal reglament fixescha l'organ paritetic designà u l'organ responsabel:

a.

il mument exact da la liquidaziun;

b.

ils meds finanzials libers e la part da reparter;

c.

il deficit e l'attribuziun da tal;

d.

il plan da repartiziun.

⁵ L'instituziun da provediment sto infurmar a temp e cumplettamain las persunas assicuradas sco er las persunas pensiunadas davart la liquidaziun parziala u totala. En spezial las sto ella laschar prender invista dals plans da repartiziun.

⁶ Las persunas assicuradas e las persunas pensiunadas han il dretg da laschar controllar las premissas, la procedura ed il plan da repartiziun tras l'autoritad da surveglianza e da laschar prender quella ina decisiun en chaussa. In recurs cunter la decisiun da l'autoritad da surveglianza ha mo in effect suspensiv, sch'il president da la partiziun cumpetenta dal Tribunal administrativ federal u sch'il derschader d'instrucziun dispona quai d'uffizi u sin dumonda dal recurrent. Sche l'effect suspensiv na vegn betg concedì, ha la decisiun dal Tribunal administrativ federal mo in effect a favur u a disfavur dal recurrent.²⁰⁶

¹ Sch'i vegnan schliads contracts tranter las instituziuns d'assicuranza e las instituziuns da provediment ch'èn suttamessas a la LFLP²⁰⁸, exista in dretg sin il chapital da garanzia.

² Il dretg tenor l'alinea 1 s'augmenta per la participaziun proporziunala als surplis e sa reducescha tras ils custs da recumpra. L'instituziun d'assicuranza sto suttametter a l'instituziun da provediment in rendaquint detaglià e chapaivel.

³ Sco custs da recumpra valan las deducziuns per la ristga da tschains. Sche la relaziun contractuala ha durà almain 5 onns, na pon ils custs da recumpra betg vegnir deducids. Il dabun da vegliadetgna tenor l'artitgel 15 na dastga betg vegnir reducì, er betg sch'il contract ha durà main che 5 onns.

⁴ En cas ch'il patrun schlia il contract d'affiliaziun cun sia instituziun da provediment, ston l'instituziun da provediment veglia e nova sa cunvegnir davart la dumonda, sche las persunas che retiran rentas duain restar tar l'instituziun veglia u midar a la nova, sch'il contract d'affiliaziun na prevesa nagina regulaziun per quest cas. Sch'il contract d'affiliaziun na cuntegna nagina regulaziun u sch'i na dat nagina cunvegna tranter l'instituziun da provediment veglia e nova, restan las persunas che retiran rentas tar l'instituziun da provediment veglia.

^4bis Sch'il contract d'affiliaziun prevesa che las persunas che retiran rentas bandunian l'instituziun da provediment veglia en cas ch'il contract d'affiliaziun vegn schlià, dastga il patrun schliar quest contract pir, cur ch'ina nova instituziun da provediment ha confermà en scrit ch'ella surpiglia questas persunas sut las medemas cundiziuns.²⁰⁹

⁵ En cas che l'instituziun da provediment schlia il contract d'affiliaziun cun il patrun, ston l'instituziun da provediment veglia e nova sa cunvegnir davart la dumonda, sche las persunas che retiran rentas duain restar tar l'instituziun veglia u midar a la nova. Sch'i na dat nagina cunvegna, restan las persunas che retiran rentas tar l'instituziun da provediment veglia.

⁶ Sche las persunas che retiran rentas restan tar l'instituziun da provediment veglia, resta il contract d'affiliaziun en vigur concernent las persunas che retiran rentas. Quai vala er per ils cas, nua che l'invaliditad è entrada suenter la schliaziun dal contract d'affiliaziun, premess che l'incapacitad da lavurar, ch'è stada il motiv da l'invaliditad, saja entrada avant la schliaziun dal contract d'affiliaziun.

⁷ Il Cussegl federal regla l'appartegnientscha da las persunas che retiran rentas, sch'il contract d'affiliaziun vegn schlià en consequenza da l'insolvenza dal patrun.

⁸ Il Cussegl federal regla ils detagls, en spezial las pretensiuns envers la cumprova dals custs ed envers la calculaziun dal chapital da garanzia.

¹ Las instituziuns da provediment dastgan mo surpigliar effectivs da persunas che retiran rentas ed effectivs cun ina gronda cumpart da persunas che retiran rentas per cuntinuar cun la gestiun, sche las obligaziuns correspundentas èn finanziadas suffizientamain, en spezial sche las retenziuns tecnicas e las reservas da fluctuaziun da la valur necessarias èn avant maun, e sche l'expert per il provediment professiunal conferma quai.

² L'autoritad da surveglianza da l'instituziun da provediment che surpiglia ils effectivs controllescha, sche las cundiziuns per ina surpigliada èn ademplidas, ed approvescha la surpigliada cun decretar ina disposiziun. Ella communitgescha la disposiziun a l'autoritad da surveglianza ch'è stada cumpetenta fin lura. La surpigliada dastga vegnir exequida, cura che la disposiziun d'approvaziun da l'autoritad da surveglianza ha survegnì forza legala.

³ Suenter la surpigliada guarda l'autoritad da surveglianza en spezial, ch'ils chapitals da provediment e las retenziuns tecnicas ch'èn vegnids furmads per l'effectiv da persunas che retiran rentas ch'ins ha surpiglià, vegnian adattads mo en cas motivads. Per quest intent po ella pretender mintga onn in rapport da l'expert per il provediment professiunal ed ordinar las mesiras necessarias.

⁴ Da la furmaziun da retenziuns tecnicas en il senn da l'alinea 3 poi vegnir desistì, sche las prestaziuns da renta da l'effectiv da persunas che retiran rentas ch'ins ha surpiglià èn assicuradas cumplettamain ed irrevocablamain tar ina interpresa d'assicuranza tenor l'artitgel 2 alinea 1 literas a e b da la Lescha dals 17 da december 2004²¹¹ davart la surveglianza da las assicuranzas.

⁵ Il Cussegl federal regla ils detagls per la surpigliada d'effectivs da persunas che retiran rentas e po decretar disposiziuns concernent l'approvaziun da l'autoritad da surveglianza. El regla en spezial:

a.

tge che vala sco effectiv cun ina gronda cumpart da persunas che retiran rentas;

b.

las pretensiuns a la finanziaziun da las obligaziuns da rentas.

¹ L'instituziun da provediment u l'instituziun d'assicuranza sto annunziar en scrit a l'autra part contractanta midadas substanzialas d'in contract d'affiliaziun u d'in contract d'assicuranza almain 6 mais avant che las midadas duain entrar en vigur.

² L'autra part contractanta po disdir il contract en scrit, observond in termin da disditga da 30 dis, per il di che las midadas duain entrar en vigur.

³ Ella po pretender en scrit che l'instituziun da provediment u l'instituziun d'assicuranza mettia a disposiziun las indicaziuns necessarias per dumandar offertas. Sche questas indicaziuns na vegnan betg communitgadas entaifer 30 dis suenter ch'ellas èn vegnidas dumandadas, sa spostan il cumenzament dal termin da disditga da 30 dis ed il di che las midadas substanzialas entran en vigur tut tenor il retard. Sch'i na vegn betg fatg diever dal dretg legal da disditga, entran las midadas substanzialas en vigur il di annunzià.

⁴ Sco midadas substanzialas d'in contract d'affiliaziun u d'in contract d'assicuranza tenor l'alinea 1 valan las suandantas midadas:

a.

in augment d'almain 10 pertschient entaifer 3 onns da quellas contribuziuns che na correspundan betg a las bunificaziuns sin dabuns da las persunas assicuradas;

b.

ina reducziun da la tariffa da conversiun che chaschuna ina reducziun d'almain 5 pertschient da la prestaziun da vegliadetgna presumtiva per las persunas assicuradas;

c.

autras mesiras che han almain ils medems effects sco quels tenor las literas a e b;

d.

l'aboliziun da la reassicuranza cumplaina.

⁵ Las midadas tenor l'alinea 4 na valan betg sco substanzialas, sch'ellas resultan d'ina midada da las basas giuridicas.

¹ Per investir e per administrar cuminaivlamain respargns da provediment pon vegnir constituidas fundaziuns tenor ils artitgels 80-89a CCS²¹⁴.²¹⁵

² Fundaziuns d'investiziun èn instituziuns che servan al provediment professiunal. Ellas suttastattan a questa lescha. Uschenavant che questa lescha e sias disposiziuns executivas na prevesan nagina regulaziun applitgabla per la fundaziun d'investiziun, èn applitgablas per ella subsidiarmain las disposiziuns generalas dal dretg da fundaziuns.

¹ L'organ suprem da la fundaziun d'investiziun è la radunanza dals investiders.

² Il cussegl da fundaziun è l'organ suprem. Cun excepziun da las incumbensas ch'èn colliadas directamain cun la direcziun suprema da la fundaziun d'investiziun po el delegar la gestiun a terzas persunas.

³ La radunanza dals investiders decretescha disposiziuns davart l'organisaziun, davart l'administraziun e davart la controlla da la fundaziun d'investiziun.

¹ La facultad totala da la fundaziun d'investiziun cumpiglia la facultad da basa e la facultad d'investiziun. La radunanza dals investiders decretescha disposiziuns davart l'investiziun da questas facultads. Ils statuts pon fixar che questa cumpetenza vegnia exequida dal cussegl da fundaziun.

² La facultad d'investiziun vegn furmada dals daners che vegnan appurtads dals investiders cun l'intent da far cuminaivlamain investiziuns da la facultad. Ella furma ina gruppa d'investiziun u è dividida en pliras gruppas d'investiziun. En quai che concerna la contabilitad vegnan las gruppas d'investiziun manadas en moda autonoma ed èn economicamain independentas ina da l'autra.

³ Ina gruppa d'investiziun consista da dretgs eguals e senza valur nominala d'in u da plirs investiders.

⁴ En cas d'in concurs da la fundaziun d'investiziun vegnan ils bains ed ils dretgs che appartegnan ad ina gruppa d'investiziun excorporads a favur da lur investiders. Il medem vala tenor il senn per il concordat cun cessiun da la facultad. Resalvà resta in dretg da la fundaziun d'investiziun sin:

a.

las indemnisaziuns previsas dal contract;

b.

la liberaziun d'obligaziuns ch'ella ha surpiglià per ademplir correctamain sias incumbensas per ina gruppa d'investiziun;

c.

la cumpensaziun da las expensas ch'ella ha fatg per ademplir questas obligaziuns.

⁵ La scuntrada è admissibla mo en cas da pretensiuns entaifer la medema gruppa d'investiziun u en cas da pretensiuns entaifer la facultad da basa.

¹ La responsabladad da la fundaziun d'investiziun per obligaziuns d'ina gruppa d'investiziun è limitada a la facultad da questa gruppa d'investiziun.

² Mintga gruppa d'investiziun è responsabla mo per las atgnas obligaziuns.

³ La responsabladad dals investiders è exclusa.

Il Cussegl federal decretescha disposiziuns davart:

a.

il circul dals investiders;

b.

l'augment e l'utilisaziun da la facultad da basa;

c.

la fundaziun, l'organisaziun e l'aboliziun;

d.

l'investiziun, la contabilitad, il rendaquint e la revisiun;

e.

ils dretgs dals investiders.

¹ Las instituziuns da provediment ston porscher da tut temp la garanzia da pudair ademplir las obligaziuns surpigliadas.

² Ellas reglan il sistem da contribuziun e la finanziaziun uschia, che las prestaziuns pon vegnir furnidas en il rom da questa lescha, sch'ellas ston vegnir furnidas. En quest connex dastgan ellas resguardar mo il dumber avant maun da persunas assicuradas e da persunas pensiunadas (princip da la bilantschaziun en cassa serrada). Resalvads restan ils artitgels 72a-72g.²⁷³

^2bis Tut las obligaziuns d'ina instituziun da provediment ston esser cuvridas tras facultads da provediment (princip da la chapitalisaziun cumpletta). Resalvads restan l'artitgel 65c sco er ils artitgels 72a-72g.²⁷⁴

³ Ellas cumprovan lur custs d'administraziun en il quint da gestiun. Il Cussegl federal decretescha disposiziuns davart ils custs d'administraziun e davart la moda e maniera co ch'els ston vegnir cumprovads.²⁷⁵

⁴ Il Cussegl federal fixescha ina facultad iniziala e prestaziuns da garanzia per novas constituziuns da fundaziuns collectivas e cuminaivlas ch'èn suttamessas a la LFLP²⁷⁶, independentamain da lur furma giuridica u administrativa. Betg suttamessas a questa disposiziun n'èn instituziuns da provediment d'associaziuns sco er instituziuns da provediment cun plirs patruns, ch'èn economicamain u finanzialmain colliads stretgamain in cun l'auter.²⁷⁷

¹ Las instituziuns da provediment ston observar il princip da transparenza tar la regulaziun dal sistem da contribuziun, tar la finanziaziun, tar las investiziuns da chapital e tar il rendaquint.

² Cun la transparenza duai vegnir garantì che:

a.

la situaziun finanziala effectiva da l'instituziun da provediment vegnia mussada;

b.

la segirezza ch'ils intents da provediment vegnan ademplids possia vegnir cumprovada;

c.

l'organ paritetic da l'instituziun da provediment possia ademplir sia incumbensa directiva;

d.

las obligaziuns d'infurmaziun envers las persunas assicuradas possian vegnir ademplidas.

³ Las instituziuns da provediment ston esser en cas da dar infurmaziuns davart il retgav da chapital, davart l'andament da las ristgas tecnicas d'assicuranza, davart ils custs d'administraziun, davart la calculaziun dal chapital da garanzia, davart la constituziun da reservas, davart il grad da cuvrida sco er davart ils princips d'exercitar l'obligaziun da votar sco acziunaria (art. 71a).²⁷⁹

⁴ Il Cussegl federal decretescha disposiziuns davart la moda e maniera co che questas infurmaziuns ston vegnir cumprovadas - resguardond la proporziunalitad dals custs - fin sin il stgalim da las ovras da provediment.

⁵ Il Cussegl federal decretescha disposiziuns davart la moda e maniera co che la transparenza sto vegnir garantida. Per quest intent decretescha el prescripziuns da rendaquint e fixescha las pretensiuns envers la transparenza dals custs e dal retgav.

Il Cussegl federal decretescha prescripziuns minimalas davart la creaziun:

a.

da retenziuns per las ristgas tecnicas d'assicuranza;

b.

d'autras retenziuns che servan a segirar la finanziaziun;

c.²⁸¹

da reservas da fluctuaziun da la valur.

¹ Ina sutgaranzia temporara ed uschia ina divergenza temporara dal princip che la segirezza tenor l'artitgel 65 alinea 1 stoppia esser garantida da tut temp è admessa, sche:

a.

igl è garantì che las prestaziuns en il rom da questa lescha pon vegnir furnidas, sch'ellas ston vegnir furnidas (art. 65 al. 2); e

b.

l'instituziun da provediment prenda mesiras per eliminar la sutgaranzia entaifer in temp adequat.

² En cas d'ina sutgaranzia sto l'instituziun da provediment infurmar l'autoritad da surveglianza, il patrun, las persunas assicuradas sco er las persunas pensiunadas davart la dimensiun e davart ils motivs da la sutgaranzia sco er davart las mesiras prendidas.

¹ L'instituziun da provediment sto eliminar sezza la sutgaranzia. Il fond da garanzia intervegn pir, sche l'instituziun da provediment è insolventa.

² Las mesiras per eliminar ina sutgaranzia ston sa fundar sin ina basa reglamentara e tegnair quint da la situaziun speziala da l'instituziun da provediment, en spezial da las structuras da facultad e d'obligaziuns sco ils plans da provediment e la structura ed il svilup probabel dal dumber da persunas assicuradas e da persunas pensiunadas. Ellas ston esser proporziunalas, correspunder al grad da la sutgaranzia e far part d'in concept general equilibrà. Ultra da quai ston ellas esser adattadas per eliminar la sutgaranzia entaifer in temp adequat.

³ Sche autras mesiras na permettan betg da cuntanscher la finamira, po l'instituziun da provediment durant il temp da la sutgaranzia:

a.

incassar da patruns e da lavurants contribuziuns per eliminar ina sutgaranzia. La contribuziun dal patrun sto esser almain uschè gronda sco la summa da las contribuziuns dals lavurants;

b.

incassar da las persunas pensiunadas ina contribuziun per eliminar ina sutgaranzia. Questa contribuziun vegn deducida da las rentas currentas. La contribuziun dastga vegnir deducida mo da quella part da la renta currenta ch'è resultada d'augments betg prescrits da la lescha u dal reglament, e quai ils ultims 10 onns avant l'introducziun da questa mesira. Ella na dastga betg vegnir deducida da prestaziuns d'assicuranza en cas da vegliadetgna, mort ed invaliditad dal provediment obligatorica. Da prestaziuns d'assicuranza che surpassan las prestaziuns dal provediment obligatorica dastga ella vegnir deducida mo, sch'ina basa reglamentara correspundenta è avant maun. L'autezza da la renta resta garantida en mintga cas il mument ch'il dretg sin ina renta vegn stabilì.

⁴ Sche las mesiras tenor l'alinea 3 na bastan betg, po l'instituziun da provediment sutpassar la tariffa da tschains minimala tenor l'artitgel 15 alinea 2 durant il temp da la sutgaranzia, maximalmain però durant 5 onns. Il sutpassament dastga importar maximalmain 0,5 pertschient.

¹ L'instituziun da provediment po prevair en ses reglament ch'il patrun po - en cas d'ina sutgaranzia - far apports en in conto separà «Reserva da las contribuziuns dal patrun cun renunzia a l'utilisaziun (RCP cun renunzia a l'utilisaziun)» ed er transferir meds da la reserva ordinaria da las contribuziuns dal patrun sin quest conto.

² Ils apports na dastgan betg surpassar l'import da la sutgaranzia e na vegnan betg tschainsids. Els na dastgan betg vegnir duvrads per prestaziuns ed er betg vegnir impegnads, cedids u reducids en autra moda.

³ Il Cussegl federal regla ils detagls, en spezial:

a.

la dissoluziun da la RCP cun renunzia a l'utilisaziun, ses transferiment en la reserva ordinaria da las contribuziuns dal patrun e la scuntrada cun contribuziuns dal patrun che ston vegnir pajadas;

b.

l'import total pussaivel da las reservas da las contribuziuns dal patrun e ses tractament en cas d'ina liquidaziun totala e parziala.

⁴ Il patrun e l'instituziun da provediment pon fixar per contract regulaziuns supplementaras.

¹ L'instituziun da provediment fixescha en las disposiziuns reglamentaras l'autezza da las contribuziuns dal patrun e dals lavurants. La contribuziun dal patrun sto esser almain uschè gronda sco las contribuziuns totalas da tut ses lavurants. In import pli grond dal patrun po vegnir fixà mo cun ses consentiment.

² Il patrun debitescha a l'instituziun da provediment tut las contribuziuns. Per contribuziuns che na vegnan betg pajadas ad ura po l'instituziun da provediment pretender tschains da retard.

³ Il patrun deducescha dal salari la part da la contribuziun dal lavurant ch'è fixada en las disposiziuns reglamentaras da l'instituziun da provediment.

⁴ El assegna sias atgnas contribuziuns e las contribuziuns dals lavurants a l'instituziun da provediment fin il pli tard a la fin da l'emprim mais suenter l'onn chalendar u suenter l'onn d'assicuranza, per il qual vegnan debitadas las contribuziuns.²⁸⁵

¹ Las instituziuns da provediment decidan, sch'ellas vulan surpigliar sezzas la cuvrida da las ristgas u sch'ellas vulan surdar tala dal tuttafatg u per part ad ina instituziun d'assicuranza ch'è suttamessa a la surveglianza da las assicuranzas ubain - per las cundiziuns fixadas dal Cussegl federal - ad ina instituziun d'assicuranza da dretg public.

² Ellas pon surpigliar sezzas la cuvrida da las ristgas, sch'ellas adempleschan las premissas fixadas dal Cussegl federal.

¹ Instituziuns d'assicuranza che vulan surpigliar la cuvrida da las ristgas d'ina instituziun da provediment registrada tenor questa lescha, ston integrar en lur purschida tariffas che cuvran mo las ristgas per mort ed invaliditad prescrittas da la lescha. Il Cussegl federal regla ils detagls.

² ...²⁸⁶

³ Las instituziuns d'assicuranza ston furnir a las instituziuns da provediment las indicaziuns necessarias per che quellas possian garantir la transparenza che vegn pretendida en l'artitgel 65a.²⁸⁷

⁴ Tar questas indicaziuns tutgan en spezial er:

a.

in rendaquint annual e chapaivel da la participaziun al surpli; dal rendaquint sto resortir en spezial sin tge basas che la participaziun al surpli è vegnida calculada e tenor tge princips ch'ella è vegnida repartida;

b.

ina glista dals custs d'administraziun; il Cussegl federal decretescha disposiziuns davart la moda e maniera co ch'ils custs d'administraziun ston vegnir cumprovads.²⁸⁸

¹ Participaziuns al surpli che resultan da contracts d'assicuranza ston, suenter ch'il conclus concernent l'adattaziun da las rentas al svilup dals pretschs tenor l'artitgel 36 alineas 2 e 3 è vegnì prendì, vegnir bunifitgads als dabuns da spargn da las persunas assicuradas.

² Da l'alinea 1 poi vegnir divergià mo:

a.

en cas d'ovras da provediment ch'èn affiliadas a fundaziuns collectivas: sche la cumissiun da provediment da l'ovra da provediment prenda explicitamain in conclus divergent e communitgescha quel a la fundaziun collectiva;

b.

en cas d'instituziuns da provediment che na vegnan betg manadas en furma d'ina fundaziun collectiva: sche l'organ paritetic prenda explicitamain in conclus divergent e communitgescha quel a l'instituziun d'assicuranza.

¹ Las instituziuns da provediment administreschan lur facultads uschia, che la segirezza ed in retgav suffizient da las investiziuns, ina repartiziun adequata da las ristgas sco er la cuvrida dal basegn previsibel da meds finanzials liquids èn garantids.

² L'instituziun da provediment na dastga betg impegnar u engrevgiar ses dretgs che derivan d'in contract d'assicuranza da vita collectiv u d'in contract da reassicuranza.²⁹²

¹ En cas da societads anonimas tenor ils artitgels 620-762 DO²⁹⁴ cun aczias quotadas ad ina bursa ston las instituziuns da provediment exercitar il dretg da votar da las aczias ch'èn en lur possess, e quai areguard las propostas tractandadas che pertutgan ils suandants puncts:

a.

elecziun dals commembers dal cussegl d'administraziun, dal president dal cussegl d'administraziun, dals commembers da la cumissiun d'indemnisaziun e dal represchentant independent dal dretg da votar;

b.

disposiziuns statutaras tenor l'artitgel 626 alinea 2 DO;

c.

disposiziuns statutaras e votaziuns tenor las disposiziuns dals artitgels 732-735d DO.

² Ellas ston votar en l'interess da lur persunas assicuradas. L'interess da las persunas assicuradas vala sco mantegnì, sch'il cumportament da votaziun serva a la prosperitad duraivla da l'instituziun da provediment.

³ Ellas dastgan s'abstegnair da la vusch, sche quai correspunda a l'interess da las persunas assicuradas.

⁴ L'organ suprem da l'instituziun da provediment sto fixar en in reglament ils princips che circumscrivan pli detagliadamain l'interess da las persunas assicuradas en connex cun l'exercizi dal dretg da votar.

¹ Almain ina giada per onn ston las instituziuns da provediment infurmar lur persunas assicuradas en in rapport resumativ davart la moda e maniera, co ch'ellas han ademplì lur obligaziun da votar sco acziunaria.

² Sch'ellas na suondan betg las propostas dal cussegl d'administraziun da la societad anonima u sch'ellas s'abstegnan da la vusch, ston ellas declerar detagliadamain lur cumportament da votaziun en il rapport.

¹ L'instituziun auxiliara sto vegnir finanziada tenor il princip da la bilantschaziun en cassa serrada, uschenavant ch'ella surpiglia sezza la cuvrida da las ristgas.

² Ils custs che resultan tenor l'artitgel 12 a l'instituziun auxiliara vegnan surpigliads dal fond da garanzia tenor l'artitgel 56 alinea 1 litera b.

³ Ils custs ch'èn resultads a l'instituziun auxiliara per sia activitad tenor l'artitgel 60 alinea 2 da questa lescha sco er tenor l'artitgel 4 alinea 2 LFLP²⁹⁶, che na pon betg vegnir adossads al chaschunader, vegnan surpigliads dal fond da garanzia.²⁹⁷

¹ Instituziuns da provediment da corporaziuns da dretg public che n'adempleschan - il mument che la midada dals 17 da december 2010 entra en vigur - betg las pretensiuns da la chapitalisaziun cumpletta e per las qualas exista ina garanzia statala tenor l'artitgel 72c pon - cun l'approvaziun da l'autoritad da surveglianza - divergiar dal princip da la chapitalisaziun cumpletta (sistem da la chapitalisaziun parziala), sch'igl è avant maun in plan da finanziaziun che garantescha a lunga vista lur equiliber finanzial. Il plan da finanziaziun sto garantir en spezial che:

a.

las obligaziuns envers las persunas pensiunadas sajan cuvridas cumplainamain;

b.²⁹⁹

ils grads da cuvrida da partenza na vegnian betg sutpassads per tut las obligaziuns da l'instituziun da provediment sco er per sias obligaziuns envers las persunas assicuradas activas, e quai fin a la midada al sistem da la chapitalisaziun cumpletta;

c.³⁰⁰

igl existia ina grad da cuvrida d'almain 80 pertschient per tut las obligaziuns envers persunas pensiunadas sco er envers persunas assicuradas activas;

d.

augments futurs da las prestaziuns vegnian finanziads a 100 pertschient tenor la procedura da chapitalisaziun.

² L'autoritad da surveglianza controllescha il plan da finanziaziun ed approvescha che l'instituziun da provediment vegnia manada vinavant tenor il sistem da la chapitalisaziun parziala. Ella procura ch'il plan da finanziaziun prevesia ch'ils grads da cuvrida existents vegnian observads.

³ Las instituziuns da provediment pon prevair ina reserva da fluctuaziuns en la repartiziun, sch'ina midada da la structura dal dumber da persunas assicuradas è previsibla.

⁴ Il Cussegl federal decretescha prescripziuns davart la calculaziun dals meds finanzials libers. El po fixar ch'i n'existia nagin dretg proporziunal sin la reserva da fluctuaziuns en la repartiziun en cas d'ina liquidaziun parziala.

¹ Sco grads da cuvrida da partenza valan ils grads da cuvrida il mument che la midada dals 17 da december 2010 entra en vigur.

² Tar la calculaziun dals grads da cuvrida da partenza sto il chapital da garanzia ch'è necessari per pajar las rentas che ston vegnir pajadas, vegnir resguardà cumplainamain.

³ Tar la calculaziun dals grads da cuvrida da partenza dastgan reservas en cas da midadas da la valur e reservas da fluctuaziuns en la repartiziun vegnir deducidas da la facultad da provediment.

¹ Ina garanzia statala è avant maun, sche la corporaziun da dretg public garantescha la cuvrida per las suandantas prestaziuns da l'instituziun da provediment, uschenavant che quellas n'èn betg finanziadas cumplainamain pervia dals grads da cuvrida da partenza tenor l'artitgel 72a alinea 1 litera b:

a.

prestaziuns da vegliadetgna, da ristga e d'extrada;

b.

prestaziuns d'extrada envers il dumber da persunas assicuradas che sortan en cas d'ina liquidaziun parziala;

c.

deficits en chaussas tecnicas d'assicuranza che resultan tar il dumber da persunas assicuradas restantas en consequenza d'ina liquidaziun parziala.

² Ina garanzia statala vala er per obligaziuns envers dumbers da persunas assicuradas che s'affilieschan posteriuramain a l'instituziun da provediment.

L'instituziun da provediment sto laschar controllar periodicamain tras l'expert per il provediment professiunal, sche ses equiliber finanzial è garantì a lunga vista cun il sistem da la chapitalisaziun parziala e sch'il plan da finanziaziun tenor l'artitgel 72a alinea 1 vegn observà.

Sch'in grad da cuvrida da partenza tenor l'artitgel 72a alinea 1 litera b vegn sutpassà, sto l'instituziun da provediment prender mesiras tenor ils artitgels 65c-65e.

¹ La finanziaziun da las instituziuns da provediment sa drizza tenor ils artitgels 65-72, uschespert che talas adempleschan lur pretensiuns.

² La garanzia statala po vegnir abolida da la corporaziun da dretg public, sche l'instituziun da provediment ademplescha las pretensiuns da la chapitalisaziun cumpletta ed ha avunda reservas en cas da midadas da la valur.

Il Cussegl federal suttametta a l'Assamblea federala mintga 10 onns in rapport davart la situaziun finanziala da las instituziuns da provediment da corporaziuns da dretg public, en spezial davart la relaziun tranter las obligaziuns e la facultad da provediment.

¹ Mintga chantun designescha ina dretgira che decida sco ultima instanza chantunala davart dispitas tranter instituziuns da provediment, patruns e persunas che han il dretg sin prestaziuns. La dretgira decida er davart:

a.

dispitas cun instituziuns che garanteschan il mantegniment dal provediment en il senn da l'artitgel 4 alinea 1 e 26 alinea 1 LFLP³⁰²;

b.

dispitas che resultan cun instituziuns tras l'applicaziun da l'artitgel 82 alinea 2;

c.

pretensiuns da responsabladad tenor l'artitgel 52;

d.

il regress tenor l'artitgel 56a alinea 1.³⁰³

² Ils chantuns prevesan ina procedura simpla, svelta e per regla gratuita; il derschader constatescha d'uffizi ils fatgs.

³ La dretgira cumpetenta è la dretgira al domicil u a la sedia da la persuna accusada en Svizra u il lieu dal manaschi, dal qual la persuna assicurada è vegnida engaschada.

⁴ ...³⁰⁴

¹ Cunter las disposiziuns da l'autoritad da surveglianza poi vegnir fatg recurs tar il Tribunal administrativ federal.

² La procedura da recurs cunter disposiziuns sa basond sin l'artitgel 62 alinea 1 litera e è gratuita per las persunas assicuradas, nun ch'ellas hajan agì da nunponderadamain u da levsenn.

³ In recurs cunter ina disposiziun da l'autoritad da surveglianza ha mo in effect suspensiv, sch'il Tribunal administrativ federal decretescha quel sin dumonda d'ina partida.³⁰⁶

⁴ Cunter decisiuns dal Tribunal administrativ federal en il sectur dal provediment professiunal ha la cumissiun da surveglianza suprema il dretg da far recurs tar il Tribunal federal.³⁰⁷

Uschenavant ch'i n'è betg avant maun in malfatg ch'è smanatschà cun in chasti pli sever tenor il Cudesch penal³⁰⁹, vegn chastià cun ina multa, tgi che fa il suandant:

a.

violescha l'obligaziun da dar infurmaziuns, dond sapientivamain infurmaziuns faussas ubain refusond da dar infurmaziuns;

b.

s'oppona ad ina controlla ordinada da l'autoritad cumpetenta u impedescha ina tala en autra moda;

c.

n'emplenescha betg ils formulars necessaris u als emplenescha en ina moda che na correspunda betg a la vardad.

¹ Uschenavant ch'i n'è betg avant maun in malfatg ch'è smanatschà cun in chasti pli sever tenor il Cudesch penal³¹¹, vegn chastià cun in chasti pecuniar, tgi che fa il suandant:

a.

obtegna - tras indicaziuns faussas u incumplettas u en autra moda - per sasez u per in auter ina prestaziun da l'instituziun da provediment u dal fond da garanzia, da la quala el n'ha nagin dretg;

b.

sa retira - tras indicaziuns faussas u incumplettas u en autra moda - da l'obligaziun da pajar contribuziuns ad ina instituziun da provediment u al fond da garanzia;

c.

deducescha sco patrun contribuziuns dal salari d'in lavurant e na dovra betg las contribuziuns per l'intent previs;

d.

violescha l'obligaziun da discreziun u surdovra, exequind questa lescha, sia posiziun sco organ u sco funcziunari per dischavantatg da terzas persunas u per ses agen avantatg;

e.

violescha - sco possessur u commember d'in post da revisiun u sco expert renconuschì per il provediment professiunal - gravantamain las obligaziuns tenor ils artitgels 52c e 52e;

f.

fa sin agen quint affars inadmissibels, cuntrafa a l'obligaziun da transparenza cun far indicaziuns nunvairas u incumplettas u cun agir en autra moda gravantamain cunter ils interess da l'instituziun da provediment;

g.

na declera betg u tegna per sai avantatgs da facultad u retrocessiuns che stattan en connex cun l'administraziun da la facultad, premess che quels na sajan betg quantifitgads explicitamain sco indemnisaziun en il contract d'administraziun da la facultad; u

h.

violescha - sco commember da l'organ suprem u sco persuna ch'è incumbensada cun la gestiun d'ina instituziun da provediment suttamessa als artitgels 71a e 71b - l'obligaziun da votar u l'obligaziun da transparenza tenor quests artitgels.

² Sch'il delinquent prenda mo en cumpra la pussaivladad da realisar in malfatg tenor l'alinea 1 litera h, na po el betg vegnir chastià tenor questa disposiziun.

¹ Sch'ina cuntravenziun vegn commessa cun procurar las fatschentas d'ina persuna giuridica, d'ina societad collectiva u commanditara, d'ina firma singula u d'ina collectivitad senza persunalitad giuridica u uschiglio cun exequir fatschentas u servetschs per in'autra persuna, vegnan las disposiziuns penalas applitgadas sin quellas persunas natiralas che han commess il malfatg.

² Il schef da l'interpresa, il patrun, il mandant u il represchentà che tralascha intenziunadamain u per negligientscha, violond in'obligaziun giuridica, d'impedir ina cuntravenziun dal subordinà, dal mandatari u dal represchentant u d'eliminar ils effects da questa cuntravenziun, è suttamess a las disposiziuns penalas che valan per il delinquent che agescha correspundentamain.

³ Sch'il schef da l'interpresa u il patrun, l'incumbensader u il represchentà è ina persuna giuridica, ina societad collectiva u commanditara, ina firma singula u ina totalitad da persunas senza persunalitad giuridica, vegn l'alinea 2 applitgà sin ils organs culpaivels, sin ils commembers dals organs, sin ils associads directivs, sin las persunas effectivamain directivas u sin ils liquidaturs.

⁴ Sch'ina multa da maximalmain 4000 francs vegn en consideraziun e sche l'investigaziun da las persunas chastiablas tenor ils alineas 1-3 pretendess mesiras d'inquisiziun che fissan sproporziunadas en vista al chasti scadì, poi vegnir desistì da persequitar questas persunas, ed empè dad ellas po la persuna giuridica, la societad collectiva u commanditara u la firma singula vegnir sentenziada da pajar la multa.³¹²

La persecuziun ed il giudicament èn chaussa dals chantuns.

¹ Tgi che n'ademplescha betg a temp util ad ina disposiziun da l'autoritad da surveglianza cumpetenta, malgrà ch'el è vegnì admonì e rendì attent a la smanatscha da chasti tenor quest artitgel, vegn chastià da l'autoritad da surveglianza cun ina multa disciplinara da fin 4000 francs.³¹⁴ En cas da violaziuns da l'urden da pauca impurtanza po vegnir pronunzià in avertiment.

² Cunter las disposiziuns da multa poi vegnir fatg recurs tar il Tribunal administrativ federal.³¹⁵

Las disposiziuns da quest titel valan per tut las relaziuns da provediment, independentamain dal fatg sche l'instituziun da provediment è inscritta en il register dal provediment professiunal u betg.

¹ L'instituziun da provediment dastga pussibilitar l'acquist fin maximalmain a l'autezza da las prestaziuns reglamentaras.

² Il Cussegl federal regla l'acquist da persunas, che:

a.

n'han anc mai appartegnì ad ina instituziun da provediment fin il mument ch'ellas han pretendì l'acquist;

b.

retiran u han retratg ina prestaziun dal provediment professiunal.³²⁰

³ Sch'i èn vegnids fatgs acquists, na dastgan las prestaziuns che resultan betg vegnir retratgas dal provediment en furma da chapital entaifer ils 3 onns sequents. Sch'i èn vegnidas fatgas retratgas anticipadas per la promoziun da la proprietad d'abitaziuns, dastgan acquists facultativs vegnir fatgs pir, cur che las retratgas anticipadas èn pajadas enavos.

⁴ Ils reacquists en cas da divorzi u da schliaziun giudiziala d'in partenadi registrà tenor l'artitgel 22c LFLP³²¹ èn exceptads da la limitaziun.³²²

Il salari dals lavurants ch'è assicurabel tenor il reglament da l'instituziun da provediment u las entradas assicurablas da las persunas cun activitad da gudogn independenta è limità a diesch giadas l'import maximal tenor l'artitgel 8 alinea 1.

¹ Las disposiziuns da quest titel valan er per las instituziuns da provediment che n'èn betg inscrittas en il register dal provediment professiunal.

² Las instituziuns da provediment dal dretg public e dal dretg privat che han ina persunalitad giuridica èn, uschenavant che lur entradas e valurs da facultad servan exclusivamain al provediment professiunal, deliberadas da las taglias directas da la Confederaziun, dals chantuns e da las vischnancas e da las taglias sin iertas e sin donaziuns dals chantuns e da las vischnancas.

³ Immobiglias dastgan vegnir engrevgiadas tras taglias funsilas, en spezial tras taglias sin immobiglias da la valur brutta da l'immobiglia e tras taglias sin midada da proprietad.

⁴ Plivalurs da la vendita d'immobiglias dastgan vegnir engrevgiadas ubain tras la taglia sin il gudogn generala ubain tras ina taglia speziala sin il gudogn tras la vendita da bains immobigliars. En cas da fusiuns e da repartiziuns d'instituziuns da provediment na dastgan vegnir incassadas naginas taglias sin il gudogn.

¹ Las contribuziuns dals patruns a l'instituziun da provediment ed ils apports a las reservas da las contribuziuns dal patrun, inclusiv tals tenor l'artitgel 65e, valan tar las taglias directas da la Confederaziun, dals chantuns e da las vischnancas sco custs da fatschenta.³²⁵

² Las contribuziuns ch'ils lavurants e las persunas cun activitad da gudogn independenta pajan tenor lescha u tenor disposiziuns reglamentaras ad instituziuns da provediment, èn deduciblas tar las taglias directas da la Confederaziun, dals chantuns e da las vischnancas.

³ Per il lavurant assicurà ston las contribuziuns che vegnan deducidas dal salari, vegnir inditgadas en l'attest da salari; autras contribuziuns ston vegnir attestadas da las instituziuns da provediment.

La contribuziun da las persunas pensiunadas per eliminar ina sutgaranzia tenor l'artitgel 65d alinea 3 litera b è deducibla tar las taglias directas da la Confederaziun, dals chantuns e da las vischnancas.

¹ Lavurants e persunas cun activitad da gudogn independenta pon er deducir contribuziuns per ulteriuras furmas da provediment renconuschidas che servan unicamain ed irrevocablamain al provediment professiunal. Sco talas furmas da provediment valan:

a.

il provediment individual lià tar instituziuns d'assicuranza;

b.

il provediment individual lià tar fundaziuns bancaras.

² Il Cussegl federal fixescha en collavuraziun cun ils chantuns il dretg da far deducziuns per contribuziuns tenor l'alinea 1.

³ El regla ils detagls da las furmas da provediment renconuschidas, en spezial definescha el il circul e la successiun dals benefiziaris. El fixescha, quant enavant ch'il titular dal provediment po midar la successiun dals benefiziaris e designar pli detagliadamain lur pretensiuns; il titular dal provediment sto formular sias disposiziuns en scrit.

⁴ Ils benefiziaris d'ina furma da provediment renconuschida han in agen dretg sin la prestaziun che vegn attribuida ad els tras questa furma da provediment. L'instituziun d'assicuranza u la fundaziun bancara paja questa prestaziun als benefiziaris.

Las prestaziuns d'instituziuns da provediment e da furmas da provediment tenor ils artitgels 80 ed 82 pon vegnir suttamessas cumplainamain a las taglias directas da la Confederaziun, dals chantuns e da las vischnancas sco entradas.

¹ La retratga anticipada ed il retgav obtegnì da la realisaziun dal pegn dal dabun da provediment èn suttamess a la taglia sco prestaziun da chapital dal provediment.

² En cas ch'ils daners da la retratga anticipada u dal retgav da la realisaziun dal pegn vegnan puspè pajads en, po il pajataglia pretender da survegnir enavos las taglias ch'el ha pajà sin l'import ch'el ha obtegnì tar la retratga anticipada u tar la realisaziun dal pegn. Tals rembursaments na dastgan betg vegnir deducids per eruir las entradas suttamessas a la taglia.

³ Il dretg da survegnir enavos las taglias pajadas extingua 3 onns suenter ch'ils daners obtegnids da la retratga anticipada u da la realisaziun dal pegn èn puspè vegnids pajads en ad ina instituziun dal provediment professiunal.

⁴ Tut las acziuns tenor ils alineas 1-3 ston vegnir communitgadas da l'instituziun da provediment correspundenta a l'Administraziun federala da taglia senza intimaziun da sia vart.

⁵ Las disposiziuns da quest artitgel valan per las taglias directas da la Confederaziun, dals chantuns e da las vischnancas.

Avant ch'ellas ston vegnir pajadas èn las pretensiuns or d'instituziuns da provediment ed or da furmas da provediment tenor ils artitgels 80 ed 82 deliberadas da las taglias directas da la Confederaziun, dals chantuns e da las vischnancas.

¹ Il Cussegl federal nominescha ina cumissiun federala per il provediment professiunal cun maximalmain 21 commembers. Ella sa cumpona da represchentants da la Confederaziun e dals chantuns sco er, maioritarmain, da represchentants dals patruns, dals lavurants e da las instituziuns da provediment.

² La cumissiun dat il parairi al Cussegl federal en quai che pertutga dumondas da la realisaziun e da l'ulteriur svilup dal provediment professiunal.

¹ Ils organs ch'èn incumbensads da realisar ubain da controllar u da survegliar la realisaziun da questa lescha èn autorisads d'elavurar u da laschar elavurar las datas persunalas, inclusiv datas persunalas spezialmain sensiblas, ch'els dovran per ademplir las incumbensas confidadas ad els tenor questa lescha, en spezial per:³³¹

a.

calcular ed incassar las contribuziuns d'assicuranza;

b.

giuditgar dretgs da prestaziuns sco er calcular, garantir e coordinar talas cun prestaziuns d'autras assicuranzas socialas;

c.

far valair il dretg da prender regress sin ina terza persuna responsabla;

d.

exequir la surveglianza davart la realisaziun da questa lescha;

e.

far statisticas;

f.³³²

attribuir u verifitgar il numer da la AVS.

² Per ademplir questas incumbensas èn els ultra da quai autorisads d'elavurar u da laschar elavurar datas persunalas, che permettan en spezial da giuditgar la sanadad, la grevezza da la suffrientscha fisica u psichica, ils basegns e la situaziun economica da la persuna assicurada.³³³

¹ Sch'ils interess privats predominants restan garantids, han il dretg da prender invista da las actas:

a.

la persuna assicurada, per las datas che concernan ella sezza;

b.

persunas che han in dretg u in'obligaziun tenor questa lescha, per quellas datas ch'èn necessarias per far valair il dretg u per ademplir l'obligaziun;

c.

persunas ed instituziuns, a las qualas stat a disposiziun in med legal cunter ina disposiziun decretada sin basa da questa lescha, per las datas ch'èn necessarias per exequir quest dretg;

d.

autoritads ch'èn cumpetentas per recurs cunter disposiziuns decretadas sin basa da questa lescha, per las datas ch'èn necessarias per ademplir questa incumbensa;

e.

la persuna responsabla e ses assicurader, per las datas ch'èn necessarias per giuditgar in dretg dal provediment professiunal da prender regress.

² Sch'i sa tracta da datas da sanadad che pudessan avair consequenzas negativas per la sanadad da la persuna che ha il dretg da prender invista, en cas ch'ellas vegnan rendidas enconuschentas, poi vegnir pretendì da questa persuna ch'ella designeschia in medi che renda enconuschent questas datas ed ella.

Persunas ch'èn incumbensadas da realisar sco er da controllar u da survegliar la realisaziun da questa lescha, ston mantegnair discreziun envers terzas persunas.

¹ Sche nagins interess privats predominants n'impedeschan quai, dastgan vegnir communitgadas datas en il cas singul e sin ina dumonda en scrit e motivada:

a.

a las autoritads d'agid social, sch'ellas èn necessarias per determinar, midar u pretender enavos prestaziuns respectivamain per impedir retratgas betg giustifitgadas;

a^bis.³³⁷

al post spezialisà designà dal dretg chantunal (art. 40), sch'ellas èn necessarias per incassar pajaments da mantegniment betg pajads u per segirar pajaments da mantegniment futurs;

b.

a las dretgiras civilas, sch'ellas èn necessarias per giuditgar ina dispita da dretg da famiglia u d'ierta;

c.

a las dretgiras penalas ed autoritads d'inquisiziun penala, sch'ellas èn necessarias per sclerir in crim u in delict;

d.

als uffizis da scussiun, tenor ils artitgels 91, 163 e 222 da la Lescha federala dals 11 d'avrigl 1889³³⁸ davart la scussiun ed il concurs;

e.

a las autoritads da taglia, sch'ellas sa refereschan al pajament da prestaziuns dal provediment professiunal e sch'ellas èn necessarias per applitgar las leschas da taglia;

f.³³⁹

a las las autoritads per la protecziun d'uffants e da creschids tenor l'artitgel 448 alinea 4 CCS³⁴⁰;

g.³⁴¹

...

² Sche nagins interess privats predominants n'impedeschan quai, dastgan vegnir communitgadas datas:

a.

ad auters organs ch'èn incumbensads da realisar sco er da controllar u da survegliar la realisaziun da questa lescha, sch'ellas èn necessarias per ademplir las incumbensas surdadas ad els tras questa lescha;

b.

ad organs d'ina autra assicuranza sociala, sch'ina obligaziun da render enconuschentas questas datas resulta tras ina lescha federala;

b^bis.³⁴²

ad organs d'ina autra assicuranza sociala per attribuir u per verifitgar il numer da la AVS;

c.

a las autoritads cumpetentas per la taglia a la funtauna, tenor ils artitgels 88 e 100 da la Lescha federala dals 14 da december 1990³⁴³ davart la taglia federala directa sco er tenor las disposiziuns chantunalas respectivas;

d.

als organs da la statistica federala, tenor la Lescha da statistica dals 9 d'october 1992³⁴⁴;

e.

a las autoritads d'inquisiziun penala, sche la denunzia u l'impediment d'in crim pretenda quai;

f.³⁴⁵

a l'uffizi da la AI per la registraziun tempriva tenor l'artitgel 3b LAI³⁴⁶ u en il rom da la collavuraziun interinstituziunala tenor l'artitgel 68^bis LAI ed a las instituziuns d'assicuranza privatas tenor l'artitgel 68^bis alinea 1 litera b LAI;

g.³⁴⁷

al Servetsch d'infurmaziun da la Confederaziun (SIC) u als organs da segirezza dals chantuns per mauns dal SIC, sch'igl è avant maun ina smanatscha concreta per la segirezza interna u externa tenor l'artitgel 19 alinea 2 da la Lescha federala dals 25 da settember 2015³⁴⁸ davart il servetsch d'infurmaziun.

³ Las datas dastgan er vegnir communitgadas a l'autoritad da taglia responsabla en il rom da la procedura d'annunzia tenor l'artitgel 19 da la Lescha federala dals 13 d'october 1965³⁴⁹ davart la taglia anticipada.

⁴ Las datas ch'èn d'interess general e che sa refereschan a l'applicaziun da questa lescha, dastgan vegnir publitgadas. L'anonimitad da las persunas assicuradas sto restar garantida.

⁵ En ils ulteriurs cas dastgan datas vegnir communitgadas a terzas persunas sco suonda:

a.

datas che na sa refereschan betg a persunas, sche la communicaziun correspunda ad in interess predominant;

b.

datas da persunas, sche la persuna pertutgada ha dà ses consentiment en scrit en il cas singul u, sch'i n'è betg pussaivel d'obtegnair il consentiment, sch'i dastga vegnir premess tenor las circumstanzas che lur communicaziun saja en l'interess da la persuna assicurada.

⁶ I dastgan vegnir communitgadas mo las datas ch'èn necessarias per l'intent che stat en dumonda.

⁷ Il Cussegl federal regla las modalitads da la communicaziun e da l'infurmaziun da la persuna pertutgada.

⁸ Per regla vegnan las datas communitgadas en scrit e gratuitamain. Il Cussegl federal po prevair l'incassament d'ina taxa, sch'i ston vegnir fatgas lavurs che dovran spezialmain bler temp.

¹ L'instituziun da provediment sto infurmar annualmain sias persunas assicuradas en furma adattada davart:

a.

ils dretgs da prestaziuns, il salari coordinà, la tariffa da contribuziun ed il dabun da vegliadetgna;

b.

l'organisaziun e la finanziaziun;

c.

ils commembers da l'organ paritetic tenor l'artitgel 51;

d.³⁵¹

l'exercizi da l'obligaziun da votar sco acziunaria tenor l'artitgel 71b.

² Sin dumonda sto vegnir consegnà il quint annual ed il rapport annual a las persunas assicuradas. Medemamain sto l'instituziun da provediment dar ad ellas sin dumonda infurmaziuns davart il retgav da chapital, davart l'andament da las ristgas tecnicas d'assicuranza, davart ils custs d'administraziun, davart la calculaziun dal chapital da garanzia, davart la constituziun da reservas, davart il grad da cuvrida sco er davart ils princips d'exercitar l'obligaziun da votar sco acziunaria (art. 71a).³⁵²

³ Instituziuns collectivas e cuminaivlas ston orientar l'organ paritetic sin dumonda davart contribuziuns che ston anc vegnir pajadas dal patrun. L'instituziun da provediment sto orientar da sai anora l'organ paritetic, sche contribuziuns reglamentaras n'èn betg anc vegnidas transferidas entaifer 3 mais suenter il termin da pajament fixà.

⁴ L'artitgel 75 è applitgabel.

¹ Las autoritads administrativas e las autoritads da la giurisdicziun da la Confederaziun, dals chantuns, dals districts, dals circuls e da las vischnancas sco er ils organs da las autras assicuranzas socialas communitgeschan als organs ch'èn incumbensads da realisar questa lescha - sin dumonda en scrit e motivada - en il cas singul gratuitamain quellas datas ch'èn necessarias per:

a.

controllar l'affiliaziun dal patrun;

b.

fixar, midar u pretender enavos prestaziuns;

c.

impedir retratgas betg giustifitgadas;

d.

fixar ed incassar las contribuziuns;

e.

prender regress sin terzas persunas responsablas.

² Sch'ina instituziun da provediment vegn a savair en il rom da sias funcziuns ch'ina persuna assicurada retira prestaziuns nungiustifitgadas, po ella infurmar ils organs da l'assicuranza sociala pertutgada davart quest fatg.³⁵⁴

Sche las instituziuns da provediment constateschan en il rom da l'execuziun da lur incumbensas ch'ina persuna ha retratg nungiustifitgadamain prestaziuns, èn ellas autorisadas d'annunziar quai als organs da l'assicuranza sociala pertutgada sco er als organs da l'instituziun da provediment pertutgada.

Las midadas dal dretg federal vertent sa chattan en l'agiunta; quella è ina part integrala da questa lescha.

Questa lescha na pertutga betg ils dretgs da las persunas assicuradas, ch'ellas han acquistà avant che la lescha è entrada en vigur.

Durant ils 2 emprims onns suenter l'entrada en vigur da la lescha valan las suandantas tariffas minimalas per calcular las bunificaziuns da vegliadetgna:

¹ Il Cussegl federal surveglia l'applicaziun da la lescha e prenda las mesiras per realisar il provediment professiunal.

^1bis Il Cussegl federal decretescha prescripziuns davart la realisaziun da retschertgas e davart la publicaziun d'infurmaziuns che servan a controllar l'applicaziun sco er ad evaluar l'effect da questa lescha. En quest connex ston vegnir analisads en spezial l'organisaziun e la finanziaziun da las instituziuns da provediment, las prestaziuns e lur retschaviders sco er la contribuziun dal provediment professiunal al mantegniment dal nivel da viver anteriur.³⁷⁶

² Ils chantuns decreteschan las disposiziuns executivas. ...³⁷⁷

³ Ils chantuns communitgeschan las prescripziuns executivas al Departament federal da l'intern.³⁷⁸

¹ Questa lescha è suttamessa al referendum facultativ.

² Il Cussegl federal fixescha il termin che questa lescha entra en vigur e resguarda en quest connex en spezial las relaziuns socialas ed economicas. Singulas prescripziuns po el metter en vigur avant quest termin.

³ Las prescripziuns da l'artitgel 81 alineas 2 e 3 e dals artitgels 82 ed 83 ston vegnir messas en vigur entaifer 3 onns suenter l'entrada en vigur da questa lescha.

⁴ L'artitgel 83 na vegn betg applitgà per rentas e per cumpensaziuns en chapital or d'instituziuns da provediment u da furmas da provediment en il senn dals artitgels 80 ed 82 che:

a.

cumenzan a currer u ston vegnir pajadas avant l'entrada en vigur da l'artitgel 83; u

b.

cumenzan a currer u ston vegnir pajadas entaifer 15 onns dapi l'entrada en vigur da l'artitgel 83 e sa basan sin ina relaziun da provediment ch'exista gia tar l'entrada en vigur.

Data da l'entrada en vigur:³⁷⁹ 1. da schaner 1985
Art. 54, 55, 61, 63, 64 e 97: 1. da fanadur 1983
Art. 48 e 93: 1. da schaner 1984
Art. 60: 1. da fanadur 1984
Art. 81 al. 2 e 3, 82 ed 83: 1. da schaner 1987