¹ Tgi che porscha sut ses agen num e professiunalmain servetschs postals a la clientella, sto annunziar quai a la PostCom. La PostCom registrescha las purschidras da servetschs postals.

² Il Cussegl federal po liberar dals dretgs e da las obligaziuns ch'èn liads a l'obligaziun d'annunzia particularmain interpresas che obtegnan ina svieuta da pitschna impurtanza economica cun furnir servetschs postals.

³ Tgi ch'è suttamess a l'obligaziun d'annunzia sto:

a.

ademplir las obligaziuns da dar infurmaziuns tenor l'artitgel 9 e las obligaziuns da dar infurmaziuns tenor l'artitgel 23 alinea 2;

b.

garantir che las cundiziuns da lavur usitadas en la branscha vegnian observadas;

c.

negoziar in contract collectiv da lavur cun las associaziuns da persunal;

d.

avair ina sedia, in domicil u in filiala en Svizra.

Tras ina cunvegna reglan las purschidras da servetschs postals l'access senza discriminaziuns, transparent e confurm al temp a lur prestaziuns parzialas.

¹ Las purschidras d'indrizs da chaschas postalas ston offrir cunter indemnisaziun ad autras purschidras da servetschs postals ubain in servetsch da distribuziun a lur indrizs da chaschas postalas ubain las permetter en in'autra moda d'acceder als indrizs da chaschas postalas.

² Las partidas participadas reglan las cundiziuns per l'access en ina cunvegna. Ellas tramettan a la PostCom ina copia da la cunvegna.

³ Sch'i na reussescha betg a las partidas pertutgadas da far ina cunvegna d'access entaifer 6 mais dapi la communicaziun d'ina emprima offerta, dispona la PostCom sin dumonda d'ina partida la conclusiun dal contract. Per quest intent resguarda ella las pretensiuns liadas a la finanziaziun dal provediment da basa ed al funcziunament dal martgà da posta.

⁴ La PostCom decida entaifer 7 mais dapi l'entrada da la dumonda. Sin dumonda d'ina partida po ella prender mesiras preventivas, en moda che la partida petenta sto prestar ina garanzia per las investiziuns che ston vegnir prendidas pervia da sias pretensiuns. Il recurs cunter la decisiun e cunter las mesiras n'ha betg in effect suspensiv.

⁵ Il Cussegl federal concretisescha las cundiziuns per l'access als indrizs da chaschas postalas, particularmain concernent ils pretschs.

¹ Las datas d'adressas dastgan vegnir elavuradas per garantir ina consegna correcta da las spediziuns postalas.

² Sche purschidras da servetschs postals elavuran datas d'adressas per spedir suenter, per deviar u per retegnair spediziuns postalas, ston ellas barattar questas datas immediatamain cunter indemnisaziun cun autras purschidras da servetschs postals.

³ Las datas d'adressas dastgan vegnir transmessas a terzas persunas mo, sche la persuna respectiva dat ses consentiment.

⁴ Per cunvegnas e per disposiziuns davart il barat da las datas d'adressas valan las disposiziuns da l'artitgel 6 alineas 2-4.

⁵ Il Cussegl federal concretisescha las cundiziuns per il barat, particularmain concernent ils pretschs.

⁶ L'admissibladad da transmetter datas d'adressas tenor la Lescha dals 23 da zercladur 2006 davart l'armonisaziun dals registers³ resta resalvada.

Dispitas pervia da cunvegnas davart l'access als indrizs da chaschas postalas ubain davart la transmissiun da datas d'adressas vegnan giuditgadas tras las dretgiras civilas.

¹ Las purschidras da servetschs postals ston:

a.

garantir la transparenza dals pretschs per la clientella;

b.

sa laschar identifitgar da la clientella sco purschidras da servetschs postals;

c.

infurmar la clientella adequatamain davart ses dretgs e sias obligaziuns, particularmain davart l'utilisaziun da sias datas sco er davart ses dretgs da dar il consentiment.

² Las purschidras da servetschs postals èn obligadas da publitgar infurmaziuns davart la qualitad da lur servetschs postals sco er davart las consequenzas ecologicas e davart la furniziun socialmain supportabla da lur prestaziuns. Il Cussegl federal regla il cuntegn e la furma da la publicaziun.

Il Cussegl federal regla las cundiziuns che concernan las chaschas da brevs ed ils implants da distribuziun dal retschavider.

Las purschidras da servetschs postals pon limitar u excluder en lur cundiziuns da fatschenta generalas la responsabladad per spediziuns postalas betg recumandadas.

¹ Il Cussegl federal determinescha las situaziuns, en las qualas i po vegnir limità u scumandà da furnir servetschs postals ed en las qualas las purschidras da servetschs postals ch'èn suttamessas a l'obligaziun d'annunzia pon vegnir envidadas da furnir las prestaziuns. El regla l'indemnisaziun da las purschidras e tegna quint adequatamain da lur agens interess.

² Sch'ina situaziun extraordinaria pretenda quai, po il Cussegl federal obligar il persunal necessari da prestar servetsch.

³ Resalvadas restan las disposiziuns davart la pussanza da disponer dal general tenor l'artitgel 91 da la Lescha militara dals 3 da favrer 1995⁴.

¹ La Posta garantescha il provediment da basa cun servetschs postals tenor ils artitgels 14-17.

² En il rom da las prescripziuns dal Cussegl federal circumscriva ella en sias cundiziuns da fatschenta generalas tge servetschs ch'ella na furnescha betg u ch'ella furnescha mo sut tschertas premissas per motivs da la defensiun cunter privels, da l'igiena u per proteger interess giustifitgads.

¹ La Posta garantescha il transport da brevs, da pachets, da gasettas e da revistas.

² Als puncts d'access prenda ella encunter las suandantas spediziuns:

a.

brevs che van en Svizra ed a l'exteriur;

b.

pachets che van en Svizra ed a l'exteriur.

³ Ella distribuescha tut las spediziuns postalas tenor l'alinea 1 durant almain 5 dis da l'emna. Las gasettas quotidianas abunadas vegnan distribuidas durant 6 dis da l'emna. La distribuziun a chasa vegn fatga en tut ils abitadis occupads durant l'entir onn. Per singulas chasadas che sa laschan cuntanscher mo cun difficultads sproporziunadas, po il Cussegl federal prevair excepziuns.

⁴ Il Cussegl federal po prevair ultra da quai er furmas da distribuziun alternativas. Sche la distribuziun vegn fatga cun agid da furmas alternativas, garantescha la Posta er en quest cas la confidenzialitad e la segirezza da ses servetschs.

⁵ La Posta garantescha ina rait da puncts d'access en tut la Svizra. Questa rait cumpiglia:

a.

ina rait d'uffizis postals e d'agenturas postalas per tut la Svizra, che garantescha in provediment da basa accessibel en ina distanza raschunaivla a tut las gruppas da la populaziun en tut las regiuns;

b.

chaschas da brevs publicas en in dumber suffizient, almain dentant ina per lieu.

⁶ Avant che serrar u dischlocar in punct d'access occupà taidla la Posta las autoritads da las vischnancas pertutgadas. Ella tschertga ina soluziun en enclegientscha. La vischnanca pertutgada po appellar a la PostCom. Il Cussegl federal prevesa ina procedura da mediaziun per quest intent.

⁷ Ils servetschs postals ston vegnir purschids uschia che persunas cun impediments pon far diever d'els sut cundiziuns qualitativas, quantitativas ed economicas cumparegliablas cun quellas offertas a persunas senza impediments. En spezial ston:

a.

ils puncts d'access correspunder als basegns da la clientella cun impediments sensorics u motorics;

b.

spediziuns da e per persunas cun impediments da la vesida pudair vegnir tramessas senza custs da porto.

⁸ Il Cussegl federal definescha detagliadamain ils servetschs postals e fixescha las cundiziuns d'access suenter avair consultà ils chantuns e las vischnancas.

Ils servetschs postals dal provediment da basa ston esser da buna qualitad en l'entir pajais. Il Cussegl federal fixescha ils criteris da qualitad e la procedura per controllar la qualitad.

¹ Ils pretschs ston vegnir fixads tenor princips economics. L'observanza da quest princip vegn controllada tenor la Lescha dals 20 da december 1985 davart la surveglianza dals pretschs⁵.

² Per brevs e per pachets dal provediment da basa en Svizra ston ils pretschs vegnir fixads independentamain da la distanza e tenor princips unitars. La PostCom verifitgescha periodicamain che l'independenza da la distanza vegnia observada.

³ Ils pretschs per la distribuziun da gasettas e da revistas abunadas èn independents da la distanza. Els correspundan als pretschs usitads en las aglomeraziuns pli grondas.

⁴ Reducziuns dal pretsch vegnan concedidas per la distribuziun da:

a.

gasettas quotidianas ed emnilas abunadas da la pressa regiunala e locala;

b.

gasettas e revistas che organisaziuns senza finamira da rendita tramettan a lur abunents, a lur commembers u a lur donaturs en la furma da distribuziun normala (pressa da commembranza e da fundaziuns).

⁵ Reducziuns dal pretsch na vegnan betg concedidas a titels che fan part d'ina uniun d'ediziuns cun in'ediziun totala legalisada uffizialmain da passa 100 000 exemplars. Il Cussegl federal po prevair ulteriurs criteris; tals pon esser en spezial: il territori da diffusiun, la frequenza da publicaziun, la part redacziunala sco er il scumond d'ina reclama predominanta da products e da servetschs.

⁶ Il Cussegl federal approvescha ils pretschs reducids.

⁷ Per conceder questa reducziun da pretsch paja la Confederaziun annualmain las suandantas contribuziuns:

a.

30 milliuns francs per la pressa regiunala e locala;

b.

20 milliuns francs per la pressa da commembranza e da fundaziuns.⁶

⁸ Il Cussegl federal po fixar pretschs maximals per il provediment da basa u per parts da quel. Quests pretschs maximals valan en moda unitara e sa drizzan tenor ils svilups dal martgà. Il Cussegl federal po surdar a la PostCom da decretar sco er d'exequir las prescripziuns tecnicas ed administrativas.

¹ La Posta edescha segns da valur postala; ella ha il dretg exclusiv d'applitgar sin ils segns da valur postala l'inscripziun «Helvetia». Il Cussegl federal po fixar che tscherts segns da valur postala vegnan edids cun in supplement.

² La Posta po duvrar gratuitamain il terren ch'è destinà al diever general per montar chaschas da brevs publicas ed auters indrizs ch'èn necessaris per il provediment da basa.

³ En sias cundiziuns da fatschenta generalas po ella limitar u excluder sia responsabladad en cas da pitschna culpa.

⁴ Cun organisar sia interpresa tegna ella quint da las aspectativas dals chantuns.

¹ La Posta ha il dretg exclusiv da transportar brevs fin a 50 grams (servetsch reservà).

² Exceptadas dal servetsch reservà èn:

a.

brevs, per las qualas i vegn pajà duas giadas e mez il pretsch da la Posta che per brevs da la categoria la pli svelta da l'emprim stgalim da pais e da format; e

b.

brevs en destinaziun da l'exteriur.

³ La Posta fixescha ils pretschs per las brevs dal servetsch reservà en Svizra independentamain da la distanza, en ina moda che cuvra ils custs e tenor princips adequats ed unitars; per spediturs da spediziuns en massa po ella fixar pretschs che sa drizzan principalmain tenor ils custs che resultan. Il Cussegl federal fixescha ils pretschs maximals. Per quest intent sa drizza el tenor ils svilups dal martgà.

¹ La Posta dastga duvrar ils retgavs dal servetsch reservà mo per cuvrir ils custs dal provediment da basa tenor ils artitgels 13-17 ed ils artitgels 32 e 33, percunter betg per reducir il pretsch dals servetschs che na pervegnan betg dals dus mandats da provediment da basa (scumond da subvenziunament traversal).

² Ella sto concepir sia contabilitad uschia, ch'ils custs ed ils retgavs dals singuls servetschs pon vegnir cumprovads.

³ La Posta cumprova annualmain ch'ella observa l'alinea 1. La PostCom po, sin denunzia u d'uffizi, obligar la Posta da furnir la cumprova en il cas singul.

⁴ Il Cussegl federal regla ils detagls e deleghescha a la PostCom da decretar las prescripziuns administrativas e tecnicas necessarias.

¹ Il Cussegl federal elegia la PostCom, che sa cumpona da tschintg fin set commembers, e designescha il president ed il vicepresident. Ils commembers ston esser experts independents; els na dastgan ni appartegnair ad organs da persunas giuridicas ch'èn activas en il sectur dal martgà da posta, ni avair in contract da servetsch cun talas persunas giuridicas.

² La PostCom è independenta e n'è betg suttamessa en sias decisiuns a directivas dal Cussegl federal u d'autoritads administrativas.

³ Ella decretescha in reglament davart sia organisaziun e davart sia gestiun e suttametta quel al Cussegl federal per l'approvaziun.

⁴ Ella decretescha finamiras strategicas e suttametta quellas al Cussegl federal per infurmaziun.

¹ La PostCom ha in secretariat spezialisà. Quest secretariat prepara las fatschentas da la PostCom, fa las inquisiziuns e decretescha las disposiziuns necessarias davart la procedura en enclegientscha cun il presidi. El fa propostas a la PostCom ed exequescha las decisiuns da quella. El entra en contact direct cun persunas pertutgadas, cun terzas persunas e cun autoritads.

² Il Cussegl federal po delegar al secretariat spezialisà ulteriuras incumbensas en il sectur da la surveglianza dal martgà, da l'access als servetschs tenor ils artitgels 6 e 7, dal provediment da basa e dal rendaquint.

¹ La PostCom prenda las decisiuns e decretescha las disposiziuns che stattan en sia cumpetenza tenor questa lescha e tenor las disposiziuns executivas.

² Ella ha las suandantas incumbensas:

a.

ella registrescha las purschidras (art. 4. al. 1);

b.

ella surveglia, sche las cundiziuns da lavur usitadas en la branscha vegnan observadas e sch'in contract collectiv da lavur è vegnì negozià (art. 4 al. 3 lit. b e c);

c.

en cas da dispitas decida ella davart l'access a las chaschas postalas e davart l'elavuraziun da las datas d'adressas (art. 6 e 7);

d.

ella surveglia che las obligaziuns da dar infurmaziun e scleriment vegnian observadas (art. 9 e 23);

e.

ella controlla ch'il mandat legal da furnir in provediment da basa vegnia observà (art. 13-17);

f.

ella fa recumandaziuns en cas da serradas previsas ed en cas da dischlocaziuns da puncts d'access occupads (art. 14 al. 6);

g.

ella garantescha la controlla da qualitad dal provediment da basa dals servetschs postals (art. 15);

h.

ella surveglia che las prescripziuns giuridicas pertutgant ils pretschs en il provediment da basa vegnian observadas (art. 92 al. 2 segunda frasa da la Constituziun federala sco er art. 16 al. 2 e 18 al. 3);

i.

ella surveglia ch'il scumond da subvenziunament traversal vegnia observà (art. 19);

j.

ella procura per l'instituziun d'in post da mediaziun (art. 29);

k.

ella persequitescha e giuditgescha surpassaments (art. 31);

l.

ella observa ils svilups dal martgà da posta en vista a garantir in provediment varià, bunmartgà e d'auta qualitad da tut las regiuns dal pajais;

m.

eventualmain propona ella al Cussegl federal mesiras adattadas per garantir il provediment da basa.

³ Ella orientescha la publicitad davart sias activitads e suttametta al Cussegl federal annualmain in rapport da gestiun.

¹ Tgi ch'è suttamess a questa lescha sto dar a la PostCom ed al secretariat spezialisà las infurmaziuns che quels dovran per ademplir lur incumbensas.

² Las purschidras da servetschs postals ston inoltrar annualmain a la PostCom ed al secretariat spezialisà ils documents ch'èn necessaris per controllar che las pretensiuns legalas sajan vegnidas ademplidas e per far la statistica dals servetschs postals.

³ La Posta sto dar a la PostCom ed al secretariat spezialisà cunzunt quellas infurmaziuns ch'èn necessarias per controllar ch'il mandat legal dal provediment da basa, che las prescripziuns da qualitad sco er ch'il scumond da subvenziunament traversal tenor l'artitgel 19 sajan vegnids observads.

¹ En il rom da sias incumbensas veglia la PostCom ch'il dretg internaziunal, questa lescha e che las disposiziuns executivas vegnian observads.

² Sch'ella constatescha ina violaziun dal dretg, po ella:

a.

pretender da la purschidra da servetschs postals ch'è responsabla per la violaziun, ch'ella elimineschia la mancanza u ch'ella prendia mesiras per prevegnir mintga recidiva;

b.

publitgar en ina furma adequata la constataziun da la violaziun;

c.

ordinar las mesiras necessarias per ademplir il mandat legal da garantir il provediment da basa;

d.

cumplettar, restrenscher, suspender u scumandar dal tuttafatg - tras cundiziuns - l'activitad da la purschidra ch'è responsabla per la violaziun;

e.

incassar ils gudogns ch'ins ha obtegnì en cas d'ina violaziun dal dretg.

³ En cas tenor l'alinea 2 litera a sto la purschidra ch'è responsabla per la violaziun infurmar la PostCom davart las disposiziuns ch'ella ha prendì.

¹ Sch'ina purschidra da servetschs postals cuntrafa a questa lescha, a las disposiziuns executivas u ad ina disposiziun ch'è entrada en vigur sin fundament da questa lescha, po ella vegnir engrevgiada cun in import da fin a 10 pertschient da la svieuta media ch'ils servetschs postals han obtegnì durant ils ultims 3 onns da fatschenta en Svizra.

² Cuntravenziuns vegnan investigadas e giuditgadas da la PostCom. La procedura sa drizza tenor la Lescha dals 20 da december 1968 davart la procedura administrativa⁷.

³ Per calcular la sancziun resguarda la PostCom en spezial la grevezza da la cuntravenziun e las relaziuns finanzialas da la purschidra.

¹ La PostCom sco er ulteriuras autoritads ch'èn incumbensadas cun l'execuziun da questa lescha transmettan ad autras autoritads da la Confederaziun e dals chantuns las datas che quellas dovran per ademplir lur incumbensas legalas; latiers tutgan er las datas persunalas spezialmain sensiblas ch'èn vegnidas procuradas en proceduras administrativas u en proceduras penalas administrativas.⁸

² Cun resalva da cunvegnas internaziunalas divergentas dastga la PostCom mo transmetter ad autoritads estras da surveglianza en ils fatgs da posta datas, inclusiv datas persunalas spezialmain sensiblas ch'èn vegnidas procuradas en proceduras administrativas u en proceduras penalas administrativas, sche questas autoritads:⁹

a.

dovran questas datas exclusivamain per exequir la surveglianza da las purschidras da servetschs postals e per observar il martgà;

b.

èn liadas al secret d'uffizi u al secret professiunal;

c.

transfereschan las datas mo cun il consentiment precedent da la PostCom ad autoritads ed ad organs che han incumbensas da surveglianza d'interess public, nun ch'in contract internaziunal cuntegnia in'autorisaziun generala.

³ Ils uffizis da la Confederaziun e dals chantuns èn obligads da cooperar tar ils scleriments da la PostCom e da la metter a disposiziun ils documents necessaris. Latiers tutgan er las datas persunalas spezialmain sensiblas ch'èn vegnidas procuradas en proceduras administrativas u en proceduras penalas administrativas.¹⁰

La PostCom na dastga betg tradir secrets d'affar e secrets professiunals.

Per ademplir lur incumbensas legalas dastgan la PostCom sco er il post da mediaziun elavurar datas persunalas, inclusiv datas persunalas spezialmain sensiblas concernent persecuziuns e sancziuns penalas.

¹ La PostCom endrizza in post da mediaziun u deleghescha quai a terzas persunas.

² En cas da dispitas tranter la clientella e las purschidras da servetschs postals po mintga partida appellar al post da mediaziun.

³ Tgi che appellescha al post da mediaziun, paja ina taxa da tractament. La purschidra da servetschs postals surpiglia ils custs da procedura minus la taxa da tractament. Sche la decisiun da mediaziun vegn tratga a favur dal client, al vegn restituida la taxa da tractament tras la purschidra da servetschs postals.

⁴ Las partidas n'èn betg liadas tras la decisiun da mediaziun.

¹ La PostCom incassescha taxas administrativas che cuvran ils custs da sias disposiziuns e da ses servetschs. Ultra da quai incassescha ella da las purschidras che vegnan survegliadas ina taxa annuala per finanziar ils custs da surveglianza che n'èn betg cuvrids tras las taxas.

² La taxa da surveglianza vegn incassada sin fundament dals custs da surveglianza da l'onn precedent. Ella vegn calculada tenor la dimensiun dals servetschs postals furnids, en spezial tenor il dumber da las spediziuns postalas.

³ Il Cussegl federal regla ils detagls. El po delegar a l'autoritad cumpetenta da fixar taxas d'impurtanza subordinada.

¹ Cun ina multa fin a 100 000 francs vegn chastià, tgi che intenziunadamain:

a.

violescha l'obligaziun d'annunzia tenor l'artitgel 4 alinea 1;

b.

transporta nunautorisadamain spediziuns postalas en il sectur dal servetsch reservà.

² Sch'il malfatg vegn commess per negligientscha, importa la multa fin a 20 000 francs.

³ Il Cussegl federal po prevair ina multa da fin a 10 000 francs per cuntravenziuns cunter las prescripziuns executivas.

⁴ Ils surpassaments vegnan persequitads e giuditgads da la PostCom tenor las disposiziuns da la Lescha federala dals 22 da mars 1974 davart il dretg penal administrativ¹².