1 Sco organ da promoziun da la Confederaziun per l'innovaziun che sa basa sin la scienza tenor la Lescha Innosuisse dals 17 da zercladur 201619 promova la Innosuisse projects d'innovaziun cun conceder contribuziuns ad instituts da perscrutaziun en scolas autas ed ad instituts da perscrutaziun betg commerzials ordaifer il sectur da las scolas autas.20
2 Contribuziuns vegnan mo concedidas, sche las suandantas premissas èn ademplidas:
- a.
- il project vegn realisà ensemen cun in u cun plirs partenaris privats u publics che procuran per l'utilisaziun (partenaris da realisaziun);
- b.
- ina realisaziun efficazia dals resultats da perscrutaziun a favur da l'economia e da la societad po vegnir spetgada;
- c.
- il project na po probablamain betg vegnir realisà senza la promoziun tras la Confederaziun;
- d.
- ils partenaris da realisaziun sa participeschan per la mesadad a la finanziaziun dal project. Il Cussegl federal po prevair excepziuns da questa regla da finanziaziun, en spezial per:
- 1.
- projects che han in potenzial da success sur la media,
- 2.
- projects, dals quals ils resultats pon servir ad in vast circul d'utilisaders,
- e.
- il project contribuescha a la scolaziun pratica da la generaziun giuvna scientifica.
3 La Innosuisse po promover studis da realisabladad, prototips ed experiments er senza partenaris da realisaziun, sch'els vegnan realisads d'instituts da la perscrutaziun en scolas autas u d'instituts da perscrutaziun betg commerzials che na tutgan betg en il sectur da las scolas autas e sch'i sa tracta da projects che han in potenzial d'innovaziun considerabel.21
3bis …22
3ter Sche interpresas svizras vegnan exclusas da purschidas da promoziun da la Cumissiun europeica, las qualas èn destinadas a projects singuls, po la Innosuisse promover projects d'innovaziun d'interpresas giuvnas e d'interpresas pitschnas e mesaunas, sche quests projects cuntegnan in potenzial d'innovaziun impurtant, cun la finamira d'ina commerzialisaziun svelta ed efficazia e d'ina creschientscha correspundenta. La contribuziun da la Innosuisse serva a cuvrir parzialmain u totalmain tant ils custs directs dal project, ils quals resultan a l'interpresa sezza, sco er ils custs per prestaziuns da terzas persunas. En sia ordinaziun da contribuziuns fixescha la Innosuisse ils criteris da promoziun sco er ils criteris per determinar l'autezza da las atgnas prestaziuns da las interpresas.23
4 Ella po plinavant prevair instruments per la participaziun als custs per scleriments davart la realisabladad efficazia da projects da las interpresas.24
5 Ella promova en spezial projects tenor ils alineas 1, 3, 3bis, 3ter e 4 che gidan a realisar in'utilisaziun persistenta da las resursas.25
6 Ils projects promovids ston observar ils princips da l'integritad scientifica e da la buna pratica scientifica. En cas da cuntravenziuns valan las sancziuns e l'obligaziun d'infurmaziun tenor l'artitgel 12 alineas 2-4.