1 L'Associaziun da las Academias svizras è l'organ da promoziun da la Confederaziun per rinforzar la collavuraziun en e tranter las disciplinas scientificas e per francar la scienza en la societad.
2 Ella utilisescha las contribuziuns federalas en spezial per ils suandants intents:
- a.
- Ella realisescha e promova l'identificaziun tempriva da temas ch'èn relevants per la societad en il sectur da la furmaziun, da la perscrutaziun e da l'innovaziun.
- b.
- Ella s'engascha per che tgi che fa u che applitgescha enconuschientschas respectia sia responsabladad etica.
- c.
- Ella concepescha il dialog tranter la scienza e la societad e promova studis davart schanzas e ristgas da las innovaziuns e da las tecnologias.
3 Las singulas Academias coordineschan lur activitads da promoziun en il rom da l'Associaziun e garanteschan la collavuraziun en spezial cun ils instituts da la perscrutaziun en scolas autas.
4 Ellas promovan la collavuraziun da scienziads e d'experts en societads spezialisadas, en cumissiuns ed en ulteriuras furmas organisatoricas adattadas e tiran a niz questa collavuraziun per ademplir lur incumbensas.
5 Ellas sustegnan la collavuraziun scientifica internaziunala cun promover u manar instituziuns adattadas, en spezial plattafurmas naziunalas da coordinaziun e secretariats scientifics per programs coordinads sin plaun internaziunal, als quals la Svizra sa participescha.
6 Ellas pon sustegnair collecziuns da datas, sistems da documentaziun, revistas scientificas, ediziuns u chaussas sumegliantas che servan sco infrastructuras da perscrutaziun a sviluppar champs spezialisads en Svizra e che na pertutgan betg la cumpetenza da promoziun dal FNS u dals instituts da la perscrutaziun en scolas autas u che na vegnan betg sustegnidas directamain da la Confederaziun.
7 Il SEFRI fa periodicamain ina cunvegna da prestaziun cun l'Associaziun da las Academias svizras, e quai sin basa dals conclus finanzials da l'Assamblea federala. Cun quella po el surdar a l'Associaziun ed a las singulas Academias en il rom da lur incumbensas tenor ils alineas 1-4 evaluaziuns, la realisaziun da projects scientifics, la gestiun d'instituziuns tenor l'alinea 6 ed ulteriuras incumbensas spezialas.