¹ Questa lescha ha l'intent da:

a.

mantegnair, meglierar u sche pussaivel restabilir la diversitad natirala da las spezias e l'effectiv dals peschs e dals giombers indigens e da la macrofauna d'aua sco er lur spazis da viver;

b.

proteger spezias e razzas da peschs e da giombers periclitadas;

c.

garantir in'utilisaziun duraivla dals effectivs da peschs e da giombers;

d.

promover la perscrutaziun da la pestga.

² Ella stabilescha ils princips, tenor ils quals ils chantuns ston reglar il pigliar peschs e giombers.

¹ Questa lescha vala per las auas publicas e privatas.

² Per ils stabiliments per l'allevament da peschs e per las auas artifizialas privatas, en las qualas ils peschs ed ils giombers che vivan en auas avertas na pon betg arrivar sin via natirala, valan sulettamain las disposiziuns davart las spezias, las razzas e las varietads estras (art. 6 e 16 lit. c e d). Per ils stabiliments per l'allevament da peschs valan ultra da quai las disposiziuns davart intervenziuns tecnicas (art. 8-10).

¹ Ils chantuns reglan l'utilisaziun duraivla dals effectivs e procuran che

a.

la diversitad natirala da las spezias da peschs e da giombers vegnia mantegnida;

b.

ils animals na vegnian betg blessads u donnegiads inutilmain, cura ch'els vegnan pigliads.

² Els decreteschan en spezial disposiziuns concernent:

a.

ils utensils ch'èn permess per la pestga e lur applicaziun;

b.

ils utensils auxiliars permess;

c.

la pestga da peschs d'estga;

d.

la pestga da macrofauna d'aua;

e.

la repopulaziun da las auas explotadas;

f.

il dretg da chaminar sin la riva per pestgar.

¹ Il Cussegl federal decretescha disposiziuns davart:

a.

la durada dals temps da schanetg;

b.

las mesiras minimalas dals peschs e dals giombers che dastgan vegnir pigliads.

² El fixescha sut tge premissas ch'ils chantuns pon divergiar da questas disposiziuns.

³ Ils chantuns decreteschan disposiziuns davart:

a.

la creaziun da territoris da schanetg là, nua che la protecziun dals effectivs da peschs e da giombers pretenda quai;

b.

la remessa da peschs e da giombers ch'èn anc abels da viver, sche quels vegnan pigliads durant il temp da schanetg u sch'els n'han betg la mesira minimala.

¹ Il Cussegl federal designescha las spezias e las razzas da peschs e da giombers ch'èn periclitadas.

² Ils chantuns prendan las mesiras necessarias per proteger ils spazis da viver da las spezias e da las razzas ch'èn periclitadas. Els pon ordinar ulteriuras mesiras, en spezial scumonds da pestga.

¹ Ina permissiun da la Confederaziun è necessaria per:

a.

l'import e l'immissiun da spezias, da razzas e da varietads da peschs e da giombers estras en las auas svizras;

b.

l'immissiun da spezias, da razzas e da varietads da peschs e da giombers estras al lieu;

² La permissiun vegn concedida, sch'il petent cumprova che:

a.

la fauna e la flora indigena na vegn betg periclitada e

b.

la fauna na vegn betg midada en moda nungiavischada.

³ Il Cussegl federal po prevair excepziuns da l'obligaziun da dumandar ina permissiun.

⁴ Spezias, razzas e varietads estras al lieu na dastgan betg vegnir consegnadas u duvradas sco peschs d'estga vivs.

¹ Ils chantuns procuran che auals, parts da rivas e vegetaziuns d'aua che servan als peschs per fregar e per il svilup dals peschs giuvens vegnan mantegnids.

² Sche pussaivel prendan els mesiras per meglierar las cundiziuns da viver dals animals da l'aua sco er per restabilir localmain spazis da viver destruids.

¹ Uschenavant che intervenziuns en las auas, en lur reschim u en lur curs sco er intervenziuns en las rivas ed en il fund da las auas pon tangar ils interess da la pestga, dovran ellas ina permissiun da l'autoritad chantunala ch'è cumpetenta per la pestga (permissiun dal dretg da pestga).

² …⁵

³ Ina permissiun dovri en spezial per:

a.

utilisar las forzas idraulicas;

b.

regular ils lais;

c.

construir rempars da flums e d'auals sco er runcar rivas;

d.

crear auas currentas artifizialas;

e.

metter conducts en las auas;

f.

far lavurs da nettegiament cun maschinas en las auas;

g.

explotar e lavar gera, sablun ed autras substanzas en las auas;

h.

far prelevaziuns d'aua;

i.

inducir aua;

k.

far drenaschas agriculas;

l.

stabiliments da traffic;

m.

stabiliments per l'allevament da peschs.

⁴ Per prelevaziuns d'aua tenor l'artitgel 29 da la Lescha federala dals 24 da schaner 1991⁶ davart la protecziun da las auas na dovri betg ina permissiun tenor questa lescha.

⁵ Stabiliments che vegnan engrondids u renovads valan sco stabiliments novs.

¹ Resguardond las relaziuns natiralas ed eventuals auters interess ston las autoritads ch'èn cumpetentas per conceder permissiuns tenor il dretg da pestga prescriver tut las mesiras ch'èn adattadas per:

a.

crear cundiziuns da viver favuraivlas per ils animals da l'aua concernent:

1.

las quantitads minimalas da la deflussiun en cas da prelevaziuns d'aua,

2.

la furma dal profil da deflussiun,

3.

la structura dal letg e da las scarpas,

4.

il dumber e la furmaziun dals refugis per ils peschs,

5.

la profunditad e la temperatura da l'aua,

6.

la sveltezza dal current;

b.

garantir la libra migraziun dals peschs;

c.

pussibilitar la reproducziun natirala;

d.

impedir che peschs e giombers vegnian mazzads u blessads tras construcziuns u maschinas.

² Sch'i na pon betg vegnir chattadas - tar las intervenziuns previsas en las auas, en lur reschim u en lur curs sco er tar las intervenziuns en las rivas ed en il fund da las auas - mesiras che pon impedir restricziuns gravantas per ils interess da la pestga en il senn da l'artitgel 1, stoi vegnir decidì considerond ils interess generals.

³ Mesiras tenor l'alinea 1 ston vegnir previsas gia tar la projectaziun da las intervenziuns tecnicas.

Ils chantuns procuran ch'i vegnian prendidas mesiras tenor l'artitgel 9 alinea 1 tar stabiliments existents, uschenavant che quellas èn economicamain supportablas.

Ils chantuns mainan ina statistica da pestga tenor ils princips da la Confederaziun.

¹ La Confederaziun po conceder agids finanzials a:

a.

mesiras per meglierar las cundiziuns da viver dals animals da l'aua sco er per restabilir localmain spazis da viver destruids (art. 7 al. 2);

b.

lavurs da perscrutaziun davart la diversitad da las spezias e davart l'effectiv dals peschs, dals giombers e da la macrofauna d'aua sco er davart lur spazis da viver;

c.

l'infurmaziun da la populaziun davart la flora e la fauna en las auas.

² Ils agids finanzials da la Confederaziun vegnan calculads tenor l'impurtanza da las mesiras tenor l'alinea 1 literas a-c per la protecziun e l'utilisaziun dals peschs e dals giombers; els importan maximalmain 40 pertschient dals custs.⁸

³ …⁹

¹ L'Uffizi federal d'ambient sustegna las autoritads cumpetentas ad organisar ils curs necessaris per la scolaziun e per la furmaziun supplementara specifica dals pestga­ders professiunals e dals pisciculturs.¹⁰

² El po organisar curs da furmaziun supplementara per ils organs ch'èn incumbensads da survegliar la pestga.

Ils pestgaders professiunals che van a pestga sco activitad principala han il dretg da survegnir supplements per uffants tenor la Lescha federala dals 20 da zercladur 1952¹¹ davart ils supplements da famiglia en l'agricultura.

¹ Las disposiziuns da la legislaziun federala concernent la responsabladad èn applitgablas.

² Per calcular il donn sto vegnir resguardada la reducziun da la productivitad da l'aua donnegiada.

³ Cun l'indemnisaziun ch'il retschavider ha survegnì per restabilir il stadi oriund sto el reparar il donn uschè svelt sco pussaivel.

¹ Cun in chasti pecuniar fin a 180 taxas per di vegn chastià, tgi che donnegia u periclitescha intenziunadamain l'effectiv da peschs u da giombers, e quai cun:¹²

a.

far nunautorisadamain intervenziuns tecnicas (art. 8);

b.

betg resguardar cundiziuns u pretensiuns ch'èn colliadas cun ina permissiun (art. 9 al. 1);

c.

importar u integrar spezias, razzas e varietads da peschs u da giombers estras en Svizra u al lieu senza ina permissiun da l'autoritad (art. 6 al. 1);

d.

consegnar u duvrar spezias, razzas e varietads estras en Svizra u al lieu sco peschs d'estga vivs (art. 6 al. 4).

² Sch'il delinquent agescha per negligientscha, importa la multa fin a 20 000 francs.¹³

¹ Cun ina multa fin a 20 000 francs vegn chastià, tgi che sapientivamain:¹⁴

a.

n'observa betg las disposiziuns da schanetg;

b.

acquista, sa lascha regalar u venda peschs, giombers u macrofauna d'aua, dals quals el sa u sto supponer ch'els èn vegnids acquistads tras in act chastiabel;

c.¹⁵

cuntrafa en in'autra moda e maniera a questa lescha, a las prescripziuns dal Cussegl federal che prevesan in chasti per lur violaziun, u ad ina disposiziun singula ch'è vegnida drizzada ad el renviond a la smanatscha da chasti previsa en quest artitgel.

² L'emprova e la cumplicitad èn chastiablas.

³ Il delinquent vegn chastià cun ina multa, sch'el ha agì per negligientscha.

Ils artitgels 6 e 7 da la Lescha federala dals 22 da mars 1974¹⁶ davart il dretg penal administrativ valan confurm al senn per acts chastiabels tenor questa lescha.

¹ En cas da delicts da pestga e da surpassaments grevs u repetids po il derschader scumandar al delinquent sco chasti accessoric d'ir a pestga per la durada da fin a 5 onns.

² La privaziun administrativa dal dretg d'ir a pestga tras l'autoritad chantunala cumpetenta resta resalvada.

¹ La persecuziun ed il giudicament da cuntravenziuns èn chaussa dals chantuns.

² L'Uffizi federal da segirezza alimentara e fatgs veterinars¹⁸ persequitescha e giuditgescha las cuntravenziuns fatgas a chaschun da l'import. Sch'igl exista a medem temp ina cuntravenziun cunter la Lescha da duana dals 18 da mars 2005¹⁹ u cunter la Lescha davart la taglia sin la plivalur dals 12 da zercladur 2009²⁰, persequitescha e giuditgescha l'Administraziun federala da duana las cuntravenziuns.

³ Sch'ina cuntravenziun represchenta a medem temp ina cuntravenziun tenor l'alinea 2, ch'è drizzada cunter la Lescha federala dals 16 da mars 2012²¹ davart il traffic cun spezias d'animals e da plantas protegidas, cunter la Lescha federala dals 16 da decem­ber 2005²² davart la protecziun dals animals, cunter la Lescha federala dals 18 da mars 2005 davart la duana ed ils dazis, cunter la Lescha federala dals 12 da zercladur 2009 davart la taglia sin la plivalur, cunter la Lescha federala dals 20 zercladur 2014²³ davart victualias ed objects da diever u cunter la Lescha federala dal 1. da fanadur 1966²⁴ davart epidemias d'animals, e che sto vegnir persequitada da la medema autoritad federala, vegn applitgà il chasti smanatschà per la cuntra­venziun la pli greva; quest chasti po vegnir augmentà adequatamain.²⁵

¹ Il Cussegl federal decretescha las disposiziuns executivas.

² El surveglia l'execuziun chantunala da questa lescha.

³ Las guardias da cunfin federalas ston sustegnair ils organs chantunals ch'èn incumbensads da survegliar la pestga en las auas da cunfin da la Svizra ad ademplir lur incumbensas, uschenavant ch'il servetsch da duana permetta quai.

⁴ L'autoritad federala ch'exequescha in'autra lescha federala u in contract interna­ziu­nal è cumpetenta - ademplind questa incumbensa - er d'exequir la Lescha federala davart la pestga. Avant che prender ina decisiun lascha ella vegnir a pled ils chantuns pertutgads. L'Uffizi federal d'ambient ed ils ulteriurs servetschs federals coopere­schan a l'execuziun tenor ils artitgels 62a e 62b da la Lescha dals 21 da mars 1997²⁶ davart l'organisaziun da la regenza e da l'administraziun.²⁷

⁵ Sche la procedura tenor l'alinea 4 n'è betg adattada per tschertas incumbensas, regla il Cussegl federal l'execuziun tras ils servetschs federals pertutgads.²⁸

¹ Ils chantuns exequeschan questa lescha, uschenavant che la Confederaziun n'è betg cumpetenta per quai.

² Els decreteschan las prescripziuns necessarias.

¹ La Confederaziun ed ils chantuns procuran per l'infurmaziun e per la cussegliaziun da las autoritads e da la publicitad concernent l'impurtanza ed il stadi da las auas da peschs.

² Els recumondan mesiras da protecziun e da mantegniment adattadas.

¹ Ils chantuns procuran per ina surveglianza efficazia da la pestga sco er per la scolaziun e per la furmaziun supplementara dals organs da surveglianza.

² Ils organs da surveglianza ed ils experts che vegnan consultads da quels han da tut temp access a tut ils stabiliments tecnics ed a tut ils bains immobigliars, uschenavant che quai è necessari per ademplir lur incumbensas.

³ Mintgin è obligà da dar las infurmaziuns ch'èn necessarias per exequir questa lescha.

¹ En cas d'auas interchantunalas ston ils chantuns participads reglar la pestga en moda unitara en il rom da questa lescha.

² Sch'ils chantuns na pon betg sa cunvegnir, decida il Cussegl federal.

Il Cussegl federal è autorisà, suenter avair consultà ils chantuns pertutgads, da far cun auters stadis cunvegnas davart la pestga en las auas da cunfin da la Svizra. Quellas cunvegnas pon cuntegnair disposiziuns che divergeschan da questa lescha.

¹ L'approvaziun da la Confederaziun dovran las prescripziuns chantunalas davart:

a.

la gestiun (art. 3);

b.

las disposiziuns da schanetg (art. 4);

c.

las spezias e razzas periclitadas (art. 5).

² Prescripziuns cun ina durada da fin a 3 mais na dovran betg in'approvaziun.

1. La Lescha federala dals 14 da december 1973³² davart la pestga vegn abolida.

2. ed 3. …³³

¹ Questa lescha è suttamessa al referendum facultativ.

² Ella entra en vigur, cun resalva da l'alinea 3, il 1. da schaner

a.

che suonda il termin da 2 onns suenter ch'il termin da referendum è scadì senza ch'i saja vegnì inoltrà in tal u

b.

che suonda il termin da 2 onns suenter ch'il pievel ha acceptà la lescha.

³ L'artitgel 6 entra en vigur suenter ch'il termin da referendum è scadì senza ch'i saja vegnì inoltrà in tal u suenter ch'il pievel ha acceptà la lescha.

Data da l'entrada en vigur: ³⁵ 1. da schaner 1994
Art. 6: 1. d'october 1991