1 La Posta garantescha il transport da brevs, da pachets, da gasettas e da revistas.
2 Als puncts d'access prenda ella encunter las suandantas spediziuns:
- a.
- brevs che van en Svizra ed a l'exteriur;
- b.
- pachets che van en Svizra ed a l'exteriur.
3 Ella distribuescha tut las spediziuns postalas tenor l'alinea 1 durant almain 5 dis da l'emna. Las gasettas quotidianas abunadas vegnan distribuidas durant 6 dis da l'emna. La distribuziun a chasa vegn fatga en tut ils abitadis occupads durant l'entir onn. Per singulas chasadas che sa laschan cuntanscher mo cun difficultads sproporziunadas, po il Cussegl federal prevair excepziuns.
4 Il Cussegl federal po prevair ultra da quai er furmas da distribuziun alternativas. Sche la distribuziun vegn fatga cun agid da furmas alternativas, garantescha la Posta er en quest cas la confidenzialitad e la segirezza da ses servetschs.
5 La Posta garantescha ina rait da puncts d'access en tut la Svizra. Questa rait cumpiglia:
- a.
- ina rait d'uffizis postals e d'agenturas postalas per tut la Svizra, che garantescha in provediment da basa accessibel en ina distanza raschunaivla a tut las gruppas da la populaziun en tut las regiuns;
- b.
- chaschas da brevs publicas en in dumber suffizient, almain dentant ina per lieu.
6 Avant che serrar u dischlocar in punct d'access occupā taidla la Posta las autoritads da las vischnancas pertutgadas. Ella tschertga ina soluziun en enclegientscha. La vischnanca pertutgada po appellar a la PostCom. Il Cussegl federal prevesa ina procedura da mediaziun per quest intent.
7 Ils servetschs postals ston vegnir purschids uschia che persunas cun impediments pon far diever d'els sut cundiziuns qualitativas, quantitativas ed economicas cumparegliablas cun quellas offertas a persunas senza impediments. En spezial ston:
- a.
- ils puncts d'access correspunder als basegns da la clientella cun impediments sensorics u motorics;
- b.
- spediziuns da e per persunas cun impediments da la vesida pudair vegnir tramessas senza custs da porto.
8 Il Cussegl federal definescha detagliadamain ils servetschs postals e fixescha las cundiziuns d'access suenter avair consultā ils chantuns e las vischnancas.