454
Rumantsch è ina lingua naziunala, ma ina lingua parzialmain uffiziala da la Confederaziun, numnadamain en la correspundenza cun persunas da lingua rumantscha. La translaziun d'in decret federal serva a l'infurmaziun, n'ha dentant nagina validitad legala.
Lescha federala
davart il Parc naziunal svizzer
en il chantun Grischun
(Lescha dal Parc naziunal)
dals 19 da december 1980 (version dal 1. da schaner 2017)
L'Assamblea federala da la Confederaziun svizra,
sa basond sin l'artitgel 78 alineas 3 e 4 da la Constituziun federala1,2
suenter avair gì invista da la missiva dal Cussegl federal dals 12 da settember 19793,
concluda:
1 Il Parc naziunal svizzer situà en il chantun Grischun, en Engiadina ed en Val Müstair, è in reservat, en il qual la natira è protegida cunter tut las intervenziuns da l'uman e particularmain nua che tut la fauna e flora vegn surlaschada a sia evoluziun natirala. I èn mo permessas intervenziuns che servan directamain al mantegniment dal Parc.
2 Il Parc naziunal è admissibel a la generalitad, per quant ch'il reglament dal Parc permetta quai. El duai esser l'object d'ina perscrutaziun scientifica permanenta.
Purtadra dal Parc naziunal è la fundaziun da dretg public «Parc naziunal svizzer» cun sedia a Berna.
1 Il fond dal Parc naziunal, che la Lia svizra per la protecziun da la natira ha fundà, furma la facultad iniziala da la fundaziun.
2 Per ademplir sias incumbensas dovra la fundaziun ils retgavs da la facultad da la fundaziun ed autras entradas.
3 La Confederaziun paja ina contribuziun annuala vi dals custs d'administraziun, da surveglianza e da mantegniment.
4 La fundaziun po incassar taxas per il diever da las installaziuns en il Parc naziunal.
5 La facultad da la fundaziun dastga vegnir duvrada mo en cas extraordinaris. Ella na dastga betg sa reducir sut 1 000 000 francs.
1 La Cumissiun dal Parc naziunal è l'organ suprem da la fundaziun. Ella sa cumpona da nov commembers che vegnan elegids dal Cussegl federal.
2 Trais commembers vegnan proponids da la Lia svizra per la protecziun da la natira, dus da la Societad svizra da las scienzas natiralas, in commember dal chantun Grischun ed in commember da las vischnancas dal Parc. Dus commembers represchentan la Confederaziun svizra.
3 Il Cussegl federal nominescha il president da la Cumissiun dal Parc naziunal. Dal rest sa constituescha la Cumissiun sezza. Ella designescha il secretari, il contabilist ed ulteriurs organs executivs.
1 La Cumissiun dal Parc naziunal procura per il mantegniment e per la promoziun dal Parc naziunal. En spezial duai ella:
- a.
- collavurar cun il chantun e cun las vischnancas;
- b.
- administrar, survegliar e mantegnair il Parc e sias installaziuns;
- c.
- infurmar la publicitad davart la natira e davart l'intent dal Parc naziunal sco er davart las prescripziuns per ils visitaders;
- d.
- promover la collavuraziun tranter l'administraziun dal Parc ed ils perscrutaders.
2 La Cumissiun dal Parc naziunal garantescha giuridicamain l'integritad territoriala dal Parc. Ella fa contracts per ademplir l'intent da la fundaziun. Ils contracts davart la garanzia da l'integritad territoriala dal Parc, davart la sminuziun u davart l'engrondiment da tal u davart las indemnisaziuns necessarias per quai basegnan l'approvaziun dal Cussegl federal.
3 La Cumissiun dal Parc naziunal decretescha - en enclegientscha cun il Departament federal per ambient, traffic, energia e communicaziun4 - reglaments davart l'administraziun e davart la surveglianza dal Parc.
1 La fundaziun surpiglia ils dretgs e las obligaziuns che sa refereschan al Parc naziunal e ch'eran chaussa da la Confederaziun avant l'entrada en vigur da questa lescha.
2 Particularmain fa ella part dals contracts tranter la Confederaziun e las persunas che han dretgs vi dal terren e fund.
3 La participaziun da la Societad svizra da las scienzas natiralas e da la Lia svizra per la protecziun da la natira vegn reglada en in contract cun la Confederaziun svizra.
Il chantun Grischun decretescha - suenter avair tadlà la Cumissiun dal Parc naziunal - il reglament dal Parc che basegna l'approvaziun dal Cussegl federal.
1 Tgi che cuntrafa a prescripziuns dal reglament dal Parc, ch'èn vegnidas decretadas renviond a la smanatscha da chasti da quest artitgel, vegn chastià cun ina multa.
2 La persecuziun penala è chaussa dals chantuns.
3 Ils organs dal Parc pon confiscar objects ch'insatgi è s'approprià cuntrari al reglament dal Parc.
1 Il Parc naziunal stat sut la surveglianza dal Departament federal per ambient, traffic, energia e communicaziun. La Cumissiun dal Parc naziunal fa annualmain in rapport al Departament per mauns dal Cussegl federal e da las Chombras federalas.
2 La Controlla federala da finanzas verifitgescha la contabilitad.
3 Cunter las decisiuns da la Cumissiun dal Parc naziunal poi vegnir fatg recurs tenor las disposiziuns generalas da la giurisdicziun federala.5
1 Il conclus federal dals 7 d'october 19596 davart il Parc naziunal svizzer en il chantun Grischun vegn abolì.
2 Questa lescha è suttamessa al referendum facultativ.
3 Il Cussegl federal fixescha l'entrada en vigur.
Data da l'entrada en vigur: 15 d'avrigl 19817
