¹ La Confederaziun coordinescha, sustegna ed iniziescha programs e projects per promover activitads fisicas e sportivas regularas sin tut ils stgalims da vegliadetgna.

² Ella po pajar contribuziuns u furnir prestaziuns materialas.

¹ La Confederaziun sustegna la federaziun da tetg da las federaziuns svizras da sport e po pajar contribuziuns ad ulteriuras federaziuns naziunalas da sport.

² Ella po far contracts da prestaziuns cun federaziuns da sport per ademplir incumbensas da la promoziun dal sport.

³ En il rom da sias cumpetenzas procura ella che las federaziuns internaziunalas da sport chattian bunas cundiziuns generalas per lur activitads en Svizra.

¹ La Confederaziun elavura in concept per implants da sport d'impurtanza naziunala, che serva a planisar ed a coordinar ils implants da sport d'impurtanza naziunala. Quest concept vegn actualisà cuntinuadamain.

² La Confederaziun po pajar agids finanzials per construir implants da sport d'impurtanza naziunala.

³ Ella po cussegliar ils constructurs ed ils gesturs d'implants da sport.

¹ La Confederaziun maina il program «Giuventetgna e sport» per uffants e giuvenils.

² «Giuventetgna e sport» gida ils uffants e giuvenils a sa sviluppar ed a sa realisar ed als permetta da viver il sport en moda cumplessiva.

³ La participaziun a «Giuventetgna e sport» è pussaivla per l'emprima giada a partir dal 1. da schaner da l'onn che l'uffant cumplenescha 5 onns, e per l'ultima giada ils 31 da december da l'onn ch'el cumplenescha 20 onns.

¹ Ils chantuns, las vischnancas ed organisaziuns privatas sa participeschan a la realisaziun dal program «Giuventetgna e sport». Per quest intent po la Confederaziun far contracts da prestaziun.

² Ils chantuns designeschan in'autoritad ch'è cumpetenta per la realisaziun dal program «Giuventetgna e sport».

En las disciplinas da sport admessas sustegna il program «Giuventetgna e sport» curs e champs per differentas gruppas en mira.

¹ La furmaziun dal cader è chaussa da la Confederaziun e dals chantuns. Organisaziuns privatas pon vegnir consultadas.

² La Confederaziun surveglia la furmaziun dal cader.

³ Il Cussegl federal definescha las purschidas da la furmaziun dal cader e fixescha las premissas per la concessiun, per la suspensiun, per la revocaziun e per l'annullaziun da las renconuschientschas sco cader da «Giuventetgna e sport».

⁴ L'Uffizi federal da sport (UFSPO) decida davart la concessiun, davart la suspensiun e davart la revocaziun da las renconuschientschas sco cader da «Giuventetgna e sport» e constatescha l'annullaziun da talas renconuschientschas.

¹ Sch'in indizi concret lascha supponer ch'ina persuna haja commess in delict ch'è incumpatibel cun sia funcziun da cader da «Giuventetgna e sport», examinescha il UFSPO la reputaziun da questa persuna.

² Sch'igl è pendenta ina procedura penala cunter la persuna, ch'è incumpatibla cun sia funcziun da cader da «Giuventetgna e sport», refusescha u suspenda il UFSPO la renconuschientscha.

³ Sche la persuna è vegnida sentenziada pervia d'in delict ch'è incumpatibel cun sia funcziun da cader da «Giuventetgna e sport», refusescha u suspenda il UFSPO la renconuschientscha.

⁴ Per l'examinaziun da la reputaziun da la persuna prenda il UFSPO invista da las datas dal register penal pertutgant las sentenzias e pertutgant las proceduras penalas pendentas.

⁵ Las autoritads da persecuziun penala e las dretgiras èn obligadas - sin dumonda en scrit - da dar al UFSPO infurmaziuns cumplementaras extratgas da las actas penalas respectivas, sche:

a.

quai è necessari per la decisiun davart la concessiun, davart la suspensiun u davart la revocaziun da las renconuschientschas sco cader da «Giuventetgna e sport»;

b.

quai na pregiuditgescha betg ils dretgs persunals da terzs; e

c.

quai na periclitescha betg l'intent da l'inquisiziun penala.

¹ La Confederaziun paja contribuziuns per curs e per champs sco er per la furmaziun dal cader purschida dals chantuns e da las organisaziuns privatas.

² Ella po metter a disposiziun ad emprest material per realisar il program «Giuventetgna e sport».

¹ Ils chantuns promovan las pussaivladads quotidianas da far sport ed activitad fisica en il rom da l'instrucziun en scola. Els procuran ch'ils implants e l'equipament necessaris stettian a disposiziun.

² L'instrucziun da sport è obligatorica durant la scola obligatorica e sin il stgalim secundar II.

³ Suenter avair consultà ils chantuns fixescha la Confederaziun il dumber minimal da lecziuns da sport ed ils princips qualitativs per l'instrucziun da sport en la scola obligatorica e sin il stgalim secundar II, cun excepziun da las scolas professiunalas spezialisadas. Ella resguarda ils basegns dals stgalims da scola respectivs.

⁴ En la scola obligatorica èn obligatoricas almain trais lecziuns d'instrucziun da sport per emna.

⁵ Il Cussegl federal fixescha il dumber minimal da lecziuns da sport ed ils princips qualitativs per l'instrucziun da sport en las scolas professiunalas spezialisadas.

¹ En collavuraziun cun ils chantuns po la Confederaziun sustegnair la scolaziun e la furmaziun supplementara dals magisters che dattan l'instrucziun da sport.

² Suenter avair tadlà la Confederaziun fixeschan ils chantuns il dumber minimal da las uras da scolaziun dals magisters che dattan l'instrucziun da sport e las pretensiuns qualitativas a la scolaziun da tals.

¹ La Confederaziun maina ina scola auta da sport che porscha ina instrucziun da la scienza da sport, che fa perscrutaziun e che furnescha servetschs e che metta er a disposiziun scolaziuns e furmaziuns supplementaras en il sectur terziar.

² L'accreditaziun da la Scola auta federala da sport sa drizza tenor la legislaziun davart l'agid a las scolas autas e davart la coordinaziun en il sectur da las scolas autas svizras.

³ Il Cussegl federal regla las premissas per l'admissiun als studis.

La Confederaziun po sustegnair la perscrutaziun da la scienza da sport.

¹ La Confederaziun s'engascha a favur da la correctadad e da la segirezza en il sport. Ella cumbatta cunter ils fenomens secundars nungiavischads dal sport.

² La Confederaziun collavura cun ils chantuns e cun las federaziuns. Ils agids finanzials a la federaziun da tetg da las federaziuns svizras da sport u ad autras organisaziuns da sport ed ad autras instituziuns responsablas per occurrenzas da sport fa ella depender da lur acziuns a favur da la correctadad e da la segirezza en il sport.

³ La Confederaziun po realisar sezza mesiras preventivas en il rom da programs e da projects.

¹ La Confederaziun sustegna e prenda mesiras cunter l'abus da products e da metodas che servan ad augmentar la capacitad fisica en il sport (doping), particularmain tras scolaziun, tras cussegliaziun, tras documentaziun, tras perscrutaziun, tras infurmaziun e tras controllas.

² Il Cussegl federal po delegar dal tuttafatg u per part la cumpetenza da prender mesiras cunter doping ad in'agentura naziunala d'antidoping. Quella decretescha las disposiziuns necessarias.

³ Il Cussegl federal fixescha ils products e las metodas, dals quals l'utilisaziun u l'applicaziun èn chastiablas. En quest connex resguarda el il svilup sin plaun internaziunal.

¹ Las unitads administrativas da la Confederaziun, l'Institut svizzer per products terapeutics, ils posts chantunals cumpetents sco er il post cumpetent per mesiras cunter doping tenor l'artitgel 19 collavuran per restrenscher la disponibladad da products e da metodas da doping.

² L'Uffizi federal da la duana e da la segirezza dals cunfins (UDSC) annunzia a las autoritads chantunalas da persecuziun penala las constataziuns che l'inciteschan da suspectar cuntravenziuns cunter questa lescha.⁴

³ Il UDSC ha il dretg, sch'el suspectescha ina cuntravenziun cunter questa lescha, da retegnair products da doping al cunfin u en ils deposits da duana e da consultar il post cumpetent per mesiras cunter doping tenor l'artitgel 19. Quest post fa ils ulteriurs scleriments e prenda las mesiras necessarias.⁵

⁴ Independentamain d'ina eventuala procedura penala po il post cumpetent per mesiras cunter doping tenor l'artitgel 19 disponer da confiscar e da destruir products da doping u objects che servan directamain a sviluppar ed ad applitgar metodas da doping.

¹ Tgi che sa participescha a cumpetiziuns da sport po vegnir suttamess a controllas da doping.

² Controllas da doping pon far:

a.

las agenturas naziunalas ed internaziunalas d'antidoping;

b.

la federaziun naziunala da sport e la federaziun internaziunala da sport, a la quala il sportist appartegna, sco er la federaziun da tetg da las federaziuns svizras da sport ed il Comité internaziunal olimpic;

c.

l'organisatur da l'occurrenza da sport, a la quala il sportist participescha.

³ Las autoritads da controlla da doping tenor l'alinea 2 han il dretg d'elavurar las datas persunalas ch'ellas registreschan en connex cun lur activitad da controlla, inclusiv las datas persunalas spezialmain sensiblas ed ils profils da persunalitad, e da las transmetter al post cumpetent per:

a.

evaluar las controllas;

b.

sancziunar ils sportists che fan doping.

⁴ Las autoritads da controlla da doping tenor l'alinea 2 literas b e c communitgeschan ils resultats da lur controllas al post cumpetent per mesiras cunter doping tenor l'artitgel 19.

¹ Tgi che producescha, acquista, importa, exporta, transferescha, intermediescha, distribuescha, perscriva, metta en circulaziun, consegna u posseda - per intents da doping - products tenor l'artitgel 19 alinea 3 u applitgescha envers terzs metodas tenor l'artitgel 19 alinea 3, vegn chastià cun in chasti da detenziun fin 3 onns u cun in chasti pecuniar.

² En cas grevs è il chasti in chasti da detenziun fin 5 onns; ensemen cun il chasti da detenziun vegn pronunzià in chasti pecuniar.

³ In cas grev è avant maun en spezial, sch'il delinquent:

a.

agescha sco commember d'ina banda ch'è s'unida cun l'intent da sa deditgar cuntinuadamain a las acziuns designadas en l'alinea 1;

b.

periclitescha en moda spezialmain greva la sanadad u la vita da sportists tras in'acziun designada en l'alinea 1;

c.

intermediescha, distribuescha, prescriva u consegna products tenor l'artitgel 19 alinea 3 ad uffants ed a giuvenils sut 18 onns u applitgescha metodas tenor l'artitgel 19 alinea 3 envers questas persunas;

d.

fa ina gronda svieuta u in gudogn considerabel cun agir a titel professiunal.

⁴ Sche la producziun, l'acquisiziun, l'import, l'export, il transit u il possess èn destinads exclusivamain per l'agen consum, na vegn il delinquent betg chastià.

¹ La persecuziun penala è chaussa dals chantuns. Per l'inquisiziun pon las autoritads chantunalas da persecuziun penala consultar il post cumpetent per mesiras cunter doping tenor l'artitgel 19 ed il UDSC.⁶

² Sch'ina controlla da doping cumprova products u metodas tenor l'artitgel 19 alinea 3, infurmescha l'organ che ha fatg la controlla las autoritads cumpetentas da persecuziun penala e transmetta tut ils documents a quellas.

³ Tenor l'artitgel 104 alinea 2 dal Cudesch da procedura penala⁷ ha il post cumpetent per mesiras cunter doping tenor l'artitgel 19 ils suandants dretgs da partida:

a.

far recurs cunter disposiziuns da betg avrir l'inquisiziun penala e cunter disposiziuns da sistida;

b.

far protesta cunter mandats penals;

c.

far appellaziun e far appellaziun adesiva cunter ils aspects penals da sentenzias.

Las autoritads da persecuziun penala e las autoritads giudizialas cumpetentas infurmeschan il post cumpetent per mesiras cunter doping tenor l'artitgel 19 davart persecuziuns penalas iniziadas pervia da cuntravenziuns tenor l'artitgel 22 sco er davart lur conclus. Il Cussegl federal fixescha, tge infurmaziuns che vegnan communitgadas.

¹ Cun l'intent da cumbatter cunter doping ha il post cumpetent per mesiras cunter doping tenor l'artitgel 19 il dretg da barattar las datas persunalas, inclusiv las datas persunalas spezialmain sensiblas ed ils profils da persunalitad, cun posts da cumbat cunter doping esters u internaziunals renconuschids, sch'in tal barat da datas è necessari:

a.

per elavurar dumondas medicinalas e per emetter permissiuns medicinalas a favur d'in sportist;

b.

per planisar, per coordinar e per realisar controllas da doping tar in sportist;

c.

per annunziar ils resultats da las controllas da doping al post da cumbat cunter doping ester u internaziunal cumpetent.

² En ils cas tenor l'alinea 1 litera a dastgan vegnir communitgadas mo las datas ch'èn necessarias per valitar las dumondas e las permissiuns. La communicaziun da las datas dovra il consentiment explicit dal sportist pertutgà.

³ En ils cas tenor l'alinea 1 litera b dastgan vegnir communitgadas mo las suandantas datas:

a.

persunalias;

b.

las infurmaziuns necessarias medicinalas e geograficas per pudair realisar las controllas da doping tenor standards internaziunals.

⁴ Il post cumpetent per mesiras cunter doping tenor l'artitgel 19 sto procurar che las datas ch'el ha communitgà na vegnian betg dadas vinavant a terzs betg autorisads. El refusa da communitgar las datas, sch'i smanatscha ina violaziun dals dretgs persunals, particularmain sch'il post che survegn las datas na po betg garantir ina protecziun adequata da quellas.

¹ Tgi che offra, empermetta u conceda in avantatg betg duì ad ina persuna ch'exequescha ina funcziun en il rom d'ina concurrenza da sport, a la quala vegnan purschidas scumessas da sport, cun l'intenziun da sfalsifitgar l'andament da la concurrenza da sport a favur da questa persuna u d'ina terza persuna (manipulaziun indirecta), vegn chastià cun in chasti da detenziun fin 3 onns u cun in chasti pecuniar.

² Tgi ch'exequescha ina funcziun en il rom d'ina concurrenza da sport, a la quala vegnan purschidas scumessas da sport, e pretenda, sa lascha empermetter u accepta in avantatg betg duì per sasez u per ina terza persuna cun l'intenziun da sfalsifitgar questa concurrenza da sport (manipulaziun directa), vegn chastià cun in chasti da detenziun fin 3 onns u cun in chasti pecuniar.

³ En cas grevs è il chastì in chasti da detenziun fin 5 onns u in chasti pecuniar; ensemen cun il chasti da detenziun vegn pronunzià in chasti pecuniar. In cas grev è avant maun en spezial, sch'il delinquent:

a.

agescha sco commember d'ina banda ch'è s'unida cun l'intent da sa deditgar cuntinuadamain a la manipulaziun directa u indirecta da concurrenzas;

b.

fa ina gronda svieuta u in gudogn considerabel cun agir a titel professiunal.

¹ Per l'inquisiziun pon las autoritads da persecuziun penala cumpetentas engaschar l'autoritad interchantunala da surveglianza e d'execuziun tenor l'artitgel 105 da la Lescha da gieus per daners dals 29 da settember 2017⁹ (LGD).

² En cas ch'i vegn suspectada ina manipulaziun d'ina concurrenza da sport, a la quala vegnan purschidas scumessas da sport, infurmescha l'autoritad interchantunala da surveglianza e d'execuziun tenor l'artitgel 105 LGD las autoritads da persecuziun penala cumpetentas e trametta a quellas tut ils documents.

³ L'autoritad interchantunala da surveglianza e d'execuziun designada tenor l'artitgel 105 LGD ha ils suandants dretgs da partida en las proceduras manadas pervia da cuntravenziuns cunter l'artitgel 25a:

a.

far recurs cunter disposiziuns da betg avrir l'inquisiziun penala e cunter disposiziuns da sistida;

b.

far protesta cunter mandats penals;

c.

far appellaziun e far appellaziun adesiva cunter ils aspects penals da sentenzias.

¹ Las autoritads da persecuziun penala e las autoritads giudizialas cumpetentas infurmeschan l'autoritad interchantunala da surveglianza e d'execuziun tenor l'artitgel 105 LGD¹⁰ davart proceduras penalas instradadas pervia da cuntravenziuns tenor l'artitgel 25a sco er davart lur decisiuns.

² Il Cussegl federal fixescha, tge infurmaziuns che vegnan communitgadas.

¹ Il UFSPO ademplescha las incumbensas che resultan per la Confederaziun or da questa lescha, nun che auters servetschs federals s'occupian da quellas.

² Tenor la Lescha federala dals 17 da zercladur 2011¹¹ davart ils sistems d'infurmaziun da la Confederaziun en il champ dal sport è el responsabel per ils sistems d'infurmaziun.

³ El maina la Scola auta federala da sport sco er ils dus centers da curs e da scolaziun a Magglingen ed a Tenero.

⁴ Cun definir l'organisaziun dal UFSPO resguarda il Cussegl federal las incumbensas da la Scola auta federala da sport.

Per ademplir sias incumbensas po la Confederaziun sa participar ad organisaziuns privatas u publicas u instituir organisaziuns spezialas.

¹ Per nominar e per finanziar programs da plirs onns e projects po la Confederaziun far incaricas da prestaziun.

² Sche questa lescha na prevesa nagut auter, sa participeschan chantuns e persunas privatas adequatamain a la finanziaziun. La Confederaziun vul cuntanscher soluziuns colleghialas.

³ L'Assamblea federala permetta l'import maximal dals meds finanzials per plirs onns cun in conclus federal simpel.

⁴ En il rom dals credits deliberads conceda la Confederaziun agids finanzials.

¹ Il UFSPO po furnir prestaziuns commerzialas a persunas u ad organisaziuns che han in interess spezial da sias instituziuns u da ses servetschs, sche quellas:

a.

stattan en in stretg connex cun sias incumbensas principalas;

b.

na pregiuditgeschan betg l'adempliment da las incumbensas principalas; e

c.

na pretendan betg meds materials e persunals supplementars considerabels.

² Il UFSPO sto fixar pretschs confurms al martgà per sias activitads commerzialas e concepir la contabilitad dal manaschi uschia ch'i pon vegnir cumprovads ils custs ed ils retgavs da las singulas activitads. In subvenziunament traversal da las activitads commerzialas n'è betg permess.