1 Influenzas èn contaminaziuns da l'aria, canera, vibraziuns, radiaziuns, contaminaziuns da las auas u autras intervenziuns en auas, contaminaziuns e grevezzas dal terren, midadas dal material genetic d'organissems u midadas da la diversitad biologica che resultan tras la construcziun e tras il manaschi da stabiliments, tras l'applicaziun da substanzas, d'organissems u da ruments u tras la cultivaziun dal terren.9
2 Contaminaziuns da l'aria, canera, vibraziuns e radiaziuns vegnan designadas sco emissiuns, cur ch'ellas sortan dals stabiliments, e sco immissiuns al lieu da lur influenza.
3 Contaminaziuns da l'aria èn midadas dal stadi natiral da l'aria, en spezial tras fim, fulin, pulvra, gas, erosols, vapurs, savurs u chalur persa.10
4 Infrasuns ed ultrasuns han il medem status sco la canera.
4bis Contaminaziuns e grevezzas dal terren èn midadas fisicalas, chemicas e biologicas dal stadi natiral dal terren. Sco terren vala mo la stresa da terra natirala il pli sisum, en la quala pon crescher plantas.11
5 Substanzas èn elements chemics natirals u elements chemics generads tras ina procedura da producziun sco er las cumbinaziuns da tals elements. Il medem status sco questas substanzas han preparaziuns (cumposiziuns, maschaidas, soluziuns) ed objects che cuntegnan talas substanzas.12
5bis Organissems èn unitads biologicas cellularas e betg cellularas ch'èn ablas da sa multiplitgar u da transmetter material genetic. Il medem status sco quests organissems han maschaidas ed objects che cuntegnan talas unitads.13
5ter Organissems modifitgads geneticamain èn organissems, dals quals il material genetic è vegnì modifitgà uschia, sco quai ch'i na resultass mai sut cundiziuns natiralas tras cruschadas u tras recumbinaziuns natiralas.14
5quater Organissems patogens èn organissems che pon chaschunar malsognas.15
6 Ruments èn chaussas moviblas che vegnan bittadas davent dal possessur u che ston vegnir dismessas en l'interess public.16
6bis La dismessa dals ruments cumpiglia lur recicladi u lur deposit sco er ils stgalims preliminars da la rimnada, dal transport, dal deposit temporar e dal tractament. Sco tractament vala mintga midada fisicala, chemica u biologica dals ruments.17
6ter Sco applicaziun vala mintga activitad en connex cun substanzas, cun organissems u cun ruments, en spezial la producziun, l'import, l'export, il metter en circulaziun, l'utilisaziun, il deposit, il transport u la dismessa.18
7 Stabiliments èn edifizis, vias da communicaziun, autras installaziuns fixas sco er midadas dal terren. Il medem status sco stabiliments han apparats, maschinas, vehichels, bastiments ed eromobils.
8 Infurmaziuns davart l'ambient èn infurmaziuns en il sectur da questa lescha ed en il sectur da la legislaziun davart la protecziun da la natira e da la patria, davart la protecziun da la cuntrada, davart la protecziun da las auas, davart la protecziun cunter privels da la natira, davart la conservaziun dal guaud, davart la chatscha, davart la pestga, davart la tecnica genetica sco er davart la protecziun dal clima.19
9 Carburants e combustibels biogens èn carburants e combustibels liquids u da gas che vegnan producids or da biomassa u or d'autras funtaunas d'energia regenerablas.20