1 Il Cussegl federal po scumandar in'organisaziun u ina gruppaziun che propaghescha, sustegna e promova en autra moda directamain u indirectamain activitads terroristicas u l'extremissem violent e periclitescha uschia concretamain la segirezza interna u externa.
2 In scumond sa basa sin in conclus correspundent da las Naziuns Unidas u da l'Organisaziun per la segirezza e la collavuraziun en l'Europa; il Cussegl federal consultescha las cumissiuns ch'èn cumpetentas per la politica da segirezza.
3 In scumond po vegnir pronunzià per maximalmain 5 onns. Sche las premissas èn anc adina ademplidas suenter la scadenza da quest temp, po il scumond vegnir prolungà per maximalmain 5 ulteriurs onns.
4 Tgi che - sin territori svizzer - sa participescha ad ina gruppaziun u ad in'organisaziun ch'è scumandada tenor l'alinea 1, la sustegna persunalmain u materialmain, organisescha per ella u per sias finamiras acziuns da propaganda, recrutescha per ella u promova sias activitads en autra moda e maniera, vegn, nun ch'i vegnian applitgadas disposiziuns penalas pli severas, chastià cun in chasti d'empraschunament fin a 3 onns u cun in chasti pecuniar.
5 Chastiabel è er tgi che commetta il malfatg a l'exteriur, sch'el vegn arrestà en Svizra e sch'el na vegn betg extradì. L'artitgel 7 alineas 4 e 5 CP30 è applitgabel.
6 Las disposiziuns generalas dal Cudesch penal davart la confiscaziun da valurs, en spezial ils artitgels 70 alinea 5 e 72 èn applitgablas.
7 Las autoritads cumpetentas communitgeschan tut las sentenzias, tut las decisiuns penalas e tut ils conclus da sistida immediatamain, gratuitamain e cumplettamain a la procura publica federala, al SIC ed a l'Uffizi federal da polizia.