Rumantsch è ina lingua naziunala, ma ina lingua parzialmain uffiziala da la Confederaziun, numnadamain en la correspundenza cun persunas da lingua rumantscha. La translaziun d'in decret federal serva a l'infurmaziun, n'ha dentant nagina validitad legala.

Ordinaziun
tar la Lescha federala davart la pestga

(OLFP)

dals 24 da november 1993 (versiun dal 1. da schaner 2021)

Il Cussegl federal svizzer,

sa basond sin ils artitgels 4 alineas 1 e 2, 5 alinea 1, 6 alinea 3 e 21 alinea 1 da la Lescha federala dals 21 da zercladur 1991¹ davart la pestga (lescha),
sin l'artitgel 33 da la Lescha federala dals 16 da december 2005² davart la protecziun dals animals,
sin l'artitgel 53 alinea 1 da la Lescha dal 1. da fanadur 1966³ davart epidemias d'animals,
sin l'artitgel 29f alinea 2 literas c e d da la Lescha dals 7 d'october 1983⁴ davart la protecziun da l'ambient,
e sin l'artitgel 47 da la Lescha dals 24 da schaner 1991⁵ davart la protecziun da las auas (LPAuas),
exequind la Convenziun dals 19 da settember 1979⁶ davart la conservaziun da la vita selvadia e da ses spazis da viver natirals en l'Europa (Convenziun da Berna)
e la Convenziun dals 12 d'avrigl 1999⁷ per proteger il Rain,⁸

decretescha:

⁸ Versiun tenor l'agiunta cifra 3 da l'O dals 4 da matg 2011, en vigur dapi il 1. da zer. 2011 (AS 2011 1955).

1. secziun Protecziun ed utilisaziun dals peschs e dals giombers⁹

⁹ Versiun tenor la cifra I da l'O dals 8 da nov. 2000, en vigur dapi il 1. da schan. 2001 (AS 2001 93).

Art. 1 Temps da schanetg

¹ Ils temps da schanetg per ils peschs ed ils giombers menziunads importan almain:

	emnas
litgivas (Salmo trutta, Salmo cenerinus, Salmo marmoratus, Salmo rhodanensis, Salmo labrax)
- en auas currentas ed en stagnaziuns	16
- en auas stagnantas	12
salmelin da lai (Salvelinus umbla)	8
ferra (Coregonus spp.)	6
litschala (Thymallus thymallus)	10
alborella (Alburnus arborella)	4
giombers indigens (Reptantia)	40.¹⁰

² Ils chantuns fixeschan il cumenzament e la fin dal temp da schanetg, uschia ch'el cumpiglia mintgamai la perioda da reproducziun.

³ Els pon prolungar il temp da schanetg e l'extender sin ulteriuras spezias da peschs. Els èn obligads da far quai, sche quai è necessari per mantegnair l'utilisaziun persistenta dals effectivs dals peschs e dals giombers indigens.

⁴ Els reglan il diever da las raits, uschia ch'ins piglia mo il minimum pussaivel da las spezias da peschs schanegiadas.

¹⁰ Versiun tenor la cifra I da l'O dals 22 da mars 2017, en vigur dapi il 1. da matg 2017 (AS 2017 2613).

Art. 2 Mesiras minimalas

¹ Las mesiras minimalas importan per:

	cm
litgivas (Salmo trutta, Salmo cenerinus, Salmo marmoratus, Salmo rhodanensis, Salmo labrax)
- en las auas stagnantas pli grondas sut 800 m.s.m.	35
- en las autras auas	22
salmelin da lai (Salvelinus umbla)	22
ferra (Coregonus spp.)	25
litschala (Thymallus thymallus)	28
giomber nobel (Astacus astacus)	12
giomber a pattas albas (Austropotamobius pallipes)	9
giomber d'aual (Austropotamobius torrentium)	9.¹¹

² Ils peschs vegnan mesirads da sisum il gnif fin tar ils pizs da la nudaglia davos rasada ora natiralmain, ils giombers dal piz dal frunt fin tar la fin da la cua.

³ Per la pestga a rait fixeschan ils chantuns l'avertura da las anzas, uschia che peschs sut la mesira èn ina part uschè pitschna sco pussaivel da la pestga.

⁴ Ils chantuns pon augmentar las mesiras minimalas e las extender sin ulteriuras spezias da peschs e da giombers. Els èn obligads da far quai, sche quai è necessari per mantegnair l'utilisaziun persistenta dals effectivs dals peschs e dals giombers indigens.

¹¹ Versiun tenor la cifra I da l'O dals 22 da mars 2017, en vigur dapi il 1. da matg 2017 (AS 2017 2613).

Art. 2a¹² Scumond da pestga

¹ Ils peschs che figureschan en l'agiunta 1 cun il stadi da periclitaziun 0, 1 u 2 e per ils quals n'existan nagins temps da schanetg u naginas mesiras minimalas tenor ils artitgels 1 u 2 na dastgan betg vegnir pigliads.

² Salmuns (Salmo salar) mess enavos en l'aua u observads cun pestgar a la pertga ston vegnir annunziads immediatamain al servetsch chantunal da pestga.

¹² Integrà tras la cifra I da l'O dals 30 d'avust 2006, en vigur dapi il 1. da schan. 2007 (AS 2006 3951).

Art. 3¹³ Pestgas spezialas

Ils chantuns pon realisar u laschar realisar pestgas spezialas, cunzunt per pestgar avant intervenziuns tecnicas, per cumbatter cunter malsognas, per procurar la frega, per pestgar en auas d'allevament u per far retschertgas da la biologia da pestga. Per quest intent poi vegnir divergià sche necessari dals artitgels 1-2a da questa ordinaziun sco er dals artitgels 23 alinea 1 literas a-d e 100 alinea 2 emprima frasa da l'Ordinaziun dals 23 d'avrigl 2008¹⁴ davart la protecziun dals animals (OPAn).¹⁵

¹³ Versiun tenor la cifra I da l'O dals 30 d'avust 2006, en vigur dapi il 1. da schan. 2007 (AS 2006 3951).

¹⁴ SR 455.1

¹⁵ Versiun da la segunda frasa tenor l'agiunta 6 cifra II 4 da l'O dals 23 d'avr. 2008 davart la protecziun dals animals, en vigur dapi il 1. da schan. 2009 (AS 2008 2985).

Art. 4 Excepziuns generalas dals temps da schanetg e da las mesiras minimalas

Ils chantuns pon reducir u abolir ils temps da schanetg u las mesiras minimalas per in tschert temp e per ina tscherta aua, sche quai è necessari per la biologia da pestga u per l'utilisaziun persistenta dals effectivs.

Art. 5 Mesiras per proteger spezias e razzas periclitadas

¹ Sco spezias e razzas periclitadas (art. 5 al. 1 da la lescha) valan ils peschs ed ils giombers che figureschan en l'agiunta 1 cun il stadi da periclitaziun 1-4.

² Las mesiras per proteger las spezias e las razzas periclitadas (art. 5 al. 2 da la lescha) vegnan realisadas resguardond il stadi da periclitaziun e da protecziun svizzer ed europeic tenor l'agiunta 1 sco er resguardond il gener da la periclitaziun sin plaun local.

Art. 5a¹⁶ Pretensiuns al dretg da pestga

Tgi che vul acquistar in'autorisaziun per pigliar peschs u giombers, sto cumprovar ch'ella u el haja enconuschientschas suffizientas davart ils peschs e davart ils giombers sco er davart ina pestga che correspunda a la protecziun dals animals.

¹⁶ Integrà tras la cifra I da l'O dals 8 da nov. 2000 (AS 2001 93). Versiun tenor la cifra I da l'O dals 30 d'avust 2006, en vigur dapi il 1. da schan. 2009 (AS 2006 3951).

Art. 5b¹⁷ Protecziun dals animals cun pestgar

¹ Divergentamain da l'artitgel 100 alinea 2 emprima frasa OPAn¹⁸ na ston ils suandants peschs ch'èn vegnids pigliads per la consumaziun betg vegnir mazzads immediatamain:

a.: ils peschs che vegnan conservads curtamain da pestgaders professiunals sco er da pestgaders a la pertga che possedan in attest davart las enconuschientschas da la materia tenor l'artitgel 5a; ils peschs na dastgan betg suffrir da la conservaziun;
b.: ils peschs ch'èn vegnids pigliads da pestgaders professiunals, sch'i n'è betg pussaivel d'als mazzar immediatamain pervia da mal'aura u pervia d'ina pestga en massa; tals peschs pon - divergentamain da l'artitgel 23 alinea 1 litera d OPAn - vegnir transportads sin glatsch u en aua da glatsch e ston vegnir mazzads uschè baud sco pussaivel, il pli tard dentant suenter il return en il manaschi.

² Ils peschs ch'èn vegnids pigliads a la pertga e ch'èn destinads per la consumaziun, ma che na correspundan betg a las disposiziuns da schanetg e che vegnan giuditgads sco betg pli abels da viver, ston vegnir mazzads immediatamain e mess enavos en l'aua. Sch'els vegnan giuditgads sco abels da viver, na dastgan els - divergentamain da l'artitgel 100 alinea 2 emprima frasa OPAn - betg vegnir mazzads e ston medemamain vegnir mess enavos immediatamain en l'aua.¹⁹

³ Divergentamain da l'artitgel 23 alinea 1 litera b OPAn pon ils chantuns permetter da duvrar peschs d'estga indigens vivs (agiunta 1) per che pestgaders professiunals sco er pestgaders a la pertga che possedan in attest davart las enconuschientschas da la materia tenor l'artitgel 5a possian pigliar peschs da rapina en auas u parts d'auas, en las qualas ils peschs da rapina na pon betg vegnir pigliads autramain. Ils peschs d'estga vivs dastgan vegnir fixads mo vi da la bucca.²⁰

⁴ Divergentamain da l'artitgel 23 alinea 1 litera c OPAn pon ils chantuns permetter per lais e per lais da fermada che pestgaders professiunals sco er pestgaders a la pertga che possedan in attest davart las enconuschientschas da la materia tenor l'artitgel 5a dovrian crutschs cun cuntracrutschs. En lais e lais da fermada internaziunals sa stentan ils chantuns pertutgads da chattar ina regulaziun concordanta.²¹

¹⁷ Integrà tras la cifra I da l'O dals 8 da nov. 2000 (AS 2001 93). Versiun tenor l'agiunta 6 cifra II 4 da l'O dals 23 d'avr. 2008 davart la protecziun dals animals, en vigur dapi il 1. da schan. 2009 (AS 2008 2985).

¹⁸ SR 455.1

¹⁹ Versiun tenor l'agiunta cifra III 2 da l'O dals 13 da matg 2009, en vigur dapi il 1. da fan. 2009 (AS 2009 2525).

²⁰ Versiun tenor l'agiunta cifra III 2 da l'O dals 13 da matg 2009, en vigur dapi il 1. da fan. 2009 (AS 2009 2525).

²¹ Versiun tenor la cifra I da l'O dals 29 da schan. 2014, en vigur dapi il 1. da mars 2014 (AS 2014 473).

Art. 5c²² Cumbat cunter epidemias d'animals

Ils chantuns procuran ch'i na vegnian betg derasadas epidemias d'animals tras la repopulaziun cun peschs u cun giombers.

²² Integrà tras la cifra I da l'O dals 30 d'avust 2006, en vigur dapi il 1. da schan. 2007 (AS 2006 3951).

Art. 5d²³ Disposiziun penala

Las cuntravenziuns cunter l'artitgel 5b vegnan chastiadas tenor l'artitgel 26 da la Lescha dals 16 da december 2005²⁴ davart la protecziun dals animals.

²³ Integrà tenor l'agiunta 6 cifra II 4 da l'O dals 23 d'avr. 2008 davart la protecziun dals animals, en vigur dapi il 1. da schan. 2009 (AS 2008 2985).

²⁴ SR 455

2. secziun
Permissiun per importar ed introducir peschs e giombers esters

Art. 6 Noziuns

¹ Sco peschs e giombers esters al lieu valan spezias, razzas e varietads che na figureschan betg en l'agiunta 1.

² Sco esters al lieu valan:

a.: peschs e giombers che valan sco extinguids per l'intschess correspundent tenor l'agiunta 1;
b.: peschs e giombers che n'existan betg natiralmain en l'intschess correspundent;
c.: peschs e giombers tenor l'agiunta 1 che n'èn betg suffizientamain parentads geneticamain cun la populaziun da lur lieu d'introducziun.

³ Sco peschs d'aquari valan peschs e giombers che:

a.²⁵: vegnan introducids exclusivamain en aquaris, dals quals l'eventual scul sbucca en ina chanalisaziun colliada cun ina serenera; e
b.: che na vegnan duvrads ni sco peschs d'estga ni sco peschs u giombers da consumaziun.

⁴ Sco puzs valan pitschnas auas artifizialas senza affluent e senza defluent, en las qualas na vegnan betg tegnids peschs u giombers che vegnan duvrads sco peschs d'estga u sco peschs u giombers da consumaziun.²⁶

⁵ Sco introducziun vala mintga apport da peschs e da giombers en auas natiralas u artifizialas, publicas u privatas, inclusiv en stabiliments per l'allevament da peschs, puzs ed aquaris.²⁷

²⁵ Versiun tenor la cifra I da l'O dals 30 d'avust 2006, en vigur dapi il 1. da schan. 2007 (AS 2006 3951).

²⁶ Versiun tenor la cifra I da l'O dals 30 d'avust 2006, en vigur dapi il 1. da schan. 2007 (AS 2006 3951).

²⁷ Integrà tras la cifra I da l'O dals 30 d'avust 2006, en vigur dapi il 1. da schan. 2007 (AS 2006 3951).

Art. 7 Premissas per la permissiun

Las premissas da l'artitgel 6 alinea 2 da la lescha èn per regla ademplidas, sche:

a.: peschs e giombers ch'èn extinguids tenor l'agiunta 1 vegnan puspè introducids en lur intschess e na represchentan nagina periclitaziun per las spezias indigenas;
b.: varietads da peschs e da giombers tenor las agiuntas 1 e 2 vegnan introducidas sco peschs u giombers da consumaziun en stabiliments per l'allevament da peschs ed en stabiliments per tegnair peschs e sche las mesiras necessarias cunter l'evasiun vegnan prendidas;
c.²⁸: peschs esters al lieu che na figureschan betg en l'agiunta 3 vegnan introducids sco peschs da consumaziun en stabiliments serrads per l'allevament da peschs, dals quals l'eventuala deflussiun sbucca en ina chanalisaziun colliada cun ina serenera;
d.²⁹: peschs e giombers esters al lieu che figureschan en l'agiunta 3 vegnan introducids en aquaris per exposiziuns publicas e per zoos ubain per la perscrutaziun; aquaris, dals quals els na pon betg evader en in'autra aua e dals quals l'eventuala deflussiun sbucca en ina chanalisaziun colliada cun ina serenera.

²⁸ Versiun tenor la cifra I da l'O dals 30 d'avust 2006, en vigur dapi il 1. da schan. 2007 (AS 2006 3951).

²⁹ Versiun tenor la cifra I da l'O dals 30 d'avust 2006, en vigur dapi il 1. da schan. 2007 (AS 2006 3951).

Art. 8 Deliberaziun da l'obligaziun da dumandar ina permissiun

¹ Senza permissiun tenor l'artitgel 6 alinea 1 da la lescha dastgan vegnir importads:

a.: peschs e giombers morts;
b.: peschs e giombers da la mar che na pon betg surviver en l'aua dultscha;
c.: peschs per tegnair en puzs e peschs d'aquari che na figureschan betg en l'agiunta 3.³⁰

² Senza permissiun tenor l'artitgel 6 alinea 1 da la lescha dastgan vegnir introducids:³¹

a.: peschs e giombers tenor l'agiunta 1 en auas libras, sche lur lieu d'introducziun sa chatta en il medem intschess sco lur lieu d'origin;
b.: peschs e giombers tenor l'agiunta 1 en stabiliments per l'allevament da peschs ed en stabiliments per tegnair peschs, sche las mesiras necessarias cunter l'evasiun vegnan prendidas;
c.: peschs tenor l'agiunta 2, sche lur lieu d'introducziun sa chatta entaifer il sectur d'introducziun permess e sche las mesiras necessarias cunter l'evasiun vegnan prendidas;
d.³²: peschs che na figureschan betg en l'agiunta 3 en puzs ed en aquaris.

³ En cas tenor l'alinea 2 literas a-c pon ils chantuns decretar prescripziuns davart l'introducziun, sche quai è necessari per mantegnair razzas localas u per mantegnair en moda persistenta l'utilisaziun.

³⁰ Versiun tenor la cifra I da l'O dals 30 d'avust 2006, en vigur dapi il 1. da schan. 2007 (AS 2006 3951).

³¹ Versiun tenor la cifra I da l'O dals 30 d'avust 2006, en vigur dapi il 1. da schan. 2007 (AS 2006 3951).

³² Versiun tenor la cifra I da l'O dals 30 d'avust 2006, en vigur dapi il 1. da schan. 2007 (AS 2006 3951).

Art. 9 Procedura

¹ La permissiun per importar e per introducir spezias, razzas e varietads da peschs e da giombers esters al lieu sa drizza tenor l'artitgel 20 da l'Ordinaziun dals 4 da settember 2013³³ davart il traffic cun spezias d'animals e cun plantas protegidas.³⁴

² Ina permissiun da l'Uffizi federal d'ambient (Uffizi federal) è necessaria per introducir spezias, razzas e varietads da peschs e da giombers esters al lieu.³⁵

³ Las dumondas da permissiun per l'introducziun ston vegnir inoltradas a l'autoritad chantunala cun ina proposta motivada. L'autoritad chantunala la transmetta cun sia posiziun a l'Uffizi federal.

³³ SR 453.0

³⁴ Versiun tenor l'agiunta cifra II 6 da l'O dals 4 da sett. 2013 davart il traffic cun spezias d'animals e da plantas protegidas, en vigur dapi il 1. d'oct. 2013 (AS 2013 3111).

³⁵ Versiun tenor la cifra III da l'O dals 23 d'oct. 2013, en vigur dapi il 1. da schan. 2014 (AS 2013 3709).

2a. secziun³⁶ Cumbat cunter peschs e giombers esters al lieu

³⁶ Integrà tenor l'agiunta 5 cifra 18 da l'O dals 10 da sett. 2008 davart la libra emissiun en l'ambient, en vigur dapi il 1. d'oct. 2008 (AS 2008 4377).

Art. 9a

¹ Ils chantuns prendan mesiras per ch'ils peschs ed ils giombers esters al lieu tenor l'agiunta 3 ch'èn arrivads en las auas na sa derasian betg; uschenavant che pussaivel als allontaneschan els.

² L'Uffizi federal coordinescha questas mesiras sche necessari.

2b. secziun³⁷
Mesiras per proteger ils spazis da viver d'implants existents

³⁷ Integrà tras l'agiunta cifra 3 da l'O dals 4 da matg 2011, en vigur dapi il 1. da zer. 2011 (AS 2011 1955).

Art. 9b Planisaziun da las mesiras tar ovras idraulicas

¹ Ils chantuns planisescha las mesiras tenor l'artitgel 10 da la lescha tenor las prescripziuns da l'artitgel 83b LPAuas.

² Els inoltreschan a l'Uffizi federal ina planisaziun da las mesiras elavuradas tenor ils pass descrits en l'agiunta 4.

³ Ils possessurs da las ovras idraulicas ston permetter a l'autoritad cumpetenta per planisar las mesiras l'access a lur stabiliments e la dar las infurmaziuns necessarias, particularmain davart:

a.: las parts da l'implant che han consequenzas per ils spazis da viver dals animals da l'aua;
b.: il funcziunament dals implants, sch'el ha consequenzas per ils spazis da viver dals animals da l'aua;
c.: las mesiras realisadas e planisadas per proteger ils spazis da viver dals animals da l'aua, inditgond lur efficacitad;
d.: las lavurs architectonicas e funcziunalas previsas per midar l'implant.

Art. 9c Realisaziun da las mesiras tar ovras idraulicas

¹ Sa basond sin la planisaziun ordinescha l'autoritad chantunala las mesiras tenor l'artitgel 10 da la lescha. Ella po obligar ils possessurs d'ovras idraulicas, per las qualas la planisaziun na cuntegna anc naginas indicaziuns suffizientas concernent las mesiras da sanaziun, d'examinar differentas variantas da mesiras da sanaziun per realisar la planisaziun.

² Tar ovras idraulicas, per las qualas las mesiras da sanaziun n'han anc betg pudì vegnir fixadas definitivamain en la planisaziun, taidla l'autoritad l'Uffizi federal avant che decider davart il project da sanaziun. L'Uffizi federal controlla - en vista a la dumonda tenor l'artitgel 30 alinea 1 da l'Ordinaziun d'energia dal 1. da november 2017³⁸ (OEn) - sch'ils criteris tenor l'agiunta 3 cifra 2 OEn èn ademplids.³⁹

³ Sin ordinaziun da l'autoritad controllan ils possessurs da las ovras idraulicas, sche las mesiras prendidas èn efficazias.

⁴ Ils chantuns procuran che las mesiras tenor l'artitgel 10 da la lescha vegnian prendidas fin ils 31 da december 2030.

³⁸ SR 730.01

³⁹ Versiun da la segunda frasa tenor la cifra II 3 da l'agiunta 7 da l'O d'energia dal 1. da nov. 2017, en vigur dapi il 1. da schan. 2018 (AS 2017 6889).

3. secziun Procuraziun da la basa e promoziun

Art. 10 Procuraziun da la basa

¹ Ils chantuns inditgeschan ils trajects da las auas sin lur territori, en ils quals vivan ils peschs ed ils giombers cun in stadi da periclitaziun dad 1-3.

² Fin la fin d'avust dattan els a l'Uffizi federal las indicaziuns davart ils peschs ed ils giombers introducids e pigliads durant l'onn precedent. Els classifitgeschan quellas tenor:

a.: lais ed auas currentas;
b.: spezias da peschs e da giombers;
c.: pestga professiunala e sportiva.

³ Ultra da quai communitgeschan els a l'Uffizi federal ils resultats da lur retschertgas davart la cumposiziun dals effectivs da peschs e da giombers sco er davart lur mesiras tenor l'artitgel 9a.⁴⁰

⁴⁰ Versiun tenor l'agiunta 5 cifra 18 da l'O dals 10 da sett. 2008 davart la libra emissiun en l'ambient, en vigur dapi il 1. d'oct. 2008 (AS 2008 4377).

Art. 11 Retschertgas davart ils effectivs da peschs e da giombers

¹ Avant ch'ils chantuns marcan peschs u giombers a chaschun da retschertgas specificas per la pestga, fan els las suandantas indicaziuns a l'Uffizi federal:

a.: l'intent da la marcaziun;
b.: il gener da la marcaziun;
c.: il dumber dals animals che vegnan marcads;
d.: las designaziuns en cas d'ina marcaziun individuala;
e.: il cumenzament e la durada da la retschertga;
f.: l'organisaziun da l'evaluaziun.

² En enclegientscha cun l'Uffizi federal da segirezza alimentara e fatgs veterinars decretescha l'Uffizi federal directivas davart las metodas da marcaziun che n'èn betg suttamessas a l'obligaziun da dumandar ina permissiun tenor l'artitgel 18 da la Lescha federala dals 16 da december 2005⁴¹ davart la protecziun dals animals.⁴²

³ Apparats electrics da pestgar dastgan vegnir duvrads mo cun current cuntinuà, e l'ondulaziun restanta dastga importar maximalmain 10 pertschient da la media aritmetica da la tensiun.⁴³

⁴¹ SR 455

⁴² Versiun tenor la cifra III da l'O dals 23 d'oct. 2013, en vigur dapi il 1. da schan. 2014 (AS 2013 3709).

⁴³ Versiun tenor la cifra I da l'O dals 22 da mars 2017, en vigur dapi il 1. da matg 2018 (AS 2017 2613).

Art. 12⁴⁴ Agids finanzials

¹ Contribuziuns federalas vegnan concedidas a:

a.: meglieraziuns localas dals spazis da viver da peschs e da giombers;
b.: projects per promover spezias periclitadas da peschs e da giombers;
c.: analisas davart la diversitad da las spezias, davart l'effectiv e davart ils spazis da viver da peschs e da giombers;
d.: l'infurmaziun da l'entira populaziun u d'ina entira regiun linguistica.

² Las tariffas da contribuziun importan maximalmain:

a.: 40 pertschient, sch'i vegnan ademplids ils contracts da pestga internaziunals;
b.: 40 pertschient per projects che pertutgan spezias da peschs e da giombers cun in stadi da periclitaziun da 0 fin 2, che servan a meglierar lur spazi da viver u che han in caracter da pilot;
c.: 25 pertschient per projects che pertutgan spezias da peschs e da giombers cun in stadi da periclitaziun da 3 fin 4 u che servan ad infurmar la populaziun.

³ La Confederaziun na conceda naginas contribuziuns:

a.: per projects che servan en emprima lingia a l'utilisaziun dal dretg da pestga;
b.: sch'in chaschunader sto surpigliar ils custs.

⁴ Las dumondas ston vegnir inoltradas a l'Uffizi federal; ellas ston cuntegnair en spezial las infurmaziuns concernent il gener dal project, l'effect intenziunà, ils custs totals previs, la repartiziun dals custs e la data da la realisaziun. En cas da dumondas da terzas persunas sto vegnir agiuntada ultra da quai la posiziun dal servetsch chantunal da pestga.

⁵ L'Uffizi federal conceda ils agids finanzials.

⁴⁴ Versiun tenor la cifra I 24 da l'O dals 7 da nov. 2007 davart adaptaziuns d'ordinaziuns a la nova concepziun da la gulivaziun da finanzas e da la repartiziun da las incumbensas tranter la Confederaziun ed ils chantuns, en vigur dapi il 1. da schan. 2008 (AS 2007 5823).

4. secziun⁴⁵ Auas internaziunalas

⁴⁵ Integrà tras la cifra I da l'O dals 10 da sett. 1997, en vigur dapi ils 15 da nov. 1997 (AS 1997 2278).

Art. 13 Represchentanza da la Svizra en organs internaziunals

¹ La Svizra è represchentada en ils organs internaziunals che las Cunvegnas davart la pestga en las auas svizras da cunfin tenor l'artitgel 25 da la lescha (Cunvegnas davart la pestga) prevesan, sco suonda:

a.

Lai da Genevra⁴⁶: en la Cumissiun consultativa tras ina persuna nominada da la Confederaziun e tras mintgamai ina persuna nominada dals chantuns Vad, Vallais e Genevra;

b.

Doubs⁴⁷: en la Cumissiun maschadada tras ina persuna nominada da la Confederaziun e tras mintgamai ina persuna nominada dals chantuns Neuchâtel e Giura;

c.

Lai Superiur da Constanza⁴⁸: en la Cumissiun mandataria internaziunala tras ina persuna nominada da la Confederaziun e tras ina persuna nominada da mintgin dals chantuns Son Gagl e Turgovia;

d.

Lai Inferiur da Constanza e Rain da lai⁴⁹:

1.: tras ina persuna nominada da la Confederaziun,
2.: en la Cumissiun da pestga tras ina persuna cumpetenta per la surveglianza chantunala da pestga nominada dal chantun Turgovia sco er tras las ulteriuras persunas tenor il paragraf 33 dal contract;

e.

Rain Aut⁵⁰:

1.: tras ina persuna nominada da la Confederaziun,
2.: en la Cumissiun da pestga per il Rain Aut tras ina persuna nominada da la Confederaziun e tras mintgamai ina persuna nominada dals chantuns Turitg, Basilea-Citad, Basilea-Champagna, Argovia, Schaffusa e Turgovia,
3.: en il Comité da cultivaziun per la pestga en las stagnaziuns tar Rheinau tras ina persuna nominada da mintgin dals chantuns Turitg e Schaffusa;

f.

Lago Maggiore, Lago di Lugano e Tresa⁵¹:

1.: en la Cumissiun da pestga italo-svizra tras ina persuna nominada da la Confederaziun e tras duas persunas nominadas dal chantun Tessin,
2.: en la sutcumissiun tras las persunas nominadas da la persuna che represchenta la Confederaziun.

² Il Departament federal d'ambient, traffic, energia e communicaziun⁵² (Departament) nominescha la persuna che represchenta la Confederaziun e communitgescha la nominaziun a las parts contractantas. La persuna che represchenta la Confederaziun communitgescha a las parts contractantas las persunas ch'èn vegnidas nominadas dals chantuns.

³ La persuna che represchenta la Confederaziun è autorisada da contractar e maina la delegaziun svizra.

⁴ Sch'in conclus d'in organ internaziunal concerna in sectur che pertutga, tenor la lescha, la cumpetenza regulativa dals chantuns, è la persuna che represchenta la Confederaziun liada, a chaschun da la votaziun, ad ina posiziun consensuala da las persunas che represchentan ils chantuns. Sche questas persunas na pon betg s'unir e sch'i dat motivs impurtants, po la persuna che represchenta la Confederaziun decider davart la votaziun.

⁴⁶ Cunvegna dals 20 da nov. 1980 tranter il Cussegl federal svizzer e la Regenza da la Republica franzosa davart la pestga en il Lai da Genevra (SR 0.923.21).

⁴⁷ Cunvegna dals 29 da fan. 1991 tranter il Cussegl federal svizzer e la Regenza da la Republica franzosa davart l'exercizi da la pestga e davart la protecziun dal spazi da viver en l'aua en la part dal Doubs che furma il cunfin tranter ils dus stadis (SR 0.923.22).

⁴⁸ Cunvegna dals 5 da fan. 1893 tranter il Cussegl federal svizzer e las Regenzas da Baden, Baviera, Liechtenstein, Austria-Ungaria e Württemberg concernent l'applicaziun da medemas disposiziuns per la pestga en il Lai da Constanza (Cunvegna da Bregenz, SR 0.923.31).

⁴⁹ Contract dals 2 da nov. 1977 tranter la Confederaziun svizra ed il Pajais da Baden-Württemberg davart la pestga en il Lai Inferiur da Constanza ed en il Rain dal lai (SR 0.923.411).

⁵⁰ Cunvegna dals 18 da matg 1887 tranter la Svizra, Baden ed Alsazia-Lorena davart l'applicaziun da las medemas disposiziuns per la pestga en il Rain ed en ses affluents inclusiv en il Lai da Constanza (Cunvegna da Lucerna, SR 0.923.412); Cunvegna dal 1. da nov. 1957 tranter la Svizra ed il pajais da Baden-Württemberg davart la pestga en las stagnaziuns dal Rain tar l'ovra electrica Rheinau (SR 0.923.413); Contract internaziunal dals 30 da zer. 1885 tranter la Svizra, la Germania ed ils Pajais Bass per reglar la pestga da salmuns en il current dal Rain (SR 0.923.414).

⁵¹ Cunvegna dals 19 da mars 1986 tranter la Confederaziun svizra e la Repubblica taliana davart la pestga en las auas italo-svizras (SR 0.923.51).

⁵² La designaziun da l'unitad administrativa è vegnida adattada, applitgond l'art. 16 al. 3 da l'O dals 17 da nov. 2004 davart las publicaziuns uffizialas (AS 2004 4937).

Art. 14 Approvaziun e decret da disposiziuns

¹ Il Departament è autorisà d'approvar las midadas da las Cunvegnas davart la pestga e da las disposiziuns executivas internaziunalas tar questas Cunvegnas, per quant che quellas cuntegnan regulaziuns da la biologia e da la tecnica da pestga.

² La Confederaziun publitgescha las disposiziuns approvadas tenor l'alinea 1 en la Collecziun uffiziala da las leschas federalas. Il chantun Turgovia publitgescha il Plan da cultivaziun approvà per la pestga en il Lai Inferiur da Constanza ed en il Rain da lai ed il chantun Tessin las Disposiziuns executivas approvadas davart la pestga en il Lago Maggiore, en il Lago di Lugano ed en la Tresa.

³ Il Departament decretescha per il Lai Superiur da Constanza las prescripziuns davart l'applicaziun da las disposiziuns approvadas tenor l'alinea 1.

⁴ Ils chantuns pertutgads decreteschan per il Rain Aut las prescripziuns davart l'applicaziun da las disposiziuns approvadas tenor l'alinea 1.

⁵ Per quant che las Cunvegnas davart la pestga permettan als stadis contractants da decretar prescripziuns pli severas u cumplementaras, èn ils chantuns cumpetents.

Art. 15 Applicaziun da dretg federal

La lescha e questa ordinaziun èn applitgablas, sch'ellas na cuntrafan betg a las Cunvegnas davart la pestga ed a lur disposiziuns executivas.

Art. 16⁵³

⁵³ Abolì tras la cifra II 22 da l'O dals 2 da favr. 2000 tar la LF davart la coordinaziun e la simplificaziun da las proceduras da decisiun, cun effect dapi il 1. da mars 2000 (AS 2000 703).

Art. 17 Disposiziuns penalas

¹ Las cuntravenziuns cunter las prescripziuns da las Cunvegnas davart la pestga e da lur disposiziuns executivas sco er cunter las prescripziuns dal Departament e dals chantuns tenor l'artitgel 14 alineas 3-5 vegnan chastiadas tenor ils artitgels 16-19 da la lescha.

² La persecuziun penala è chaussa dals chantuns.

4a. secziun⁵⁴ Execuziun

⁵⁴ Integrà tras la cifra II 22 da l'O dals 2 da favr. 2000 tar la LF davart la coordinaziun e la simplificaziun da las proceduras da decisiun, en vigur dapi il 1. da mars 2000 (AS 2000 703).

Art. 17a Execuziun tras ils chantuns e tras la Confederaziun⁵⁵

¹ Ils chantuns exequeschan questa ordinaziun e las Cunvegnas davart la pestga, nun che questa ordinaziun surdettia l'execuziun a la Confederaziun.

² Sche autoritads federalas applitgeschan autras leschas federalas ubain cunvegnas u conclus internaziunals che pertutgan objects da questa ordinaziun u da las Cunvegnas davart la pestga, exequeschan ellas er questa ordinaziun u las Cunvegnas davart la pestga. Per la cooperaziun da l'Uffizi federal e dals chantuns vala l'artitgel 21 alinea 4 da la lescha; las obligaziuns legalas da tegnair secret restan resalvadas.

³ Sin proposta dals chantuns resguardan las autoritads federalas las prescripziuns e las mesiras dals chantuns, nun che quai impedeschia u difficulteschia sproporziunadamain d'ademplir las incumbensas da la Confederaziun.

⁴ Sche las autoritads federalas decreteschan ordinaziuns administrativas sco directivas u instrucziuns che pertutgan la pestga, consulteschan ellas l'Uffizi federal.

⁵ Il Departament surveglia l'execuziun da las Cunvegnas davart la pestga.

⁶ L'Uffizi federal prescriva ils models minimals da geodatas e da represchentaziun per las geodatas da basa tenor questa ordinaziun, per ils quals el è designà sco post federal spezialisà en l'agiunta 1 da l'Ordinaziun dals 21 da matg 2008⁵⁶ davart la geoinfurmaziun.⁵⁷

⁵⁵ Integrà tenor l'agiunta cifra 3 da l'O dals 4 da matg 2011, en vigur dapi il 1. da zer. 2011 (AS 2011 1955).

⁵⁶ SR 510.620

⁵⁷ Integrà tras l'agiunta 2 cifra 15 da l'O dals 21 da matg 2008 davart la geoinfurmaziun, en vigur dapi il 1. da fan. 2008 (AS 2008 2809).

Art. 17b⁵⁸ Infurmaziun

¹ L'Uffizi federal infurmescha e publitgescha rapports davart l'impurtanza e davart il stadi da las auas da peschs sco er davart l'explotaziun e davart la periclitaziun dals effectivs da peschs e da giombers, sche quai è d'in interess naziunal. Ils chantuns al mettan a disposiziun las indicaziuns necessarias.

² Ils chantuns infurmeschan davart l'impurtanza e davart il stadi da las auas da peschs en lur territori; els infurmeschan davart las mesiras a favur dals peschs e dals giombers sco er davart l'efficacitad da quellas.

⁵⁸ Integrà tras l'agiunta cifra 3 da l'O dals 4 da matg 2011, en vigur dapi il 1. da zer. 2011 (AS 2011 1955).

5. secziun⁵⁹ Disposiziuns finalas

⁵⁹ Oriundamain 4. secziun.

Art. 18⁶⁰ Aboliziun e midada dal dretg vertent

¹ Abolids vegnan:

a.: l'Ordinaziun dals 8 da december 1975⁶¹ tar la Lescha federala davart la pestga;
b.: l'Ordinaziun dals 27 da settember 1976⁶² concernent l'emissiun da peschs erbivors en las auas svizras;
c.: l'Ordinaziun dal DFI dals 11 da nov. 1976⁶³ concernent il perfecziunament dals pestgaders professiunals;
d.: l'Ordinaziun dal DFI dals 7 da nov. 1977⁶⁴ davart la pestga electrica.

² …⁶⁵

⁶⁰ Oriundamain art. 13.

⁶¹ [AS 1975 2361, 1980 691, 1985 670cifra I 10]

⁶² [AS 1976 1988]

⁶³ [AS 1976 2558]

⁶⁴ [AS 1977 1974, 1980 1010]

⁶⁵ Abolì tras l'agiunta 5 cifra 18 da l'O dals 10 da sett. 2008 davart la libra emissiun en l'ambient, cun effect dapi il 1. d'oct. 2008 (AS 2008 4377).

Art. 19⁶⁶ Entrada en vigur

Questa ordinaziun entra en vigur il 1. da schaner 1994.

⁶⁶ Oriundamain art. 14.

Agiunta 1⁶⁷

⁶⁷ Versiun tenor la cifra I da l'O dals 21 d'oct. 2020, en vigur dapi il 1. da schan. 2021 (AS 2020 4825).

(Art. 2a, 5, 5b, 6-8)

Spezias indigenas da peschs e da giombers

Num rumantsch/local	Num scientific	Intschess natirals^a	Stadi da periclitaziun^b

Acipenseridae:
Sturiun atlantic	Acipenser sturio	Rain Aut	0, S
Anguillidae:
Anguilla	Anguilla anguilla	Rain, Rodan, Doubs, Ticino	1
Blenniidae:
Cagnetta	Salaria fluviatilis	Ticino	3, E
Clupeidae:
Alosa agona	Alosa agone	Ticino	3, E
Alosa	Alosa alosa	Rain Aut	0, E
Alosa faussa	Alosa fallax	Ticino	DI, E
Cobitidae:
Cobite italiano	Cobitis bilineata	Ticino	2
Loscha da flum	Cobitis taenia	Rain	DI, E
Loscha da puz	Misgurnus fossilis	Rain (territori da Basilea)	0, E
Cobite mascherato	Sabanejewia larvata	Ticino	1
Coregonidae:
Ferra (tut las taxas)	Coregonus spp.	specific en mintga lai	4, E
Cottidae:
Rambot	Cottus gobio	Rain, Rodan, Doubs, Ticino, En	4
Cyprinidae:
Brama	Abramis brama	Rain, Rodan, Doubs	BP
Spirlin	Alburnoides bipunctatus	Rain, Rodan, Doubs	3, E
Alvurn	Alburnus alburnus	Rain, Rodan, Doubs	BP
Alborella	Alburnus arborella	Ticino	1, E
Barbun	Barbus barbus	Rain, Rodan, Doubs	4
Barbun chanin	Barbus caninus	Ticino	3
Barbun talian	Barbus plebejus	Ticino	3, E
Blicca	Blicca bjoerkna	Rain	4
Nas	Chondrostoma nasus	Rain	1, E
Nas talian	Chondrostoma soetta	Ticino	1, E
Carpa	Cyprinus carpio	Rain, Rodan, Doubs, Ticino	4
Gobiun	Gobio gobio	Rain, Rodan, Doubs, Ticino	BP
Gobiun dal Danubi	Gobio obtusirostris	Lai da Constanza	DI
Stgiraun	Leucaspius delineatus	Rain	3, E
Alet satigl	Leuciscus leuciscus	Rain, Rodan, Doubs	BP
Nas iberic	Parachondrostoma toxostoma	Doubs	1, E
Sanguinerola italiana	Phoxinus lumaireul	Ticino	3
Frilla	Phoxinus phoxinus	Rain, Rodan, Doubs, En	BP
Amarin	Rhodeus amarus	Rain	2, E
Gobiun talian	Romanogobio benacensis	Ticino	DI
Plotra mediterrana	Rutilus aula	Ticino	1
Plotra taliana	Rutilus pigus	Ticino	1, E
Plotra	Rutilus rutilus	Rain, Rodan, Doubs	BP
Scardun	Scardinius erythrophthalmus	Rain, Rodan, Doubs, En	BP
Scardola italiana	Scardinius hesperidicus	Ticino	3
Alet	Squalius cephalus	Rain, Rodan, Doubs	BP
Cavedano italiano	Squalius squalus	Ticino	3
Striola taliana	Telestes muticellus	Ticino	4, E
Striola	Telestes souffia	Rain, Rodan, Doubs	3, E
Tinca	Tinca tinca	Rain, Rodan, Doubs, Ticino, En	BP
Esocidae:
Glischun cisalpin	Esox cisalpinus	Ticino	DI
Glischun	Esox lucius	Rain, Rodan, Doubs, Ticino, En	BP
Gasterosteidae:
Peschin armà	Gasterosteus gymnurus	Rain (territori da Basilea), Lago Maggiore	4
Gobiidae:
Gobiun da Panizza	Padogobius bonelli	Ticino	2, E
Lotidae:
Lota da flum	Lota lota	Rain, Rodan, Ticino	BP
Nemacheilidae:
Barbet	Barbatula barbatula	Rain, Rodan, Doubs, En	4
Percidae:
Pertga d'aur	Gymnocephalus cernua	Rain, Rodan	BP
Pertga	Perca fluviatilis	Rain, Rodan, Doubs, Ticino, En	BP
Asprun	Zingel asper	Doubs	1, S
Petromyzontidae:
Lampedra da flum	Lampetra fluviatilis	Rain Aut	0, E
Lampedra pitschna	Lampetra planeri	Rain, Doubs	2, E
Piccola lampreda	Lampetra zanandreai	Ticino	1, E
Lampedra da mar	Petromyzon marinus	Rain Aut	0
Salmonidae:
Salmun dal Danubi	Hucho hucho	En	0, E

Litgiva adriatica	Salmo cenerinus	Ticino	1
Litgiva dal Danubi	Salmo labrax	En	1
Litgiva marmorisada	Salmo marmoratus	Ticino	1
Litgiva-zebra	Salmo rhodanensis	Doubs	2
Salmun	Salmo salar	Rain Aut	0, E
Litgiva atlantica
Litgiva d'aual	Salmo trutta	Rain, Rodan, En	4
Litgiva da flum	Salmo trutta	specific en mintga flum	2
Litgiva da lai	Salmo trutta	specific en mintga lai	2
Salmun-litgiva	Salmo trutta	Rain	0
Jaunet	Salvelinus neocomensis	Lai da Neuchâtel	0
Salmelin da las profunditads	Salvelinus profundus	Lai da Constanza	1
Salmelin da lai	Salvelinus umbla	specific en mintga lai	3
Siluridae:
Silur	Silurus glanis	Rain Aut, Aara, Lais al pe dal Giura, Lai da Constanza	BP, E
Thymallidae:
Litschala adriatica	Thymallus aeliani	Ticino	1
Litschala	Thymallus thymallus	Rain, Rodan, Doubs, En	2, E
Astacidae:
Giomber nobel	Astacus astacus	Rain, Rodan, Doubs, En	3, E
Giomber talian	Austropotamobius italicus	Rain, Rodan, Ticino	1
Giomber a pattas albas	Austropotamobius pallipes	Rain, Rodan, Doubs, Ticino	2, E
Giomber d'aual	Austropotamobius torrentium	Rain	2, E
^a Las indicaziuns «Rain», «Rodan», «Doubs», «Ticino» ed «En» cumpiglian mintgamai ils intschess idrologics svizzers da quests flums. Ils intschess da l'Adda e da l'Adisch na vegnan betg menziunads separadamain, els han il medem status sco l'indicaziun «Ticino».
^b Stadi da periclitaziun: 0 = extinguì, 1 = smanatschà d'extincziun, 2 = fermamain periclità, 3 = periclità, 4 = potenzialmain periclità, BP = betg periclità, DI = datas insuffizientas, E = protegì sin plaun europeic tenor la Convenziun da Berna, S = strictamain protegì sin plaun europeic tenor la Convenziun da Berna.

Agiunta 2⁶⁸

⁶⁸ Versiun tenor la cifra II da l'O dals 22 da mars 2017, en vigur dapi il 1. da matg 2017 (AS 2017 2613).

(Art. 7 ed 8)

Peschs, per ils quals croda davent l'obligaziun da dumandar ina permissiun per als emetter entaifer l'intschess permess

Num rumantsch/local	Num scientific	Intschess permess
Litgiva giaglia	Oncorhynchus mykiss	Stabiliments per l'allevament da peschs e per tegnair peschs; lais da muntogna e lais da fermada alpins senza libra migraziun dals peschs en las parts sura e sut da las auas; auas stagnantas artifizialas ch'èn vegnidas etablidas spezialmain per intents da pestga
Salmelin canadais	Salvelinus namaycush	Stabiliments per l'allevament da peschs e per tegnair peschs; lais da muntogna e lais da fermada alpins
Salmelin d'aual	Salvelinus fontinalis	Stabiliments per l'allevament da peschs e per tegnair peschs; auas che n'èn betg adattadas per litgivas d'aual, en las qualas i dat gia salmelins d'aual senza procurar per consequenzas nungiavischadas per la fauna e la flora
Sander	Sander lucioperca	Stabiliments per l'allevament da peschs e per tegnair peschs; auas, en las qualas i dat gia sanders senza procurar per consequenzas nungiavischadas per la fauna e la flora
Koi, carpa a spievel e furmas d'allevament sumegliantas	Cyprinus carpio (furmas d'allevament)	Stabiliments per l'allevament da peschs e per tegnair peschs; pitschnas auas stagnantas artifizialas
Caratscha	Carassius carassius	Stabiliments per l'allevament da peschs e per tegnair peschs; pitschnas auas stagnantas artifizialas
Caratscha d'aur	Carassius auratus	Stabiliments per l'allevament da peschs e per tegnair peschs; pitschnas auas stagnantas artifizialas
Caratscha d'argient	Carassius gibelio	Stabiliments per l'allevament da peschs e per tegnair peschs; pitschnas auas stagnantas artifizialas
Alet gob	Leuciscus idus (furma d'allevament)	Stabiliments per l'allevament da peschs e per tegnair peschs; pitschnas auas stagnantas artifizialas

Agiunta 3⁶⁹

⁶⁹ Versiun tenor la cifra II da l'O dals 22 da mars 2017, en vigur dapi il 1. da matg 2017 (AS 2017 2613).

(Art. 7, 8 e 9a)

Spezias, razzas e varietads da peschs e da giombers, dals quals la preschientscha vala sco midada nungiavischada da la fauna

Num rumantsch/local	Num scientific
Umbra	Umbra spp.
Rasbor zaclin	Pseudorasbora parva
Carpa alva	Ctenopharyngodon idella
Carpa d'argient	Hypophthalmichthys molitrix
Carpa taclada	Aristichthys nobilis
Pesch-giat	Ameiurus spp.
Pertga-sulegl	Lepomis gibbosus
Pertga-litgiva	Micropterus salmoides
Pertga naira	Micropterus dolomieu
Gobiun a bucca naira	Neogobius melanostomus
Gobiun Kessler	Neogobius kessleri
Gobiun da flum	Neogobius fluviatilis
Gobiun currider	Neogobius gymnotrachelus
Gobiun mesaglina	Proterorhinus semilunaris
Giombers senza giomber nobel, giomber a pattas albas e giomber d'aual	Reptantia senza Astacus astacus, Austropotamobius pallipes ed Austropotamobius torrentium

Agiunta 4⁷⁰

⁷⁰ Versiun tenor l'agiunta cifra 3 da l'O dals 4 da matg 2011, en vigur dapi il 1. da zer. 2011 (AS 2011 1955).

Planisaziun e mesiras tar ovras idraulicas existentas

¹ Ils chantuns inoltreschan in rapport intermediar a l'Uffizi federal fin ils 31 da december 2012. Quest rapport cuntegna:

a.: ina glista da las ovras idraulicas existentas e da lur stabiliments accessorics per lung d'auas currentas ch'èn adattads per la prosperitad dals peschs;
b.: indicaziuns davart ils stabiliments che disturban essenzialmain l'ascensiun u la descensiun dals peschs;
c.: indicaziuns davart la necessitad probabla da prender mesiras da sanaziun, sch'ins resguarda las relaziuns natiralas ed eventuals auters interess.

² La planisaziun concludida inoltreschan els a l'Uffizi federal fin ils 31 da december 2014. Ella cuntegna:

a.: ina glista da las ovras idraulicas, da las qualas ils possessurs ston prender mesiras tenor l'artitgel 10 da la lescha, cun indicaziuns davart las mesiras da sanaziun e davart ils termins, entaifer ils quals las mesiras èn previsas e ston vegnir realisadas. Ils termins sa drizzan tenor l'urgenza da la sanaziun;
b.: indicaziuns davart la moda e maniera, co che las mesiras da sanaziun en l'intschess da l'aua pertutgada èn vegnidas coordinadas ina cun l'autra e cun autras mesiras per la protecziun dals biotops natirals e per la protecziun cunter aua gronda;
c.: per ovras idraulicas, tar las qualas las mesiras da sanaziun che ston vegnir prendidas n'han anc betg pudì vegnir fixadas definitivamain pervia da relaziuns spezialas: in termin, entaifer il qual il chantun vegn a fixar, sche ed eventualmain tge mesiras da sanaziun ch'èn previsas e che ston vegnir realisadas fin cura. Relaziuns spezialas datti cunzunt, sche pliras ovras idraulicas chaschunan ina pregiudicaziun essenziala en il medem intschess e sche las parts da la pregiudicaziun essenziala na pon anc betg vegnir attribuidas a las singulas ovras idraulicas.

Ordinaziun tar la Lescha federala davart la pestga

(OLFP)

Ordinaziun
tar la Lescha federala davart la pestga