1 Il Cussegl federal creescha in register per denominaziuns d'origin e per indicaziuns geograficas.
2 El regla en spezial:
- a.
- il dretg da s'inscriver;
- b.
- las premissas per la registraziun, particularmain las pretensiuns dal carnet d'obligaziuns;
- c.
- las proceduras da registraziun e da protesta;
- d.
- la controlla.
2bis En il register pon vegnir inscrittas denominaziuns d'origin ed indicaziuns geograficas svizras ed estras.35
3 Denominaziuns d'origin u indicaziuns geograficas inscrittas na pon betg daventar denominaziuns genericas. Denominaziuns genericas na dastgan betg vegnir inscrittas sco denominaziuns d'origin u indicaziuns geograficas.
4 Sch'in num d'in chantun u d'in lieu vegn duvrà en ina denominaziun d'origin u en ina indicaziun geografica, stoi vegnir garantì che la registraziun correspunda ad in'eventuala regulaziun chantunala.
5 Denominaziuns d'origin ed indicaziuns geograficas inscrittas na dastgan betg vegnir registradas sco marca per products, sch'in causal da l'alinea 7 è etablì.36
5bis Sch'ina marca, che cuntegna ina denominaziun d'origin u ina indicaziun geografica ch'è identica cun ina denominaziun d'origin u cun ina indicaziun geografica annunziada u ch'è sumeglianta a tala, vegn depositada per rauba identica u cumparegliabla, vegn sistida la procedura d'examinaziun da la marca, fin che la decisiun legalmain valaivla davart la dumonda d'inscriver la denominaziun d'origin u ina indicaziun geografica è avant maun.37
6 Tgi che dovra ils nums d'ina denominaziun d'origin u d'ina indicaziun geografica inscritta per ils medems u per sumegliants products agriculs ubain per products agriculs elavurads sto ademplir il carnet d'obligaziuns tenor l'alinea 2 litera b. Questa obligaziun na vala betg per il diever da marcas ch'èn identicas u sumegliantas ad ina denominaziun d'origin u ad ina indicaziun geografica inscritta en il register e ch'è vegnida depositada u inscritta da buna fai u acquistada tras in diever da buna fai:
- a.
- avant il 1. da schaner 1996; u
- b.
- avant che la denominaziun d'origin u l'indicaziun geografica inscritta è vegnida protegida tenor questa lescha u sin fundament d'ina autra basa legala, sch'en la Lescha dals 28 d'avust 199238 davart la protecziun da las marcas i n'èn betg avant maun motivs per la nullitad u per la scadenza da la marca.39
6bis Cun giuditgar, sch'il diever d'ina marca acquistada da buna fai tenor l'alinea 6 è confurma al dretg, stoi vegnir resguardà en spezial, sch'igl exista in privel d'engion u ina cuntravenziun cunter la concurrenza loiala.40
7 Denominaziuns d'origin ed indicaziuns geograficas inscrittas èn en spezial protegidas cunter:
- a.
- mintga diever commerzial per auters products che profitan da la reputaziun da denominaziuns protegidas;
- b.
- mintga appropriaziun, falsificaziun u imitaziun.