Questa lescha ha l'intent da promover la transparenza davart l'incarica, davart l'organisaziun e davart l'activitad da l'administraziun. Per quest intent gida ella ad infurmar la publicitad cun al garantir l'access als documents uffizials.

¹ Questa lescha vala per:

a.

l'administraziun federala;

b.

las organisaziuns e las persunas da dretg public e privat externas a l'administraziun federala, uschenavant ch'ellas relaschan actas u prendan disposiziuns d'emprima instanza en il senn da l'artitgel 5 da la Lescha federala dals 20 da december 1968³ davart la procedura administrativa (PA);

c.

ils Servetschs dal parlament.

² Questa lescha na vala betg per la Banca naziunala svizra e per l'Autoritad federala per la surveglianza dals martgads da finanzas.⁴

³ Il Cussegl federal po excluder dal champ d'applicaziun da la lescha ulteriuras unitads da l'administraziun federala sco er ulteriuras organisaziuns e persunas externas a l'administraziun federala, sche:

a.

quai è necessari per ademplir las incumbensas che las èn vegnidas surdadas;

b.

i vegniss fatg donn a lur cumpetitivitad tras la submissiun a questa lescha;

c.

las incumbensas che las èn vegnidas surdadas èn da pitschna impurtanza.

¹ Questa lescha na vala betg per:

a.

l'access a documents uffizials concernent las proceduras:

1.

civila,

2.

penala,

3.

da l'agid internaziunal giuridic ed uffizial,

4.

internaziunalas per reglar dispitas,

5.

da la giurisdicziun statala ed administrativa u

6.

da cumpromiss;

b.

il dretg d'ina partida da consultar las actas d'ina procedura administrativa d'emprima instanza.

² L'access als documents uffizials che cuntegnan datas persunalas dal petent sa drizza tenor la Lescha federala dals 19 da zercladur 1992⁵ davart la protecziun da datas.

Resalvadas restan las disposiziuns spezialas d'ulteriuras leschas federalas:

a.

che decleran tschertas infurmaziuns sco secretas; u

b.

che prevesan premissas che divergeschan da quellas previsas en questa lescha per l'access a tschertas infurmaziuns.

¹ Sco document uffizial chapeschan ins mintga infurmaziun:

a.

ch'è registrada sin tge purtader d'infurmaziuns ch'i saja;

b.

ch'è en possess da l'autoritad, da la quala ella deriva u a la quala ella è vegnida communitgada; e

c.

che concerna l'adempliment d'ina incumbensa publica.

² Sco documents uffizials vegnan considerads er ils documents che pon vegnir producids cun agid d'in tractament electronic simpel sin basa d'infurmaziuns registradas che satisfan a las pretensiuns tenor l'alinea 1 literas b e c.

³ Betg sco documents uffizials vegnan considerads ils documents:

a.

che vegnan utilisads d'ina autoritad per intents commerzials;

b.

dals quals il tractament n'è betg terminà; u

c.

ch'èn destinads ad in diever persunal.

¹ Mintga persuna ha il dretg da consultar ils documents uffizials e da survegnir infurmaziuns da vart da las autoritads areguard il cuntegn dals documents uffizials.

² Ella po consultar ils documents al lieu ubain dumandar ina copia. La legislaziun davart il dretg d'autur resta resalvada.

³ Sch'in document uffizial è vegnì publitgà en in organ da publicaziun u sin ina pagina d'internet da la Confederaziun, vegn considerà il dretg tenor ils alineas 1 e 2 sco ademplì.

¹ Il dretg d'access als documents uffizials vegn limità, suspendì u refusà, sch'el po:

a.

pregiuditgar considerablamain la libra furmaziun da l'opiniun e da la voluntad d'ina autoritad suttamessa a questa lescha, d'in auter organ legislativ u administrativ u d'ina instanza giudiziala;

b.

disturbar l'execuziun tenor las finamiras da mesiras concretas tras ina autoritad;

c.

periclitar la segirezza interna u externa da la Svizra;

d.

cumprometter ils interess da la politica exteriura u las relaziuns internaziunalas da la Svizra;

e.

cumprometter las relaziuns tranter la Confederaziun ed ils chantuns u tranter ils chantuns;

f.

periclitar ils interess da la politica economica u monetara da la Svizra;

g.

svelar secrets da professiun, da fatschenta u da fabricaziun;

h.

divulgar infurmaziuns ch'èn vegnidas communitgadas voluntarmain da terzas persunas ad in'autoritad che aveva garantì da las tegnair secret.

² Il dretg d'access als documents uffizials vegn limità, suspendì u refusà, sch'el po pregiuditgar la sfera privata da terzas persunas; excepziunalmain po dentant prevalair l'interess public a l'access.

¹ I n'exista nagin dretg d'access als documents uffizials da la procedura da cunrapport.

² Ils documents uffizials dastgan vegnir rendids accessibels pir cur che la decisiun politica u administrativa, per la quala els èn la basa, è vegnida prendida.

³ Il Cussegl federal po decider excepziunalmain che documents uffizials da la consultaziun dals uffizis na vegnan betg rendids accessibels er suenter la decisiun.

⁴ L'access als documents uffizials concernent posiziuns relativas a tractativas currentas e futuras è en mintga cas exclus.

⁵ L'access als rapports davart l'evaluaziun da la capacitad da prestaziun da l'administraziun federala e davart l'efficacitad da sias mesiras è garantì.

¹ Ils documents uffizials che cuntegnan datas da persunas ston, sche pussaivel, vegnir anonimisads avant che vegnir consultads.

² Sche las dumondas d'access concernan documents uffizials che na pon betg vegnir anonimisads, vegn applitgà l'artitgel 19 da la Lescha federala davart la protecziun da datas⁶. La procedura d'access sa drizza tenor la lescha qua avant maun.

¹ La dumonda d'access als documents uffizials sto vegnir drizzada a l'autoritad che ha fatg il document u che l'ha survegnì sco adressata principala da terzas persunas che na suttastattan betg a questa lescha.

² Il Cussegl federal po prevair ina procedura speziala per l'access als documents uffizials da las represchentanzas svizras a l'exteriur e da las missiuns tar organisaziuns internaziunalas.

³ La dumonda sto esser formulada en moda suffizientamain clera.

⁴ Il Cussegl federal regla ils detagls da la procedura:

a.

el resguarda ils basegns spezials da las medias;

b.

el po prevair autras modalitads d'access, nua ch'in grond dumber da dumondas sa referescha als medems documents;

c.

el po prolungar ils termins da tractament per dumondas che pretendan in tractament che chaschuna ina lavur spezialmain gronda.

¹ Sche la dumonda d'access concerna documents uffizials che cuntegnan datas da persunas e sche l'autoritad prevesa da conceder l'access, consultescha ella la persuna pertutgada e la dat l'occasiun da prender posiziun entaifer 10 dis.

² L'autoritad infurmescha la persuna consultada davart sia posiziun pertutgant la dumonda d'access.

¹ L'autoritad prenda posiziun uschè svelt sco pussaivel, en mintga cas dentant entaifer 20 dis suenter avair retschavì la dumonda.

² Il termin po vegnir prolungà excepziunalmain per 20 dis, sche la dumonda concerna documents voluminus, cumplexs u grev da procurar. El vegn prolungà per la durada necessaria, sche la dumonda concerna documents uffizials che cuntegnan datas da persunas.

³ Sche la dumonda concerna documents uffizials che cuntegnan datas da persunas, suspenda l'autoritad l'access fin che la situaziun giuridica è sclerida.

⁴ L'autoritad infurmescha ils petents, sch'il termin vegn prolungà u sche l'access vegn limità u refusà ed inditgescha summaricamain ils motivs persuenter. L'infurmaziun e la motivaziun, sche l'access vegn limità u refusà, vegnan fatgas en scrit.

¹ Ina dumonda da mediaziun po far mintga persuna:

a.

da la quala l'access a documents uffizials vegn limità, suspendì u refusà;

b.

davart la dumonda da la quala l'autoritad n'ha betg prendì posiziun entaifer il termin; u

c.

ch'è vegnida consultada tenor l'artitgel 11, sche l'autoritad vul conceder l'access cunter sia voluntad.

² La dumonda da mediaziun sto vegnir fatga en scrit a l'incumbensà federal per la protecziun da datas e per la transparenza entaifer 20 dis suenter avair retschavì la posiziun da l'autoritad u suenter la scadenza dal termin che stat a disposiziun a l'autoritad per prender posiziun.

³ Sch'ina mediaziun reussescha, è la procedura liquidada.

Sche la mediaziun na reussescha betg, consegna l'incumbensà federal per la protecziun da datas e per la transparenza, entaifer 30 dis suenter avair retschavì la dumonda da mediaziun, ina decleraziun en scrit a las persunas participadas.

¹ Il petent u la persuna consultada po pretender, entaifer 10 dis suenter avair retschavì la recumandaziun, ch'i vegnia relaschada ina disposiziun tenor l'artitgel 5 da la Lescha federala dals 20 da december 1968⁷ davart la procedura administrativa.

² Dal rest relascha l'autoritad ina disposiziun, sch'ella - divergentamain da la recumandaziun:

a.

vul limitar, suspender u refusar il dretg d'access ad in document uffizial;

b.

vul conceder l'access ad in document uffizial che cuntegna datas da persunas.

³ La disposiziun sto vegnir relaschada entaifer 20 dis suenter avair retschavì la recumandaziun u la dumonda da decisiun tenor l'alinea 1.

¹ La procedura da recurs sa drizza tenor las disposiziuns generalas davart l'organisaziun giudiziala.

² Las autoritads da recurs han er access als documents uffizials ch'èn suttamess a l'obligaziun da tegnair secret.

¹ L'access als documents uffizials è per regla suttamess al pajament d'ina taxa.⁹

² I na vegnan betg incassadas taxas per:

a.

il tractament d'ina dumonda che pretenda pauca lavur;

b.

proceduras da mediaziun (art. 13); e

c.

proceduras da decisiun (art. 15).

³ Il Cussegl federal fixescha ils detagls e la tariffa da taxas tenor ils custs effectivs. Resalvadas restan las regulaziuns da taxas divergentas sin fundament da legislaziuns spezialas.

⁴ Per consegnar rapports, broschuras u auters stampats e purtaders d'infurmaziuns po en mintga cas vegnir incassada ina taxa.

Tenor la lescha qua avant maun ha l'Incumbensà federal per la protecziun da datas e per la transparenza (incumbensà) tenor l'artitgel 26 da la Lescha federala davart la protecziun da datas¹⁰ en spezial las suandantas incumbensas e cumpetenzas:

a.

el maina la procedura da mediaziun (art. 13) e fa la recumandaziun, sch'ina mediaziun na reussescha betg (art. 14);

b.

infurmescha d'uffizi u sin dumonda da persunas privatas e d'autoritads davart las modalitads da l'access als documents uffizials;

c.

s'exprima davart ils sbozs dals relaschs e davart las mesiras da la Confederaziun che concernan considerablamain il princip da transparenza.

¹ L'incumbensà evaluescha l'applicaziun, l'efficacitad ed en spezial ils custs che vegnan chaschunads da l'execuziun da questa lescha e fa regularmain in rapport per mauns dal Cussegl federal.

² In emprim rapport davart ils custs che resultan da l'execuziun da questa lescha sto vegnir suttamess al Cussegl federal entaifer 3 onns suenter l'entrada en vigur da questa lescha.

³ Ils rapports da l'incumbensà vegnan publitgads.

¹ En il rom da la procedura da mediaziun ha l'incumbensà er access als documents uffizials ch'èn suttamess a l'obligaziun da tegnair secret.

² L'incumbensà e ses secretariat èn suttamess al secret d'uffizi en la medema dimensiun sco las autoritads, da las qualas els consulteschan ils documents uffizials u survegnan infurmaziuns.

Il Cussegl federal po en spezial relaschar disposiziuns davart:

a.

la gestiun dals documents uffizials;

b.

l'infurmaziun davart ils documents uffizials;

c.

la publicaziun dals documents uffizials.

La midada dal dretg vertent vegn reglada en l'agiunta.

Questa lescha vegn applitgada per ils documents uffizials ch'èn vegnids fatgs u retschavids d'ina autoritad suenter ch'ella è entrada en vigur.

¹ Questa lescha è suttamessa al referendum facultativ.

² Il Cussegl federal fixescha l'entrada en vigur.

Data da l'entrada en vigur: 1. da fanadur 2006¹¹